Matie 9

Zozii ‑yamä 'kpläkplänyɔ

(Makö 2.1‑12; Lukö 5.17‑26)

1Zozii ‑plä 'gokpë 'nɩ ɔ yi 'nyiee 'tɔɔ, 'nɩ ɔ yi ɔ 'bhlɩɩ#9.1 ɔ 'bhlɩɩ: Kapɛnayumö‑duu' plöö‑ lä ɔ 'bhlɩɩ. Zɛɛ 'sɩɩ Matie 4.13. yi. 2Ɔ ‑kʋ ‑lɔɔ 'nɩ nyɩkpa yio 'kpläkplänyɔ ‑lä. Wa bhɛnöɔ‑ bhä ‑amäkɩɩ'. ‑Mä Zozii nii‑ lä waa' pɔlötɛtɛɛ 'yi nä kɔ ‑soo 'kpläkplänyɔɔ, ɔ lä 'naa 'yunɔ, ‑n 'tɛmä 'yikʋ ‑mä ‑naa nyenyii yä cienöɔ! 3‑Mä ‑Jlämöcɩanyʋä zio ‑kʋ bhlä ‑lɔɔ nä, wa ci bhä waa' pleyii, wlä nyɩkpɔnɔ nä, kɔ zie lä Laagɔ ‑dii! 4‑Mä Zozii ‑yi bhlä sä wa bhobho lä nä, kɔ cii‑, ɔ lä ‑ɔnözä 'nɩ anyɩa' pleyii sää bhobholɩ ‑nyenyi ‑kʋ bhä ‑mɔɔ? 5N 'kɔ soo nynä ‑mä, ‑naa nyenyii yä cienöɔ, ɩyä n 'kɔ soo nynä ‑mä, ‑n ‑bha 'kʋ ‑yä ‑n nää nä, 'klünö 'sɔ 'mnöö laa ‑sä 'tɛ bhää? 6Ɩ ‑ŋwa 'kʋ nynä a yibhë sɔɔ nynä ‑mä, ‑mää ‑dʋdʋkʋ nä, Nyɩkpɔɔ ‑Yowli ‑kä 'päwä ‑yä ɔ 'kä nyɩkpaa' nyenyi cie. Ɔ cii‑ lä sɔɔ nä, 'nɩ ɔ yi 'kpläkplänyɔɔ soo, ɔ lä ‑n ‑bha 'kʋ! ‑N 'bhlü ‑naa ‑amäkɩɛ 'kʋ ‑yä ‑n mʋ ‑naa ‑gbäsɩɩ! 7'Kpobhuu ‑bhlo 'kʋ 'nɩ nyɩkpɔɔ yi 'kʋ ‑bha, 'nɩ ɔ yi ‑amäkɩɛ 'kʋ 'bhlü 'nɩ ɔ yi gbëë' mʋ. 8‑Mä nyɩkpa ‑gbʋʋ ‑kʋ bhlä ‑lɔɔ nä, wa nii‑ lä ‑nɩnɩ 'fɩɩn 'yi nä, kä ‑ŋänö ‑plʋwa. Ɩ ‑kä 'ŋnö 'nɩ wa fään bhä Laagɔ 'ŋnu. Sä Laagɔ nyɛɛ‑ lä 'ylʋzɔkʋnyʋä 'sää 'päwä 'kädä nä, ɩɩ' ‑zä wa fänʋ bhlä 'ŋnu.

Zozii laa‑ Matie nynä ɔ 'güo 'kʋ

(Makö 2.13‑17; Lukö 5.27‑32)

