Luke 6
6
1Ubuk hnup hnupaka Boiyesuq loeq yaq ta'paiq haqkhoeq Zungtau phlaiq uk loeq án ciq tuna ta'paiq haqloeq Zungmci haq louq uk loeq án nei. 2Yaqkhowa Phariqsae haqloeq Boiyesuqa nanghniq loeq ubuk hnupa sai dataq pu khoeq piya án sai laq oe? taeng án hau. 3Boiyesuq loeqkhaw hnyangphalang Dawoeiq loeq yaq ta'paiq haq buq loeq án boeiqi kho wa yaq loeq pi a'sai yoe nakkhoeq phawtphuwaq tuk moe? 4Yaqkhoeq Boipaw ima won loeqteq Yahaenpaw haqloeq noeng án ei laq khoeq muq yaq loeq louq loeqteq a'ei khoeq tanaq yaq ta'paiq haqla khaw a'paek haqbeq taeng hau loeqteq a'la kicaq Boi loeq 5khlaungcaw ka'phlaet khoeq kei khoeq ubuk hnup Boi ka'phlaet taeng a'hau haq.
Boiyesuq loeq sa'tong kut paukak a'du khoeq khlaung poemaka a'mboei paek khoeq klong 6A'coe ubuk hnupoeng Boi khoeq ta'lazalaiq ya a'mcok hau haq tuna sa'tong kut a'du khoeq khlaung poemak a'moeiq. 7Yaq tuna Phariqsae loeq klam hmotsaw haqloeq Boiyesuqa ubuk hnupa hmat amniqa khoeq amboei loeq a'plaet án suiyai tawiq ya a'phaela án cawnauk. 8Seiloeqkhaw yaqhniq loeq pi khoeq a'nmkhinoe nakkhoeq Boiyesuq loeq nana a'nhmot klongoeng yaq a'kut pawi yaqkhoeqa awlum hmaungkauma thowi taeng a'hau loeq yaq khlaung khaw án gung duna khoeq a'thoq. 9Yaqkiyoeng Boiyesuq loeq nanghniqa keiloeq kamhniq haq hmai. Nei khakhut ubuk hnupa a'pawi ma'sai laqai moe? Seiyaqloeq pawi yaq khoeq ma'sai laqai moe? Hmata ma'klawn laqai moe? ma'tuk laqai moe? taeng a'hiq haq kiyoeng 10a'phaela khoeq khlaung haq cawnaw haqloeq teq sa'tong kut a'du khoeq khlaunga na'kut hmyaniye taeng a'hau loeq yaq khlaung loeqkhaw a'kut a'hmani loeq yaq khlaung kut a'pawi ba. 11Yaqkhowa Phariqsae loeq klamhmotsaw haqkhoeq nana ánsaw hlok uk loeqteq Boiyesuqa kha án sai laqai yoe? nakkhoeq poemak loeq poemak án toengbang.
Boiyesuq loeq ta'paiq hng'laihneiqa a'haeq khoeq klong 12Hnupakteq Boiyesuq khoeq Boipaw a suq a'tongi yai khoeq tonghawn dunaka cit loeqteq suq a'tongi kiyoeng yaq tonga yanblaiq a'om. 13Kho a'wa loeq yaq ta'paiq haqla mcup haq poeiq loeqteq yaqhniq haq tau wa ta'paiq ha'laihneiq a'haeq haq. 14Yaqhniq haqteq, Petaruq taeng Boi loeq a'ming a'paek khoeq Siqmou loeq yaq a'nau Eoeidare, Yakouq, Yawhan, Philapuq, Batawlamae, 15Matae, Tawmat, Alaphae caw Yakouq, a'myoe khaekisaw taeng a'nbaeki khoeq Siqmou, 16Yakoukcaw Yudaq loeq a'hnuwa Boiyesuqa a'yeiqai khoeq Yudaqsakayouq tiq haq a'nphlaet.
A'mcok hau haq khoeqloeq ta'hlai a'sai haqkhoeq 17Yaqkiyoeng Boiyesuq khoeq yaq tapaiq haqloeng tonghawna khoeq a'daunga ánkom. Yaq duna ta'paiq haqdoe Yudaq plei, Yeruqsalein mloeq, Turuq loeq Ziqdou mlaetbaenga a'nmoeiq khoeq mloeq haqla khoeq khlaung haqkhaw yaqduna án phaw. 18Yaqhniq khoeq Boiyesuq loeq amcokhau khoeq a'nkhomloukiyai tawiq ya loeq yaqhniq mniq haq a'boei ba lai tawiq ya a'nlo khoeq a'phlaet. Sa'simangca loeq a'manicaw haqkhaw a'pawicai poeiqba. 19Boiyesuqa a'mniq amboeinoen khoeq a'tat haq sot loeqteq khlaung haq awlum a khoeq a'nmniq haq a'boei nauk klongoeng khlaung ta'kum khoeq Boiyesuqa a'nmhlaemai a'nsai.
