Juan 4
4
Suxi aataga ïmadï ïmo oki Samarhiïrï oidakami
1-2Daidi aidïpïrï mui odami urabaimitadai go Suxi dai Suxi mamaatïrdamigadï gabapakonaiña ix makïdï urabaiña. Dïï Suxi mai bapakonaitadai tomarhi ïmadutai. Daidi go fariseos ix makïdï bia ïkobai gïn buaboidaraga ïgakoi daidi ikaiti,
—Daiñi xïï mui odami urabaimi go Suxi. Tomarhi go Juan mai po kaxi bapakonai odami ix xïïxi gabapakonai go Suxi— ikaitiña ïgakoitai.
Dïï maiti ïr buaboi sai go Suxi gabapakonaitadai odami. Bhaiyoma mosïkaxi mamaatïrdamigadï ïgai dai gabapakonaiña. 3Dïï bïïxkïrï aidïxi máí go Suxi ix kaititadai go fariseos busai ïgai abhai oidigañdïrï xakoga Judeïrï tïgidu dai maigobai jii xako Galileana tïgidu oidigi.
4Daidi biakatadai Suxi ix Samarhiïrï daibuñagi dai ajiagi Galileana. 5Dai ami Samarhiïrï ayi ïgai ïmo arhi kiiki xako Sikar tïgidu oidigi. Go Sikar miadïrï bipiïyi go dïbïrai xako Jakobokaru daibundi go Josekaru maradïkatai ïgai. 6Dai ami go Jakobokaru dïbïradïana dajatadai ïmo poso ix makïdï iduitadai go ïgai ïïki. Dai parï daanduko ïxi ayi Suxi ami posoana dai ami daiba kabami ibhimutugaitai. 7-8Dai go mamaatïrdamigadï maigobai iji daidi gagaaga agai kuadagai maigo Sikarïrï. Dai bhodïrï ami posoana ayi ïmo oki ami miadïrï oidakami dai gabaigi agaitadai sudagi. Daidi Suxi itïtïdai,
—Gin oigïdañi dai gin oida lïïchi sudagi— itïtïdai.
9Dai go oki itïtïdai,
—Aanï ïr oki dai ïr Samarhiïrï oidakami dai aapi ïr judiu di— itïtïdai. —¿Tuixi gin ñokidi aapi dai gin tanïi sudagi?— itïtïdai.
Go judidiu tukurakami ubadai dukai ix tumaxi taatagi ïmo Samarhiïrï oidakami tudu dai kaxkïdï pokaiti go oki.
10Dai Suxi itïtïdai,
—Aapi maiti gin maatï dai tomarhi mai maatï aapi ixtuma oidaragai bia Diuxi óídakami bïïtarï. Ix maatïkamudai aapi aidï gia gin tañimudai sudagi ix aanï gï oidamudai go sudagi ix makïdï kïïgakïrï duakaturhidi odami— itïtïdai.
11Dai go oki itïtïdai,
—¿Dukatai bhïna aapi sudagi daidi gin oidana?— itïtïdai. —Mai bia aapi ixtukïdï busaidagi dai kïï tukabaga go poso bïïxi. Xadïrï ixtutuidïna aapi ix bhïiyagi sudagi daidi gin oidagi— itïtïdai. —¿Dai baadïrï gin oidana aapi sudagi ix makïdï kïïga duduakaturhi odami?— itïtïdai. 12—Daiñi, gïr piipixara Jakobokaru gïr biturhi idi poso dai kïïga bia sudagi dïï mai xii tïbïpi maigobai dadasai gobai tonomodagai. Ami tudu yïïdana sudagi go Jakobokaru dudatai tonomokatai. Dai maamaradï dai modukai sosoigadï ami gayïdana ïpï. Dai dukatai xibi gïr maakiadan kaiti aapi sudagi ix makïdï bïïxkïrï bïïtarï maigobai dadasai tonomodagai dai ix makïdï kïïga duduakaturhi odami. ¿Aapi pïx tudu ïr gïdukïdioma ix bhai go Jakobokaru? Go sudagi ix makïdï gïr maa ïgai mai tïbïpi maigobai dadasai tonomodagai di— itïtïdai go oki.
13Daidi go Suxi itïtïdai,
—Odami ix makïdï yïïdana go sudagi idi posoañdïrï otoma ïpamu tonokoñikana. 14Dïï mos go sudagi ix makïdï gaoidi aanï gokïdï gia ka mai tonokoñikana odami bïïxkïrï bïïtarï. Go sudagi ix makïdï gaoidi aanï ïr ïpïan dukami ïmo babiki ix makïdï odami ïrana mïraiña dai ïgaikïdï kïïgakïrï óídakana odami bïïxkïrï bïïtarï— itïtïdai Suxi.