9Zozii ‑bha lä ‑lɔɔ 'nɩ ɔ ‑kʋ lä mʋdä nä, ɔ nii‑ lapoo‑ylänyɔ, ɔmɔ wa laa bhä Matie. Ɔ ‑kʋ bhä ‑lɔɔ lapoo‑yläda sä. 'Nɩ Zozii yio soo, ɔ lä ‑mɔɔ, ‑n gë'ë 'kʋ! 'Nɩ Matie yi 'kʋ ‑bha 'nɩ ɔ yio 'kʋ 'gë. 10‑Nɩnɩ plöö‑ ylä na, 'tänyɩ ‑bhloo' Zozii ‑kʋ bhä Matiee' ‑gbäsɩɩ 'nɩ wa lü bhä. 'Nɩ lapoo‑ylänyʋä ɩyä gbenyenyinyʋää' 'yigädalʋä, wa ‑yä Zozii ‑yä 'kʋgënyʋa 'sɔ lüü bhä 'kʋ. 11‑Mä Falizɩɛnyʋa nii‑ lä Zozii 'yi 'nɩ ɔ ‑yä nyɩkpa‑cënä 'sɔ lüü bhlä 'kʋ nä, kä wa ylää‑ ɔɔ' 'kʋgënyʋa, wlä ‑ɔnözä 'nɩ anyɩa' Cɩanyɔɔ ‑yä lapoo‑ylänyʋä ‑yä gbenyenyinyʋä 'sɔ lüü bhä 'kʋʋ? 12Zozii nuu‑ lä sä wa ci bhlä nä, kɔ ‑sonʋwa, ɔ lä nyɩkpaa' ‑lʋa ‑wanö 'yɛkɛɛ‑ 'tɛ lä 'mʋ nä, waa' tään ‑wʋ gwäzö‑nʋnyʋä, ‑mä gupanyʋä, wamää‑ tää lä gwäzö‑nʋnyʋä. 13A mʋ ‑wʋ saa ‑yä a tään wälɩklënaa' ‑zɔɔ! Laagɔ lä 'Cibhisälɩ nn' tänö ‑wʋ nyɩkpɔɔ' ‑mä plɛkʋmɛnɔ‑ n 'ylänöɔ.#9.13 Ɩ bha Ozee 6.6.

Nä, nyɩkpaa' ‑lʋa ‑wanö nʋnʋgbɩ‑ gëë‑ lä 'yi nä, waa' ‑zä nn' ‑wʋ ‑yi ‑mä gbenyenyinyʋaa' ‑zä n ‑yi lä.

‑Gbugbee' goolɩɩ' wälɩ

(Makö 2.18‑22; Lukö 5.33‑39)

14Ylʋʋ ‑kʋ ‑lɔɔ 'nɩ Zään Badisöö' 'kʋgënyʋa ‑yi Zozii yëku 'nɩ wa yio 'ylä, wlä Cɩanyɔ‑, sɩ ‑kʋ bhä 'nɩ ‑anyɩ, ‑a ‑yä Falizɩɛnyʋa 'sɔ goo bhä ‑gbugbe 'futu 'futu, 'nɩ ‑naa 'kʋgënyʋaa' goo bhä ‑gbugbee? 15'Nɩ Zozii yiwa soo, ɔ lä nyɩkpɔ kä 'ŋnɔ flaa‑ 'nɩ wa kä ‑lɔɔ wlunö‑gämʋʋ' daa ‑kʋ nä, a bhobho nynä ‑mä nyɩkpaa wa laa‑ 'nɩ ‑wa ‑yi lä nä, wa yi ‑lɔɔ 'wlio yëku kʋ 'nɩ waa' ‑lä ‑pʋpɛ nʋ ‑a? ‑Mä ylɩɩ yi ŋëë 'nɩ wa yiwa 'wlio nëedë ‑sä. ‑Lɔɔ ylɩɩyɩ 'mnö, ‑lɔɔ wa 'kä lä ‑gbugbe goo. 16'Nɩ Zozii yiwa bʋkʋ soo, ɔ lä nyɩkpɔɔ' 'bhlü ‑wʋ lokupɛlʋ ‑yälʋ 'kʋ 'nɩ ɔ 'kʋ 'kotuzʋ ‑ya 'kplää. Ɔ kä sɔɔ ‑nʋ nä, kä lokupɛlʋ ‑yälʋʋ jlü 'kotuzʋʋ 'nɩ ʋ 'ŋätlönöɔ bʋkʋ 'nɩ këfëa mʋmʋ klä. 17Waa' 'bhlü ‑wʋ 'sɩɩ divaa‑ylä 'kʋ 'nɩ wa 'ka 'kɔgwlɛ‑sabhü#9.17 sabhü: 'Zufʋnyʋaa' sabhüü nä, mnɛkwi wa bhlü 'kʋ 'nɩ wa bhlɩɩ bhä. Mnɛkuu wa klänʋ 'nyu ‑yä ‑bhliibhlʋ ‑yä divaa 'mnö 'nää. 'mnö 'nää klää. Wa kä sɔɔ ‑nʋ nä, divaa yi gbä 'nɩ sabhüü yi wlɔɔ, 'nɩ a yi sa jɛɛ. 'Nɩ sabhüü yi 'sɩɩ mnɔ. Ɩ ‑ŋwa 'kʋ nynä ‑mä divaa‑ylaa, wa 'ŋʋa sabhüü' ‑lɛɛ yälö 'mnö. ‑Lɔɔ sabhüü ‑yä divaa 'sɔ yi ‑kä 'nää klɔɔ.