A'oeqcaq khoeq khlaung haq 20Yaqkiyoeng Boiyesuq loeq ta'paiq haq pa'toeng hei loeq a'hau khoeqteq, khlaung soenglai haqkhoeq án oeqcaq. Piyawoe naka Boipaw khomcaeng khoeq yaqhniq taw a'phlaet. 21Towa ei-ok loeq a'mboeiqi haqkhoeq án oeqcaq. Piyawoe naka yaqhniq loeq ngawq oeng án ei laqi khoeq khing a'pawai. Towa án kaqlaq saw haqkhoeq án oeqcaq. Piyawoe naka yaqhniq án mnuiq laq khoeq khing a'phawai. 22A'coe khlaung haqloeq nanghniqa khlaungcaw klongoeng a'nmuni haq nak loeq pak seisei, a'mphaen na'nlaqi nak loeq pak seisei, na'sali a'khlaqi uk loeqteq laenglaeng caengcaeng a'hau na'nlaqi nak loeq pak seisei nanghniq khoeq nán oeqcaq. 23Yaqkha haq a'phlaet nak loeq oeqcaq tuk loeqteq lawm boei tuk. Pi klongoeng naka Boipaw omdun a'phlaet khoeq mehona suqlaen na'nlaqi ba lai. A'hyoema khaw yaqhniq hampaw haq loeqkhaw Pa'rawphaeq haqla yaq khakhut a'nsai klongoeng a'phlaet.
Oeqcaqaq khoeq khlaung haq 24Seiloeqkhaw sa'thi haqloe, nanghniq haqkhoeq towa a'lawicawa na'nom laq klongoeng nanghniq tawiq ya teq nana a'kaukai. 25Towa ngawqong ei laqsaw haqkhoeq oeqcaqaq uk. Piyawoe naka nanghniq khoeq a'boeqi haq khoeq khing a'phaw bahmai. Tawa mnuiqlaqsaw haqkhoeq oeqcaqaq uk. Piyawoe naka nanghniq hma án kaqlaqai khoeq khing a'phaw hmai. 26Khlaung ta'kum loeq nanghniqa a'hmlokthaq haq nak loeq nanghniq khoeq oeqcaqaq tuk. Piyawoe naka yaqhniq hampaw haqkhaw a'long a'nsongi khoeq Pa'rawpaeq haq a'nphlaet klongoeng a'phlaet.
A'mseinauk sawa khaeki boei 27Seiloeqkhaw towa kei plau hnyin saw nanghniqa ka'mhau haqlai. Nanghniqa amsei nauk khoeq haqla khaeki boei tuk. A'muinsaw haqla a'pawi sai paek boei tuk. 28Nanghniqa amsamisaw haqla pa'si paek boei tuk. Nanhniqa amyukai nauk khoeq haqla khaw suq tongi paek boei tuk. 29Hmat poemak loeq nang na'baeng phakaka amsouq nak loeq a'la phakak khaw hlengi paek boei. Hmat loeq nang angki amhiqi nankloeq lawpak paek boei. 30Nang hma khoeq uwaq a'mhiqi khoeq khlaung haqla paek haq boei. Hmat loeq nang wawnthaung a'louki nak loeq yaqhma khoeq hiqi ba lai tiq. 31Nanga khlaung loeq ampawi nauk waiq khakhut nang loeqkhaw khlaunga pawi nauk boei. 32Nanga amkhaekisawa noeng na'khaeki yai nak loeq Boipaw loeq yaqa kha a'hmoi a'louqi nauk hmai yoe? Khlaungsei haqkhaw yaqhniqa khaekisawa noeng a'nkhaeki theiq 33Nanga a'mpawi nanksawa noeng nang loeq na'pawi naukai naka Boipaw hma khoeq Suq na'laqi yai moeiq yaq. Khlaungsei haq loeqkhaw yaq khakhut a'nsai theiq. 34Nanghniqa lei amsap haq balai taeng hmyawyi tuk loeqteq noeng na'puwai nanka nanghniq loeq Boipaw hma khoeq pa'si kha na'nlaqiyai yoe? Khlaungsei haq loeqkhaw yaqkha a'nlaqi ba lai tawiq ya poemk loeq poemk a'npuhiqi theiq. Nanga Boipaw loeq amhmyaensi khakhat khlaung haqla khaw hmyaensi mlung tawyi boei tuk. 35Nanghniq loq khlaungsei haqla khaeki tuk loeqteq yaqhniqa a'pawi khoeqhaq sai boei tuk. Uwak ka'nlaqi ba lai taeng mkhini tuk loeqteq mpuwai tuk. Boipaw loeq pawi yaq khoeq khlaung loeq kyezu hmotaq khoeq khlaung haqla khaw a'khaeki haq klongoeng nanghniq loeq yaqkha na'nsai nak loeq nanghniq na'nlaqi ba lai khoeq suqteq nana laen loeqteq a'pawicai khoeq Boipawcaw haq na'nphlaetai. 36Nanghniq Boipaw khoeq a'khaeki a'laen klongoeng nanghniq loeqkhaw klaunga khaeki boei tuk.
