ሀዋረታ 28
28
ጳዉሎስ ዩሾይ አባን ተቀትዳ ቢታ ማልታን
1ኑኒ ጋፃ ሳሮ ከይዳ ዎደ ጋክዳ በሳይ ዩሾይ አባን ተቀትዳ ቢታ፥ ማልታ ግደይሳ ኤርዳ። 2ማልታ አሳይ ኑስ ዳሮ ኬሀ ኬህዶሶና። እር ቡክያ ግሾነ ሜግያ ግሾ ታማ ኤድ ኑና ኡባ ሞክዶሶና። 3ጳዉሎስ ዳሮ አፍራ ሺሽድ ታማን ዎሽን፥ ሾሽ ሴላ ግሾ ከይድ እያ ኩሽያ ቦላ ፃፀትድ እያ ዱክስ። 4ማልታ አሳይ ሾሽ ጳዉሎሳ ኩሸን ፃፀትዳይሳ በእዳ ዎደ እሶይ እሱዋኮ፥ “ቱማ ሀ ኡራይ ሸምፖ ዎዳ አስ፤ ሀር አቶሽን አባፈ እ አትንካ ፆሳ ፕርዳፈ#28:4 ፆሳ ፕርዳፈ፦ ሄ ዎደ ሄ ቢታን ዱማ ዱማ ማጫ ፆሳት ደኦሶና። ኤንታፈ እስንያ ኢታ ኦያ አሳ ፕርድያሮ። እያ ፕርዳ ፆሲ ጌተታ ፄገታሱ። አትድ ፓፃ ዳናዉ ዳንዳእቤና” ያግዶሶና። 5ሽን ጳዉሎስ ባ ኩሽያፐ ሾሻ ዉፃርክድ፥ ታማን የግስ፤ እያ አይኮካ ቆህቤና። 6ኤንቲ፥ “እያ አሳተይ ክፄስ፥ ዎይኮ አኬኮና ኩንድድ ሀይቄስ” ግድ እያ ናጎሶና። ሽን ዳሮ ዎደ ናግድ እያ አሳተን አይብካ ዱማትዳባይ ይን፥ “ሄስ ፆሰ” ያግድ ባንታ ቆፋ ላምዶሶና። 7ሄ ሄራን ዩሾይ አባን ተቀትዳ ቢታ ሀላቃ፥ ፑፕልዮሳ ጌተተይሳስ ጋደይ ደኤስ፤ ሄ ጋላስ ጋካናዉ እ ኑና ሲቆን ሞክስ። 8ፑፕልዮሳ አዋይ ቆፆ፥ ምሻነ ኡሎ ኡትሶን ሀርገትድ ዝንእድ ደኤስ። ጳዉሎስ እያ ሶ ገልድ እያዉ ፆሳ ዎስስ፤ ባ ኩሽያ እያ ቦላ ዎድ ፓስ። 9ሄሳፈ ጉየ፥ ዩሾይ አባን ተቀትዳ ቢታ፥ ማልታን ደእያ ሀርግያ ሀራ አሳትካ ይድ ፓፅዶሶና። 10ኤንቲ ኑና ዳሮ ቦንቾ ቦንችዶሶና፤ ኑኒ ማርካበን ባናዉ ደንድዳ ዎደ ኦገስ ኮሽያባ ኑስ እምዶሶና።
ጳዉሎስ ሮመ ጋክስ
11ሄ አጌናፐ ጉየ፥ ማልታን ባልጎ አድ ማርካበን ገልድ እስክንድረ ባናዉ ደንድዳ። ሄ ማርካብያ ቦላ ድዮስቆሮሳ ጌተትያ መንተ ኤቃታ ምስለይ ደኤስ። 12ስራኩሰ ካታማ ገልድ ያን ሄ ጋላስ ኡትዳ። 13ያፐ ደንድድ ረግዩመ ካታማ ጋክዳ። እስ ጋላሳፐ ጉየ፥ ዱገሀ ባጋ ጫርኮይ ጫርክን፥ ዎንተ ጋላስ ፑትዮላ ካታማ ጋክዳ። 14ያን ኑኒ እስ እስ አማንያ አሳታ ደምን፥ ባንታራ ሳምንታ ጋምአና መላ ኑና ዎስዶሶና። ሄሳፈ ጉየ፥ ሮመ ብዳ።
15ሮመን ደእያ አማንያ አሳት ኑባ ስእድ፥ አፍዮሳ ግያን፥ ሄ እማ ኬ ጋካናዉ ኑና ሞካናዉ ይዶሶና። ጳዉሎስ ኤንታ በእዳ ዎደ ፆሳ ጋላትድ ምነትስ።
16ኑኒ ሮመ ገልዳ ዎደ ጳዉሎስ ባና ናግያ ዎታዳርያራ ባርካ ደኦ ጌተትስ።
17ሄ ጋላሳፐ ጉየ፥ ጳዉሎስ አይሁደታ ሀላቃታ ባኮ ፄግስስ። ኤንቲ ሺቅዳ ዎደ ኤንታኮ፥ “ታ እሻቶ፥ ታኒ ኑ አሳ ዎይኮ ኑ አዋታ ዎጋ ቦላ አይብ ቆሆካ ኦብከ፥ ሽን ታና የሩሳላመን ቃችድ ሮመ አሳስ አድ እምዶሶና። 18ኤንቲ ታ ሞቱዋ በእድ ሀይቆስ ጋያባ ታ ቦላ አይብባካ ደምቦና ግሾ ታና ብላናዉ ቆፕዶሶና። 19ሽን አይሁደት ሄሳ እፅዳ ዎደ፥ ‘ታባ ቄሳረይ ፕርዶ’ ያጋስፐ አትሽን፥ ታኒ ታ ደርያ ሞትያባይ ደእን ግደና።#ሀዋ 25:11. 20ታኒ ህንተና ፄግስዳይ ህንተና በአናዉነ ህንተዉ ሀይሳ ኦዳናሳ። ታኒ ሀ ሳንላታን ቃሸትዳይ እስራኤለ አሳይ ናግያ ኡፋይሳ ግሾሳ” ያግስ።
21አይሁደ ሀላቃት ጳዉሎሳኮ፥ “ኑስ ይሁዳፐ ነባ ፃፈትዳ ዳብዳበይ ጋክቤና። ያፐ ይዳ አሳታፐ እሶይካ ነባ ኢታ ኦድዳይ ባዋ። 22ሽን ሀ ነ ካልያ አማኑዋ ዱማ ዱማ በሳን አሳይ እፀይሳ ኑኒ ኤርያ ግሾ ነ ቆፋ ስአናዉ ኮዮስ” ያግዶሶና።
23ኤንቲ ባንታ ያና ጋላስ ጳዉሎሳስ ቃፃርድ፥ ሄ ጋላስ ዳርድ እ ደእያሱዋ ይዶሶና። እ ዎንታፈ ኦማርስ ጋካናዉ ፆሳ ካዎተባ ኤንታዉ ማርካትስ። ቃስ ኤንቲ የሱሳባ አማናና መላ ሙሰ ህግያፈነ ናበታ ማፃፋፐ ቆንጭስድ ኤንታ ታማርስስ። 24እሶት እሶት ጳዉሎስ ግዳይሳ አማንዶሶና፥ ሽን ሀራት አማንቦኮና። 25ኤንቲ ባንታ ግዶን ኦዳ ማኦና እፅዳ ዎደ ጳዉሎስ እስባ ግዳፐ ጉየ ብዶሶና። እ ሀይሳዳ ያግስ፦ “ጌሻ አያናይ ኑ አዋታስ ናብያ እሳያሳ ዶናን ኦድዳይስ ቱማ።
26“ ‘ኔኒ ሄ አሳኮ ባዳ፥
ህንተ ስስ ስኤታ፥ ሽን ህንተዉ ገለና፤
ህንተ በኦ በኤታ፥ ሽን ደመከታ።#እሳ 6:9-10.
27አይስ ጊኮ፥ ሀ ደርያ ዎዛናይ ሙምስ፤
ኤንታ ሀይይ ቱልስ፤
ኤንታ አይፈይካ ጎዘትስ።
ሄስ ባይነኮ፥ ኤንቲ ባንታ አይፍያን በእድ፥
ባንታ ሀይን ስእድ፥ ባንታ ዎዛናን አኬክድ፥
ታኮ ስማናሽን፤
ታካ ኤንታ ፓናሽን’ ያጋ” ያግስ።
28“ህዛ፥ ሀይስ ፆሳ አቶተ ኪታይ አይሁደ ግዶናይሳታስ ግደይሳ ኤሬታ። ኤንትካ ስአና” ያግስ።
29ጳዉሎስ ሄሳ ግዳፐ ጉየ፥ አይሁደት ባንታ ግዶን ዳሮ ፓላምሸ ከይድ ብዶሶና።
30ጳዉሎስ ከራ ኬን ናምኡ ላይ ኩመ ደእስ፤ ያን ደእሸ ባኮ ያ ኡባ ሞኬስ። 31ያሽ ባይናነ ኦንካ ድጎናሽን ፆሳ ካዎተባ ሳባክስ፤ ጎዳ የሱስ ክርስቶሳባ ቆንጭስድ ታማርሴስ።
S'ha seleccionat:
ሀዋረታ 28: GFBEVF
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Word for the World International and The Word for the World Ethiopia