Zayilusö ‑yɔŋnɔ ‑glɔɔ 'kuëë, 'nɩ dolu kwlii a 'ŋnɔ 'nɩ ɔ ‑yamä

(Makö 5.21‑43; Lukö 8.40‑56)

18‑Mä Zozii ‑kʋ bhä ‑lätee cidä 'nɩ 'Zufʋnyʋa' 'cifi ‑bhlo ‑yio yëku. 'Nɩ ɔ yio ‑kokoowli dëlü glu 'pä. Ɔ lä Cɩanyɔ‑, 'naa 'yuŋnʋgbɛnyɔɔ yä 'ku! Ɔ kuu‑ lä nä, ‑lɔɔ ‑lätee 'mʋ ‑tlʋmä, nä bheeje, ‑n yi ‑yä ‑n gbɩɔ ‑klɔgbä 'kʋ ‑mä ɔ yi 'kuëë glɔɔ. 19'Nɩ Zozii yi 'kʋ ‑bha ɔ ‑yä ɔɔ' 'kʋgënyʋa 'sɔ, 'nɩ wa yi nyɩkpɔɔ 'kʋ gë. 20‑Mä wa ‑kʋ lä ‑mɔɔ mʋdä nä, 'ŋnɔ ‑bhlo, ɩ nʋ bhɛ 'ylʋbɔ 'kʋgbä 'sɔ 'nɩ dolu kwlinöɔ bhlä. ‑Mä 'ŋnɔnɔ ‑ghlää Zozii 'wuklë 'nɩ yi ɔɔ' ‑bänaa' numnuu 'taa. 21Kɔ cii bhlä ɔɔ' pleyii nynä ‑mä n kä mii‑ 'nɩ n kä Zozii' ‑bänaa' numnuu' 'kpakpa 'taa nä, n yi yamä. 22'Nɩ Zozii yi 'ylɩbhɔ. Ɔ nii‑ lä 'ŋnɔɔ 'yi nä, kɔ ‑sonöɔ, ɔ lä n ‑yɔŋnɔ, 'tɛtɩ ŋënö‑ö 'kʋ. ‑Naa pɔlötɛtɛ yä‑ä puë! Ɔ cii‑ lä sɔɔ nä, 'kpobhuu ‑bhlo 'kʋ, kä 'ŋnɔɔ ‑yamä. 23Zozii ‑ŋëë ylä Zayilusöö' ‑gbäsɩɩ 'nɩ ɔ nii‑ lä ‑blɩkɔ ‑klänyʋa 'yi, 'nɩ ‑jlëë' kplü gbä bhlä nä, 24kɔ cii‑, ɔ lä a ‑sä gwë ‑mä 'yuoo ‑wʋ kuu‑, kɔ ŋɔɔ lä. ‑Mä ɔ cii‑ lä sɔɔ nä, kwa ‑nyɩänöɔ. 25Wa ‑sä 'fɩa gwë 'nɩ, ‑gbäsɩɩ wa ŋʋʋ‑ bhlä 'yuŋnʋgbänyɔɔ nä, Zozii yi ‑mɔɔ plä 'nɩ ɔ yi 'yuo ‑klɔgbä klä, 'nɩ 'yuo yi 'kʋ ‑bha. 26‑Mä 'yunɔɔ' 'kuëë glɔɔ‑wälɩnɩ bhlüü‑ ‑lɔɔ' 'lëkpëa 'fɩɩn 'kʋ.

Zozii ‑yamä 'yikpüü' kʋnyʋä 'sɔ

27‑Mä Zozii ‑bha ‑lɔɔ 'nɩ ɔ mʋ bhɛ lä nä, 'yikpü‑käänyʋä 'sɔ güo‑ bhä 'kʋ 'nɩ wa woo bhä, wlä ‑a tötɔ Davidö ‑Yowli‑, bheeje ‑n yibhënö‑anyɩ ŋäzö! 28Ɔ ‑ŋëë ylä gbëë' nä, 'nɩ 'yikpü‑känyʋa 'sɔ yio yëku yi. 'Nɩ ɔ yiwa 'ylä, ɔ lä ‑mä a bhobho 'zaazɩ nynä ‑mä, n yi'anyɩ yamä ‑a? Wlä ‑ɛɛɛ, Kwlienyɔ‑! 29Wa cii‑ lä sɔɔ 'nɩ ɔ yi waa' 'yii 'taa 'nɩ ɔ yiwa soo, ɔ lä sä anyɩa' pɔlötɛtɛɛ ylä lä nä, ɩ kʋ sɔɔ! 30'Nɩ 'yikpü‑känyʋa 'sɔɔ 'yii yi welio. ‑Mä Zozii ‑bhuwa ‑kɔkwɩ, ɔ lä 'klünö n ‑nʋ'anyɩ lä nä, a 'nä ‑sänɩ ‑lä nyɩkpɔ! 31‑Mä sä wa wlʋʋ‑ lä 'gää ‑zɔɔ nä, kwa ‑mʋ 'nɩ, wa yi wälɩɩ 'bhlɩɛ 'fɩɩn 'mnö bie.

