Kisah Para Rasul Uram 15
15
Sun dib tenen nang asi kalingna nang aryi Yerusalem atei buluboka kuramiryi, uram sisingmai uram
15:1-21
1Kuramnyi ani, ninyi ton nang ara Yudea mutuk aryi kuboka Antiokhia atei yanganmai. A yanganmai nang aryi sun dib tenen nang asi ato ebmai, “Er Musa biryi kerek sekamwe to sunci sal asi den bama sekdarur. Den bama asi kum sekmunyi ura, Er Imtamnyi biryi sunsi kum lebkwansir,” ebmai. 2Ato eboka etereramnyi bok, er Paulus ab Barnabas ab aryi, “Ato tenen kum,” eboka sun ab tonkwa lulubdanmai. Lulubdanmai ba, sun dib tenen nang aryi er Paulus ab Barnabas ab ton sun kankan aryi yuk nang ab asi ato ebdeibmai, “Sunda Yerusalem atei bindoka sun Teleb Uram deyok kouboka eteren nang ab sun dib tenen nang asi kalingna nang ab ebdandoka a uram deyok sisikdarur,” ebdeibmai. 3Ato eboka ebdeibmai cok, sun Antiokhia atei aryi kuboka dib tenen nang aryi sunsi bokdonokmai. Bokdonokmai ura, Paulus ab Barnabas ab Antiokhia atei nang ton nang ab tonkwa anabdobmai. Ura, banmai ani, Fenisia mutuk ton Samaria mutuk ton yibanmai cok, sunci ato ebnin banmai, “Sun yuk yala nang ababyi sun malyi dinyi takloboka Er Imtamnyi bisi miliraming.” Ato ebnin banmai asi sun a mutuk aryi kuboka dib tenen nang aryi kekebmai ura, sun kanya kilkil weik kubmou. 4Banmai ani, Yerusalem atei binmai ura, sun akatei kuboka dib tenen nang ab, sun Teleb Uram deyok kouboka eteren nang ab, ton sun dib tenen nang asi kalingna nang ab aryi sunsi kibdobmai. Kibdobmai ura, er Paulus ab Barnabas ab aryi sunsi ato ebmarei, “Nunda Teleb Uram etereranoumwe bok, Er Imtamnyi biryi miliransou uca, sun yuk yala nang ababyi Er Imtamnyi bisi dib tenenung,” ebmarei. 5Ato ebmarei bok, ton nang aryi tikoka lulurdana uram ebmai. A lulubmai nang ara Farisi nang bok, nun Du Yesus bisi dib teneramnyi nang aryi sunci ato ebmai. “Nunda Yahudi yala nang aryi er Musa biryi kerek sekamwe to kunuramib to, sun yuk yala nang ababyi neiktoto ukubkwanung. Ara, sun yuk yala nang ababyi, ‘Er Imtamnyi biryi nunsi er mabwe kibdobmasir,’ tenen sun sal nang ara den bama sekwanung,” ebmai.
6Ebmai ura, sun Teleb Uram deyok kouboka eteren nang ab, sun dib tenen nang kalingna nang ab aryi, “Una kubkwayeb?” tenen a deyok liliboka uram sisingmai. 7Uram weikto sisingmai ani, er Petrus biryi tikoka uram ton ebmou. Ara, erci sunsi, “Ni kwit yabwe kekendarur. Sirya bisibmou talak ara Er Imtamnyi biryi sun kankan aryi kuboka nisi wibnou ara sun bikmarum. Ara, niryi sun yuk yala nang asi Teleb Uram eterebkwanse ab, sun yuk yala nang aryi nun Du Yesus bisi dib tenebkwamnyi ab ati, Er Imtamnyi biryi nisi wibnou. A dinyi ara sun nirya bikmarum. 8Tonda, Er Imtamnyi bira ninyi kanya bingsururnyi biryi Er tenen kanya sirya lak kibmou. Ara, Erci, ‘Sun yuk yala nang ababyi Ni mabwe kibdeibkwan,’ teneboka Erci Er Imtamnyi Kanya Roh Kudus asi sunbabyi karebmou. 