ಯೋಹಾನ 2

2
ಕಾನಾ ಗಾಮ್‌ನು ವ್ಯಹಾ
1ತೀನ್ನೆ ದನ್ಮ ಗಲಿಲಾಯನು ಕಾನಾಕರಿ ಗಾಮ್ಮ ಏಕ್‌ ವ್ಯಹಾ ಥೂ. ಯೇಸುನಿ ಆಯ ಹಿಜ್ಜಾ಼ ಥಿ. 2ಯೇಸುನ ಅಜು಼ ಇನ ಶಿಷ್ಯರ್‌ನಾಬಿ ವ್ಯಹಾನ ಬುಲೈರಾಖ್ಯುಥು. 3ದ್ರಾಕ್ಷಿನು ರಖ್ಹ್‌ ಪುರ‍್ಯೂಕೊಂತೆ ಇನಖ್ಹಾಜೆ, ಯೇಸುನಿ ಆಯಾ ಇನ ದ್ರಾಕ್ಷಿನು ರಖ್ಹ್‌ ಕೊಯ್ನಿ” ಕರಿ ಬೋಲಿ.
4ಯೇಸುನೆ ಇನ, “ಆಯಾ, ಮನ ಆ ಅಖ್ಖು ಶನ ಬೋಲಸ್? ಮಾರಿ ವಖ್ಹತ್ ಬಿಜೂ಼ಬಿ ಕೋ ಐರ‍್ಹೀನಿ” ಕರಿ ಬೋಲ್ಯೊ.
5ತದೆ ಯೇಸುನಿ ಆಯಾನೆ ಆಳ್‌ನ ಖ್ಹಾರು, “ಯೋ ತುಮೂನ ಶಾತ್‌ ಬೋಲಸ್ಕಿ, ಯೋ ಕರೊ” ಕರಿ ಬೋಲಿ.
6ಬಂಡಾಥಿ ಬಣೈಹುಯು ಛೊ಼ ಟೊಟ್ಟಿ ಮ್ಹೇಲಿರಾಖ್ಯುಥು, ಯೆಹೂದ್ಯರ್‌ನಿ ಪದತ್ತಿಮ ಶುದ್ದಿ ಕರಾನಟೇಕೆ, ಅನ ರಾಕ್‍ತುಥು. ಹರೇಕ್ ಟೊಟ್ಟಿಬಿ ಖ್ಹುಮಾರ್ ಚಾರಿಖ್ಹ್ ಥಿ ಏಕ್‌ ಖ್ಹೋ ವೀಖ್ಹ್‌ ಲೀಟರ್ ಪಾಣಿಭರಾವ ಎವ್ಡು ಮೋಟು ಥೂ. 7ಯೇಸು ಯೋ ಆಳ್‌ ಖ್ಹಾರಾನ, “ಹೈರಾತೆ ಟೊಟ್ಟಿಮ ಪಾಣಿ ಭರೊ” ಕರಿ ಬೋಲ್ಯೊ. ಇಮ್ಮಸ್ ಇವ್ಣೆ ಯೋ ಟೊಟ್ಟಿಮ ಪಾಣಿ ಬಮ್‌ಭರ‍್ಯು. 8ತದೆ ಯೇಸುನೆ ಇವ್ಣುನ, “ಹಮ್ಕೆ ಅನಾಮಾನು ಥೋಡು ಪಾಣಿನ ಕಾಡಿಲಿಜೈ಼ನ್‌, ಖಾಣು-ಪಾಣಿನಿ ಬಾರೇಮ ದೇಖಿಲೇವ್‌ಕರಾಸ್ತೆ ಮೋಟಾನ ದೆವೊ” ಕರಿ ಬೋಲ್ಯೊ. ಇವ್ಣೆ ಲೀಜೈ಼ನ್ ದಿದು, 9ತದೆ ಇನೆ ದ್ರಾಕ್ಷಿನು ರಖ್ಹ್‌ ಬಣಿರ‍್ಹುಥೂತೆ ಪಾಣಿನ ಚಾ಼ಖಿ ದೇಖ್ಯೊ. ಯೋ ದ್ರಾಕ್ಷಿನು ರಖ್ಹ್‌ ಕಿಜ್ಗಾ಼ಥು ಆಯು ಕರಿ ಇನ ಮಾಲುಮ್ ಕೋ ಥೂನಿ, ಕತೋಬಿ ಪಾಣಿ ಕಾಡ್ಯುತೆ ಯೋ ಆಳ್‌ ಖ್ಹಾರಾನ ಆ ಮಾಲುಮ್‌ ಥು. ತದೆ ಇನೆ ಯೋ ವ್ಯಹಾನೊ ವ್ಹೆತುಲ್ಡಾನ ಬುಲಾಯು. 10ಅಖ್ಖುಜ಼ಣು ಅಛ್ಛು಼ ದ್ರಾಕ್ಷಿನು ರಖ್ಹ್‌ನ ಪಹಿಲೆ ದೀನ್ ನಿಷಾಛ಼ಡಿಗತೊ ತದೆ ಮಾಮುಲಿನ ರಖ್ಹ್‌ನ ದೇಸ್. ತೂತೊ ಅಛ಼್ಛ ದ್ರಾಕ್ಷಿನ ರಖ್ಹ್‌ನ ಹಮ್ಕೆಲಗು ದೀರಾಖ್ಯೊಸ್ ಕರಿ ಬೋಲ್ಯೊ.
