लुका 2
2
येशुइ केबु
(मत्ती १:१८-२५)
1ओः तेःकासु रोमी क्याःल्खापकीइ छ्योम्बो क्याःल्बु अगस्तसकीइ क्याःल्खापला एःक्योक थाम्जेर मीःक्या टाःङ्जेला मीःन प्रुःको लाःती हुकुम तेर्सी।#२:१ दी मीःन प्रुःगेन हुकुमदी थाम्जेर मीःक्याइ रोमी क्याःल्बुला च्याल्गो च्याल्ज्युक लाःती तेर्ती एःके। 2दी हुकुमदी तोःङ्गीइ थाङ्माइदी एःके ओःले ओः तेःकासु सीरीयाइ हाकीमदी कुरेनीयस एःके। 3क्याःल्बुइ हुकुमराःरा थाम्जेर मीःक्या राःङ राःङगीइ केक्योक युःलला मीःन प्रुःजेला काःल्सी।
4ओः तेःकासु योसेफदी गालीलगीइ नासरत लाःकेन क्याःसाला तेःकुके। इःनाङ खुङ मीःन प्रुःजेलादी क्याःल्बु दाऊद केक्योक यहुदीयाइ क्याःसा बेथलेहेमला काःल्सी चीलेलाःना योसेफदी दाऊदकीइ छार्क्युफुर्क्यु एःके। 5योसेफ रा मरीयमगीइदी याःर्का क्याःप्केन ताम टीसीःङ्दी एःके ओः सोङ्गारा योसेफकीइ मरीयमलाङ ङीमुरा खेर्सी। ओः तेःकासु मरीयमदी जुबु ङीःपाक काःल्दी एःके। 6खुङक्या बेथलेहेमला एःकासुनारा मरीयमला पीःजा केगेन नाःजा क्याःप्सी। 7ओःले खुङगीइ छेस्यो पुः केसी ओःले ओः पीःजाला केःलाइ तुम्दी बस्तुइ साःगेन नेकीला ज्यासी चीलेलाःना ओःला खुङक्याला तेःचेला लोजक्याला ठाउँ माःज्योर।
स्वर्गदुतक्या ओःले लुःक कोःरालुक्या
8बेथलेहेम क्याःसाइ थामालारा थाङला कोःरालुक्याइ कुःङ्मु लुःक रुःङ्दी तेःती एःके। 9कोन्ज्योइ स्वर्गदुत चीग कोःरालुक्याइ तोःङ्ला थोङ्सी ओःले कोन्ज्योइ साङ्बु खुङक्याइ छ्योसीःराछ्योले थोङ्सी। दीखो थोङ्दी लुःक कोःरालुक्या जीबाइ माःङ्बुरा दार्सी। 10इःनाङ स्वर्गदुतकीइ खुङक्याला लाःसी, “माःजी, चीलेलाःना ङाः थाम्जेर मीःक्याला माःङ्बुरा खाम्साङगीइ याःबु लेःङ्गो ख्योङ्दी ख्याक्याइ तोःङ्ला ओःङ्दी एः। 11कोःदो, दाऊद केक्योक क्याःसाला तीःरीङ थार्च्युगेन्दी केदी एः, खुङरा ख्रीष्ट प्रभु इःङे। 12ख्याक्याइ ओः पीःजाला केःलाइ तुम्दी बस्तुइ साःगेन नेकीला ङ्याल्दी ज्याक्योक फ्रेकेन एः ओःले दीखोलाःम्लेरा ख्याक्याइ खुङला ङोःसेगेन एः।” 13ओः तेःकासुरा माःङ्बुरा राःङ्सा स्वर्गदुतक्याङ थोङ्सी ओःले कोन्ज्योला प्रशंसा पेःदेरा लु लेःङ्दी लाःसी,
14“थाम्जेरलेङ चोला नाःम्खालीङला तेःकेन कोन्ज्योइदी
जयजयकार एःच्युक,
ओःले जाम्बुलीङला काँःदी मीःक्याइ ङीमु खुङ केःदाङ एःपा, खुङक्याला खाम्साङ्बु ज्योर्च्युक।”
15कोन्ज्योइ स्वर्गदुतक्या नाःम्खालीङछ्योले लोःमीःजीक कोःरालुक्याइ चीगकीइ राःङ्साला लाःसी, “ताः, उः बेथलेहेमला डोगा ओःले कोन्ज्योइ लाःक्योक च्योःङ्रा ताम काःल्दी तागा।” 16खुङक्या गेबु पेःदी बेथलेहेमला काःल्सी। ओःला खुङक्याइ मरीयम, योसेफ ओःले बस्तुइ साःगेन नेकीला ङ्याल्ज्याक्योक पीःजाला थोङ्सी। 17ओःले कोःरालुक्याइ पीःजाला थोङ्दी पीःजाइ बारेला स्वर्गदुतकीइ लाःक्योक थाम्जेर ताम थाम्जेरला लाःतेर्सी। 18कोःरालुक्याइ लाःक्योक दीखो ताम कोःगेनक्या थाम्जेर याःमाछाक काःल्सी। 19इःनाङ मरीयमगीइदी दीखो थाम्जेर ताम याःबुले ठीवा चेती राःङगीइ सेम नाःङ्लारा ज्यासी। 20ओःले ओः कोःरालुक्याइ स्वर्गदुतकीइ लाःक्योक च्योःङ्रा थाम्जेर ताम कोःजे ओःले थोङ्जे ज्योर्काराङ कोन्ज्योला महीमा ओःले प्रशंसा पेःदेरा लोःदी काःल्सी।
पीःजाइ मीःन येशु ज्याक्योक
21ङीःमा केःइ ङीःमु पीःजाला खतना पेःसी ओःले खुङगीइ मीःन येशु ज्यासी, ओःखो मीःनदी खुङगीइ आमा जुबु ङीःपाक डोजे तोःङ्लारा स्वर्गदुतकीइ ज्यो लाःती लाःक्योक एःके।
येशुला कोःम्साला क्याप च्योल्क्योक
22मोशाइ तेर्क्योक ठीम च्योःङ्रा मरीयम चाङेन#२:२२ चाङेन मोशाइ तेर्क्योक ठीम च्योःङ्रा पीःजा केमीःजीक ङीःमा खालङीइ ङीःमु पीःजाइ आमा चाङ्जेला चीङ स्याःक्या कोःम्साला क्याप च्योल्कोःउके। ङीःमा काःल्सी ओःले योसेफ रा मरीयम ङीक्कारकीइ पीःजाला यरुशलेमगीइ कोन्ज्योइ मन्दीरला कोन्ज्योला क्याप च्योल्जेला ख्योङ्सी 23चीलेलाःना प्रभु कोन्ज्योइ ठीमला प्रुक्योक एः, “थाम्जेरकीइ छेस्यो पुः कोन्ज्योला क्याप च्योल्रा कोःउएः।”#प्रस्थान १३:२,१५ 24ओःन्डुलेरा कोन्ज्योइ ठीमगीइ लाःक्योक च्योःङ्रा छ्याप चीग तुःङ्कुःकुर की पुःर्कालीङगीइ ङीथाल पीःप्रु बली तेर्र्कोःउके।#लेबी १२:६-८
25ओः तेःकासु सीमीयोन लाःकेन मीः यरुशलेमला तेःकुके। खुङ याःबु मीः एःके। ओःले खुङगीइ कोन्ज्योला च्याःम्बु पेःउके। खुङ इस्राएलीक्याला सेन्च्युगेन्दी मीःइ लाःम तादी तेःकुके ओःले चाङ्मा ला खुङ ङीमु एःके। 26“कोन्ज्योइ ताङेन थार्च्युगेन ख्रीष्टला माःथोङ्बाइ ख्या मीसीए” लाःती चाङ्मा लाइ खुङला तोःङमीःजीकरा तेङ्दी एःके। 27खुङला चाङ्मा लालाःम्ले पेःदी कोन्ज्योइ मन्दीरला ख्योङ्सी। योसेफ ओःले मरीयमगीइ कोन्ज्योइ ठीमला प्रुःक्योक च्योःङ्राले येशुला कोन्ज्योला क्याप च्योल्जेला मन्दीरला ख्योङ्सी। 28ओः तेःकासु सीमीयोनगीइ पीःजाला खुङगीइ पाःङ्ज्याला खुर्सी ओःले कोन्ज्योला प्रशंसा पेःदेरा लाःसी,
29“ए प्रभु, ख्याइ राःङगीइ ताःम्ज्या पेःक्योक च्योःङ्रा,
ताः राःङगीइ लाबुला खाम्साङ्बुले सीजे तेर।
30चीलेलाःना ख्याइ ताङ्क्योक थार्च्युगेन्दीला ङाःइ थोङ्जे ज्योर्सी।
31ख्याइ खुङला थाम्जेर मीःक्याइ थोङ्ज्युक लाःती ताङ्क्योक इःङे,
32खुङरा यहुदीक्या भन्दा राःङ्सा क्युःपाइ मीःक्याला
ख्याइ लाःम तेङेन्दी छेमी इःङे।
ओःले ख्याइ इस्राएलीक्याइ महीमा पेःच्युगेन्दी खुङरा इःङे।”
33पीःजाइ बारेला सीमीयोनगीइ लाःक्योक ताम कोःदी खुङगीइ आबा रा आमा याःमाछाक काःल्सी। 34सीमीयोनगीइ खुङक्याला मोलाम तेर्ती पीःजाइ आमा मरीयमला लाःसी, “कोःदो, दी पीःजा इस्राएलला माःङ्बुरा मीःक्याइदी थार्चे ओःले सीःङ्दाककीइ लागी कोन्ज्योइ दाम्क्योक इःङे। कोन्ज्योइ खुङला चुःन्डुलगीइ लागी ताङ्दी एः इःनाङ माःङ्बुरा मीःक्याइ खुङला टाः पेःगेन एः। 35ओःले माःङ्बुरा मीःक्याइ सेमला ठीवा चेक्योक तामक्या थोङेन एः। ओःले ख्याइ सेम लाःना नोम्बो टीःइ सुर्क्योक च्योःङ्रा तुःक्पुइ काःङेन्दी एः।”
36कोःम्साला हान्ना लाःकेन मेःन्दा चीग कोन्ज्योइ लेःङ्गो तेर्केन पेःन्पीःजा एःके। खुङ आसेर फोलाइ फानुएलगीइ पोःमो एःके। याःर्का क्याःप्क्योकीइ लोः तीःनलारा खुङ मोःराङ्मु काःल्दी एःके। 37ओः तेःकासु खुङ लोः खाल सीः रा सीःजे काःल्दी एःके। खुङगीइ नाःमाङ कोन्ज्योइ मन्दीर मेःपोर्कुके, खुङ माःङ्बु च्योःङ्रा खा चाङ्मा तेःती कुःङ्मु ङीःमाला कोन्ज्योला प्रार्थना पेःदेरा पीमु चुदी फ्या छाल्दी तेःकुके। 38ओः तेःकासु खुङगीइयाङ मरीयम रा योसेफकीइ सुःरला ओःङ्दी कोन्ज्योला थुजीछे लाःसी ओःले यरुशलेमला ताःम्साङ जोजेला कोन्ज्योइ लाःम तागेन थाम्जेर मीःक्याला येशुइ बारेला लाःसी।
39कोन्ज्योइ ठीमगीइ लाःक्योक च्योःङ्रा पेःकोन्दी चे थाम्जेर लेःगा पेःसीःङ्दी योसेफ रा मरीयमगीइ पीःजा येशुला खेर्ती राःङगीइ गालीलगीइ नासरत लाःकेन क्याःसा लोःसी 40पीःजा येशु ल्हे ओःले नावाइ काङ्दी छ्योम्बो काःल्देरा काःल्सी ओःले कोन्ज्योइ मोलामदी खुङखाला एःके।
पीःजा येशु कोःम्साला
41लोःरी टाःङ्मा येशुइ आबा आमा यरुशलेमला नीस्तार मेःलीङला डोगेन पेःउके। 42तेन्दुरा च्योःङ्रा येशु लोः चीङ्ङी लेप्कासुना खुङक्याइ येशुला ङीमुरा मेःलीङला खेर्ती काःल्सी। 43मेःलीङगीइ ङीःमा सीःङ्मीःजीक खुङक्या खीमछ्योले लोःसी इःनाङ येशुदी यरुशलेमलारा तेःसी। दीखो तामदी खुङगीइ आबा आमाइ छोर्रा माःछोर। 44येशु राःङ्सा रोःक्या ङीमु ङीमुरा एःस्वाँ लाःती ठीवा साल्दी खुङ्क्या ङीःमा काःङगीइ लाःम काःल्सी। कुःङ्से काःल्मीःजीक खुङक्याइ ङेनपेन रा रोःक्याइ कील्ला खुङला छोल्गाला स्युःसी। 45खुङला काःलाङ माःफ्रेमीःजीक खुङ्क्या येशुला छोल्जेला फीर्च्या यरुशलेमछ्योले लोःसी। 46येशुइ आबा आमाइ छोल्सुना छोल्सुना ङीःमा सुम तीङ्ला खुङला कोन्ज्योइ मन्दीरला छ्येइ ठीमगीइ लोबेनक्या ङीमु तेःती खुङक्याइदी ताम कोःदेरा ताम टीःदी तेःक्योक फ्रेसी। 47येशुइ नावा रा खुङगीइ लेःन लोक्योक थोङ्दी थाम्जेर मीःक्या याःमाछाक काःल्सी। 48ओःन्डुले येशुला ओःला थोङ्सुना खुङगीइ आबा आमा याःमाछाक काःल्सी, ओःले खुङगीइ आमाइ लाःसी, “पुः, ख्याइ ङीःक्याला दीखो ची पेःक्योक? तादो ख्याइ आःबा रा ङाः तुःङाल पेःदेरा ख्याला छोल्देरा एःके!” 49“ख्याक्याइ ङाःला चीले छोल्क्योक? ङाः राःङगीइ आबाइ खीमला#२:४९ आबाइ खीम आबाइ खीम लाःक्योकदी कोन्ज्योइदी खीम इःङे। दीला कोन्ज्योइदी खीम लाःती कोःम्साला लाःक्योक इःङे। ओःङ्कोःउए लाःकेन ताम टेःम्बा म्याःके?” लाःती येशुइ लेःन लोसी। 50इःनाङ खुङगीइ लाःक्योक तामगीइ लेःन मरीयम रा योसेफकीइ सेमाःखु। 51ओः तीङ्ला येशु आबा आमा ङीमु नासरतला लोःसी ओःले खुङक्याइ लाःक्योक ताम ङीःन्दी तेःसी। खुङगीइ आमा मरीयमगीइदी दी थाम्जेर तामक्या टेःम्बा माःचेबाइ राःङगीइ सेमलारा ज्यासी। 52ओःले येशुदी कोन्ज्यो ओःले मीः ङीक्कारकीइदी मोलाम ज्योर्ती जुबु ओःले नावाला छार्तेरा काःल्सी।
S'ha seleccionat:
लुका 2: SYW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.