9Ati, Er Imtamnyi biryi nunda Yahudi yala nang ab sun yuk yala nang ab ati, ‘Yuk-yuk,’ kum teneransir. Den bama sengna deici aryi Erci nun kanya asi kum kilisurur. Eda, nun Du Yesus bisi dib tenebibyi deici aryi Erci nun kanya ab sun kanya ab neiktoto kiliransir. 10Ati, una deyok aryi sunci, ‘Sun yuk yala nang ababyi den bama sekwanung,’ ebmarum do? Ato ebmunyi ura, sunci Er Imtamnyi tenen dinyi asi bisik sekminikmunyei. Ati, sunci, ‘Er Imtamnyi biryi teleb tenerur dinyi asi kum ukubkwayeb,’ tenebmarum do? Sunci ato tenebmunyei. Er Imtamnyi biryi sunsi wenebsicei. Den bama sengna ati, nun Yahudi yala nang aryi, ‘Mambul weik kurdeirin dinyi,’ teneramib. Nun abwe yabwe aryi ato teneramnyi to, nunbabyi neiktoto tenenub. Ati, una deyok aryi sunci nun kwit yabwe yuk yala nang asi, ‘Den bama sekdarur,’ ebmarum do? Nunci nun kwit yabwe yuk yala nang asi takubman kum dinyi takubdeibibyei. 11Den bama sengna deici asi Er Imtamnyi biryi nunsi kum lebsute. Eda, nun Du Yesus biryi nunsi teleb kubdeibmasou deyok aryi, Er Imtamnyi biryi nunsi lebkwansir. Ato kuboka Erci nunda Yahudi yala nang ab yuk yala nang ababyi neiktoto lebkwansir. A dinyi asi nunda dib tenen nang aryi dib tenenub,” ebmou.
12Er Petrus biryi ato ebmou ura, sun bulubmai nang nirya aryi uram kilikmai. Ura, sun Barnabas ab Paulus ab aryi tikoka uram liliboka ato ebmarei, “Er Imtamnyi biryi nunsi miliransou aryi nunci ato-ato kuboka ilil tenen dinyi ukuranoumwe,” ebmarei. 13Sirya ebmarei ura, er Yakobus tikoka uram ton ebmou. Ara, erci sun bulubmai nang asi ato ebmou, “Ni kwit yabwe kekendarur. 14Nun kwit Simon Petrus biryi nunsi nukmasir uram asi sun nirya kekebmarum. Ara, nun Nai Imtamnyi biryi Er bico tenen dinyi asi lak kibmou cok, sun yuk yala nang kankan aryi kuboka ton nang asi wibmou. Ara, Er Imtamnyi biryi, ‘Sunbabyi Ni si weik ebkwanunung,’ tenen sunsi wibmou. 15A dinyi ara sun Er Imtamnyi Uram ebdeibmaci to lak etereramnyi nang aryi minob kerek sekeiamnyi to kurur. Ara, sunci ato eboka kerek sekamnyi.
16‘Er Imtamnyi biryi ato ebmar,
“Nira Imtamnyi biryi sun Israel yala nang asi taklobmase asi aminda aryi sun dam tamuryankwan.
Tamuryanyi ura, Niryi karebnyi uca, sun Daud yala nang aryi tubto kalikoka sun Israel yala nang asi iya arukwaming.
Ai daksakmar asi ninyi aryi tamuboka teleb kubdeiboka erebdeiboka doraming to,
Nira Imtamnyi biryi er Daud yala asi teleb kubdeibniryok, tubto erebdeibkwan.
17Ara, sun ninyi kankan aryi Er Imtamnyi Uram kum kekeramnyi nang aryi Nira Imtamnyi bisi moloryankwaning ati, Niryi er Daud yala asi teleb kubdeibkwan.
Tonda, sun Yahudi kuma yala nang kankan kuraming nang ara Nira Imtamnyi biryi Er mabwe kibdeibmou nang aryi Ni dam yankwanung ati, Niryi er Daud yala nang asi teleb kubdeibkwan.”
Nira Imtamnyi bira a dinyi nirya kunubdeibkwananyi biryi ato ebmasise,’ eamwe. (Amos 9:11-12)
18A dinyi ara Er Imtamnyi biryi kunubdeibkwamwe dinyi asi Er Imtamnyi biryi minob uca lak ebdeiansou,” ebmou.
