ሮመ 6
6
ናጋራስ ሀይቆ ክርስቶሳስ ደኦ
1ያትን፥ ኑኒ ዎይጋኔ? ፆሳ አ ኬሀተይ ዳራና መላ ናጋራን ምንድ ደእኖ? 2አካይ፥ ኑኒ ናጋራስ ሀይቅዳባ ግድኮ፥ ያትን፥ ኑኒ ህዛፐ ዋንድ ናጋራን ዳኔ? 3ኑ ኡባይ ክርስቶስ የሱሳራ እስፋናዉ ፃማቀትዳ ዎደ እያ ሀይቁዋን እያራ እስፋናዉ ፃማቀትዳይሳ ኤረከትዬ? 4ኑ ፃማቀትዳ ዎደ ክርስቶሳራ ሀይቅዳነ ሞገትዳ። ክርስቶስ ፆሳ አዋ ቦንቾ ዎልቃን ሀይቆፐ ደንድዳይሳ መላ ኑካ ኦራ ደኦን ዳና።#ቆላ 2:12.
5ኑ እያ ሀይቁዋን እያራ እስኖ ግድኮ፥ ሄሳዳካ፥ እያ ደንዱዋን እያራ እስኖ ግዳና። 6ኑ ህዛፐ ናጋራስ አይለ ግዶና መላነ ኑ ናጋራንቾ አሳተ ዎልቃይ ያና መላ ኑ ጭማ አሳተይ ክርስቶሳራ ካቀትዳይሳ ኤሮስ። 7እስ አስ ክርስቶሳን ሀይቅዳባ ግድኮ፥ እ ናጋራ ዎልቃፈ ላአ ከይስ። 8ኑኒ ክርስቶሳራ ሀይቅኮ፥ እያራ ደኦን ዳናይሳ አማኖስ። 9ክርስቶስ ሀይቆፐ ደንድዳ ግሾ፥ ዛር እ ሀይቆናይሳነ ሀይቆይ ስንፈ እያ ሃሮናይሳ ኑ ኤሮስ። 10እ ሀይቅዳ ዎደ ናጋራስ እስቶሆ ዉርሰ ጋካናዉ ሀይቅስ፥ ሽን ሀእ ደኦን ፆሳስ ደኤስ። 11ሄሳዳካ፥ ህንተ ናጋራስ ሀይቅድ፥ ጎዳ ክርስቶስ የሱሳ ባጋራ ፆሳስ ደኦን ደኤይሳ ቆፕተ።
12ሄሳ ግሾ፥ ህንተ፥ ህንተ አሳተ አሙዋስ ኪተቶና መላ ሀይቅያ ህንተ አሳተ ናጋር ሃሮፖ። 13ቃስ ህንተ አሳተ ናጋራ ኦናዉ ጌላተ ሚሸ ኦድ እሞፍተ። ሽን ህንተ ሀይቆፐ ደንድድ፥ ደኦን ደእያ አሳዳ ህንተ አሳተ ፆሳስ እምተ። ቃስ ህንተ ኩመ አሳተ ፅሎ ኦሶ ኦናዉ ፆሳስ አድ እምተ። 14ህንተ ፆሳ አ ኬሀተ ጋርሳን ደኤታፐ አትሽን፥ ህገፈ ጋርሳን ደኦና ግሾ ናጋር ህንተና ሃራናዉ በሰና።
ፅሎተ አይለ
15ያትን፥ ኑ ዎይጋኔ? ህገፈ ጋርሳን ግዶናሽን፥ ፆሳ አ ኬሀተ ጋርሳን ደእያ ግሾ ናጋራ ኦነዬ? አካይ፥! 16ህንተ እስ አሳስ ኪተታናዉ ህንተና አይለ ኦድ እምያ ዎደ ሄ ህንተ ኪተተይሳስ አይለ ግደይሳ ኤሬታ። ሄሳዳካ፥ ህንተ ናጋራስ ኪተትኮ፥ ህንተዉ ሀይቆ ኤህያ ናጋራስ አይለ ግዴታ። ዎይኮ ህንተ ፆሳስ ኪተትኮ ፅሎተ ኤህያ ፆሳስ አይለ ግዴታ። 17ካሰ ህንተ ናጋራስ አይለ፥ ሽን ሀእ ህንተ ኤክዳ ቱማ ትምርትያስ ኩመ ዎዛናፐ ኪተትዳ ግሾ ፆሳስ ጋላት ግዶ። 18ህንተ ናጋራ አይለተ ቃሾፐ ብለትድ ፅሎተ አይለ ግድደታ።
19ህንተ ህንተ ቆፋን ዳቡራንቾ ግድያ ግሾ፥ ታኒ ኦደስካ ገልያ ኦገን ኦዳይስ። ካሰ ህንተ፥ ህንተ አሳተ ቱናነ ኢታባ ኦናዉ አይለ ኦድ እምዳይሳ መላ ሀእ ህንተ አሳተ ጌሽ ግዳና መላ ፅሎተ አይለ ኦድ እምተ።
20ህንተ ናጋራስ አይለትድ ደእያ ዎደ ፅሎተስ ሃረተከታ። 21ህንተና ሀእ ዬላይያ በን ህንተ ኢታ ኦሱዋፐ አይ ማደ ደምደቲ? ሄ ኦሶታ ዉርሰይ ሀይቆ። 22ሽን ህንተ ናጋራ አይለተ ቃሾፐ ብለትድ፥ ፆሳስ አይለ ግድደታ። ሄስ ህንተና ጌሽ ኦድ መርና ደኡዋኮ ካለስ። 23ናጋራ ጋተይ ሀይቆ። ሽን ፆሳይ፥ ኑ ጎዳ ክርስቶስ የሱሳ ባጋራ እምያ እሞታይ መርና ደኦ።
S'ha seleccionat:
ሮመ 6: GFBEVF
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Word for the World International and The Word for the World Ethiopia