ሀዋረታ 16
16
ፅሞትዮስ ጳዉሎሳራነ ስላሰራ ጋሄትስ
1ጳዉሎስ ዳርበነ ልስፅራ ብስ። ያን ፅሞትዮሳ ጌተትያ አማንያ አስ ደኤስ። እያ አይያ አማንያ አይሁደ ማጫስ፥ እያ አዋይ ግርከ አስ። 2ልስፅራንነ እቆንዮነን ደእያ አማነይሳት ፅሞትዮሳባ ሎይድ ማርካትዶሶና። 3ጳዉሎስ ፅሞትዮሳ ባራ ኤፋናዉ ኮይድ፥ እያ አዋይ ግርከ አስ ግድዳይሳ ሄ በሳን ደእያ አይሁደ ኡባይ ኤርያ ግሾ እያ ቃፃርስ። 4ኤንቲ ካታማታራ ብሸ የሩሳላመን ደእያ ሀዋረትነ ጭማት ዎዳ ህግያ አማነይሳት ናጋና መላ ኤንታዉ ኦድሸ አዶሶና። 5ሄሳ ግሾ፥ ዎሳ ኬት አማኖን ምንሸ፥ ታይቦንካ ጋላስ ጋላስ ዳር ዳር ብዶሶና።
ጳዉሎስ ማቀዶነ ባናዉ ፄገትስ
6ኢሰን ቃላ ኦዶና መላ ጌሻ አያናይ ኤንታ ድግዳ ግሾ፥ ፕርገራነ ጋላትያ ቢታራ አዶሶና። 7ኤንቲ ሚሰ ዛዋ ጋክዳ ዎደ ብታነ ባናዉ ኮይዶሶና። ሽን የሱሳ አያናይ ኤንታ ድግስ። 8ሄሳ ግሾ፥ ኤንቲ ሚሰ ማታራ አሸ ፅሮኣዳ ዎዶሶና። 9ጳዉሎስ ቃማ ቆንጨን እስ ማቀዶነ አስ ባኮ፥ “ማቀዶነ ፕናዳ ኑና ማዳርክ” ያግሸ ኤቅድ ዎስሽን በእስ። 10ቆንጨ እ በእዳፐ ጉየ ኤለስድ ኑኒ ማቀዶነ ባናዉ ኮይዳ። አይስ ጊኮ፥ ዎንገላ ያን ደእያ አሳስ ኦዳናዉ ፆሳይ ኑና ፄግዳይሳ ኤርዳ።
ሊድያ ክርስቶሳ አማናሱ
11ፅሮኣዳፐ ደንድድ ማርካበን ገልድ ሳሞትራቀ ብዳ፥ ዎንተ ጋላስ ናጱለ ብዳ። 12ያፐ ደንድድ ማቀዶነ ቢታን ደእያ ፍልጵስዩሳ ካታማ ብዳ። ፍልጵስዩስ ሮመ አሳይ ደእያ ካታማ። ኑኒ ሄ ካታማን ጉ ጋላስ ኡትዳ።
13ሳምባታ ጋላስ ካታማፐ ጋፃን ሻፋ ዶናን አይሁደት ፆሳ ዎስያ በሲ ደኤይሳ ኤርድ ያ ብዳ። ሄ በሳን ሺቅዳ ማጫሳስ ቃላ ኦድዳ።
14ኑና ስእያ አሳፐ እስ ሊድያ ጌተትያ ትያትሮና ካታማፐ ይዳ፥ ፆሳ አማንዳ ዞኦ አፍላ ዛልእያ፥ ማጫስያ ደአዉሱ። ጳዉሎስ ኦደይሳ እያ ስአና መላ ፆሳይ እ ዎዛና ዶይስ። 15ሊድያ ባ ሶ አሳራ እስፈ ፃማቀትዳፐ ጉየ ኑኮ፥ “ህንተ ታና ጎዳ ቱማ አማናሱ ጊኮ ታ ሶ የተ” ጋዳ ምንዳ ዎሳሱ።
ጳዉሎስነ ስላሰይ ቃሸትዶሶና
16ኑኒ ፆሳ ዎስያ በሳ ብሽን ኢታ አያናይ እ ቦላ ደእድ ማሮያ እስ ጌላኦ ጋንዶይ ኑራ ጋሄታሱ። እያ ካያዳ ዳሮ ሚሸ ባ ጎዳታስ ኤሀዉሱ። 17ጳዉሎሳነ ኑና ካላዳ፥ “ሀይሳቲ ኡባፈ ቦላ ፆሳ አይለታ! ኤንቲ ህንተ አታና ኦገ ኦደይሳታ” ጋዳ ዋሳሱ።
18ኡባ ጋላስ ሄሳዳ ጋዉሱ። ሽን ጳዉሎስ ይሎትድ ጉየ ስሚድ፥ ሄ አያና፥ “የሱስ ክርስቶሳ ሱንን ኔኒ ኢፐ ከያ” ግድ ኪትስ። ኢራካ ኢታ አያናይ ኢፐ ከይ አግስ።
19ሽን እ ጎዳት ባንታዉ ሚሸ ደምያ ኦገይ ይዳይሳ በእድ፥ ጳዉሎሳነ ስላሰ ኦይክድ፥ ዳባባ ዳይናታ ስን ጎች ኤፍዶሶና። 20ዳይናታ ስን ኤንታ ኤፍድ፥ “ሀይሳቲ አይሁደ አስ ግድሸ ኑ ካታማ አሳ ዳሮ ዋይሶሶና። 21ኑኒ ሮመ ቢታ አስ ግድሸ ኤካናዉነ ኦናዉ ዎጋ ግዶናባ ታማርሶሶና” ያግዶሶና።