19Ebmou cok, er Yakobus biryi ton ato ebmou, “Er Imtamnyi biryi ato ebmou deyok aryi, nunci sun yuk yala nang kankan Er Imtamnyi bisi milibkalibmang nang asi takubman kum dinyi takubdeibibyei. Ati, nunci sun yuk yala nang asi, ‘Den bama sekdandarur,’ ebibyei. 20Takubman kum dinyi kum takubdeibtibyi. Eda, nunci takubman dinyi tentok-tentok asi takubdeibkwayeb. Ara, nunci sunsi ato ebkwayeb, ‘Kwemdeina asi deibingnyi yina ton, ngang kotokoka obmangnyi dinyi ton ara yibmunyei. Tonda, ining ababyi yina mem. Tonda, ner ton sal ton talyi yordana mem.’ Nunci ato eboka kerek sekdeibkwayeb. 21A dinyi ati, nunda Yahudi yala nang aryi, ‘Ukuna mem dinyi,’ teneramib. Er Musa biryi ato eboka minob kerek sekamwe. Ura, minob uca ukuryok talak ababyi nun wa in kum uki tum berekci ura, sun bulubmangnyi nang aryi a uram kekeraming. Atei nirya ara Musa Uram eteren ai kuranci asi bulubmangnyi ura, uram erdeirin nang aryi a uram ara er Musa biryi kerek sekamwe uram asi nukde baraming,” ebmou.
Uram sisikmai ura, sunci sun Antiokhia nang asi, “Ato-ato kubdarur,” eboka kerek sekeibmai uram
15:22-35
22Er Yakobus biryi ato ebmou ura, sun Teleb Uram deyok kouboka eteren nang ab, sun dib tenen nang asi kalingna nang ab, sun dib tenen nang yuk nang ab aryi uram toubdeibmai. Ara, sunci ato ebdanmai, “Nun kankan aryi ninyi mikbaryi asi wibibyi ura, sun ab Paulus ab Barnabas ab tonkwa anaboka Antiokhia atei binkwanung,” ebmai. Ato ebmai ura, sunci Yudas uruma si Barsabas ab, Silas ab wibmai. A bitinyi nang ara sun dib tenen nang asi menengnandei nang kurandei. 23A bokdonokoi nang biriman aryi sunci kerek sengna ton deibmai. A kerek sengna umbura aryi sunci ato ebmai.
“Nun kwit yabwe dib tenen nang, teleb.
Sun Antiokhia atei aryi bulurandum nang ton, Siria mutuk aryi bulurandum nang ton, Kilikia mutuk aryi bulurandum nang asi, ‘Nun kwit yabwe,’ ebmasib. Sun yuk yala nang kankan aryi dib tenerandum nang asi kibdobmasib. Nunda Teleb Uram deyok kouboka eteren nang ab, dib tenen nang asi kalingna nang ab, dib tenen nang yuk nang ab aryi den bama sengna deyok ati uram sisikmoubwe. Uram sirya sisikmoubwe ura, nunci, ‘Ato-ato kubdarur,’ eboka kerek sengna ton kerek sekeibmasib. 24Ninyi mikbaryi nang sun dam yanmaici, talyi uram eterebmasei asi nun kekebmoubwe. Talyi uram eterebmai uca, sun dib tenen nang kanya kankana kusurur ara nun kekebmoubwe. A nang ara nun kankan aryi yanmai asi, nunci a nang asi kum bokdonokmoubwe ati ebmab. 25A deyok aryi, nunci uram dobdeiboka neik kanya boboka ninyi bitinyi asi wibmoubwe. A nang ara nun kwit yabwe boukwe weik kusurur nang Paulus ab Barnabas ab tonkwa bindoka sun dam yankwamaring. 26A bokdonokmasib nang ara nun Du Yesus bisi diboka miliranding nang kururung. Ara, ninyi aryi sunti, ‘Obtibyi,’ eramnyi ababyi, sunci tanglona kum uca nun Du Yesus Kristus si lak etererandei asi bokdonokmab. 27A bokdonokmasib nang si ara Yudas ab Silas ab asi bokdonokmasib. A nang ara sun dam yaringnyi ura, nun kerek sekeibmasib to sun si bambul aryi ebkwansiring. 28Nunci sun yuk yala nang asi takubman kum dinyi kum takubdeibkwayeb. Ati, nunci sunsi, ‘Den bama sekdandarur,’ kum ebkwayeb. A dinyi ara Er Imtamnyi Kanya Roh Kudus aryi sunsi teleb tenesurur. Tonda, nunbabyi neiktoto tenenub. Ara, sunda yuk yala nang asi takubman kum dinyi kum takubdeibkwansib. Eda, sunsi takubman dinyi akwe takubdeibkwansib. 29Ara, nunci sunsi ato eboka ebdeibkwayeb, ‘Kwemdeina asi deibingnyi yina ton, ngang kotokoka obmangnyi dinyi ton yibmunyei. Tonda, ining asi yina mem. Tonda, ner ton sal ton talyi yordana mem.’ Sunci a dinyi asi kisibdobmunyi ura, telebto kubkwandarur.
