Kisah Para Rasul Uram 21
21
Er Paulus Yerusalem atei binmou uram
21:1-16
1Ura, nunda sun Efesus atei kuramnyi dib tenen nang kalingna nang ab bokdanmoubwe ura, nun weik co ngun-ngun wekokabuburyi anabdobmoubwe. Ura, ilila me kwan deici banmoubwe ani, me dumdum si Kos anmalakoka binmoubwe. Ura, akatei mabmoubwe ani, berekwe ura, nunda anaboka me kwan deici tubto banmoubwe ani, me dumdum si Rodos dam binmoubwe. Ura, tubto akatei bindoka mabmoubwe ani, berekwe ura, nunda anaboka me dumdum si Patara dam binmoubwe. 2Ura, Patara atei kunmoubwe ura, Fenisia mutuk binkwamwe weik co ngun-ngun asi eibmoubwe. Eibmaburyok, nunda a co ngun-ngun wengbindokabuburyi, anabdobmoubwe. 3Anabdobmabuburyi banmoubwe ura, bisik ai ara weikanun banmoubwe ani, weik me dumdum si Siprus asing eibmoubwe. Eibmaburyok, nunci a me dumdum youkwetam asi bisibmoubwe. Bisibmoubwe ura, nunci anmalakoka Siria mutuk asi binmoubwe. Ara, Siria mutuk doramnyi atei si Tirus binmoubwe. Akatei ara sun co ngun-ngun kalingna nang aryi sun weik co ngun-ngun umbura bobmai dinyi nirya asi yokminikwamnyi ati binmoubwe. 4Ura, co ngun-ngun aryi anabokabuburyi, nunda sun akatei kuboka nun Du Yesus bisi dib teneramnyi nang asi asing dirbinmoubwe. Dirbinmoubwe ura, sun ab tonkwa uki tabaryi kubmoubwe. Ura, Er Imtamnyi Kanya Roh Kudus aryi a nang asi eterebmou uca, sunci er Paulus bisi, “Kan Yerusalem atei biminyei,” ebmai. 5Ato ebmai bok, uki tabaryi sirya bisibmou ura, nun anaboka binmoubwe. Nunda co ngun-ngun dam tamurbanmoubwe ura, sun akatei kuramnyi dib tenen nang ab sun nermabwe ab tonkwa bindoka bongdeirirmasei. Bongdeirirmasei cok, ilila me katum dam yanmoubwe ura, nun nirya ara nun kutam ikdongoboka Er Imtamnyi bisi molobmoubwe. 6Ura, sirya kibdandoboubwe ura, nunda co ngun-ngun wengbinmoubwe bok, sunda sun ai yuk-yuk tamurorbinmai.
7Ura, nunda Tirus atei aryi anaboka ilila me kwan deici banmoubwe ani, atei si Ptolemais binmoubwe. Ura, nunci, “Sun akatei kuramnyi dib tenen nang asi asing dirbinkub,” tenen nun co ngun-ngun aryi anaboka dirbinmoubwe. Akatei binmoubwe ura, akatei nang ab kibdandokabuburyi, sun ab tonkwa uki tentok kubmoubwe. 8Mabmoubwe ani, berekwe ura, nunda co ngun-ngun tubto wekokabuburyi, me kwan deici banmoubwe ani, Kaisarea atei binmoubwe. Ura, nunci anaboka, “Nun kwit Filipus bisi asing dirbinkub,” tenen dirbinmoubwe. Filipus bira Teleb Uram lak eterebde baramunyi bisi dirbinmoubwe ura, er ab tonkwa kubmoubwe. Anyi Filipus bira sun kwaning ataramwe nang asi bongkareramunyi kuramwe. Anyi bira minob Yerusalem atei aryi dib tenen nang aryi, “Kwaning ataranci nang asi kwaning bokde karebkwanung,” tenen wa irmilin nang tabaryi tikeiamnyi. 9Anyi Filipus bira er nermabwe dumbaryi deiamwe ara ninyi kum doamnyi. A kam nerabwe asi Er Imtamnyi Kanya Roh Kudus aryi etereramwe uca, sunci Er Imtamnyi Uram ermuruboka lak etereramnyi.