A'coe khlaunga ciyangai tiq 37A'coe khlaung haqla khaw caetcawq haqlai tiq, yaqnakanoeng Boipaw loeqkhaw nanghniqa amcaetcawq haqhlaq. Khlaung haqla khauk ong saiyai tuk, yaqnaka noeng Boipaw loeqkhaw nanghniqa khauk ong amsai haqhlaq. A'coe khlaung haqla khwai nhloeq boei tuk, yaqnakanoeng Boipaw loeqkhaw nanghniqa khwai amhloeq haqlai. 38Khlaung haqla paeksot boei tuk. Nanghniq loeq na'paeksot nak loeq nanghniq khaw a'paeksot na'laqi yai taeng a'hau haq. Nanghniq khi duka amthoen paek haqlai. Nang loeq a'coe khlaung haqla na'paeksot khut Boipaw loeqkhaw nanga ampaeksot ba lai taeng a'hau haq. 39Yaqkiyoeng Boiyesuq loeq yaq khlaung haqla pung pungak amthumi nauk haqkhoeq teq a'mik mu poeak loeq a'coe a'mikmuwa lawm amphlaq theiqai moe? Yaqhniq poemhneiq doen hnglong soka a'nklawqtheiq ai seiyaq moe? 40Ta'paiq khoeq sa'la thauka a'ta nank khoeq moeiq yaq. Seiloeqkhaw yaqhniqa a'pawilanga ma'cok paekai naka sa'la khakhut phlaetai. 41Nang loeq nang na'mika thingtum hyawqbaung a'moeiq khoeq hmuqi ta'ong, na'yapui mika a'moeiq khoeq a'hmucaw noeng piya na'hmuqoe? 42Nangmika thingtum hyawqbong a'moeiq khoeq a'hmun hmuyi ta'ong nán yapui mika a'moeiq khoeq a'hmun kamlouq pakai taeng kha na'hau theiq oe? Khlaungpawilong songi saw haqloe, nang nán mika thingtum hyawqbong a'moeiq khoeq a'hmun a'yang louki hme. Yaqnakanoe na'yapui mika a'moeiq khoeq a'hmun kha na'louq laqai yoe nakkhoeq na'hmawtai.
A'thing loeq a'thaiq 43Thing pawi ya pawi yaq khoeq thaiq thaiqaq khakhut pawi yaq khoeq thinga khaw a'pawi khoeq thaiq theiq yaq. 44A'thaiq so pu loeq thing klong ma'hau noeng. Hling puma khoeq paipethai msiq tuk loeq laqaq tuk khakhut hling puma khoeqkhaw ca'byeiq thaiq msiq tuk loeq laqaq tuk. 45A'pawi khoeq khlaung loeq yaq mlung duka khoeq a'pawi khoeqhaq noeng amsoq theiq. Pawi yaq khoeq khlaung loeqkhaw yaq mlung duka khoeq pawiqyaq khoeq noeng amsoq theiq. Nanghniq plau woeng nanghniq mlungko khoeq a'pau hni.
Imsauksaw poemhneiq 46Nanghniq loeq kei plau hnyini ta'ong keiya Boi yoe Boi yoe taeng a'mbaeki haq lo? 47Keihma lo uk loeqteq kei plau hnyinisaw haqkhoeq a'ni na'laukiyoe? nakkhoeq keiloeq kamhau haqlai. 48Yaq khlaung khoeq daek amthuka coq loeqteq lung haqloeng ouqmyeit khlawq loeqteq imsauksaw a'lauki. Tui a'laen kho wa yaq im khoeq a'pawilanga a'sauk klongoeng caqi ta'ong a'cangkaunga a'om. 49Seiloeqkhaw kei plau yaw loeqteq hmyiyaq khoeq khlaung khoeq oukmyeit khlawq ta'ong seitauwa im sauk saw a'louki. Yawqaw loeqteq tui a'laen nak loeq yaq im khoeq saksang kluq loeqteq a'phaeti poeiq yai taeng a'hau.
S'ha seleccionat:
Luke 6: ctpv-rv
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.