Teleb nun kwit yabwe, a kunum sirya sekmab,” eboka kerek sekdeibmai.
30A kerek sengna asi karebmai ura, sirya molobdanmaici, Yudas ab Silas ab sun Paulus ab Barnabas ab tonkwa anabdobmai. Ara, Yerusalem atei aryi anaboka banmai ani, Antiokhia atei binmai. Binmai ura, sun dib tenen nang nabmai ba, bulubmai. Sirya bulubmai ura, sunci a kerek sengna asi sun dam karebmarei. 31Ura, sun Antiokhia nang aryi a kerek sengna asi doboka nukmai ura, sun kanya kilkil kubmou. Ara, sunci, “A uram deyok aryi, nun kanya katabum ebmasir,” tenen sun kanya kilkil kubmou. 32A sirya ura, er Yudas ab Silas ab ara Er Imtamnyi Uram ebdeibmaca etererandei nang kurandei cok, sunci sun akatei kuboka dib tenen nang asi uram ilinto eboka eterebmarei. Eterebmarei cok, sunci sun kanya asi katabum ebdeibmarei. 33Ura, uki mikbaryi bisibmou bok, sun Yudas ab Silas ab sun Antiokhia atei kuboka dib tenen nang ab tonkwa kunmai. Kunmai ani, sunci, “Nun bokdonoksei nang asi tamurbinkwanim,” eboka molobmarei. Molobmarei ba, sun Antiokhia atei nang aryi sunsi, “Ur birurum,” ebmai ura, sunda anaboka Yerusalem atei tamurbinmarei. 34Silas biryi yuma aryi, “Ni binkun,” ebmou cok, erci aminda aryi, “A iya kubkwan,” tenebmouci, takmou ba, Yudas ab tonkwa kum binmarei. 35Yudas bira tamurbinmou bok, sun Paulus ab Barnabas ab Antiokhia atei tuba kunmarei. Kunmarei cok, sun ab yuk nang ilinto ab tonkwa etereramnyi. Ara, nun Du Yesus uram Teleb Uram etereramnyi.
Er Paulus ab Barnabas ab lulubdanmareici, bokdanmarei uram
15:36-41
36Kunmai ani, uki mikbaryi bisibmou bok, er Paulus biryi er Barnabas bisi ato ebmou. “Minob ura Teleb Uram eterebde binanoumwe atei yuk-yuk asi tamurbinkwinim. Ara, ‘Nun kwit yabwe dib tenen nang ara una kubde kunung do?’ tenen dirbinkwinim,” ebmou. 37Ebmou cok, er Barnabas biryi, “Yohanes uruma si Markus milibsir ba, tonkwa binkub,” tenebmou. 38Tenebmou bok, er Paulus biryi ato ebmou, “Yohanes Markus bira nunsi milibsicei. Minob ura Pamfilia mutuk kubmabwe bok, Yohanes Markus biryi nunsi miliransou ani, erci nunsi takloboka Teleb Uram eterena ababyi taklobmou. A deyok aryi, erda nunsi milibsicei,” eboka Paulus biryi ato ebmou. 39A deyok aryi, er Paulus ab Barnabas ab lulubdanmarei uca, bokdanmarei. Ura, er Barnabas biryi Markus bisi, “Ni ab tonkwa binkwanim,” ebmou ura, sun co ngun-ngun bukoka ilila me kwan deici banmarei. Banmarei ani, weik me dumdum atei si Siprus binmarei. 40Binmarei bok, er Paulus biryi er Silas bisi wiboka, “Ni ab tonkwa binkwanim,” ebmou. Ebmou ura, sun Antiokhia atei kuramnyi dib tenen nang aryi sunsi bokdonokmai. Ara, “Er Imtamnyi biryi teleb kuboka sunsi milina teleb,” eboka bokdonokmai. 41Bokdonokmai ura, er Paulus ab Silas ab Siria mutuk ab Kilikia mutuk ab yibinmarei cok, sunci sun dib tenen nang kanya asi katabum erdeirirandei.
S'ha seleccionat:
Kisah Para Rasul Uram 15: MTG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
@LAI 2007 (New Testament), @LAI2022 (Old and New Testament)