Matəw 8
8
Yeso zwey anóm moʼ nu yə mə sɨgə akyuŋ
1amaʼazənə Yeso swiʼi igun ugum wu, akama ba mə ŋuw aboʼo uŋwən. 2Anom moʼ nu akyuŋ mə inyo ma ŋu zum utəw anwi imbey Yeso ghayn kwi, “Asɨyisəg ngwə bə wuʼ ghəy kwi inyi inyo zayn.” 3Yeso sa ubugə ma ibira uŋwən ghayn kwi, “Mə wuʼ ighəy nigə. Inyo zayn.” Aba ighari wu, akyuŋ wu məy inyo anom wu. 4Anigə Yeso ghayn abú uŋwən kwi, “Zom atoŋ kwi, ka ngwə ghayn ayə anó zəŋ abú wa moʼ, asɨmə ŋuw tey inji inyo abú wa faʼa ambəŋ Nwiye, nibi na aghəy ifá zənə Mose sob da ba kyay kwi akyuŋ wu si mey injə inyo.”
Yeso zwey wa faʼa atəw abú usogwi
5Amaʼazənə Yeso ŋu nyi á Kapenahom, atəw abú usogwi ukɨ feyn ŋu boʼo ubugə abú uŋwən. 6Yə ghayn abú uŋwən kwi, “Masa uŋu wa faʼa yə sɨgə igun ukon ungɨŋ na. Cha inji abú uŋwən iyeŋ u yə zəw ingəʼ.”
7Yeso ghayn abú uŋwən kwi, “Ayi ŋu zwey uŋwən.”
8Asɨmə atəw wu abú usogwi ghayn abú uŋwən kwi, “Masa, cha adi kaŋa kəʼ aŋu amə aghəy ngwə nyi ungɨŋ inyi na. Ghayn aba inayn, uŋu wa faʼa yi boro. 9Umugə fən, ayə aton usogwi kyayn, usogwi chini umbə inyi aton. Abə ghayn abú ufeyn kwi, ‘ŋuw’ uyi ŋu. Abə ghayn abú u chini kwi, ‘zaʼa’ u yi zaʼa. Abə ghayn abú inyi sob kwi, ‘faʼa afaʼa zəŋ’ u yi ifaʼ.”
10Amaʼazənə Yeso zəw anó zəŋ, yə yere anigə ighayn abú ba mbənə mbə́ niŋe anjim ma kwi, “Ayə ghayn asiʼ inen kwi, cha adi si kwaʼa zən wa moʼ ungɨŋ Izre nu umə nə ukudu ibeni fiŋ zəŋ. 11#Luk 13.29Ayə ghayn inen kwi, ba nanaʼ umbi zaʼa aba zənə nyamachugi mə duw awu nibi zaʼa aba zənə nyamachugi mə nimə awu pey yi chomo igun agayi ungɨŋ anó ufon azobo ni jəgə nə Abraham, Azik foro Yakob. 12#Mat 22.13; 25.30; Luk 13.28Nwiye yi chi ba mbənə mbə́ tana anó ufon wu isiy abú úŋwən imaʼ ungɨŋ asin firi nu amə asin zənə umi mə idey ikoro asoŋ.”
13Anigə Yeso ghayn abú atəw usogwi wu kwi, “Si ŋuw ayə ungwə wa faʼa yi boro anji zənə ngwə beni.” Wa afaʼa atəw abú usogwi boro aba ighari wu.
Yeso zwey ba nanaʼ
14amaʼazənə Yeso ŋu nyi ungɨŋ na Pita, yə́ zən unyuŋ Pita igun ukon nə ufi. 15Amaʼazənə yə bira ubugə unyoŋ Pita, ufi wu sayn uŋwən. Anigə unyoŋ Pita noʼ kaba aghəy jəgi inaʼ abú Yeso. 16Amaʼazənə utuʼ injaʼ si cheg anəy wu, ba num ba nanaʼ nu uzugə iboŋ mə ungɨŋ inyo ma ŋu abú Yeso. Yə chi uzugə iboŋ wu aba akə inayn. Izwey ba ujum mbənə mbə́ mə́ sɨgə. 17Anó zəŋ aghəy da anó zənə wa ukən Nwiye Azaya ghayn du akə asiʼ kwi,
“Uŋwən ma amboŋ num ita sɨgə
anigə izwey ngwa.”