15Dai go oki mai maatï kaï dai mai máí ix agaitadai Suxi ïmo soiñi ibhïgadï bïïtarï dai mai xu mosïkaxi tukugadï bïïtarï. Ix kaxkïdï go oki itïtïdai,
—Gin oidañi go sudagi ix makïdï aagai aapi bai podukai ka mai tonomokagi dai ka maiti gï agadagi ix baigiagi aanï tabhiadïrï— itïtïdai.
16Dai Suxi soiña ïrhiditadai go oki sai maatïkana xorai ïgai daidi itïtïdai,
—Mïïka baida gï kuna dai bhaigobai dada bïï gokatai aapimï— itïtïdai go Suxi.
17Daidi go oki itïtïdai,
—Mai kuna aanï— itïtïdai.
Dai Suxi itïtïdai,
—Buaboi tudu ix mai kuna aapi— itïtïdai Suxi. 18—Taamadu go kïkïïrhi ix makïdï ïmadï bii aapi. Muiyoko gï kukunta aapi di. Dai xibi go kïïrhi ix makïdï ïmadï daja aapi maiti ïr gï kuna— itïtïdai.
19Daidi go oki mos kaïkai ix tïtïdai Suxi sai bhodïrï itïtïdai,
—Kïïga maatï aapi ix tumaxi tomaxi mai aagagi odami. Ïmo aagadami Diuxi ñokidï ïrhi aanï aapi— itïtïdai. 20—Gin aagidañi tudu ix makïdï ïr buaboi, aapimï judidiu ikaiti sai mosïkaxi Jerusalenïrï gï agai ix ibuadagi xadutudaragai Diuxi bïïtarï dai aatïmï Samarhiïrï óídakami ïma dukai aagai. Aatïmï gïr piipixarakaru ïïki abhiadïrï ibuayi xadutudaragai Diuxi bïïtarï tami Samarhiïrï go tubidakana ix makïdï tami Samarhiïrï kïïka. Gin aagidañi, ¿Bako ïr kïïga ix xadutuada aatïmï Diuxi?— itïtïdai.
21Daidi Suxi itïtïdai,
—Kïïga tïgito kaïka idi ñoki. Daiñi, ayimu ix tuigako odami xadutuadamu Diuxi gïr Oga bïïxi aipakoga dai mai xu mosïkaxi tanai Samarhiïrï ïmadï mïï Jerusalenïrï. 22Aapimï tami Samarhiïrï óídakami ibuadana xadutudaragai Diuxi bïïtarï, dïï mos mai maatï aapimï xorai ïgai— itïtïdai. —Dïï aatïmï judidiu gia maatï. Kaxkïdï tudu go kïïgakïrï bubiadami ïr judiu. Aatïmï gia kïïga maatï Diuxi— itïtïdai. 23-24—Gin tïkakai aapi ix dukatai ïr kïïga ix xadutuada odami Diuxi. Daiñi, Diuxi ïr ïï ibhïdagai, ïbïrhi gï dukami ïgai tudu dai kaxkïdï ipïrhidi ïgai ix odami kïïga xadutuadagi gïn ibhïdagakïdï. Dai ka miadaimi ixtuigako Diuxi Ibhïgadï maakimu tïgibudagai odami dai maatïtuldamu ix dukatai xadutuada ïgai Diuxi dai bïïxi odami ix makïdï kïïgakïrï xadutuada ïrhidi kïïga ïïgiadamu Diuxi Ibhïgadï. Diuxi ipïrhidi ix podukai xadutuadagi odami ïgai tudu, ïïgiditai Diuxi Ibhïgadï. Dai aanï aagai sai xibi ka ayi ix tuigako odami kïïga ïïgiadamu Diuxi Ibhïgadï dai podukai buaboikïdï xadutuadamu Diuxi— itïtïdai.
25Daidi go oki itïtïdai,
—Aanï kïï maatï sai dibiagai ïmo Otosadï Diuxi ix makïdï ïr go Ga Tïanïdami ka agai. Dai ïgai gïr maatïtulda agai bïïxi aïkatai dibiakai— itïtïdai.
26Daidi Suxi itïtïdai aidï,
—Aanï tudu ïr go Ga Tïanïdami dai gï ïmadï aatagai xibi— itïtïdai.
