Matu 5
5
Yezu pa'alɛ Nɛreba Zoore zuo
(Luki 6.20-49)
1Yezu n nyɛ nɛrekuuŋɔ la, a zom la zoore zuo, en ta zi'ire ba'ahɛ la, ti a zahereba la paaɛ a zi'an. 2Ti a ya'ɛ nuurɛ, pɔhɛ pa'ala ba yeti:
3“Sum boi mɛ la sɛba en mi' ti ba boti sia puan suŋɛ, bamam en sɔi saazuo sɔ'ɔlum la.
4 #
Aza 61.2
“Sum boi mɛ la sɛba en kele, ba wan nyɛ subugehum.
5 #
Yoo 37.11
“Sum boi mɛ la sɛba en sigehe ba mɛhi, bamam n wan nyɛ tiŋa wa nyuurɔ.
6 #
Aza 55.1-2
“Sum boi mɛ la sɛba ti tuuntɔɔ vom kom, la ko'nyuuro tara ba, Ba wan tigehɛ ba.
7“Sum boi mɛ la sɛba en zoti nɛreba nimbu'ɔ. Ba wan to'e nimbɔ'zɔrɛ.
8 #
Yoo 24.3-4
“Sum boi mɛ la sɛba suya en ka tari dɛgerɔ. Ba wan nyɛ Yinɛ.
9“Sum boi mɛ la sɛba en sugeni. Ba wan yi'ira ba Yinɛ kɔma.
10 #
1 Pit 3.14
“Sum boi mɛ la sɛba ti ba mɛleha ba tuuntɔɔ vom zuo. Ba dinɛ dela saazuo sɔ'ɔlum la.
11 #
1 Pit 4.14
“Sum boi mɛ la yamam, ti nɛreba en tuuri ya, gee namehera ya, yi'ira ya yu'yooro yima yima en dagi yelemɛŋerɛ, mam zuo. 12#2 Yel 36.16; Tuum 7.52 Sireni ya gee nyɛɛna, gee ya yɔɔrɛ karegɛ mɛ saazuo ha. Bala mɛa ti ba yuum mɛleha Yinɛ nɔtɔgeheba sɛba en diŋɛ yamam nɛŋa na la.
Yaarum la niifum
(Maki 9.50; Luki 14.34, 35)
13“Yamam en de tiŋa wa zuo yaarum; gee yaarum han bɔregɛ bu za'afum, bu wan iŋɛ la ŋwani le ta'am lebe bu puan na? Yaarum bumɔ ka le ana suŋa bo' sɛla sɛla, han dagena ba ka'ɛ bu bahɛ ti ba niira la nama.
14 #
Yɔn 8.12; 9.5 “Yamam dela tiŋa wa zuo niifum. Tiŋa en mɛ yagelɛ zoore zuo, kan ta'am lile. 15#Mak 4.21; Luk 8.16; 11.33Nɛra ka laŋɛ butolela dikɛ pi'ɔ vuge ka; gee a dikɛ ka sugela la butolela sugelego zi'an, ti ka niiɛ bo' nɛra woo yire la puan. 16#1 Pit 2.12 Bala mɛa, bahɛ ya ti ya niifum la niira nɛreba nɛŋan, ti ba nyɛ ya tuunsuma la, la ba dikɛ pɛka bo' ya Sɔ en boi saazuo ha la.
Ze'elego, la Nɔtɔgeheba
17“Da ti'ihɛ ya ti mam wa'am na ti n saalum la nɔze'elego la bii nɔtɔgeheba yɛla la. Mam ka wa'am na ti en saalum ba bahɛ mɛ, gee mam wa'am na ti bu wa'am la asira na. 18#Luk 16.17 Mam yeti ya la yelemɛŋerɛ wa, ti han dagena ti saazuo la timpaberɛ n tole, gulehɛgɔ pika yɛla la puan kan makɛ saalum, han dagena a za'a wa'am na tum mɛ. 19Bala zuo, fum se'em woo n galum nɔze'elego la puan yelepika gee pa'ala nɛreba ti ba ita bala, eŋa daana en wan ta dɛna nɛre pika saazuo sɔ'ɔlum la puan; gee se'em woo en dole a za'a, gee me pa'ala nɛreba bala, wan ta dɛna nɛrekãtɛ Saazuo sɔ'ɔlum la puan. 20Mam yeti ya mɛ wa, ti han dagena ya tuuntɔɔ vom la gaŋɛ la Gɔnmi'ineba la, la Farasiiduma la, yamam me pun kan makɛ kɛ̃ Saazuo sɔ'ɔlum la puan.