10Ura, Filipus er ab tonkwa kunmoubwe ara uki mikbaryi bisibmou ura, ninyi tentok si Agabus yanmou. Anyi bira Yudea mutuk aryi Er Imtamnyi Uram ebdeibmaca etereramunyi bisi yanmou. 11Er Agabus nun dam yanmou ura, erci er Paulus sabya asi dakoka dobdobmou. Paulus sabya asi sirya dobmou ura, er Agabus biryi er mining yan taruk nirya labtaleboka debdanmou. Sirya debdanmou ura, ato ebmou, “Er Imtamnyi Kanya Roh Kudus aryi ato eboka lak kibmanir. A sabya damnyi bira ninyi aryi tabwe debkwaming. Ara, Yerusalem atei asi binmaci ura, sun Yahudi yala nang aryi ersi taleboka tabwe debkwaming. Sirya debingnyi ura, sun Yahudi yala nang aryi ersi sun yuk yala nang dam bobindoka abingiryi, ‘Anyi bisi obdarur,’ ebkwaming,” ebmou.
12Er Agabus biryi er Paulus biti ato ebmou ba, nun nirya aryi er Paulus bisi ato ebmoubwe, “Nai, Yerusalem atei ara bana mem. Kanda akatei Kaisarea atei asi kurorandum,” eboka ebdaraboka molobmoubwe. 13Engeboka molobmoubwe bok, er Paulus biryi nunsi, “Ni kwit yabwe, sun engena mem se. Sun engena aryi ni kanya asi mambul kibdeibnumunyei. Ninyi aryi nisi tabwe debningnyi ababyi, obningnyi ababyi, niryi, ‘Ni li,’ kum ebkwan. Nira nun Du Yesus bisi milinun deyok akiryi, niryi, ‘Ninyi aryi nisi obningnyi ababyi malyi,’ tenenun. Ninyi aryi nisi Yerusalem atei obningnyi ara ni teleb tenenun,” ebmou. 14Er Paulus biryi ato ebmou. Ara, nunci “Yerusalem atei bana mem,” ebmoubwe asi erci kum kekebmasou. Ura, nunci, “Er Imtamnyi biryi teleb tenebmaci to kunubdur,” tenen nunci, “Yerusalem atei bina mem,” ena ara takmoubwe.
15Ura, nunda Kaisarea atei ara uki mikbaryi kubmoubwe ani, nunci nun dinyi kiknibminikmoubwe ura, nunci, “Yerusalem atei binkwayeb,” tenen anabdobmoubwe. 16Banmoubwe bok, Kaisarea atei nang mikbaryi ara nun ab tonkwa banmoubwe. Ani, a nang aryi nunsi boboka Manason ai asi bobinmasei. Anyi Manason bira me dumdum si Siprus aryi deiaminyi kuramuryok, yuma talak aryi kuboka nun Du Yesus bisi dib teneramunyi kuramwe.
Er Paulus biryi Yakobus bisi dirbinmou uram
21:17-26
17Ura, nunda Yerusalem atei binmoubwe ura, sun akatei dib tenen nang aryi kilkil kanya boboka nunsi kibdobmasei. 18Mabmoubwe ani, berekwe ura, er Paulus ab nun er kwit yabwe ab tonkwa er Yakobus bisi dirbinmoubwe. Ara, sun dib tenen nang asi kalingnamnyi nang nirya buluboka er Yakobus ai wekmai asi nun dirbinmoubwe. 19Ura, er Paulus biryi sunsi, “Ni kwit yabwe,” ebmou ura, erci liliboka, “Er Imtamnyi biryi ni biriman aryi ato-ato dinyi kikniramwe,” eboka lak eterebmou. Lak eterebmou cok, erci sunsi, “Nira Teleb Uram etereranse ba, nun Nai Imtamnyi karebmou uca, sun yuk yala nang ababyi nun Du Yesus bisi dib tenenung,” ebmou.
20Er Paulus biryi ato ebmou ba, sun a wekmai kalingna nang aryi kekebmaici, Er Imtamnyi si weik ebmai. Ura, sunci er Paulus bisi ato ebmai, “Nun kwit Paulus, nun Yahudi yala nang kankan ababyi ninyi yubwa-yubwa ilinto aryi Er Yesus bisi dib teneraming ara kan bikdobdum. Dib tenenungci, er Musa biryi ebdeiansou uram asi iya busul kuboka kunuraming. 21Ura, a nang nirya ara kan eterena ara sun kanya kankana kurur. Ara, ninyi aryi tola uram boboka sun akatei kunung Yahudi yala nang asi Paulus kan deyok ati ato ebmai, ‘Er Paulus biryi sun yuk yala nang kankan kuraming Yahudi yala nang asi ato eboka etererande, “Er Musa ebdeiansou uram kununa ara taklobdarur,” eboka etererur,’ ebmai. Tonda, a nang aryi Paulus kanti ato ebmai, ‘Er Paulus biryi ato eboka etererande, “Sun mabwe asi den bama sekmunyei,” eboka etererur. Tonda, “Sun Yahudi yala nang kuramingnyi to tuba kunubmunyei,” eboka etererur,’ ebmai. Ura, ninyi aryi ato eboka kanda Paulus biti uram bobmai ati, sun akatei kuboka Yahudi yala nang aryi kan eterena ara sun kanya kankana kurur. 22Ati, ukuryok, una kubkwayeb do? Paulus kanda Yerusalem atei sirya yanmarim ara ninyi nirya aryi kekebkwamaking. 23-24Ninyi nirya aryi kanti, ‘Er Paulus biryi er Musa Uram asi kunurur,’ tenen bikwaming ati, kanci ukuryok nun ebkwinkib uram asi kunubdum. Nun kwit yabwe dib tenen nang kankan aryi ninyi dumbaryi nang ara Er Imtamnyi bisi, ‘Nun kisok otong kum kobdamibiryok, ato-ato kunubkwamib,’ eboka ebdeiamnyi. Ebdeiamnyi ura, kunubmai ani, sun kisok otong kum kobdankwamnyi talak asi ukuryok sirya bisibmou. Sirya bisibmou ati, sunci ninyi dama deiboka Er Imtamnyi si weik ebkwamaici, sun kisok otong asi kobdankwamai. Ara, er Musa biryi ebdeiansou to kunubkwaming ati, sunci ato kubkwaming. Ati, ukuryok kan ab a nang ab tonkwa bindokabmunci, sunci er Musa biryi takubdeiansou to sun damnyi kilibdandarur. Ato kuboka kilibdamunyi ura, kan Paulus biryi a nang ati kilingdana dengna dekdum. A nang aryi sun kisok otong asi kobdankwaming ati, kanci sun dengna dekwandum. Kanci ato kubminyi ura, ninyi nirya aryi kanti, ‘Er Paulus bira er Musa biryi takubdeiamwe uram asi kunurur,’ tenen bikwaming. Ba, sun yuk nang aryi bobmai uram ara, ‘Tola uram akwe kurur,’ tenen bikwanking. 25Ura, sun yuk yala nang kankan aryi dib tenen nang asi nunci kerek sengna ton sirya sekeibmoubwe. Ara, nunci sunsi, ‘Ato-ato kubdarur,’ eboka kerek sekeibmoubwe. Ara, ‘Kwemdeina asi deirin dinyi yina ab ining ton yina mem.’ Tonda, ‘Ngang kotokoka on dinyi asi yina mem.’ Tonda, ‘Ner ton sal ton talyi yordana mem,’ eboka kerek sekmoubwe,” ebmai.