Nyɩkpɔɔ' ‑sää bhɔɔ 'mʋ 'nɩ ɔ ‑yamä

32‑Mä 'yikpü‑känyʋa 'sɔ wlʋʋ‑ lä 'gää ‑zɔɔ nä, kä nyɩkpa ‑lä bʋkʋ nyɩkpɔ Zozii yëku. ‑Lɔɔ' nyɩkpɔɔ nä, ‑zuzunyënyu ‑kʋɔ bhä kätää' 'nɩ ʋ gbä 'nɩ ɔɔ' mii bhɔɔ 'mʋ ‑säälɩ. 33‑Mä Zozii tlüü‑ ‑zuzunyënyuu, 'nɩ nyɩkpɔɔ yi 'mʋ säälɩ 'kʋ cie. ‑Mä ‑jlëë' nyɩkpa kä plɛkʋ 'niniwa. Wlä ‑mää 'Yizlɛ‑bhlɩnɛ 'mnö, ‑a 'nö bhä 'wlʋ nä, ‑aa ‑läzä sää wälɩ 'ni! 34Falizɩɛnyʋaa‑ ‑kʋ bhlä ‑lɔɔ nä, wa ci bhä, wlä ‑zizinyenyii' 'cifio, ɔmɔɔ‑ nyɩɔ lä 'päwä 'nɩ ɔ tlü lä ‑zizinyenyii.

‑Jlëa' wälɩ ‑kä Zozii ŋäzö 'kʋ

(Makö 3.6‑19; Lukö 6.12‑16; 10.2)

35‑Mä Zozii bhlü bhä 'di 'kädɩɩ ‑yä ‑bhlüdüü, 'nɩ ɔ cɩa bhä ‑mɔɔ' Laagɔ‑bhitii 'mnö. Ɔ sää bhä nyɩkpa Laagɔɔ' 'Leyiduu' 'Nägädöö. 'Nɩ ɔ yamä bhä 'sɩɩ gupanyʋa ‑yä 'bhlʋlɛ ‑känyʋä nü nü nü. 36‑Mä ɔ ni bhlä nyɩkpaa' 'gbʋʋ 'yi 'nɩ wa yinöɔ bhlä nä, kä ŋäzö ‑jɛnöɔ 'kʋ. ‑Wa yinöɔ bhlä nä, 'kwlɩ yʋwa bhɛ kpänyɩ bhɩä dä gwlɛɛ. Wa yä bhɛ sɩä, 'nɩ plɛ yʋwa bhɛ 'sɩɩ 'kpɔsɔ. Kä wa ‑kʋ bhɛ nynä 'bhabhlöö' lɩɩ‑ ‑wʋ lä kpanyɔ ‑kä nä. 37Ɩ ‑kä 'ŋnö 'nɩ Zozii ‑soo ɔɔ' 'kʋgënyʋa, ɔ lä ‑döödä yä ŋëë, ‑mä 'klaa nä, ka 'ghlü 'nɩ aa' 'mnö lebhenʋnyʋaa' ‑wʋ ‑zu. 38Nä, a bhibhie 'klaa käänyɔ ‑yä ɔ 'kä ‑döönyʋa 'kʋ 'ŋʋʋ.

S'ha seleccionat:

Matie 9: god

Subratllat

Comparteix

Copia

Vols que els teus subratllats es desin a tots els teus dispositius? Registra't o inicia sessió

Més informació sobre GOD - u2

Matie 9

Versets bíblics populars de
Matie 9

Escolta Matie 9

La Bíblia:

Godié

Versió: GOD - u2 - god

Matie 9

Matie 9

Versets bíblics populars de Matie 9

Escolta Matie 9

La Bíblia:

Godié

Versió: GOD - u2 - god

Matie 9

Versets bíblics populars de
Matie 9