Matius 21
21
Yesus tonyambut rami lau nyan kota Yerusalem
21:1-11
(Mrk. 11:1-10; Luk. 19:28-38; Yoh. 12:12-15)
1Kotika Yesus hintang kawan murid-Eh jonyo dapot Yerusalem, iroh tocak desa Betpage nyan beloi Lungkuh Jaitun.#21:1 Lungkuh Jaitun oko hubungai ma korombut Laca Co Tomonjanji Mohotara, iyohonon Laca co dulun Israel nisieh ‘Kristus’. Noto Jakaria 14:4. Yesus nyuhu duo murid-Eh tulak labih houn. Hie-Eh, 2“Tulakleh hia desa nyan muka non. Ikan ruo angar kito ico kontuluh koledai bawe hintang anak eh tonambitnyan johi nyan idi. Mukoi duo koledai cioh paluh mehen hia intoi. 3Amun oko dulun co ngisok, ‘Kura ikan mukoi koledai duo onon?’ Mantun ma dulun cioh, ‘Tuhan morulueh. Tapi Are angar jion nompulieh.’ ”
4Poristiwa cioh tojadi ina antun Mohotara jarin nyata isan co Hiah jaman sinan toporapot pian nabi, santuh naiieh:
5“Mantun ebat ma kawan ponduduk nyan kota Yerusalem,
‘Porhatibatboh, Lacamu dahat dombut indamme!
Are aroko pongasar.
Are nungang ico kontuluh koledai,
Ico kontuluh anak koledai co daja.’ ”#21:5 Ingkan buku Jakaria 9:9.
6Murid duo iyoh tulak paluh nguan nain co tomantun Yesus ma iroh. 7Iroh mehen koledai bawe cioh ma anak eh hia Yesus. Iroh mandak jubah doh nyan tungkui koledai cioh paluh Yesus cakat nyan tungkuieh.#21:7 Batuh anak Laca Salomo nungang koledai sobagai ciri are jarin laca (1 Raja-raja 1:33-35; 44). Nyan Jakaria 9:9 tonulih bahawa Laca Co Tomonjanji Mohotara angar nungang koledai ma cara isan iyoh ka. Antun cioh jarin nyata ma poristiwa cotuh. 8Oko orong lau dulun co mampar kawan jubah doh nyan calan ika ngohurmat Are. Oko ka orong dulun co notok kawan pating paluh norataieh nyan calan. 9Orong dulun nyalan nyan muka hintang nyan uwoi likut Yesus. Iroh ngororoho ma kojorih,
“Hosana! Narabat Laca ingkan koturunan Daud!
Narabat Are co dombut ponah aran Tuhan Mohotara!
Koponara indai-Eh nyan ika co poko hunyung!”#21:9 Dulun orong tatuh nara Yesus hapo antun ingkan buku Masmur 118:26.
10Hiah waktu Yesus muntam Yerusalem, ngolauh kota jarin rami lau. Kawan dulun nyan kota yoh ngisok, “Omeboh dulun conon?”
11Kawan dulun co ngonulu Yesus museh, “Tuhboh Yesus, ico nabi ingkan Nasaret nyan propinsi Galilea.”
Yesus ngomuho kawan podagang ingkan polontaran Lopo Mohotara
21:12-17
(Mrk. 11:15-19; Luk. 19:45-48; Yoh. 2:13-16)
12Paluh Yesus muntam hia polontaran Lopo Mohotara. Are ngomuho kokon dulun co hoborakang-bojuri nyan ika cioh.#21:12 Pasar cotuh nyutir kawan dulun co dombut ingkan ocu ika moli porsembahan. Tapi pasar cioh toumpi nyan ika co bokon. Bokon ma iyoh, iroh sobulih tosuloi duit awi baya boraoi hapo duit husus indan Lopo Mohotara. Dulun co nosuloi duit taiyoh derek curang ka. Are monjungkirbalik kawan meja co tohapan tukang nosuloi duit. Are ngolungkang kawan bangku co hapan kawan ponjuar bele merpati co ika porsembahan. 13Hie-Eh ma iroh, nyan ponah Surat Borasih “Antun Mohotara tuh ocop tonulih: ‘Lopo-Kuh iyohco lopo ika bodoa.’#21:13 Noto buku Yesaya 56:7. Tapi ikan umpieh isan guha porampuk!”#21:13 Noto buku Yeremia 7:11.
14Paluh, orong dulun bobuto hintang dulun co lumpuh ehen dombut hia Yesus nyan polontaran Lopo Mohotara yoh. Are pomambuh iroh. 15Tapi kawan imam kopala hintang kawan guru Hukum Torat kito aang co mosotahir yoh paluh jarin sangit. Iroh sangit ka tului oko kawan daja nyan polontaran Lopo Mohotara yoh ngororoho jorih ma Yesus, “Hosana! Narabat Laca ingkan koturunan Daud!”
