Luke 4
4
1Jnkhaw vjyawng 'Boipaw Yesyuq' khrawng cimkya tiq muikhraw vj kxmyom theqna 'Yawden' let tj kxq a'lo ba khaw vj cimkya ti muikhraw na a'dawn khrawng baw tjunu khocxn pawt a'cet. 2Jn dxn nj khrawng nawtsi caten na a'cawm khrawng khonhxp lhikip a'khawm me. Jn khonhxp heq j-khrawng nhi na i-kha e-o yaq kaw vj a'mji nghxt khen cuvj jn khonhxp heq a'pji lo na ce a'dx ve lo. 3Nawtsi caten na 'Boipaw Yesyuq' j "nang khrawng 'Pxtpaw Phawlaw' caw hxvj ce ni lung khrawng mung ngj thonne bjiq seq tina hawu va" tiyj a'hawu. 4'Boipaw Yesyuq' na "khrawng khrawng e-ok kj a'sawk an'heng siyju" tiyj kyengcaw vj a'yo ve. 5Jnkhaw vjyawng nawtsi caten na 'Boipaw yesyuq' khrawng lhxngkau tiq tong hawn tjq ciq theqna somdek kj mji tiq tai neng-ngeng heq khrawng tanaw vjt tj a'dawn. 6Nawtsi 'Lucipha' na 'Boipaw Yesyuq' j "ke yj a'pet khrawng ni ka'phun tha heq na ka'tawk ke khrawng ka'boiqma heq ke na ka'pet do nawk kj ka'pet tj ka'laq khennj nang ngj ka'pet tai. 7Ke yum na na'xm me khaw ce ni heq tomti nang ngj ka'pet tai" tiyj a'hawu. 8'Boipaw Yesyuq' na "'Pxtpaw Phawlaw' pjinghawt pjt yawng yum na ka'xm me laq ai nhi tok yawng ka'lupcak laq ai"nawk khrawng kyengcaw vj a'yo ve'' tiyj a'hawu ba. 9Thakha nawtsi 'Lucipha' na 'Boipaw Yesyuq' khrawng 'Yeruqsalawng' luq j kxq lhxng dj tiq PhawLaw kyong ngj ceq pui naw na nang khrawng 'Pxtpaw Phawlaw' caw khaw vj ce ni hawn nj thoq soi cawm ma. 10'Pxtpaw Phawlaw' na nang congvong hai hawn cipaw heq j a'sin nghxt tiyj kyengcaw vj a'yo ve khennj nang na niq-e law hai siyju tiq. 11Nang kho heq kha lung ngj lhem na niq-e yaq hawn nj nhi tiq na an'kut tj an'pjm pet tai" tiyj nawtsi 'Lucipha' na a'hawu. 12Jnkhaw hxyawng 'Boipaw Yesyuq' na kha "nang na a'lxlx caw vj 'Pxtpaw Phawlaw' cawm kawq" tina kyengcaw vj a'yo ve tiyj a'hawu ba. 13Nawtsi 'Lucipha' na a'dxkdxk kj a'cawm pjnnj 'Boipaw Yesyuq' ka vj kxq a'cet ba. 14Jnkhaw vjyawng 'Boipaw Yesyuq' khrawng cimkya tiq muikhraw phun nj kxmyom theqna 'Galiqle' kre tj a'cet ba. Nhi sitawng heq kha i-khjk tom mj a'khrai yok. 15'Boipaw Yesyuq' khrawng, damarungt ngj mji tiq Khrawng batnghawt tj a'cokhawu yok khennj khrawng tomti na kha nhi khrawng an'tjuqkauq ve nawk. 16Jnpjnnj ce 'Boipaw Yesyuq' khrawng nhi len nghxt nawk 'Nacarek' Luq pawt a'lo ba. Uqpuk nhxp pj damarung ngj a'cet soi baw cet theqna kyengcaw phawt hai yj a'tung hxvj. 17'Parawphek' 'Hesyayaq' kyengcaw an'pet na 'Boipaw Yesyuq' na phvawng na a'phawt. Jn kyeng cawuk kj yo ve tiq ce. 18'Cimkya tiq muikhraw heq khrawng ke ceng ngj a'mji pjn. Ibahai yj nawk hxvj ce cek ke tiq heq j-sitawng pawi soqsai ba hai tok kj 'Pxtpaw Phawlaw' na ke a'lui pjn. Nan'lungko duk kj kxq na'niq heq khrxk ba hai, a'mawn khawm ti heq lhjq ba hai, mikmhu yaq ti heq mhuq ba hai, a'kulu nawk khawm laq ti heq ljt ba hai na, 19'Pxtpaw Phawlaw' na khrawng heq a'ljulawk ke hai khokum a'khrai lo pjn tiyj sai hai tok kj ke khrawng a'tjq lo pjn" tiyj a'yok ke. 20 'Boipaw Yesyuq' na kyengcaw a'phawt pjnnj ce tom ba theqna damarung mawqpaw vj a'pet ba. 'Boipaw Yesyuq' a'ngvaw ba khaw vj khrawng heq batnghawt na mik khrep yaq kaw an'tjuq ve. 21Jnkhaw vjyawng nhi tiq j "nang'hi yawk laq khrawng kyengcaw pek kj tuq nhxp pj a'mhawnmx a'thonne lo pjn" tiyj 'Boipaw Yesyuq' na a'hawu. 22'Boipaw Yesyuq' na a'hawu khrawng yaw laq tiq khrawng heq na nhi khrawng an'tjuqkauq ve nawk. Nhi mongkhok kj thok lo tiq kheukhaw pawi heq kha mhawnkau theq u-na "ni khrawng ce 'Yawtep' caw siyju vaw tiyj an'punghaw ko an'hawu ve tong. 23'Boipaw Yesyuq' na kha "to-to tiq na a'punghaw niqnawng yawng khrxk ba hawn nj a'to ve maw laq ai tiyj kheukhaw a'mji baw vj 'Kaperanong' luq j na'poqcai nghxt baw vj na'mji nghxt nawk luq j kha poqcai ye ya tiyj nang'hi na ke ljt yju nan'hawu vai. 24'Boipaw Yesyuq' na thawp na ke na a'mhawn ka'hawu laq ai nawk hxce i-bawng 'Parawphek' heq kha siyj seq an'punghaw mji nawk luq j mhawi laq yju uq' tiyj a'hawu. 25Ke na thawp na a'mhawn ka'hawu laq ai nawk hxvj ce 'Parawphek' 'Iqliqyaq' na om nghxt hxvj khokum kum-thum sina khoi kung khoyawq-aw yaq khennj kre breq cu an'mxthak nghxt laq khaw vj 'Icare' kre yj 'Iqtarelaq' mhe'nu heq batnghawt an'mji nghxt khrawng a'mhawn. 26Pxtpaw Phawlaw' na 'Iqliqyaq' khrawng 'Icare' kre yj mji tiq a'kyaw khrawng yx mhe'nu heq ceng ngj tjq yaq kaw vj 'Ciqdung' kre 'Caqrettaq' luq j mji tiq mhe'nu pjinghawt ceng ngj yawng phui hai yj a'tjq. 27 'Parawphek' 'Iqliqsye' om nghxt hxvj kha 'Icare' khrawng yx heq duk kj nuna a'niq koppe tiq baqtnghawt an'mji. Sinakha jn heq duk kj kxq 'Siriya' kresaw 'Nemen' ming naw tiq khrawng pjinghawt tj kxq loi na u-kha khrxk sawk nghxt yju" tiyj a'hawu. 28'Boipaw Yesyuq' na a'hawu khrawng yaw laq tiq damarung ngj kxq khrawng heq khrawng a'lhji yj an'lung sutsut. 29Jn khrawng heq na 'Boipaw Yesyuq' luq krawng pawt sjtlok theqna jn luq an'te nawk kong hawn a'ljn nj tunluk hai yj an'ceq pui nawk. 30Sinakha 'Boipaw Yesyuq' khrawng, khrawng tu duk baw phen ne na a'cet ba. 31Jnpjnnj ce 'Boipaw Yesyuq' khrawng 'Galiqle' kre 'Kaperanong' luq tjq cet theqna uqpuk nhxp tjng ngj damarung ngj a'cokhawu soi. 32'Boipaw Yesyuq' kheukhaw vj cimkyaq tiq muikhraw a'pui khennj khrawng heq na nhi cokhawu khrawng mhawnkau theqna a'tjuqkauq ve nawk. 33Jn damarung duk kj bji yaq tiq nawtsi koppe tiq khrawng pjinghawt a'mji. Jn khrawng na 'Boipaw Yesyuq' j 34J 'Nacarek' luqsaw 'Yesyuq' vj nang na ke'hi i-baw na'poq ai tyaw. Ke'hi cimkhrak hai yj na'lo vaw. Nang hu-u nawk khrawng ke hi na kan'cok. 