22አሳይ እስ ባጋ ግድድ፥ ጳዉሎሳ ቦላነ ስላሰ ቦላ ደንድዶሶና። ዳይናት ኤንታ ማኡዋ ቃርድ ፃምአን ሾጫና መላ ኪትዶሶና። 23ኤንታ ዳሮ ዋዳፐ ጉየ፥ ቃሾ ኬ ገልስዶሶና። ቃሾ ኬ ናገይስካ ኤንታ ምን ናጋና መላ ኪትዶሶና። 24ቃሾ ኬ ናገይስ ሄ ኪታ ኤክድ፥ ጳዉሎሳነ ስላሰ ቃሾ ኬስ ቆልአ ገልስስ። ኤንታ ቶሁዋ ዱፅስ።
25ሽን ግድ ብላሄ ግድያ ዎደ ጳዉሎሳራነ ስላሰራ ዎስሸነ ማዝሙረ የፅሸ ፆሳ ጋላቶሶና። ቃሾ ኬን ደእያ ሀራ አሳትካ ኤንቲ ግያባ ስኦሶና። 26ቆፖና ቃሾ ኬ ባሶይ ቃፃና ጋካናዉ ቢታ ቃፆይ ሀንስ። ሄ ሳተንካ ፐንገ ኡባይ ዶየትስ፤ ቃሸትዳ አሳ ኡባ ሳንላታይ ብርሸት ዎስ። 27ቃሾ ኬ ናገይስ ስኮፈ ባርክዳ ዎደ ቃሾ ኬ ፐንገ ኡባይ ዶየትዳይሳ በእድ ቃሾ አሳይ ከስ ኤክ ብዳባ ዳንን ባና ዎናዉ ማሸ ኤክስ። 28ሽን ጳዉሎስ ቃላ ቁ ኦድ “ኑ ኡባይ ሀይሳን ደእያ ግሾ ኔኒ ነና ቆሆፓ” ያግስ።
29ቃሾ ኬ ናገይስ ፆምፐ ዎስ ኤክድ ኤለስድ ጋ ዎፅስ። ኮኮርሸ ጳዉሎሳ ስንንነ ስላሰ ስንን ጉፋንስ። 30ኤንታ ካረ ከስድ፥ “ታ ጎዳቶ፥ ታኒ አታናዉ አይ ኦናዉ በሲ?” ያግስ።
31ጳዉሎሳራነ ስላሰራ እያኮ፥ “ጎዳ የሱስ ክርስቶሳ አማና፤ ኔራነ ነ ሶ አሳራ አታና” ያግዶሶና። 32ኤንቲ እያስነ እያ ሶን ደእያ ኡባስ ጎዳ ቃላ ኦድዶሶና። 33ቃማ ሄ ሳተንካ ቃሾ ኬ ናገይስ ኤንታ ኤፍድ ኤንታ ማዱን ሜጭስ። ኤለስድ ባ ሶ አሳ ኡባራ ፃማቀትስ። 34ጳዉሎሳነ ስላሰ ባ ሶ ኤፍድ ኤንታዉ ካ አስ። እ ባ ሶ አሳ ኡባራ ፆሳ አማንዳ ግሾ ኡፋይትስ።
35ሳእ ዎንትን ዳይናት፥ “ሄ አሳታ ብላ” ያግድ ዎታዳረታ ሀላቃታ እያኮ ኪትዶሶና። 36ቃሾ ኬ ናገይስ፥ “ህንተ ብለታና መላ ዳይናት ኪትዶሶና። ህዛ፥ ከይድ ሳሮ ቢተ” ያግድ ሄ ኪታ ጳዉሎሳስ ኦድስ።
37ሽን ጳዉሎስ፥ “ኑኒ ሮመ አስ#16:37 ሮመ አስ፦ ጳዉሎስ ሮመ አስ ያግድ ባና ፄግዳይ ሄ ዎደ አይሁደ ቢታ ሃረይ ሮመ ካዎተ ግድዳ ግሾሳ። ሄ ዎደ ሮመ ቢታን ደእያ አሳይ ፕርድ ባይና ጋራፈቶኮና። ግድሽን ኤንቲ ኑና ፕርድ ባይና አሳ ስንን ዋድ፥ ቃሾ ኬን የግዶሶና። ሀእ ኑና ጌማን ከይድ ቦ ጎና? ሀነና፥ ኤንቲ ባንታ ሁጰን ይድ ኑና ከሶ” ያግስ።
38ዎታዳረ ሀላቃት ዳይናታስ ሄሳ ኦድን፥ ጳዉሎሳራነ ስላሰራ ሮመ ቢታ አሰ ግድዳይሳ ስእዳ ዎደ ያይዶሶና። 39ሄሳ ግሾ፥ ዳይናት ይድ ኤንታኮ፥ “ኑኒ ህንተና ቆህዳ” ግዶሶና። ቃሾ ኬፈ ካረ ኤንታ ከስድ፥ ካታማፐ ከይድ ባና መላ ዎስዶሶና። 40ጳዉሎሳራነ ስላሰራ ቃሾ ኬፈ ከይድ ሊድያ ሶ ብዶሶና። ያን አማነይሳታራ ጋከትድ ኤንታ ምንድ ከይድ ብዶሶና።
S'ha seleccionat:
ሀዋረታ 16: GFBEVF
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Word for the World International and The Word for the World Ethiopia