Mark 7
7
1Jâ ndi ja Farisi na balěndi na bahuhu ba vakiyedi o Jěrusalěm, ba lataniya o Mâ‐a jadi. 2O bâ‐ba yěnidi beyokwedi beaju beâkâ be jaka beja na ndindo, yeně ndi na ba tuke benâ, ka bâ‐ba duwa ponda. 3Ikabojana Farisi na Jiu běhěpi bu taka o ja beja njo itě kabo ba ta ’tuka benâ, itata ja epepa ya batodu. 4Oningě ba viya o ihambanido ba jaka kabo ba ta o tuka benâ. Na belombo bepâkwě beitě be jadi ibeabu be di nângângo na ba tatakandi, pani ka ituka ja imâgi na mbeya, na melombo, na tagulu. 5Jâ ndi ja Farisi na balěndi ba uwa Mâ, na, E lě nde ya beyokwedi beâvě be ha tamwaka na bepepa bea batodu, ndi ba jaka beja ba tuke benâ. 6Ka Mâ‐a timbwana bâ, na, Isaia a huwakite o sâkâ ’nyěni menoki pani ka yâ di lěndwěngo, na,
Bato těkaba ba hekakidi ’Mba na belěbu beabu, ndi melema meabu me yavaniděngo n‘ Umba.
7Kakana ba kalakiyate ’Mba o naně, ba yokwakidě iyokwanidi via belekanako bea bato.
8O bakakiděni belekanako bea Anyambě, ndi o tatakani bepepa bea bato, pani ka ituka ja mbeya na sěngě ja mamâgi, na bea jângâ tědině bepâkwě beitě ibeanyu be hakě. 9Ka Mâ‐a vâ na bâ, na, O hakandi bwamu mětě! n‘ isenja ja elekanako ya Anyambě, na ovaně nd‘ inyěni o ka tatě bepepa beanyu. 10Ikabojana Mosěs a vâki, na, Hekakidě hângwě na nyângwě; tepě, A ka hâkě hangwě na ba nyangwě, a wake bowaka. 11Ndi o vâkândini na, Oningě moto a vâ, na hangwě na ba nyangwě na, Eâvě e diyedi o kovaka n‘ umba e ndi Kârban (e di na, Bověkwě o Anyambě a jadi) vâkâna a bi pwenjavwenja. 12Vâkâna wa bâbâkâni na a hake pě hangwě na ba nyangwě elombo; 13o hadivakiděni ndaga ja Anyambě na bepepa beanyu be hadi; na bea jângâ tědině beitě ibeanyu be hakě. 14O Mâ‐a bekidi ebimba yěhěpi ndiyango, ka Mâ‐a yâ na bâ, na, Inyěni běhěpi yokalakidi ’Mbani, o ka bweyakiděni: 15o ’bě na elombo o bwebwe ya moto e ngakiyě o mâ‐a jadi e ka yâlě o bevě mâ, ndi belombo be pumakě oviya o mâ‐a jadi, ekabe ndi be bevakě moto. 16Oningě moto a di na matâ ma yokakě, a yokakě. 17O Mâ‐a vakiyedi oviya ebimba, ka Mâ‐a ngiya o ndabo, ka beyokwedi beaju bea uwa Mâ o pělě ya ukanakâdi. 18Ka Mâ‐a vâ na bâ, na, O ibě tepě ni n‘ ibweyidě? Wa ’wěni na elombo yěhěpi e jadi o bwebwe e ngakiyě o moto, e ’bě na ngudi e bevakě mâ; 19ikabojana ya ngakiya o ’bumulema ’aju, ndi o ihuhu, na yâ ya pumwě o pěpěkě e vovolakandi na beja beěhěpi? 20Ka Mâ‐a vâ, na, E vakiyě o ulema, yâ ndi e bevakě moto. 21Ikabojana ovoně, o melema mea bato, nd‘ o pumakiyě ipikiliya ibe, inanganiya, ihonde, iweyana, iyiba, 22itângina, bebe, ijowa, uhâ, dihâ ibe, ikila ja Anyambě, maměmě, behayěhayě: 23belombo tě bebe ’kabe beěhěpi, be vakiyandi oviya utema, na beâ bea bevě moto.
24Oviya ’vaně ka Mâ‐a ’muwa nala o mapěpěkě ma Tair na Saidon, ka Mâ‐a ngiya o ndabo, A vahaka moto a yowakě, nd‘ A diyaka na ngudi e kutamakě. 25Mwajo a diyakidi na mwa mwajo ua nděmbě a diyaki na ilina ibe, o mâ‐a yokakidi sango ’aju, ka mâ‐a viya ka kwa o beko beaju: 26mwajo těně a diyakindi ua Grik, ua etomba ya Surofinisia, ka mâ‐a hâhâlidě Mâ, na, a pumake mwana ’aju ua mwajo děvil těně. 27Ka Jisus a vâ na ju, na, Bana ba take na vula vulango, ’kabojana e ’bě lukango na o nangâ beja bea bana na o ’hwa beâ mbwa. 28Ka mâ‐a yavwana Mâ, na, E, Upangiyi, ndi mbwa tě o ibongalo ja tagulu i jaka nguhu ja bana. 29Ka Mâ‐a vâ na ju, na, O nyanga ya ndaga těkadi, kěkě; děvil e věngěmindi mwan‘ ’âvě ua mwajo. 30O mâ‐a pâkidi o ndabo ’aju, ka mâ‐a kâbidě děvil ya věngěmě, mwan‘ ’aju ua mwajo a di nangudwěngo o ikondo.
31Ka Mâ‐a věngěmě pě o tungu ya Tair na Saidon, ka Mâ‐a pâ o etima ya Galili, a pudunganakindi hanganě ya tungu ya Děkapolis. 32Ka bâ‐ba vana o Mâ‐a jadi moto ua poke n‘ imbuke, ka bâ‐ba hâhâlidě Mâ na A kahakidě mâ ikadu jaju. 33Ka Mâ‐a nângâ mâ o pěpěkě ya ebumbu, ka Mâ‐a vamě mepenjo meaju o matâ maju, ka Mâ‐a tuwa malě, ka Mâ‐a kupaně emi ’aju; 34ka Mâ‐a tamuwa hěvěn oba, ka Mâ‐a veguma, ka Mâ‐a vâ na mâ, na, Efatha, yeně ndi, na, Bumwanakiya. 35Elěngiaha tepě ka matâ maju ma bumuwa, ka ukato mua emi ’aju mu a ’njuwaniya, a ka kalaka hohonganěngo. 36Ka Mâ‐a sombiyě bâ, na, ba langwake moto; nd‘ ulingo muaju u sombiyakě bâ nonaně yâ nyanga tě tepě eabu e hamanakidě yâ. 37Ba ka mamaka bomamaka, na, A handi belombo beěhěpi bwam‘; A pangakate poke i yokaka na mambuke ma kalaka.
S'ha seleccionat:
Mark 7: BNG1895
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Published by the American Bible Society in 1895.