26Ura, sun dib tenen nang asi kalingna nang aryi ato ebmai ati, er Paulus biryi sun ebmai uram asi kekebmou. Ura, mabmai ani, er Paulus biryi a dumbaryi nang ab tonkwa bindoka sun damnyi kilibdanmai. Er Musa biryi ebdeiamwe to kilibdanmai ura, er ab er kwit yabwe dumbaryi nang ab tonkwa Er Imtamnyi biti ninyi dama deirin ai Bait Allah ai dam binmai. Binmai ura, sunci sun Er Imtamnyi ai wa in nang asi ato ebmai, “Uki tabaryi kilibdabiryok, nun kilibdana talak sirya bisibmaci ura, nun yuk-yuk aryi Er Imtamnyi bisi dama deibkwayeb,” ebmai.
Er Paulus bira Er Imtamnyi biti ninyi dama deirin ai Bait Allah ai dam kunmou bok, ninyi aryi ersi talebmai uram
21:27-36
27Ura, uki tabaryi tum bisibkwamwe ba, er Paulus bira Er Imtamnyi biti ninyi dama deirin ai Bait Allah ai dam binmou. Sirya binmou ura, Asia mutuk aryi yanmai Yahudi yala nang aryi ersi asing eibmai. Asing eibmai ura, ninyi ilinto bulubmai asi, sunci yu kuboka sun bulubmai nang asi, “Anyi bira malinyi,” ebmai. Ebmai ura, sunci er Paulus bisi talebmai. 28Talebmai cok, sunci sun bulubmai nang asi ato ebmai, “Nun kwit yabwe Israel yala nang o, sunci miliroryasumunyi ba, anyi bisi talebkwayeb se! Anyi bira dantam-dantam yibinkirikoka nun Israel yala nang ati, ‘Malyi nang,’ eboka eterebde barur. Tonda, erci er Musa takubdeiansou uram ati, ‘Malyi uram,’ erur. Tonda, Bait Allah ai ati erci, ‘Malyi ai,’ erur. Ura, ukuryok anyi Paulus biryi yuk yala nang ton bobindoka Bait Allah ai dam asi yanmar. Yunani yala nang asi Bait Allah ai dam boyanmar ati, erci akai Er Imtamnyi ai asi malyi kibdeibmar,” eboka sun Asia mutuk aryi kuboka yanmai Yahudi yala nang aryi er Paulus bisi tatab-tatab ebmai. 29Ara, talyi ati eboka sunci er Paulus bisi tatab-tatab ebmai. Er Paulus ab Efesus ateinyi Trofimus ab Yerusalem atei noutam yibinmarei asi sunci minob asing eibmai. Asing eibmai uca, sunci bita kum bikoka, “Er Paulus biryi yuk yalanyi bisi Bait Allah ai dam bobinmar,” tenebmai. Er Paulus biryi ato kum kubmou bok, sun kum bikmai cok, talyitam asi ato tenebmai.
30Sun Asia mutuk aryi kuboka yanmai Yahudi yala nang aryi tatab-tatab ebmai uca, sun Yerusalem atei nang nirya aryi yu weik kuboka bulubmai ura, uram ngolokoka dobmai. Dobmai cok, sunci er Paulus bisi taleboka Bait Allah ai dam aryi kuboka kiliboka bosakwetebmai. Bosakwetebmai ura, sun Bait Allah ai kalingnamnyi nang aryi akai Er Imtamnyi ai bublan asi akiryok tirikdongobmai. 31Ura, sun bulubmai nang aryi, “Obtibyi,” tenebmaici, er Paulus bisi bokoka obnin binmai. Obnin banmai bok, sun yin doun nang sienyi biryi a kunmai to kekebmou. Ara, ninyi aryi uram boboka ersi ato ebmai, “Sun Yerusalem atei nang nirya ara yu weik kuboka bulubmangci, uram ngolokoka dobmang,” ebmai. 32Kekebmou ura, sun yin doun nang sienyi ab er arungnamnyi nang ab sun yin doun nang ab tonkwa er Paulus bisi lembinmai. Ura, sun bulubmai nang aryi sun yin doun nang yanganmai asi asing eibmai ura, sunci er Paulus bisi ona ara takmai.