11ಯೇಸುನೆ ಆ ಪಹಿಲು ಖ್ಹಣೇದ್ನ ಕಾಮ್ನ ಗಲಿಲಾಯನು ಕಾನಾ ಕರಿ ಗಾಮ್ಮಕರ‍್ಯೊ. ಹಿಜ಼್ಜ ಯೇಸು ಇನ ಮಹಿಮೆನ ವತಾಳ್ಯೊ, ಅಜು಼ ಇನ ಶಿಷ್ಯರ್‌ನೆ ಇನಾಪರ್‌ ವಿಶ್ವಾಸ್‌ ಕರ‍್ಯಾ.
12ಅನ ಬಾದ್‌ಮ ಯೇಸು, ಇನಿ ಆಯಾ, ಭೈಯೇ ಅಜು಼ ಇನ ಶಿಷ್ಯರ್‌ನಿ ಜೋ಼ಡ್ಮ, ಕಪೆರ್ನೌಮ್ ಕರಿ ಗಾಮ್‌ನ ಜೈ಼ನ್‌, ಥೋಡ ದನ್ ಹಿಜ್ಜಾ಼ ಥಾ.#2:12 ಮತ್ತಾಯ 4.13
ಯೇಸು ಮಂದಿರ್‌ಮ ಗಯೋತೆ
(ಮತ್ತಾಯ 21:12,13; ಮಾರ್ಕ 11:15-17; ಲೂಕ 19:45-46)
13ಯೆಹೂದ್ಯರ್‌ನ ಪಸ್ಕ ಪೂಜಾ಼ನೊ#2:13 ವಿಮೋಚನ ಕಾಂಡ 12.1-27 ದನ್ ಖನ್ನೆ ಐಗೂತೆ ಇನಖ್ಹಾಜೆ, ಯೇಸು ಯೆರೂಸಲೇಮ್‌ನ ಉಪ್ಪರ್ ಗಯೊ. 14ಹಿಜ್ಜಾ಼ ಮಂದಿರ್‌ಮ ಅದ್ಮಿಖ್ಹಾರು ಢಾಂಡು, ಮೇಂಢು, ಅಜು಼ ಪರ‍್ಯಾವ ವೆಚು಼ಕರ್ತುಥೂತೆ ಯೇಸುನೆ ದೇಖ್ಯೊ, ಅಜು಼ ಪೈಶಾ ತೋಡಾವಾನು ಧಂದೊ ಕರಾವಾಳುಬಿ ಇವ್ಣಿ ಇವ್ಣಿ ಮೇಜ್‌ಪರ್‌ ಬೇಶಿನ್, ಧಂದೊ ಕರುಕರ್ತುಥು. 15ಇನಖ್ಹಾಜೆ ಯೇಸುನೆ ಶಿಂದ್ರಾಥಿ ವಾಟಿನ್ ಏಕ್‌ ಕೊಲ್ಡಾನ ಬಣಾಯೊ, ಇನೇಥಿ ಯೋ ಖ್ಹಾರಸ್ ಜಾನ್ವರ್‌ನ, ಢಾಂಡಾನ ಅಜು಼ ಮೇಂಢಾನ ಮಾರಿನ್, ಮಂದಿರ್‌ಮಾಥು ಭಾರ್‌ ಹಕೇಳ್ಯೊ; ಪೈಶಾ ತೋಡಾವಾಳಾನು ಮೇಜ್‌ನ ರಡ್‌ಕೈನ್‌, ಪೈಶ ರಂಚಿದಿದೊ. 16ಪರ‍್ಯಾವೊ ವೇಚ಼ವಾಳಾನ, “ಹಜ್ಜಾ಼ಥು ಅನ ಪಳ್ಳಿ ಜಾ಼ವೊ! ಮಾರ ಬಾನಘರ‍್ನ ಬಜಾ಼ರ್‌ನಿ ಝ಼ಗೊ ಕರಾನು ಭೀರಾಖೊ!” ಕರಿ ಬೋಲ್ಯೊ. 17ತದೆ, “ತಾರಿ ಮಂದಿರ್‌ಪರ್‌ಲಿ ಘಣಿ ಪ್ಯಾರ್, ಮಾರ ಮಹಿ ಆಗ್‌ನಿಮತ್‌ ಬಳಾಸ್‌”#2:17 ಕೀರ್ತನೆ 69.9 ಕರಿ ವಚನ್‌ಮ ಲೀಖೈರ‍್ಹೂತೆ ಯೋ ವಚನ್ ಶಿಷ್ಯರ್‌ನಿ ಯಾದ್ಮ ಆಯು.
18ಯೆಹೂದ್ಯರ್ ಅದಿಕಾರಿನೆ ಯೇಸುನ ಖನ್ನೆ ಐನ್ ಬೋಲ್ಯು,ತೂ ಹಮೂನ ಖಿವು ಅದ್ಭುತ್ ಖ್ಹಣೇದ್‍ನು ಕಾಮ್ನ ಕರಿನ್ ವತಾಳಿಸ್ಕಿ ಅನೇಥಿ ತೂ ಶಾತ್ ಕರುಕರಾಸ್ಕಿ ಇನಿ ಹಕ್ ತುನ ಛಾ಼ ಕರಿ ಸಾಬಿತ್ ಉಷೆ.
