Matius 23
23
Yesus momporingat ina aroh pura-pura pio isan kawan pomimpin agama
23:1-36
(Mrk. 12:38-40; Luk. 11:37-54,20:45-47)
1Paluh Yesus mantun ma dulun orong hintang ma kawan murid-Eh. 2Hie-Eh, “Kawan guru Hukum Torat hintang kawan dulun Parisi haba kuasa ika majar porentah hintang poraturan Mohotara co tonulih Musa. 3Poko tului iyoh, nontumun hintang nuhitboh kokon co tomajar doh ma ikan. Tapi, iroh mahi aroko nguan ome co tomajar doh. Poko tului iyoh, aroh ngulit kawan alogawin doh. 4Iroh ngomahat kawan dulun ma orong poraturan agama co moho tongompian. Tapi iroh aroko kolu dohop dulun isut mahi ina poraturan cioh boraoi tongompian! 5Kokon co tongompian doh baya ina dulun nara iroh leh. Cuntueh: Kotak ika sangan pira-pira ayat ingkan Surat Borasih tomowot nyan lingko hintang tondung, toumpi doh bahai. Kawan rumbai jubah, toumpi doh ombu ina tokitan eh meleh tuhit ma Mohotara hangki dongan doh. 6Nyan lopo ika sombayang hintang nyan kawan pesta iroh herak tuot nyan ika co tohormat. 7Nyan pasar, iroh herak ma dongan doh hormat tabe ma iroh. Iroh mahi herak dulun mihi hurmat naah iroh ‘Pa Guru’.
8Tapi arohboh ikan herak tonisi ‘Pa Guru’. Awi, ikan baya oko ico ‘Bapa Guru’, Laca Co Tomonjanji Mohotara hintang uras ikan iyohco hokonduang. 9Arohboh ikan naah ico mahi nyan dunia tuh ‘Umai’. Awi, ikan baya oko ico Tama, iyohonon Mohotara Tama nyan sorga. 10Arohboh ikan ka herak tonaah ‘Pomimpin’. Awi, ikan baya oko ico Pomimpin, iyohonon Laca Co Tomonjanji Mohotara. 11Malah, dulun co poko penting nyan halo ikan sobulih jarin polayan mu. 12Mohotara angar porandah dulun co potamam arop. Tapi, Mohotara angar potamam kokon dulun co morandah arop.”
13Colakaboh ikan kawan guru Hukum Torat hintang kawan dulun Parisi. Ikan pura-pura pio tapi atoi me jahat. Ikan mohalang dulun ika muntam jarin anggota koluarga Korojaan Sorga. Podahar ikan leh aroko kolu muntam. Tapi, ikan mohalang kawan dulun co bousaha muntam.
[14Colakaboh ikan kawan guru Hukum Torat hintang kawan dulun Parisi. Ikan pura-pura pio. Ikan nipu kawan balu ika haba harta doh. Dapot lopo doh mahi tomorampas. Ikan mucap doa co ombu-ombu, tapi iyoh baya pura-pura leh ika nutup kojahat me. Poko tului iyoh, Mohotara mositi angar mohokum ikan meleh bahat hangki dongam.]
15Colakaboh ikan kawan guru Hukum Torat hintang kawan dulun Parisi. Ikan pura-pura pio. Ikan mitah laut hintang ngolanjah pulou nganyap ico dulun mahi co lian tomompongaruh ina are muntam agama me. Amun are muntam agama me, maka ikan umpi are jarin dulun co angar muntam noraka, dulun co duo kali lipet meleh jahat hangki ikan leh.
16Colakaboh ikan co isan kawan pomimpin co bobuto. Ikan aroko kito calan co buah hintang umpi dulun bokon dajat. Ikan majar santuh: ‘Amun oko dulun co porohon janjieh ma sumpah demi Lopo Mohotara, maka are aroko sobulih molalus sumpah eh. Tapi amun oko dulun co porohon janjieh ma sumpah demi barang-banda bulou co oko nyan ponah Lopo Mohotara, maka are sobulih molalus sumpah eh.’ 17Ikan kawan dulun bako hintang bobuto! Barang-banda bulou taiyoh husus indan Mohotara awi tohapan ponah Lopo Mohotara. Jadi, mositi Lopo Mohotara yoh meleh penting hangki barang-banda bulou taiyoh. 18Ikan mahi majar santuh: ‘Amun oko dulun co porohon janjieh ma bosumpah demi tungkup batu ika mapang kurban, maka are aroko torikat ma sumpah eh. Tapi amun oko dulun co porohon janjieh ma bosumpah demi porsembahan nyan tungkui tungkup batu ika mapang kurban cioh, maka are sobulih molalus sumpah eh.’ 19Ikan kawan dulun bobuto! Porsembahan cioh jarin husus indan Mohotara awi tomporsembah nyan tungkui tungkup batu ika mapang kurban cioh. Jadi, mositi tungkup batu ika mapang kurban cioh meleh penting hangki porsembahan cioh. 20Poko tului iyoh, amun oko dulun co bosumpah demi tungkup batu ika mapang kurban, maka are bosumpah demi tungkup batu ika mapang kurban cioh hintang kawan porsembahan co oko nyan tungkuieh ka. 21Amun oko kawan dulun co bosumpah demi Lopo Mohotara, maka are bosumpah demi Lopo Mohotara hintang demi Mohotara ka co nukui nyan intin. 22Amun oko dulun co bosumpah demi sorga, maka are bosumpah demi korusi korojaan Mohotara hintang demi Mohotara ka co tuot nyan tungkuieh.#23:16-22 Kawan pomimpin agama herak uri-uri ma antun ika umpi kawan macam ‘sumpah’. Iroh hotaleh tintun ‘sumpah’ comoh co sah hintang comoh co aroh. Yesus mantun uras onon bako awi Mohotara kito amun ito momonuhi janjin to atawa aroh. (Noto ka Mat. 5:33-37.)
23Colakaboh ikan kawan guru Hukum Torat hintang kawan dulun Parisi. Ikan pura-pura pio. Ikan mihi indan Mohotara sopuluh porsen ingkan hasir kokon imbun komulan dapot co pokongolik mahi tomasuk kawan dorampah, solasih, adas manis, hintang jintan. Tapi ikan aroko tuhit ma kawan porentah Mohotara ponah Hukum Torat co meleh penting. Iyohonon, ikan aroko sucing, aroko porahan komasi ma dongam, hintang aroko tenden tuhit ma Mohotara. Ikan porulu mihi porpuluhan. Tapi aroh dapot solingo kawan porentah taiyoh ka co penting! 24Heh ikan kawan pomimipin samah ma dulun bobuto. Ikan porhati aang kolik tapi aroko porhati aang co penting. Ibarat dulun co mende monalot ingkan korih eh, tapi are nolon unta co incah nyan ponah eh!
25Mohotara angar mohukum ikan kawan guru Hukum Torat hintang kawan dulun Parisi. Ikan pura-pura pio isan cangkir hintang pinjan co borasih hila luar eh leh. Tapi nyan ponah atoi me, ikan incah pongalam hintang jahat. 26Heeh dulun Parisi co bobuto! Ngorasih soun ponah atoime, maka topit luar eh ka angar borasih.
27Mohotara angar mohukum ikan kawan guru Hukum Torat hintang kawan dulun Parisi. Ikan pura-pura pio. Ikan somporengu kawan kolowong co tomoncat bura. Nyan luar eh tokito segah. Tapi nyan ponah eh sangan kawan tulang dulun matoi hintang bobagai macam koluse. 28Isanioh boh ikan! Ingkan luar ikan tonoto pio, tapi atoime sobujur eh jahat.
29Mohotara angar mohukum ikan kawan guru Hukum Torat hintang kawan dulun Parisi. Ikan pura-pura pio. Ikan mangun kolowong indan kawan nabi hintang mohias kawan tugu pongingat kawan dulun co bolum bujur nyan tohimo Mohotara. 30Ikan mahi mantun, ‘Sompamaeh kaih bolum hiah jaman tatu hiang kaih sinan, mositi kaih aroko umba ma iroh ngompatoi nabi taiyoh.’ 31Tapi ma isanioh ikan leh mongaku bahawa ikan iyohco koturunan kawan dulun co ngompatoi kawan nabi! 32Jadi, ngoholuh eh leh alogawi jahat co ocop tomolai pian tatu hiang me yoh, dapot soropai! 33Heh ikan co jahat, ikan koturunan dulun jahat isan nyipo co mohari! Aroh bopikir ikan hegah ngomuho arop ingkan hukuman nyan noraka! 34Ngoneh ehboh! Akuh angar nyoruhan hia ikan kawan nabi, kawan dulun boakar pikir, hintang kawan guru co majar Antun Mohotara. Oko ingkan iroh co angar me ngompatoi. Tonga co bokon angar me mohukum matoi nyan sompolaki Co bokon angar tomoncambuk me nyan kawan lopo ika sombayang me. Co bokon eh kole angar me nyiksa ingkan kota hia kota. 35Poko tului iyoh, ikan angar monangung hukuman awi kompatoi kokon dulun co bolum bujur nyan tohimo Mohotara, molai ingkan kompatoi Habel dapot ma kompatoi nabi Jakaria, anak Berekia, co tongompatoi me nyan owang tungkup batu ika mapang kurban ma Lopo Mohotara. 36Porocayaleh bahawa tului kokon alogawi cioh Mohotara angar mohukum koturunan tatuh.
Yesus nohuang dulun Israel nyan Yerusalem co kuloi Are
23:37-39
(Luk. 13:34-35)
37 Paluh Yesus nohuang, “Ooo, kawan dulun Yerusalem. Ikan ngompatoi kawan nabi. Mohotara nyoruhan kawan dulun hia ikan, tapi ikan medak iroh ma batu dapot matoi. Akuh nyau horoholuh nyolindung ikan, samah isan pohok co nyolingom kawan anak eh nyan pinda ilat eh. Tapi, ikan kuloi. 38Ngoneh ehboh! Mohotara aroko angar nyolindung bat Lopo-Eh co oko nyan kota Yerusalem tuh.#23:38 Antun cotuh jarin nyata waktu pomorintahan Romawi mohancur Lopo Mohotara hintang ngolauh kota Yerusalem hiah toun 70 M. 39Ikan aroko angar noto Akuh bat dapot ikan tohoku paluh mantun tintun Akuh, ‘Are tuh dombut ponah aran Tuhan Mohotara. Haas ito nara Are!’ ”#23:39 Ingkan Masmur 118:26.
S'ha seleccionat:
Matius 23: TBSS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió