Luke 3
3
1Rawmaq Ikarek 'Tiqberiq sica' nawn sawk kum kalainghaw mji hxvj 'Pungtiqpiqlet' kha 'Yuqdaq' kre vj mawnglen ngj thonne na 'Herukentiqpaq' kha 'Galiqle' kre mawng ngj thonne. 'Herukentiqpaqq' nawu'u 'Phiqliqpuq' kha 'Iqtuqre' na 'Taqrakhawnik' kre yj mawnglen nj thonne. 'Luqtaniq' kha 'Abiqlawng' kre yj mawng ngj thonne. 2Jnkhaw hxvj 'Ennaq' na 'Kayaphaq' kha len dj tiq 'Mhawpaw' hji yj a'hiq thonne tun nj 'Pxtpaw Phawlaw' kheukhaw khrawng tjunu khocxn nj mji tiq 'Cakhariq' caw 'Yawhen' ceng tjq a'khrai lo. 3'Yawhen' ce 'Yawden' let kawm kon nj cet yok theqna khrawng heq j nhi tiq an'kret sisaw heq lhjq khrawng khawm laq hai tok suisaw ye ba theqna 'Betticen' khawm hai tok a'hawu yok. 4'Parawphek' 'Hesyayaq' cawuk kj mji tiq baw tjng ngj tjunu khocxn nj pjinghawt pjtcaw a'pang yok khrawng ce 'Pxtpaw Phawlaw'a'lo nawk hai lawm krangsa vjn lawm kha krundiu ba sawk kjn. 5Tong dxmhawk nawk dxn nj dek lhuiq ba na tong lhxngnem nawk nyhinyhop ba vjn. Lawm kolak kha krun ba sawk theqna pawi yaq tiq lawm kha pawi ba sawk kjn. 6Jnkhaw vjyawng 'Pxtpaw Phawlaw'na a'ljulawk ke khrawng, khrawng heq na an'mhuqyawk laq ai tiyj a'yok ke. 7'Yawhen' ceng ngj 'Betticenr' khawm hai yj khrai lo tiq heq j "j phvawu si yx heq baw vj lhaye theq tiq heq sj khrai lo hai tiq 'Pxtpaw Phawlaw' a'lung si khrawng ngj kxq cen hai tok nang'hi yj na hu-u an'hyawk nghxt 8Jnkhennj nang'hi a'kret a'sisaw heq j kxq kan'lung kan'suisaw ye ba pjn nawk khrawng nan'mjicoq j sawksi dawn njn. Nan'punghaw ko nan'punghaw 'Abrengheng' yx khennj 'Pxtpaw Phawlaw' na a'kret pe hai siyju tiyj khin ne kawq cuq. Ni lung krjng heq kha 'Abrengheng' caw-nawu heq j thonne hawn nj 'Pxtpaw Phawlaw' na a'poqcai khoq. 9Tuq-j ce thing heq khruk nawk hai he lawk-nghawt thing khocju vj a'mji pjn. Jnkhennj a'theq pawi yaq tiq thing ce a'khruk khawm laq theqna mipxm mj a'djutit khrawng khawm laq ai tiyj 'Yawhen' na a'hawu. 10Jn hxvj yawng khrawng heq na kha 'Yawhen' yj "jn baw nawk hxce ke'hi na hi-I kan'poqcai laq ai" tiyj an'nghiq. 11'Yawhen' na kha phang lawp-nhiq nan'tawk ke na ce phang taw ye yaq tiq j lawp-nghawt nan'pet laq ai. E-hai ok hai nan'tawk ke na ce taw ye yaq tiq j nan'petsot laq ai tiyj" a'hawu ba. 12A'phukok tiq heq kha 'Yawhen' ceng ngj 'Betticen' khawm hai yj khrai lo theqna jn heq na kha"Sarapaw vj ke'hi na ce hi-i kan'poqcai laq ai tiyj an'nghiq khaw vj. 13'Yawhen' na nang'hi na kha phjisa an'kok sawk khrawng thawk kj a'lhji yj kok kawq cuq tiyj a'hawu ba. 14A'kyaw seksaw heq na kha ke'hi na ce hi-i kan'poqcai laq ai tiyj an'nghiq kaw vj 'Yawhen' na nang'hi kha khrawng heq ceng ngj kxq phjisa khrawng thanakan nj tong kawq cuq. U-vj kha a'si yaq kaw bju ve naw kawq cuq. Nang'hi laq khrawng khrawcawk kj lok hawn nj mji bjiq cuq" tiyj a'hawu ba. 15Khrawng heq tomti na ljulawk ke hai tiq 'Boipaw Yesyuq' lo ba vai nghxq tiyj khin theq u-na an'cong nge khen cuvj jn 'Boipaw Yesyuq' khrawng 'Yawhen' heq aw co yju tiyj an' xt nawk lo. 16'Yawhen' na khrawng heq j tui yj 'Betticen' ka'pet khrawng ce a'mhawn tyaw. Sinakha ke thawk kj lhxng dj tiq pjinghawt a'lo nghxq. Ke ce nhi khopatawp yoi sut pet hai kung kha tawn ne hx. Nhi na khrawng cimkya tiq muikhraw vj kha, mi yj kha nang'hi yj 'Betticen' a'pet tai. 17Jn 'Boipaw Yesyuq' khrawng a'punghaw kolawu vj tuncawng duk kj kxq a'hi heq khap hai yj a'mji pjn. A'punghaw talawng khrawng kyalhek hawn nj sya theqna tuncawng khrawng cawng im mj taw na a'hi heq ce mi yj a'si yai tiyj a'hawu. 18'Yawhen' na ni baw vj lawm a'dxkdxk kj khrawng heq khrawng a'lung suisaw ye theqna 'Pxtpaw Phawlaw' ceng pawt cet ba hai tok kj sitawng pawi a'hawu yok. 19'Heruk' mawng na khrawng a'punghaw nawu'u immawq nu 'Herawdiq' khrawng tha kung ngj a'peha nawk khrawng na a'kyaw a'pawi yaq khrawng tomti 'Yawhen' na setsui theqna a'cokhawu. 20Jnkhen cuvj 'Heruk' mawng na 'Yawhen' khrawng thong ngj a'khrawk. A'kret heq kha thawp theqna a'pet batx. 21 'Yawhen'thong a'kraw laq lhawn nj khrawng heq batnghawt tj 'Betticen' a'pet nghxt pjnnj 'Yesyuq' kha 'Betticen' a' khawm lo. 'Yesyuq' na suq a'tong tun nj hawnnhi awulang theqna 22Cimkya tiq muikhraw khrawng khongkho haw baw vj 'Boipaw Yesyuq' ceng ngj a'komlo. "Nang khrawng ke na a'lhji yj khet na ka'nawye nawk khrawng ke caw' tiyj hawnnhi nj kxq a'thai thok lo. 23'Boipaw Yesyuq' na 'Pxtpaw Phawlaw' tok cxkcxk a'lup khaw hxvj a'sawk thungkip bawng a'mji nghxq. Nhi khrawng 'Yawtep' caw vj thonne. 'Yawtep' ce 'Iqliq' caw vj thonne. 'Iqliq' ce 'Maqtet' caw 24'Matet' ce 'Leviq' caw 'Leviq' ce 'Melaqkhiq' caw 'Melaqkhiq' 'ce 'Yennaq' caw 'Yennaq' ce 'Yawtep' caw 25'Yawtep' ce 'Mettaqtiq' caw 'Mettaqtiq' ce 'Amuk' caw 'Amuk' ce 'Nahung' caw 'Nahung' ce 'Iqtaqliq' caw 'Iqtaqliq' ce 'Naqge' caw 26'Naqge' ce 'Maek' caw 'Maek' ce 'Mettaqtiq' caw 'Mettaqtiq' ce 'Syemiq' caw 'Syemiq' ce 'Yawtep' caw 'Yawtep' ce 'Yuqdaq' caw 27 'Yuqdaq' ce 'Yawhennaq' caw 'Yawhennaq' ce 'Retaq' caw 'Retaq' ce 'Ceruqbabelaq' caw 'Ceruqbabelaq' ce 'Syalaqtelaq' caw 'Syalaqtelaq' ce 'Neriq' caw 28'Neriq' ce 'Melaqkhiq' caw 'Maylaqkhiq' ce 'Endiq' caw 'Endiq' ce 'Kawteng' caw 'Kawteng' ce 'Iqlaqmawdeng' caw 'Iqlaqmawdeng' ce 'Iraq' caw 29'Iraq' ce 'Yawte' caw 'Yawte' ce 'Iqleca' caw 'Iqleca' ce 'Yawring' caw 'Yawring' ce 'Maqtet' caw 'Maqtet' ce 'Leviq' caw 30'Leviq' ce 'Syiqmong' caw 'Syiqmong' ce 'Yuqdaq' caw 'Yuqdaq' ce 'Yawtep' caw 'Yawtep' ce 'Yawnen' caw 'Yawnen' ce 'Iqlyaking' caw 31'Iqlyaking' ce 'Mele' caw 'Mele' ce 'Menen' caw 'Menen' ce 'Mettaqtaq' caw 'Mettaqtaq' ce 'Naten' caw 'Naten' ce 'Davik' caw 32'Davik' ce 'Yesye' caw 'Yesye' ce 'Awbet' caw 'Awbet' ce 'Bawcaq' caw 'Bawcaq' ce 'Calaqmung' caw 'Calaqmung' ce 'Nasyung' caw 33'Nasyung' ce 'Amiqnaqdep' caw 'Amiqnaqdep' ce 'Etmin' caw 'Etmin' ce 'Aren' caw 'Aren' ce 'Hecaqrung' caw 'Hecaqrung' ce 'Pharek' caw 'Pharek' ce 'Yuqdaq' caw 34'Yuqdaq' ce 'Yakuk' caw 'Yakuk' ce 'Iqcek' caw 'Icek' ce 'Abrengheng' caw 'Abrengheng' ce 'Teraq' caw 'Teraq' ce 'Nakhaw' caw 35'Nakhaw' ce 'Cerok' caw 'Cerok' ce 'Ragaw' caw 'Ragaw' ce 'Phalawk' caw 'Phalawk' ce 'Heba' caw 'Heba' ce 'Syalaq' caw 36'Syalaq' ce 'Kaiqnen' caw 'Kaiqnen' ce 'Aphacat' caw 'Aphacat' ce 'Syemaq' caw 'Syemaq' ce 'Nawiq' caw 'Nawiq' ce 'Lamawk' caw 37'Lamawk' ce 'Maqtuqsyaqlaq' caw 'Maqtuqsyaqlaq' ce 'Iqnok' caw 'Iqnok' ce 'Yarawk' caw 'Yarawk' ce 'Maqhalelelaq' caw 'Maqhalelelaq' ce 'Kaiqnen' caw 38'Kaiqnen' ce 'Iqnuk' caw 'Iqnuk' ce 'Syetaq' caw 'Syetaq' ce 'Adeng' caw vj thonne theqna 'Adeng' ce 'Pxtpaw Phawlaw' caw vj thonne.
S'ha seleccionat:
Luke 3: ctpv-rv
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.