33Ura, sun yin doun nang sienyi biryi er Paulus dam yanmouci, talebmou ura, erci sun yin doun nang asi ato eboka arukmou, “Anyi bisi besi tabwe bitinyi aryi debdarur,” ebmou. Ba, sirya debmai ura, er yin doun nang sienyi biryi sun a tikmai nang asi er Paulus biti ato eboka asibdenmou, “Anyi bira unanyi da? Anyi biryi una kubmar do?” eboka asibdenmou. 34Asibdenmou uca, ton nang aryi yuk dinyi ebmai bok, yuk nang aryi yuk dinyi ebmai. Uca, sun yin doun nang sienyi biryi er Paulus biryi kubmou to diboka kum bikmou. Diboka kum bikmou deyok aryi, erci sun yin doun nang asi arukoka er Paulus biti, “Anyi bisi nun yin doun nang atei bobindoka kalikdarur,” eboka arukmou. 35Arukmou ba, sun yin doun nang aryi er Paulus bisi bobanmai. Bobanmai ani, sun atei binmai ura, “Atei bowengbinkwayeb,” tenen sun atei bisik welebana kweitata asi bowelebai. Asi, sun Yahudi yala nang aryi aminda milibmai aryi uram ilinto ngolokoka dobmai. Ura, sun yin doun nang aryi, “Er Paulus bisi talyi obingnyei,” tenen ersi tomobtaleboka bowelebinmai. 36Bobinmai bok, sun Yahudi yala nang aryi aminda banmaici, sunci uram weik ngolokoka, “Anyi Paulus bisi obdarur,” ebmai.
Er Paulus biryi erdamnyi libdanmou uram
21:37-40
37Sun yin doun nang aryi er Paulus bisi sun atei bowelebinkoi bok, er Paulus biryi sun yin doun nang seribu baryi nang asi arungnamwe sienyi bisi ato ebmou. Ara, Yunani uram aryi eboka erci ersi ato ebmou, “Nai o, niryi kansi uram ton ena teleb do?” eboka asibmou. Ato eboka asibmou uca, er sienyi biryi kanya kankana kubmou ura, “Kanda Yunani uram ena ara kan bikmarim do?” ebmou. 38Ebmou cok, er sienyi biryi Paulus bisi ato ebmou, “Niryi kanti, ‘Mesir nang,’ tenebman bok, Yunani uram ena ati bingdumnyi kurum. Ati, kanda bai nang sienyi kum kurum do? Anyi biryi, ‘Weik sienyi si Kaisar uram asi tuba kunubibyei,’ ebmou ura, er miliramnyi nang ab Kaisar miliramnyi nang ab tonkwa obdanmai. Sirya obdanmai ura, anyi biryi er miliramnyi nang asi bobinmou. Ara, lulai boraming nang empat ribu baryi bulubdeiboka erci ninyi kun kum mutuk bobinmou. Niryi manmalibniryok, kanti, ‘Bai nang sienyi bica,’ tenebmakise,” ebmou.
39Sun yin doun nang sienyi biryi ato ebmou ba, er Paulus biryi ersi ato ebmou. “Nai o, nira Mesir nang kuma. Eda, Yahudi yala nang kunun. Nira Kilikia mutuk asi weik atei si Tarsis aryi deianeinyi kunun. Kanci, ‘Ur,’ ebniminyi ura, niryi sun bulubmang nang asi uram ton ebkwan,” ebmou.
40Er Paulus biryi ato eboka molobmou ba, er sienyi biryi, “Ur ebdum,” ebmou. Ebmou ura, er Paulus biryi kweitata dub tikmouci, “Uram kilikting,” tenen er taruk mobmob ebdongobmou. Mobmob ebdongobmou ura, sun uram ngolokoka donmai nang nirya ara uram kilikmai. Sirya kilikmai ura, er Paulus biryi sun Yahudi yala nang uram ara Ibrani uram aryi ebmouci, sun a bulubmai Yahudi yala nang asi uram ton ebkarebmou.
S'ha seleccionat:
Kisah Para Rasul Uram 21: MTG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
@LAI 2007 (New Testament), @LAI2022 (Old and New Testament)