16Kawan imam kopala hintang kawan guru Hukum Torat taiyoh mantun ma Yesus, “Koneh-Mu pai ome co tomantun kawan daja tatuh?”
Hien Yesus ma iroh, “Iyoh, Koneh-Kuh. Tapi arinai piji pai ikan mombaca antun cotuh nyan Surat Borasih?: ‘Iko ocop umpi ina kawan daja hintang kawan anak ua mahi mantun kawan koponara.’ ”#21:16 Ingkan buku Masmur 8:3.
17Paluh Are naat iroh. Are tulak hia luar kota Yerusalem hia desa Betania paluh hiloi nyan intin.
Yesus hotulut puun ara co aroko mua
21:18-22
(Mrk. 11:12-14,20-26)
18Ngonyua-nyua nyuap ondoeh, Yesus hopuli hia kota Yerusalem. Ponah solanai, Are nongkomo dou. 19Nyan saran calan, Are kito ico kobatang puun ara. Jadi, Are ngoroni puun ara cioh, tapi arelu oko buaeh. Baya oko kawan doui leh. Hie-Eh ma puun ara cioh, “Iko aroko angar piji mua bat.” Situ sini puun ara cioh jarin kojang.
20Hiah waktu kawan murid Yesus noto kojadian cioh, iroh potodangang. Hien doh, “Maindeoi bodai puun ara cioh lansung jarin kojang?”
21Hien Yesus ma iroh, “Ngonehboh! Amun ikan porocaya hintang aroko ragu-ragu, maka ikan mahi boraoi umpi aang co mosotahir isan co tongompiang-Kuh ma puun ara conon, hintang aroko baya tikas onon leh. Sompamaeh ikan nyuhu puruk cotuh, ‘Topangkat paluh topende hia ponah laut!’ Maka aang cioh angar tojadi. 22Kokon aranaang co tonyawot me ponah doa, asar ikan porocaya, ikan angar norimaeh.”
Kawan pomimpin dulun Yahudi ngisok ma angit tintun ome hak Yesus mantun sanioh
21:23-27
(Mrk. 11:27-33; Luk. 20:1-8)
23Opaiyoh, Yesus muntam hia polontaran Lopo Mohotara paluh majar nyan intin. Hiah iyoh, kawan imam kopala hintang pomimpin bangsa Yahudi dombut hia-Eh. Hien doh, “Ome hak-Mu nguan kokon onon? Ome co mihi hak indam-Mu?”
24Hien Yesus ma iroh, “Akuh mahi angar ngisok ma ikan. Amun ikan mihi jawapan indang-Kuh, maka Akuh angar mantun ma ikan tintun ome co mihi hak indang-Kuh ika nguan kokon aang tatuh. 25Tuhboh kisok Kuh: Ome co mihi hak indan Yohanes ika mombaptis? Mohotara atawa kolunon?”
Jadi, iroh morunding nganyap jawapan ma samah arop doh. Hien doh, “Amun ito mantun, ‘Mohotara co mihi hak cioh indan Yohanes’, Yesus angar ngisok ito, amun sanioh kura ikan aroko porocaya Yohanes? 26Tapi amun ito mantun: Ingkan kolunon, ito takut ma dulun orong, awi kokon dulun mongangap Yohanes yoh nabi.”
27Maka iroh mantun ma Yesus, “Kaih aroko monau ome co mihi hak cioh ma Yohanes.”
Yesus mantun, “Amun sanioh, Akuh mahi aroko angar maraeh ma ikan ome co mihi hak indang-Kuh ika nguan kokoieh tuh.”
Yesus nyamah kawan pomimpin dulun Yahudi ma daja co aroko nguan kojere tamaieh
21:28-32
28 Paluh Yesus mantun ma kawan imam kopala hintang kawan pomimpin bangsa Yahudi taiyoh, “Mikir eh tintun tindung cotuh: Oko ico tama co empun duo beti anak bakah. Tamaieh yoh tulak hia anak co portama paluh mantun, ‘Anakkuh, tulakbat bogawi nyan kabun angur ngonai tuh.’ 29‘Useh anak eh yoh, Aah mongkan akuh tuh.’ Tapi opaiyoh are loson paluh tulak bogawi nyan kabun angur cioh.
30Tamai yoh tulak hia anak co koduo paluh mantun aang co samah, nyuhu are tulak bogawi nyan kabun angur. Anak eh yoh museh, ‘Yoh, pa, akuh angar tulak.’ Tapi anak eh yoh aroko tulak. 31-32Nah, ingkan songkolang anak eh iyoh, comohboh co nguan kojere tamaieh?”
Useh doh, “Co portama tongohia tamaieh.”
Hien Yesus ma iroh, “Ngonehyoh! Ikan samah isan anak co aroko nontumun kojere tamaieh. Awi Yohanes Pombaptis dombut ika porahan ma ikan cara bolum co buah nyan tohimo Mohotara. Tapi ikan aroko porocaya are. Tapi kawan dulun co tomangap ‘bodosa’ isan kawan takih pajak hintang kawan bawen polacur, iroh porocaya ma Yohanes. Oluco ikan kito are tapi ikan aroko moneser hintang aroko porocaya ma are. Poko tului iyoh, kawan takih pajak hintang kawan bawen polacur angar meleh houn jarin anggota koluarga Korojaan Mohotara hangki ikan.”
Yesus nyamah kawan pomimpin dulun Yahudi ma kawan pongolola kabun angur co jahat
21:33-46
(Mrk. 12:1-12; Luk. 20:9-19)
33“Ngonehyoh tindung co bokon cotuh: Oko ico dulun empun tana co umpi kabun angur. Are umpi pagar toliut eh, ngali luwang ika mohoh bua angur taiyoh, hintang tomangun ka monara jaga nyan kabun cioh. Opaiyoh, are nyuhu ngolola kabun cioh ma pira-pira dulun, paluh tulak hia negri bokon. 34Hiah waktu sorang mutoi angur taiyoh jonyo dapot, empun kabun cioh nyoruhan pira-pira polayan eh hia kawan dulun pongolola taiyoh ika monu hasir kabun co jarin hak tioh. 35Tapi kawan pongolola taiyoh nawan kawan polayan taiyoh. Co ico tomolantu doh, are ico kole tongompatoi doh, hintang ico co bokon kole tomedak doh are ma batu.
36Opaiyoh, empun kabun cioh nyoruhan kole kawan polayan co bokon, meleh orong hangki co kosulak. Tapi kawan pongolola taiyoh umpi iroh ma cara co samah. 37Kojekaieh, empun kabun cioh mantun ponah atoieh, ‘Mositi kawan pongolola taiyoh angar ngohurmat anakkuh.’ Maka are nyoruhan anak eh hia iroh. 38Tapi, kotika kawan pongolola taiyoh kito anak eh dahat dombut, iroh borunding samah arop doh, ‘are non daai co jarin empun kabun cotuh amun tamaieh ocop matoi. Ayu, ito ngompatoi are ina kabun cotuh jarin ito empuieh!’ 39Jadi, iroh nawan eh, hobuhut hobehet are hia luar kabun angur cioh, paluh ngompatoieh.”#21:33-39 Kabun angur molambang umat Mohotara, hintang empuieh mula Mohotara (Yes. 5:1-7). Kawan potani ponyewa molambang kawan pomimpin dulun Yahudi co kuloi kawan nabi. (Kawan polayan molambang kawan nabi taiyoh.) (2 Tawarik 36:14-16). Yesus mahi ocop monau roncana doh ika ngompatoi Are.
40 Paluh Yesus ngisok ma kawan imam kopala hintang kawan pomimpin bangsa Yahudi taiyoh, “Hiah waktu empun kabun angur yoh dombut, ome co angar tongompiai ma kawan pongolola taiyoh?”
41Hien doh ma Yesus, “Mositi are angar ngolumat kawan dulun jahat taiyoh. Paluh are angar nyuhu kawan dulun bokon co kolu mihi bagian hasir kabun indaieh tangar waktueh.”
42Hien Yesus ma iroh, “Mositi ikan piji mombaca nyan Surat borasih tintun otuh:
‘Batu co tonongkuloi kawan tukang bangunan ocop jarin batu poko penting ika bangunan eh.
Tuhan co nguan iyoh!
Ico alogawi co bungah lau indan to.’ ”#21:42 Ingkan buku Masmur 118:22-23.
43 Paluh Yesus mantun, “Jadi, ngonehbatlah otuh: hak me ika jarin anggota Korojaan Mohotara angar tomonu ingkan ikan. Hak cioh angar tomihi hia bangsa co angar nguan kojere Mohotara.
[44Batu cioh angar mohancur sika dulun co tahak nyan tungkuieh, hintang remuk sika dulun co tonyatueh.]”#21:42-44 Batu cioh molambang Yesus. Kawan pomimpin dulun Yahudi kuloi Are, tapi Are korinah penting. Are iyohco Laca Co Tomonjanji Mohotara, ‘Kristus’. Kawan dulun co tahak hia tungkui batu cioh hintang kawan dulun co tonyatu batu cioh molambang kawan dulun co kuloi Yesus. Iroh angar tomohukum matoi daai. Noto Yesaya 8:14-15; Daniel 2:34-35,44-45; Roma 9:31-33; 1 Korintus 1:23; 1 Petrus 2:8.
45Kotika kawan imam kopala hintang kawan pomimpin dulun Parisi ngoneh kawan tindung Yesus, iroh paham bahawa irohboh co tomaksut-Eh. 46Jadi iroh nganyap cara ika nawan Are. Tapi aroko bohanyi, awi iroh takut ma dulun orong co mongangap Yesus yoh nabi.
S'ha seleccionat:
Matius 21: TBSS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió