Markus 2
2
Pomambuh dulun co lumpuh, Yesus mombukti arop-Eh bokuasa mampun dosa
2:1-12
(Mat. 9:1-8; Luk. 5:17-26)
1Bopira ondo opaiyoh, Yesus hopuli hia kota Kapernaum. Orong dulun ngoneh bahawa Are oko nyan lopo nyan idi. 2Jadi, korinah kongorong dulun dombut hokumpur nyan intin. Ponah Lopo cioh kuntop mapak ma dulun. Malah dapot nyan muka tungkang mahi kuntop ma dulun. Sopondehan Yesus momborita Antun Mohotara ma iroh, 3oko opat dulun dombut mehen ico beti dulun lumpuh. Iroh nyau mehen dulun cioh hia Yesus ina tongomambuh. 4Tapi iroh arelu boraoi muntam hia ponah lopo awi tolangkun kongorong dulun. Jadi iroh paluh nukat hia tungkui sapo hintang ngoluwang sapo cioh tangar nyan hunyung ika Yesus oko. Opaiyoh Iroh muloh dulun lumpuh yoh co kaling nyan tungkui ihap eh. 5Kotika Yesus noto koporocayaan doh ma-Eh, Yesus mantun ma dulun lumpuh cioh, “Anak-Kuh, dosammu ocop tomampun.”
6Tapi, pira-pira guru agama Yahudi co dahat tuot nyan intin bopikir ponah atoi doh, 7“Kura dulun cotuh mantun sanioh? Are hopander nain Are Mohotara! Baya Mohotara co boraoi mampun dosa!”
8Tapi Yesus jion monau pikiran doh yoh. Hie-Eh ma iroh, “Pikiran ponah atoi me korinah sala! 9Comoh meleh sutir, mantun ma dulun lumpuh cotuh ‘Dosam mu ocop tomampun’ atawa mantun ‘Kokatbat. Mangkat ihapmu non hintang nyalan bat?’ 10Makitu, Akuh porahan ma ikan bahawa Anak Kolunon bokuasa mampun dosa nyan dunia tuh.”
Paluh Yesus mantun ma dulun lumpuh cioh, 11“Kokatbat, mangkat ihapmu, hintang bulibat!” 12Lansung dulun cioh kokat nyan muka kokon doh, mangkat ihap eh paluh tulak hia luar. Uras dulun nyan intin kagum, Paluh nara Mohotara. Hien doh, “Kitan arinai piji kito kojadian isan otuh!”
Yesus hojolahan ma kawan dulun co tomangap bodosa
2:13-17
(Mat. 9:9-13; Luk. 5:27-32)
13Opah iyoh, Yesus tulak kole hia banut danau Galilea. Orong dulun dombut hia-Eh, paluh Are majar iroh. 14Sopondehan Yesus nyalan nyan intin, Are kito oko dulun Yahudi co nakih pajak indan pomorintahan Romawi. Araieh Lewi, anak Alpeus. Lewi dahat tuot nyan lopo ika ngumpur pajak. Yesus mantun maeh, “Umba Akuh!” Lewi lansung tonjok, ngonulu Yesus.
15Hiah waktu Yesus dahat kuman nyan lopo Lewi, oko orong tukang takih pajak hintang kawan dulun bokon co tomangap bodosa pian mosorakat. Tului, orong nyan halo iroh ngumba Yesus. Jadi, iroh dombut umba kuman homboh-homboh ma Yesus hintang kawan murid-Eh. 16Tapi hiah waktu kawan guru agama Yahudi co tomasuk kawan pomimpin agama Yahudi ingkan kolompok Parisi noto, bahawa Are kuman halo tukang takih pajak hintang dulun bodosa taiyoh, iroh ngolomumut. Iroh mantun ma kawan murid Yesus, “Kura Are kuman homboh ma tukang takih pajak hintang kawan dulun bokon co bodosa?”
17Tapi Yesus ngoneh antun doh yoh. Jadi Are mantun, “Dulun co sehat aroko porulu dokter. Tapi dulun co hotoro mositi porulu dokter. Akuh dombut aroh ika naah dulun co bujur, tapi kawan dulun co bodosa.”
Yesus monjelas alasan kawan murid-Eh aroko puasa
2:18-22
(Mat. 9:14-17; Luk. 5:33-39)
18Kawan murid Yohanes Pombaptis hintang kawan dulun Parisi puasa. Jadi, hiah waktu iyoh, oko kawan dulun co dombut hia Yesus paluh ngisok, “Kawan murid Yohanes hintang kawan pongikut dulun Parisi puasa. Kura kawan murid-Mu aroh?”
19Useh Yesus ma iroh, “Hiah waktu ponganten bakah incah homboh ma kawan jolahaieh, mositi kawan jolahaieh aroko puasa. 20Tapi waktueh angar dombut, ponganten bakah tomehen ingkan iroh. Hiah waktu iyoh, iroh angar puasa.”
21“Amun lembon co tomuun tirat, arelu oko dulun co numpang lembon co nomuun yoh hapo kerep benang co incah puga. Awi, benang co incah puga angar ngorusut paluh nirat lembon cioh jarin meleh bahai. 22Sanioh ka, arelu oko dulun co mika angur puga ponah kantung upak co tomuun. Dulun aroko nguan sanioh awi kotika angur puga lanoh nyiwuh, kantung eh bolontup. Jadi kantung eh rusak holuh angur eh tusoh. Koduo-duoeh topende. Angur co puga sobulih tomika ponah kantung co puga ka.”#2:21-22 Benang puga hintang angur puga molambang porubahan co tomoroncana Mohotara sorinai Are moncipta dunia. Porubahan cioh tojadi hiah waktu Mohotara nyuhu Laca Co Tomonjanji-Eh hia dunia tuh. Ma tindung cotuh, Yesus monjelas eh dulun sobulih sadar bahawa pikiran hintang atoi doh sobulih tongomaa-Eh. Baya dulun co porocaya bahawa Yesus iyohco Laca Co Tomonjanji Mohotara boraoi tongomaa.
Pongajaran Yesus tintun ondo Sabat#2:23-28 Ondo Sabtu, husus sotorahat hintang somayang indan dulun agama Yahudi.
2:23-28
(Mat. 12:1-8; Luk. 6:1-5)
23Hiah ico ondo Sabat, Yesus hintang kawan murid-Eh nyalan nyihin umo gandum. Kawan murid-Eh micai kawan luang gandum. 24Jadi, kawan dulun Parisi mantun ma-Eh, “Noto! Alogawin kawan murid-Mu non sala! Awi, oko porentah Mohotara ponah Hukum Torat co ngosiit dulun bogawi nyan ondo Sabat.”
25-26Useh Yesus ma iroh, “Mositi ikan piji mombaca Surat Borasih tintun alogawin Laca Daud hiah waktu Abyatar iyohco Imam Agung. Daud hintang kawan dulun co umbaeh jarin dou. Jadi, Daud muntam hia ponah Lopo Mohotara, monu rute co ocop tomposembah indan Mohotara. Monurut Hukum Torat baya kawan imam boraoi kuman rute cioh. Tapi hiah kotika cioh, Daud kuman eh. Are mihi indan kawan pongikut eh ika kuman ka.”#2:25-26 Kesah tintun Laca Daud tuh oko nyan buku 1 Samuel 21:16. Poraturan tintun rute cioh oko nyan buku Imamat 24:5-9.
27Paluh hien Yesus ma iroh, “Mohotara umpi ondo Sabat indan kopentingan kolunon. Are arelu umpi kolunon indan kopentingan ondo Sabat. 28Jadi, Anak kolunon iyohco Tuhan co bokuasa ma ondo Sabat.”
S'ha seleccionat:
Markus 2: TBSS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió