Kisah Para Rasul Uram 24
24
Sun Yahudi yala nang aryi Kaisar amwetam bunanyi si Feliks urasintam yanmai ura, er Paulus bisi tatab-tatab ebmai uram
24:1-9
1Ura, uki amubaryi mabmai ani, sun Yahudi yala nang kalikoka uram sengkwetena nang ton Yerusalem atei aryi anaboka Kaisarea atei yanmai. Ara, Er Imtamnyi kan ninyi kan noutam kuboka antanirdeirin sienyi si Ananias ab, ton sun Yahudi yala nang asi kalingna yuk nang ab aryi, “Er Paulus bisi tatab-tatab ebkwayeb,” tenen sun Kaisar amwetam bunanyi si Feliks bisi yanmai. A yanganmai ura, tatab-tatab ena diboka lilibde bingnamunyi si Tertulus bira sun ab tonkwa yanmai. Sirya yanmai ura, sunci er Paulus bisi tatab-tatab ebmai. 2Ura, er Kaisar amwetam bunanyi biryi, “Er Paulus bisi ai weki boyandarur,” eboka arukmou ura, er Tertulus bira sun Yahudi yala nang uram bobmunyi biryi er Paulus bisi tatab-tatab ebmou. Ara, erci ato ebmou,
“Nai, Kaisar amwetam bunanyi kanti niryi, ‘Teleb,’ ebmakin. Kanci nun mutuk kalingsurum akiryi nunda tuba-tuba teleb akwe kuramib. Kan bikdobto kuboka kalingnansirim akiryi nun mutuk asi bitabdeibmanto dinyi ilinto nai Kaisar amwetam bunanyi kanci bitardeiriransumwe. 3Nun Yahudi yala nang nirya aryi nun nai Feliks kanti, ‘Nun teleb kurdeirisururnyi,’ tenen kan si weik tuba-tuba ererdeikunub. 4Ura, niryi, ‘Nun nai uki bumang kibminiknyei,’ tenen uram cang kum ebkun. Ati, kanda teleb kanya borumnyi biryi kekeniminyi bok, niryi uram mitikanun ebniryi, anyi Paulus bisi tatab-tatab ebkun. 5Anyi Paulus bira ninyi malyi kiminingdurnyi kurur asi eibmoubwe. Dantam-dantam yibarur atei nirya asi anyi biryi nun Yahudi yala nang asi, ‘Sun kalingnansing nang uram kekebmunyei,’ eboka eteresurur. Anyi bira Nazaret ateinyi si Yesus bisi miliramnyi nang sienyi kurur. 6-7Tonda, anyi biryi mem en dinyi kunuboka Bait Allah ai asi malyi kibdeibmou. A deyok aryi, nunci ersi talebmoubwe. Ura, nunci anyi biti, ‘Er Musa biryi takubdeiansou to wenebkwayeb,’ tenebmoubwe bok, sun yin doun nang sienyi Klaudius Lisias biryi nun tenebmoubwe to sekminikoka anyi Paulus bisi lemyanmou. Lemyanmou ura, erci nunsi, ‘Sunci er Kaisar amwetam bunanyi dam bindokabmunci, er Paulus bisi tatab-tatab ena teleb,’ ebmou. 8Ura, ukuryok Kaisar amwetam bunanyi kanci anyi Paulus deyok lilibminyi ura, anyi bira malinyi kurur ara kanbabyi eibkwamarim. Ara, nunci ersi tatab-tatab enub uram asi kanci, ‘Diba ati ening,’ tenen bikwamarim,” ebmou. 9Ura, er Tertulus biryi a kunum sirya ebmou ura, sun er ab tonkwa wekmai Yahudi yala nang ababyi, “Tola kuma,” eboka er Paulus bisi tatab-tatab ebmai.
Er Paulus biryi er Kaisar amwetam bunanyi si Feliks urasintam tikokaburyi, erdamnyi libdanmou uram
24:10-23
10Sirya tatab-tatab ebmai ura, er Kaisar amwetam bunanyi biryi, “Er Paulus biryi uram ton ebkwandura,” tenen er taruk mobmob ebdongobmou. Er taruk mobmob ebdongobmou ba, er Paulus biryi erdamnyi libdandoka ato ebmou.
“Nai o, kwalina mitik kum kwaliramoubwe talak nirya asi kanci nun Yahudi yala nang deyok liliboka sengkweterandim. A deyok aryi, niryi teleb kanya boboka abniryi, ‘Nun nai biryi ni deyok ababyi diboka lilibkwamanir,’ tenen ni damnyi libdankun. Sun Yahudi yala nang aryi nisi tatab-tatab enunung bok, niryi malyi dinyi ton kum kubmase ati ebman. 11Nira Yerusalem atei asi yanmase ura, uki amolbaryi a kunum kubde binmoubwe ati ebman. Ara, ‘Er Imtamnyi si weik eboka molobkwan,’ tenen ni Yerusalem atei asi yanmase. Kanci lilinmaniminyi ababyi, niryi tola uram kum ebman ara bikwamanirim. 12Nira Yerusalem atei yanmase ura, ninyi tentok ababyi uram ton kum lulubdanmoubwe. Tonda, niryi sun bulubmai nang asi malyi kiminingna ton kum kubmase. Ara, sun Bait Allah ai dam asi bulubmai nang ab, sun Musa Uram eteren ai wekmai nang ab, sun atei keta bulubmai nang ab ababyi niryi malyito kum kibminikmase ati ebman. 13A nang aryi niti tatab-tatab enunung bok, ni malyi kun dinyi ton kum kunun ati, talyi uram akwe eboka abingiryi, nisi tatab-tatab ebmaning. Sunci niti, ‘Er malyi kubmou to asing eibmoubwe,’ ena kum enunung. 14Niryi malyi dinyi ton kum kubmase deyok aryi, niryi kansi uram ton lak ebkwaman. Nira nun Nai Imtamnyi nun abwe yabwe aryi moloraminyi bisi molonun. Er Imtamnyi bisi molonun, ukuryok eterena uram dib tenenun. Ninyi aryi nun Du Yesus deyok ati eterena uram dib tenen nang nunsi, ‘Malyi uram asi dib tenenung,’ eransing. Ato eransing bok, niryi a uram ati, ‘Dib en uram,’ tenenunci, nun Nai Imtamnyi bisi molonun. Er Musa biryi ebdeiansou uram nirya ara nibabyi dib tenenun. Tonda, sun Er Imtamnyi Uram ebdeibmaci to lak etereramnyi nang yuk nang aryi kerek sekmai uram nirya asi nibabyi dib tenenun. 15Sun yuk Yahudi yala nang aryi Er Imtamnyi bisi dibde bunung to, nibabyi Er Imtamnyi bisi dibde bunun. Ara, sunci, ‘Sun din nang kam bukokwaming,’ tenen dibde buraming to, nibabyi neiktoto teneboka dibde buran. Ara, ‘Teleb kun nang babyi malyi kun nang babyi erci kam bukeibkwansir,’ tenen ni dib tenenun. 16Ato tenenunci, busul kuboka abniryi, niryi, ‘Teleb dinyi akwe kubdeibtinyi,’ tenen tuba-tuba kurdeirirderan. Ara, ‘Er Imtamnyi bisi malyi kubminiknyei,’ tenen, ‘Sun ninyi asi malyi kubminiknyei,’ tenen teleb dinyi akwe kurdeirirderan.
