Kisah Para Rasul Uram 18
18
Er Paulus Korintus atei bindoka kuramwe uram
18:1-17
1A sirya ura, er Paulus Atena atei aryi anaboka yuk atei si Korintus binmou. 2Binmou ura, ninyi tentok si Akwila er ab ebdanmarei. Anyi Akwila bira Yahudi yalanyi kuramwe bok, mutuk si Pontus aryi deiaminyi kuramwe. Pontus mutuk deiaminyi kuramuryok, Akwila bira a mutuk deibloboka Italia mutuk bindoka kuramwe. Kuramwe ani, Korintus atei yanamwe. Ara, er weik sienyi si Kaisar Klaudius biryi, “Sun Yahudi yala nang asi ni li,” tenen erci sun Yahudi yala nang nirya asi er atei si Roma aryi kuboka yakdonokamwe. Yakdonokamwe uca, Akwila ab er ner si Priskila ab tonkwa Italia mutuk aryi anaboka Korintus atei yanandei. Ura, er Paulus Korintus atei yanmouci, sun nang bitinyi asi asing dirbinmou. 3Asing dirbinmou ura, er Paulus biryi, “Ei, a nang bitinyi sunbabyi keis ol ai dona bikdei ara ni wa iran to irurung,” tenen bikmou. Bikmou uca, er ab sun ab tonkwa kuramiryi, wa tonkwa iramnyi. 4Tonkwa kuramiryi, wa in kum uki si Sabat tum berekne ura, er Paulus bira sun Yahudi yala nang aryi buluboka Musa Uram eteren ai wengbindoka, erci sun buluboka wengdamnyi nang ab Er Imtamnyi Uram deyok sisingnamnyi. Ara, erci, “Sun Yahudi yala nang ab sun Yunani yala nang ab Er Yesus bisi dib tenebting,” tenen sunsi Teleb Uram lak etereramwe.
5Kunmai ani, er Silas ab Timotius ab Makedonia mutuk aryi kuboka sunbabyi Korintus atei yanmarei. Yanmarei ura, er Paulus biryi keis ol ai dona aling wiramwe ara takloboka erci yuk uki tum ababyi sun Yahudi yala nang asi Teleb Uram tuba-tuba etereramwe. Ara, erci sunsi, “Nun Du Yesus bira Er Imtamnyi biryi bokwetebmou ninyi Lemsururnyi diboka kurur,” eboka etereramwe. 6Etereramwe bok, sun Yahudi yala nang aryi, “Tola uram erum,” eboka er Paulus biti, “Malinyi,” ebmai. Ebmai ba, er Paulus biryi sunsi, “Tola uram kuma, dib uram aca,” eboka donganibdeibmou. Donganibdeibmou cok, erci er ongon aling asi langtum-langtum eboka kiliblobmou. Ara, er Paulus biryi, “A nang ara Er Imtamnyi Uram dokdonokmang ati, ni sunsi deiblobkun,” tenen erci er ongon aling kiliblobmou. Kiliblobmou cok, erci sun akai bulubmai Yahudi yala nang asi ato ebmou. “Sunci Er Imtamnyi Uram dokdonokmarum ati, Er Imtamnyi biryi sunsi wenebsicei. Er Imtamnyi biryi sunsi wenebsici ba, sunci nisi tatab-tatab ebmunyei. Eda, sun damnyi dib kum teneboka malyi kurandum akiryi Er Imtamnyi biryi sunsi wenebkwansir ati ebman,” ebmou. Ebmou cok, er Paulus biryi sunsi, “Ukuryok ara niryi sun Yahudi yala nang asi takloboka sun yuk yala nang asi Teleb Uram etererbinkun,” ebmou. 7Er Paulus biryi ato ebmou ura, erci sun Yahudi yala nang asi takloboka otam ai ara ninyi si Titius Yustus er ai binmou. Anyi bira Yahudi yala nang kum kuramuryok, Er Imtamnyi bisi miliramunyi kuramwe ai asi binmou. 8Ura, er Paulus biryi okai wengbindokaburyi, Teleb Uram eterebmou ba, ninyi si Krispus ab er mabwe silib ab nun Du Yesus bisi dib tenebmai. Anyi Krispus bira sun yuk yala nang aryi Musa Uram eteren ai kalingnamunyi kuramwe. Tonda, sun Korintus atei aryi yuk nang ilinto ababyi er Paulus biryi etereramwe uram asi kekebmaici, dib tenebmai. Dib tenebmai ura, er Paulus ab er kwit yabwe ab aryi sunsi me dongobmai.