27Kia aatagaitadai Suxi go oki ïmadï bai ami dada mamaatïrdamigadï ïpamu. Dai mai tïtïgaitadai ïgai ixtumaxi gïn tïgitoagi nïiditai ix aatagai Suxi ïmadï ïmo oki. Dïï tomarhi ïmadutai go mamaatïrdami mai tïkakai Suxi ix tuma aatagaitadai ïgai tomarhi mai tïkaka ix tuixi ñokidi ïgai go oki.
28Dai go oki amaxi bia baigiakarudï sudagi dai ïpamu nora xako guka bhaabhaki. Ami aagidi ïgai óídakami daidi itïtïdai,
29—Mïïka abïr nïida ïmo kïïrhi ix makïdï bïïxi gin aagidi ixtuma buadana aanï maiti gin maatïkatai. ¿Idi ix tudu ïr go Ga Tïanïdami?— itïtïdai ïgai go óídakami.
30Baidi go odami bubuaka abhiadïrï xako guka kiiki dai mïï nïida agai go Suxi.
31Dai mai kia aïkai go odami bai go mamaatïrdami daañimi go Suxi daidi itïtïdai,
—Gïr Mamaatïtuldiadami, ugañi lïïchi bhiayi— itïtïdai.
32Dai Suxi itïtïdai aidï,
—Aanï bia kuadagai ix tuma ugiagi ix makïdï aapimï mai maatï— itïtïdai.
33Daidi go mamaatïrdami ïïgi gïn tïkakaimi aipako daidi ikaitimi,
—¿Ïmai ix tudu buapidi ix tuma ugia gobai?— ikaitimi.
34Dai Suxi itïtïdai,
—Kïïga buyiña aanï gubukarhigai ibuadatai aanï ixtumaxi Diuxi ipïrhidi dai buadatai go aaduindagai ix makïdï gin tïjïi ïgai. Mos ïr kuadagai gï dukami gobai gin bïïtarï— itïtïdai. 35—Daiñi, odami ikaitiña sai kia biïga maakoba masadai ix aiyagi yoobaragai. Dïï aagai ïgai mosïkaxi odami yoobaradï ix makïdï bia ix tuigako gï yoobagi dai oidaga ïmai yoobaragai ix makïdï ïr Diuxi yoobaradï dai gobai gia tomax tuigako gï yoobai dai Diuxi yoobaradï ïr go odami ix makïdï gin buaboitudai.
Daiñi, gï agai ix kïïga gïn tïgito nïijada aapimï go odami ix makïdï mïï gukigi. Ïgai ka bhai gïn dui ix buaboitudagi gin ñoki xibi. Gobai tudu ïr yoobaradïka agai Diuxi— itïtïdai. 36—Gin aaduñi, kaxi oidaga mui odami ix makïdï kaïkana gin ñoki dai ka bhai gïn duu ix gin buaboitudagi. Ïgai tudu ïr yoobaradï Diuxi gï dukami. Dai Diuxi kïïga mamaakai bhai ïrhiaragai odami ix makïdï soiña yoobai yoobaradï, soikïitai odami saidi gin buaboitudaiña tudu. Dai xïïxkadï soikïdagi aapimï odami saidi gin buaboitudaiña aidï gia bhai gïn ïjïldamu go gaa ix makïdï ka ïïkioñdïrï aagiditadai gin ñoki dai aapimï ix makïdï gokiïrï dada dai soi odami saidi gin buaboitudaiña kïïga bhai gïn ïjïldamu ïpï. Ïpïan ïxi bhai gïn ïjïldamu aapimï odami ix makïdï kïï gïïpi bañidagi yoobaragai— itïtïdai.
37—Daiñi, odami ikaitiña sai, —Ïmoko ïgai dai gaïsïi dai gokiïrï ïmai gayobai— Pokaitiña odami aagaitai ïïgi yoobaragadï dai pomaaxi Diuxi yoobaradïkïdï ïpï. 38Daiñi, ïïmoko ix makïdï ïr ïsadami gï dukami ka aagidi odami gin ñoki dai xibi aanï gïn otoi mïsaidi ïr yoobadami dukai soikïitai ïgai ix makïdï kaï gin ñoki saidi gin buaboitudaiña tomaxi aapimï maiti ïr ïgai ix makïdï aagidi gin ñoki go odami. Jaa ïgai dai ka aagidi bai aapimï mos ïr gayobadami duu soikïitai ïgai ix gin buaboitudaiña— itïtïdai Suxi go mamaatïrdamigadï.