17Ura, kwalina mikbaryi kwalibmai talak ara Yerusalem atei ton kum yangaranse ani, Yerusalem atei tamuryanmase. Ara, co bok bobmasiryi, ‘Ni kwit yabwe Yahudi yala nang kankan aryi utotoa ataranci nang asi karebkwan,’ teneboka yanmase. Tonda, ‘Er Imtamnyi bisi dama deibkwan,’ tenen yanmase. 18Ura, nira ato kubmase bok, Yahudi yala nang ninyi mikbaryi aryi nisi eibmanei. Ara, niryi er Musa biryi ebdeiansou to, ni damnyi me ilikeibdanmase ura, Bait Allah ai dam kunmase bok, a nang aryi nisi asing eibmanei. A eibmanei talak ara ninyi ilinto ni dam ton kum bulubmai ati ebman. Tonda, ni dam tikmaici, wekmai nang ara uram weikanun ngolokoka lulurdana uram ton kum ebmai. 19Niryi ninyi asi malyi kum kibminikmase bok, Asia mutuk kuramnyi Yahudi yala nang ton yanmai ura, sunci ninyi asi malyi kibminikmai. A nang ara nisi tatab-tatab ebmanei cok, kanda Kaisar amwetam bunanyi urasintam kum yanmang. A nang aryi kan urasintam asi yanmating obura, ni malyi kubmase dinyi asi lak eboka tatab-tatab ebniting. 20Ura, a yanmang nang aryi nisi, ‘Tatab-tatab ebtibyi,’ tenebmaning ara sun asing eibmanei to lak ebningiryi, ni malyi kubmanyi deyok asi lak kimdeirina teleb. Sun nun Yahudi yala nang asi uram sengkwetena nang aryi ni deyok asi lilibmai uca, niryi ni damnyi libdanmase ura, niryi una malyi dinyi kubmase do? Ni damnyi ton kum bikdanman ati, a nang aryi ni malyi kubmanyi dinyi lak kibkwaning. 21Niryi a nang urasintam tikokabsiryi, ni damnyi libdanmasiryok, niryi uram doboka ato ebmase. ‘ “Sun din nang asi kam bukokwaming,” tenena ara dib tenenun deyok aryi, sunci nisi ukuryok tatab-tatab ebmanurum.’ Niryi ato ebmase deyok aryi, a nang aryi nisi tatab-tatab ebmaning do?” ebmou. 22Ato eboka er Paulus biryi erdamnyi libdanmou. Sirya libdanmou ura, er sienyi Feliks bira sun Yesus miliramnyi nang dib tenen dinyi ati bita bikmunyi biryi, “A deyok ati a kunum sirya sisikmab,” ebmou. Ebmou cok, erci, “Sun yin doun nang sienyi Klaudius Lisias yanmaci ura, niryi kan deyok ati uram sekwetebkwan,” ebmou. 23Ura, er sienyi Feliks biryi sun yin doun nang seratus baryi kalingnamunyi bisi ato arukmou. “Er Paulus bisi diboka kalingdamunyi ababyi, er dongoboka kalingnandum ai umbura ara ur yibarandur. Tonda, er atabmaci dinyi asi er kwit yabwe aryi deiboka kareryangaramingnyi ura, sunci bisik seksinibmunyei.” Ato eboka er Kaisar amwetam bunanyi si Feliks biryi er Paulus deyok ati arukmou.
Sienyi si Feliks ab er ner Drusila ab aryi er Paulus ab ebdanmai uram
24:24-27
24Uki mikbaryi kunmai ani, er sienyi Feliks ab, er ner si Drusila ab aryi, “Er Paulus ab ebdatibyi,” tenen yanmarei. Feliks ner Drusila bira Yahudi ner kuramwe. A nang bitinyi yanmarei ura, er Feliks biryi arukmou ba, sun yin doun nang aryi er Paulus bisi boyanmai. Boyanmai ura, Feliks ab er ner ab kekenmarei ura, Paulus biryi Kristus Yesus bisi dib tenena deyok ati lak ebmou. 25Eterebmou ura, er Paulus biryi, “Er Imtamnyi teleb tenesurur dinyi ukuna teleb,” ebmou. Tonda, erci, “Nun malyi tenen dinyi darabdongobdandoka teleb ukuna teleb,” ebmou. Tonda, erci, “Er Imtamnyi biryi ninyi nirya ati sun malyi deyok lilibkwansir,” ebmou. Er Paulus biryi a dinyi nirya ebmou ba, er sienyi Feliks biryi kekebmou ura, er ilil kubmou. Ilil kubmou ba, erci Paulus bisi, “Ukuryok ara uram sirya sisikmanim. Aminda aryi teleb uki tum kubnici ura, niryi nabkiniryi, kan ab tonkwa tubto ebdankwankin,” ebmou. 26Ara, erci, “Er Paulus biryi nisi co bok karebnici ura, niryi ersi lobdeibkwan,” tenen erci Paulus bisi liki ilinto nabmou ura, uram sisingnandei. 27Kunmai ani, kwalina bitinyi sirya bisibmou ura, er weik sienyi si Kaisar biryi yuk amwetam bunanyi bisi tikeibmou ba, sienyi si Perkius Festus biryi er Feliks bisi unubmou. Ununa kabul bok, er Feliks biryi er Paulus bisi kum lobdeibmou. Ara, erci, “Sun Yahudi yala nang aryi nisi teleb tenebniting,” tenen erci Paulus bisi kum lobdeibmou.
S'ha seleccionat:
Kisah Para Rasul Uram 24: MTG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
@LAI 2007 (New Testament), @LAI2022 (Old and New Testament)