9Kunmai ani, uki tentok tum aryi lukunda aryi nun Du Yesus biryi lak kibmou uca, er Paulus biryi dib dinyi asi asing eibmou. Asing eibmou uca, nun Du Yesus biryi ersi ato ebmou, “Paulus, kan ilil kubkicei. Teleb Uram eterena ati takminyei. Eda, kan kanya katabum ebkou ba, Teleb Uram eboka lak etererandum. 10Nira kansi milirankin ati, kan ilil kukina mem. Ninyi aryi kansi malyi kum kubdeibkiting. Akatei nang kankan ara Niryi ninyi ilinto asi Ni mabwe kibdeibkwan,” ebmou. 11Nun Du biryi er Paulus bisi ato ebmou uca, er Paulus biryi Korintus atei asi kuramwe ara kwalina tentok kwaliboka wala nabaryi bisibmou. A kuramwe ura, erci Er Imtamnyi Uram eboka sun Korintus nang asi etereramwe. 12Kuramnyi ani, weik sienyi si Kaisar biryi tikeibmou uca, a mutuk Akhaya asi ukuryok sienyi si Galio biryi kalikalibmou. Kalikalibmou ba, sun Yahudi yala nang aryi antanibdobmaici, “Er Paulus bisi tatab-tatab ebkwayeb,” eboka sunci ersi sienyi Galio bisi bobinmai. 13Bobinmai ura, sun Yahudi yala nang aryi er Galio bisi ato ebmai. “Nai o, anyi Paulus biryi sun ninyi asi malyi kurminingnansir. Ara, weik sienyi si Kaisar biryi, ‘Mem,’ eboka arungsurur uram asi yan yaniriryok, erci, ‘Er Imtamnyi akwe molobdarur,’ eboka etererur,” ebmai. 14Ato eboka tatab-tatab ebmai ba, er Paulus biryi, “Libdankun,” teneabwe bok, sienyi Galio biryi uram doboka sun Yahudi yala nang asi ato ebmou. “Sun Yahudi yala nang se. Talyi uram boyangana ara ni bouranir. Anyi biryi malyi dinyi dobmate ura, niryi sun tatab-tatab ebmarum uram asi kekebmatinyi. Anyi Paulus biryi malyi dinyi ton kum doramwe tenebman. 15Sunci ersi tatab-tatab enmarum dinyi ara sun Yahudi yala nang mamun lulurdan uram deyok akitikwe ebmarum. Ati, sun Yahudi nang sien nang aryi anyi Paulus deyok asi lilibkwanung. A deyok ara niryi lilibman kum kubmanir,” ebmou. 16Ato ebmou ura, er Galio biryi sun Yahudi yala nang asi yakwetebmou uca, sun deyok lilin dam aryi sakwetebindobmai. 17Sakwetebindobmai bok, sun yuk nang aryi ninyi si Sostenes bisi taleboka kulabmai. Anyi Sostenes bira Yahudi yala nang kuramuryi, Musa Uram eteren ai kalingnamunyi kuramwe. Sun yuk nang aryi er Sostenes bisi kulabmai asi er Galio biryi eibmouci, erci, “Se mem,” kum ebmou. Eda, erci “Malyi,” tenebmouci, ukublobmou.
Er Paulus bira Siria mutuk aryi kuboka Antiokhia atei tubto tamurbinmou uram
18:18-23
18A sirya ura, er Paulus Korintus atei asi uki weik kuramwe ani, erci sun dib tenen nang asi, “Ni binkun ati, da kubdarur,” eboka molobmouci, bokdanmai. Bokdanmai ura, er Paulus ab er kwit Akwila ab Akwila ner Priskila ab tonkwa anabdobmai. Anabdobmai ura, sunci weik co ngun-ngun ara Siria mutuk binkwamwe co ngun-ngun asi wekoka ilila me kwan deici banmai. Bana kum kuabiryok, sunda co ngun-ngun dararyangan atei si Kengkrea tuba kunmai cok, er Paulus biryi er kisok otong dilou kwabdanmou. Minob ura, er Paulus biryi Er Imtamnyi bisi, “Kanci nisi milibniminyi ura, niryi ni kisok otong min kum kobdankwan,” eboka ebdeiamwe. Ebdeiamwe ura, sirya kunuabwe ura, ukuryok er otong kum kobkabokamwe talak sirya bisibmou. Sirya bisibmou ati, er Paulus biryi er kisok otong kobdanmouci, erci Er Imtamnyi si weik ebmou. 19A sirya ura, weik co ngun-ngun wekokabiryi, me kwan deici banmai ani, atei si Efesus binmai. Binmai ura, Akwila ab er ner Priskila ab ara Efesus atei asi kurandei bok, er Paulus biryi, “Nira anaboka Antiokhia atei binkwan,” tenebmou. Tenebmou ura, erci sun Efesus atei kuramnyi Yahudi yala nang aryi buluboka Musa Uram eteren ai asi wengbindokaburyi, erci sun Yahudi yala nang asi Teleb Uram eterebmou. 20Eterebmou ba, sun Yahudi yala nang aryi ersi, “Nai o, a eterebmasirim uram deyok ara uki weik kekebtibyi tenebmab ati, kan ab nun ab tonkwa kubkwayeb,” eboka molobmai. 21Ato eboka molobmai bok, er Paulus biryi sunsi ebmou ara. “Ato tenen kum, ni anaboka binkwan. Er Imtamnyi biryi, ‘Teleb,’ tenebnici ura, ni aminda tubto tamuryanyi uca, ebdankwayeb,” ebmou. 22Ato eboka bokdanmai ura, er Paulus bira Efesus atei aryi anaboka co ngun-ngun deici bukoka banmou. Ilila me kwan deici banmou ani, Palestina mutuk atei si Kaisarea binmou. Binmou ura, erci Yerusalem atei bindoka sun akatei dib tenen nang ab, “Ni kwit yabwe,” eboka kibdanmai cok, bokdanmai. Bokdanmai ura, er Paulus anaboka Antiokhia atei binmou. 23Antiokhia atei kunmou ani, erci anaboka Galatia mutuk ton Frigia mutuk ton yibinmou. Yibinmou cok, erci sun a mutuk kuramnyi dib tenen nang ab ebdanmaici, erci sun kanya katabdongobnin baramwe.