Mui Samarhiïrï óídakami buaboitu go Suxi
39Dai mui odami ami kiikiañdïrï óídakami buaboitu Suxi mos po tïdakai go oki sai Suxi aagiditadai bïïxi aïkatai ixtumaxi buadana. 40Kaxkïdï aidïxi ayi óídakami ami xako dajatadai Suxi, gadaañimi ïgai sai ami gïn ïmadï biïna. Baidi go Suxi amaxi kiikiïrï bii goka tasai ïmadï.
41Dai jaa mui buaboitu ïpï kaïkai aatagidï Suxi. 42Dai go makïdï buaboitu itïtïdai go oki,
—Mai xu mos buaboitu aatïmï kaïkai ix gïr tïtïdai aapi aagaitai aapi go Suxi, xibi ïïgi aatïmï kaï ix kaiti Suxi kaxkïdï buaboitu aatïmï. Kïï maatï aatïmï sai ïgai ïr go Ga Bhaitï Kïakami ix makïdï kïïgakïrï bubaida agai bïïxi oidigi daama óídakami— itïtïdai go ix makïdï buaboitudai.
Suxi duadi ïmo gïrhi ix makïdï ïr maradï ïmo dunukami
43-44Bhodïrï abhiadïrï goka tasaikïdï jii go Suxi dai ayi xako gïrakami ïgai. Galileïrï tïgidu oidigi ami. Dai ïkioma Suxi ka aagiditadai ïmo ñoki go mamaatïrdamigadï dai potïtïdai sai bhaitoma bïïxkïrï xïïxkadï ïmo aagadami Diuxi ñokidï gamaakiagi ñoki ïïgi aaduñdï xako gïrakami ïgai sai mai buaboida kaïkana ïgai. 45Dïï gia xibi aïkai Suxi Galileïrï xako gïrakami ïgai go óídakami bhai ïrhiarakïdï biaturhi dai miadïgi nïiditai. Muidutai ïgai Jerusalenïrï darakatadai baasïkioma Kïïgakïrï Bubaidaragai Bagimiïrï dai tïïtadai ix Suxi idui mui maaxidaragai ami ix makïdï ïïgi Diuxi ixtutuidikïi ix buadagi. Kaxkïdï kïïga miadïgi ïgai xibi.
46Dai ïpamu ayi Suxi go arhi kiikiïrï xako Kana tïgidu ami Galileïrï, xako baasïkioma iduitadai ïgai ïmo bino sudagikïdï. Dai maigobioma xako Kapernaumïrï tïgidu ïmai kiiki oidakatadai ïmo dunukami dai kabami koko maradï. Ïmo arhi gïrhi go kokoadï. 47Bai go dunukami kajioma ix ami Kanaïrï dibiatadai go Suxi dai mïï nïidamu gobai dai baida agai sai mïï duadana maradï. Karhioga mutadai maradï aidï.
48Dai Suxi itïtïdai go dunukami,
—Aapimï mai buaboitudai ix mai ïpïgioma nïijadagi maaxidaragai maaxi ix makïdï ïïgi Diuxi ibuayi. Ïbogiami podukai buaboituda antaada aapimï— itïtïdai.
49Daidi go dunukami itïtïdai,
—Gin tïanïdamiga, gin oigïdakai otoma mïï nïida gin maara. Tadu muu ïgai mai kia aïkai aapi— itïtïdai.
50Dai Suxi itïtïdai aidï,
—Noragiñi gï kiiyamu. Ka duayi gï maara— itïtïdai.
Daidi go dunukami buaboitu saidi ïr buaboi ix duu aagiditadai go Suxi dai nora kiiyamu.
51Dai kia boiyïrï imïi ïgai bai pipioñigadï buidïrï ayi dai potïtïdai sai ka duayi maradï. 52Baidi go dunukami gatïkakai sa xuduku ïxi duayitadai maradï. Dai pipioñigadï itïtïdai,
—Takabo mos koi gïsïko tasai dagito toiñdagai— itïtïdai.
53Daidi go dunukami gï tïgito sai go ka duku Suxi potïtïdaitadai sai maradï ka duayitadai ix kaxkïdï go dunukami ïmadï bïïxkatai kiidïrï óídakami buaboitu go Suxi. 54Gokïdï ka gokadukatadai maaxidaragai ix makïdï iduitadai Suxi Galileïrï aidï abhiadïrï ix dibiatadai ïgai Jerusalenañdïrï.
S'ha seleccionat:
Juan 4: NTP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Copyright: Ethnos360 Sanford, Florida