Anó da ba mbənə u beni iniŋe anjim Yeso
18Amaʼazənə Yeso zən akama ba zənə yə́ kad uŋwən, yə ghayn abú mbə́ məŋə-anó ma kwi u kwene iŋu anjin animini izi. 19Amaʼazənə yə ghayn nigə, ataʼa ba moʼ akə unoʼo ŋu abú uŋwən pey yi ghayn kwi, “Ataʼa ba ayi ŋu aboʼo jigə usin ujum mbənə ngwə mə ŋuw.”
20Yeso ghayn abú uŋwən kwi, “Kyay kwi indom tə nə ibəg, inen tə nə ikəŋ asɨmə cha Ŋwə̂ Wa nə asin moʼ iniŋi atəw ma akuŋ.”
21Aməŋə-anó chini ghayn abú uŋwən kwi, “Masa, siy adey ŋuw twayn uŋu mbaʼ.”
22Yeso ghayn abú uŋwən kwi, “Niŋe inyi njim isayn uwu ba twayn umbi uwu ba.”
Yeso təmənə afim
23Amaʼazənə Yeso ŋu nyi ungɨŋ abaŋ ugwi, mbə́ məŋə-anó ma ŋu nyi aboʼo uŋwən. 24Umugə mbə́ nyi nigə, u sə ŋu zən afim kaka moʼ ti ni chigə ghəy abaŋ ugwi wu kaba fwayn ŋu aton ugwi. Amaʼazənə afim wu mə chigə nigə, Yeso mə bunə. 25Mbə́ məŋə-anó ma ŋu noʼo uŋwən ighayn abú uŋwən kwi, “Asɨyisəg, chiyə ngwa iwu, mba yə sə baʼa iŋu iku.”
26Yeso ywere abú úŋwən kwi, “Mbən mə goro ngiya? Injən ibeni fiŋ yə kweʼe.” Umugə yə ghayn nigə, yə noʼ ghayn abú afim wu foro abú imbaŋ ugwi wu kwi ibo, usin nyaʼa zuw nyim.
27Anom wu yere anigə ighayn kwi, “Amə ukudu wa ngiya ŋunə nu kaba afim nə imbaŋ ugwi imə wumine uŋwən?”
Yeso zwey anom ubigə nu uzugə iboŋ mə ungɨŋ inyo ma
28Amaʼazənə Yeso pey anjin animini zi nu imə aba abey Gadara, yə bomo nə anóm ubigə moʼ nu uzugə iboŋ mə ungɨŋ inyo uma. Anom wu mə́ chomo ungɨŋ isəy nu mbə́ toŋo igun ukob. Mbə́ mə́ naʼa ingəʼ inya akə nji zənə amə cha ma nji abú wa moʼ ichigə akə inji wu. 29Amaʼazənə uzugə iboŋ wu zən Yeso, mbə́ kyay ghayn kwi, “Ungwə Ŋwə̂ Nwiye amə anó ngiya ngwə zaʼa ighəy ina? Ngwə zaʼa izi ingəʼ igun ina nu cha amaʼ di si koʼo?”
30Unoŋ ingwey moʼ mə jəgə iyad asin wu. 31Anigə uzugə iboŋ wu boʼo ubugə abú Yeso kwi, “Ngwə bə mi chiyə ngwa, cha ngwa mba ŋuw nyi ungɨŋ ingwey ti.”
32Yeso ghayn abú uŋwən kwi, “Mbən ŋuw nyi.” Anigə mbə du ŋu nyi ungɨŋ ingwey wu. Unoŋ ingwey wu kumə swiʼi awu igun ugum ŋu fwayn ungɨŋ animini ikoŋ. 33Ba mbənə mbə́ mə́ nəmə ingwey wu nod ŋu ungɨŋ abey wu. Mbə́ pey yi ghayn unó ujum nibi ghayn anó zənə aghəy abú ba mbənə uzugə iboŋ mə́ ungɨŋ inyo ma. 34Ba ujum ungɨŋ asin wu zəw nigə du iŋu bomo Yeso. Amaʼazənə mbə́ zən uŋwən, mbə́ boʼo ubugə abú uŋwən kwi u duw ungɨŋ aba abey uma.
S'ha seleccionat:
Matəw 8: NGI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023 CABTAL