Ninyi si Apolos biryi sun Efesus nang asi Er Imtamnyi Uram etereramwe uram
18:24-28
24Ura, Akwila ab er ner Priskila ab Efesus atei asi kurandei bok, ninyi tentok si Apolos yanmou. Anyi bira Yahudi yalanyi bisi, Mesir mutuk atei si Aleksandria aryi deiaminyi kuramwe. Anyi Apolos bira Er Imtamnyi Uram deyok ilinto bikamunyi kuramuryi, erci co eboka eterenanyi kuramwe. 25Er Apolos biryi nun Du Yesus biti eterena diboka bikamuryi, erci kilkil asa kuboka sun yuk nang asi Er Yesus deyok ati bita liliboka etereramwe. Etereramwe bok, Er Imtamnyi Kanya Roh Kudus deyok ara erda bita kum bingnamwe. Ara, Er Imtamnyi biryi Er Kanya asi sun ninyi kanya dam dongoboka karebmou deyok ara, er Apolos biryi kum bingnamwe. Eda, minob ura er Yohanes biryi ninyi me dem dongoramwe deyok akwe er bingnamwe. 26Er Imtamnyi Kanya Roh Kudus deyok ati, er bita kum bingnamuryok, er Apolos biryi sun Yahudi yala nang buluboka Musa Uram eteren ai wengbindokaburyi, erci ilil kum asa aryi Er Yesus Uram eterebmou. Eterebmou bok, er Akwila ab er ner Priskila ab aryi er eterena kekebmarei. Kekebmarei ura, sunci er Apolos bisi, “Kan nun ai sisingyasurum,” eboka nabmarei. Nabmarei ura, sunci ersi bita kum bingnamwe dinyi asi bita eterebmarei. Eterebmareici, sunci Apolos bisi ato ebmarei. “Er Imtamnyi biryi ato-ato kuboka ninyi lemsurur,” eboka ersi bita eterebmarei. 27Ura, kunmai ani, er Apolos biryi, “Akhaya mutuk binkwan,” tenebmou ura, sun Efesus atei kuramnyi dib tenen nang aryi ersi, “Ur birum,” ebmai. Ebmai ura, sunci kerek sengna ton sekeibmai. Ara, sunci, “Nun kwit yabwe Akhaya mutuk kuraming dib tenen nang aryi er Apolos bisi, ‘Nun kwit,’ eboka kibdobting,” tenen kerek sekeibmai. Ura, er Apolos biryi Efesus atei aryi anaboka co ngun-ngun deici bukoka banmou ani, Akhaya mutuk binmou. Akhaya mutuk binmou ura, sun a mutuk kuramnyi dib tenen nang aryi ersi, “Nun kwit,” eboka kibdobmai. Ura, er Apolos biryi a mutuk kuramnyi dib tenen nang ara Er Imtamnyi biryi teleb kubdeibmou nang asi tingyanmou ura, erci sun kanya katabdongobnin baramwe. 28Ara, sun Yahudi yala nang aryi sun Er Yesus bisi dib tenen nang ab lulubdandoka, “Er Yesus bira talinyi bica,” ebmai asi er Apolos biryi ilil asa kum uca ato ebmou. “Er Yesus bira Er Imtamnyi biryi bokwetebmou ninyi Lemsururnyi kurur,” eboka er Apolos biryi Er Imtamnyi Uram aryi du dobmouci, erci uram ebdaraboka nun Du Yesus deyok ati dib en uram asi lak kimnamwe.
S'ha seleccionat:
Kisah Para Rasul Uram 18: MTG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
@LAI 2007 (New Testament), @LAI2022 (Old and New Testament)