'Pxtpaw Phawlaw' ceng ngj kxq lo tiq lhxng dj tiq j na'thon tiyj pang na a'hawu. 35Jnkhaw vjyawng 'Boipaw Yesyuq' na nawtsi a'cokhawu cawng na"dek na mji, nhi duk kj kxq thok nghxq yawng" tiyj a'hawu. Jn hxvj yawng nawtsi na jn khrawng khrawng, khrawng heq pxm mj hjngluk sawk na niqnawng pe yaq kaw vj a'thok ba. 36Damarung ngj kxq khrawng heq na kha mhawnkau theq u-na "ni i-bawng kheukhaw ljk. Ni khrawng na a'sjtlok na nawtsi a'thok laq khrawng a'tha na phun heq nhi ceng ngj a'mji sxtx" tiyj an'hawu ve tong. 37Jnpjnnj ce 'Boipaw Yesyuq' sitawng heq khrawng jn kvawqkra vj mji tiq a'kyaw dxn heq j kha a'khrai yok. 38'Boipaw Yesyuq' khrawng, damarung ngj kxq cet ba theqna 'Syiqmung' im pawt a'cet. 'Syiqmung' puicang a'lhji yj a'kang yaq khennj nhi tok to-bong pet hai 'Boipaw Yesyuq' vj khrawng heq na an'hawu phui. 39'Boipaw Yesyuq' khrawng jn mhutaw ka vj tung theqna "kang ba nghxq yawng" tiyj a'hawu. Jn baw a'hawu cawng na 'Syiqmung' puicang khrawng kang ba theqna jntalheng kung thju na nhi tiq a'khin nawk ba. 40Khomxlawm mj niqnawng a'dxkdxk mji na kang yaq tiq heq khrawng 'Boipaw Yesyuq' ceng tjq khrawng heq na an'lo pui nawk. 'Boipaw Yesyuq' na jn kang yaq tiq heq pum mj a'kut tawng theqna an'niqnawng heq khrawng a'khrxk ba sawk. 41"Nang khrawng 'Pxtpaw Phawlaw' caw vj na'thonne" tiyj nawtsi heq khrawng pang theqna kang yaq tiq heq ceng ngj kxq an'thok ba. 'Boipaw Yesyuq' khrawng ljulawk ke tiq tiyj nhi tiq na an'cok khennj 'Boipaw Yesyuq' na nhi tiq coksawng theqna kheu sawk yju. 42 A'tha nhxp-nghawt a'ngaw ngomyawn nj ce 'Boipaw Yesyuq' khrawng, khrawng heq hiusip nawk dxn pawt a'cet. Jn baw na kha khrawng heq na 'Boipaw Yesyuq' an'sui yok. An'khom na ce nhi tiq ceng ngj kxq a'ceq tawk hai khrawng an'nga ye. 43Jn baw na kha 'Boipaw Yesyuq' na "ke khrawng a'kyaw luq heq j kha bjikhji tiq sitawng pawi yj thon tiq 'Pxtpaw Phawlaw' neng-ngengu dj soisen ne tiq sitawng pawi heq ka'soqsai yok laq hawm mai. Ni baw soqsai hai tok 'Pxtpaw Phawlaw' na ke khrawng a'tjq lo yawng tiyj a'hawu pjnnj 'Galiqle' kre yj kxq a'cet ba. 44Jnpjnnj ce 'Boipaw Yesyuq' khrawng 'Yuqdaq' kre yj kxq damarung heq j 'Pxtpaw Phawlaw' tala tawmthong soqsai yok na a'mji.
S'ha seleccionat:
Luke 4: ctpv-rv
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.