19ತದೆ ಯೇಸುನೆ, “ಆ ಮಂದಿರ್‌ನ ರಡ್‌ಕೈನಾಖಿದೇವೊ, ಮೇ ತೀನ್ ದನ್ಮ ಅನ ಪಾಛು಼ ಭಾಂದೀಶ್”#2:19 ಮತ್ತಾಯ 26.61; 27.40; ಮಾರ್ಕ 14.58; 15.29 ಕರಿ ಜವಾಬ್‌ ದಿದೊ.
20ಯೆಹೂದ್ಯರ್‌ನೆ ಇನ, “ಆ ಮಂದಿರ್‌ನ ಭಾಂದಾನ ಛೊ಼ ಉಪ್ಪರ್ ಚಾ಼ಳಿಖ್ಹ್ ವರಖ್ಹ್‌ ಹುಯು! ತೂ ಅನ ತೀನಸ್ ದನ್ಮ ಭಾಂದಾನ ಓಳೆಜಾಸ್ಕಿ‍ ಶು?” ಕರಿ ಬೋಲ್ಯೊ.
21ಕತೋಬಿ ಯೇಸು ಖಿವಿ ಮಂದಿರ್‌ನಿ ಬಾರೇಮ ಬೋಲುಕ‍ರ್ತೋಥೊ ಯೋ ಇನು ಶೊಂತ್ ಶರೀರ್ ಹುಯಿರುಥು. 22ಯೇಸು ಮರೀನ್, ಜಿವ್ತೊಹುಯಿನ್ ಉಠಾನ ಬಾದ್‌ಮ, ಆ ವಾತೆ ಇನ ಶಿಷ್ಯರ್‌ನ ಯಾದ್ಮ ಆಯು, ತದೆ ಇವ್ಣೆ ವಚನ್‌ಮ ಲೀಖೈರ‍್ಹೂತೆ ಅಜು಼ ಯೇಸುನೆ ಬೋಲ್ಯೋತೆ ವಾತೆನ ನಂಬ್ಯು.
ಅದ್ಮಿನಿ ಚಾ಼ಲ್‌ನಿ ಬಾರೇಮ ಯೇಸುನಿ ಗ್ಯಾನ್
23ಯೇಸು ಪಸ್ಕ ಪೂಜಾ಼ನಿ ವಖ್ಹತ್‌ಮ ಯೆರೂಸಲೇಮ್ಮ ಥೊ, ತದೆ ಇನೆ ಕರ‍್ಯೊತೆ ಅದ್ಭುತ್‌ಖ್ಹಾರು ಘಣ ಅದ್ಮಿನೆ ದೇಖಿನ್‌, ಇನ ನಾಮ್‍ಪರ್ ವಿಶ್ವಾಸ್‌ ಕರ‍್ಯು. 24ಕತೋಬಿ ಯೇಸುನೆ ಖುದ್ ಇನಾಸ್ ಇವ್ಣಿ ವಿಶ್ವಾಸ್‌ಪರ್ ಮ್ಹೇಲಿದಿದೊಕೊಯ್ನಿ, ಶನಕತೊ ಯೊ ಖ್ಹಾರಸ್ನ ಮಾಲುಮ್‌ ಕರಿರಾಖ್ಯೋಥೊ. 25ಯೋ ಹರೇಕ್ ಅದ್ಮಿನ ದಿಲ್ನ ಮಾಯ್ನನ ಮಾಲುಮ್ ಕರಿರಾಖ್ಯೊಥೋತೆ ಇನಖ್ಹಾಜೆ ಕೋಣ್‌ಬಿ ಖೆವ ಅದ್ಮಿನಿ ಬಾರೇಮ ಯೇಸುನ ಸಾಕ್ಷಿ ಬೋಲಿವತಾಳಾನು ಜ಼ರೂರತ್ ಕೋಥೂನಿ.

Subratllat

Comparteix

Copia

None

Vols que els teus subratllats es desin a tots els teus dispositius? Registra't o inicia sessió

Plans de lectura i devocionals gratuïts relacionats amb ಯೋಹಾನ 2

YouVersion utilitza galetes per personalitzar la teva experiència. En utilitzar el nostre lloc web, acceptes el nostre ús de galetes tal com es descriu a la nostra Política de privadesa