Sunsunyiim
21 #
Yɛh 20.13; Tii 5.17 “Ya wum ti ba yuum yele bo' diimen diimen ha la yeti, ‘Da ku nɛra; gee fum se'em en ku nɛra wan nyɛ gakerɛ.’ 22Gee mam yeti ya yeti, fum se'em en iŋɛ suure la a suuɔ wan nyɛ gakerɛ. Fum se'em en tu fum suuɔ wan paaɛ kiinduma zi'an. Fum se'em en yele nɛra ti, ‘Gerego wa,’ ye' la bugum tiŋa. 23Bala, ya han bɔ'ɔra ya bo'olum kaabegɔ bimbeni la zuo, gee tiɛ ti fum suuɔ tari se'ere la hɔ, 24bahɛ fum bo'olum la kaabegɔ bimbeni la zi'an gee kiŋɛ ta sugelum fum suuɔ la, gee nyaa wa'am na bo' fum bo'olum la. 25Naaɛ la se'em en zuuhe fum la ka'lam ti ya nam boi sore zuo yɛ'a naba yire la. Han dagena bala, a wan dikɛ fum iŋɛ naba nu'uhen, ti eŋa me dikɛ fum bo' kpɛ'ɛnduma, ti bamam me dikɛ fum lobe bahɛ paka deo puan. 26N yeti ya la yelemɛŋerɛ, ti fum kan makɛ yehe na han dagena fum ta yɔ la hanɛ la za'a kpiniŋam.
Kabohi yɛla
27 #
Yɛh 20.14; Tii 5.18 “Ya wum ti ba yuum yeti, ‘Da tum kabohi.’ 28Gee mam yeti ya yeti, se'em woo en bihɛ pɔka la kunkoma'afum pun tum la kabohi la pɔka la mɛ a suuren. 29#Mat 18.9; Mak 9.47 Fum zuɔ niho han bahɛ ti fum tuna be'em, kpikɛ bɔ lobe bahɛ; la ani suŋa ti fum bɔregɛ fum iŋa la zi'an kayima bahɛ, nyana iŋa la za'a en ta dikɛ bahɛ bugum tiŋa la puan. 30#Mat 18.8; Mak 9.43 Ti fum zuɔ nu'o han baha ti fum tuna be'em, ŋmaaɛ kɔ, lobe bahɛ; la ani suŋa ti fum bɔregɛ fum iŋa la zi'an kayima bahɛ nyana iŋa la za'a en ta dikɛ bahɛ bugum tiŋa la puan.
Pɔgelebehego
(Matu 19.9; Maki 10.11-12; Luki 16.18)
31 #
Tii 24.1-4; Mat 19.7; Mak 10.4 “Ba me yuum tɔgɛ yeti, ‘Se'em woo en bahɛ a pɔga, a daana gulehɛ lebehego gɔŋɔ bo' ka, gee bahɛ ka.’ 32#Mat 19.9; Mak 10.11-12; Luk 16.18; 1 Kor 7.10-11 Gee mam yeti ya yeti, se'em woo en bahɛ a pɔga han dagena ka tum la kabohi; a bahɛ ti pɔge kaŋa galum mɛ; ti se'em woo en di pɔka ti ba bahɛ ka tum la kabohi la pɔge kana.
Pɔrɛ
33 #
Malm 19.21; Kãl 30.2; Tii 23.21 “Le yɛ'ɛha, ya wum ti ba yuum yele diimen diimen duma yeti, ‘Nɛra da pɔ pumpɔreŋɔ pua, gee tum fum pu'ulɛ nuurɛ la ninmu'urɛ ti fum iŋɛ se'ere bo' Daana la.’ 34#Aza 66.1; Mat 23.22; Yem 5.12Gee mam yeti, da pun makɛ pɔ la fii me. Da makɛ pɔ saazuo wa, se'ere en sɔi la, Yinɛ na'am kuka zi'an en bala, 35#Aza 66.1; Yoo 48.2bii fum pɔ timpaberɛ wa, se'ere sɔi la, Yinɛ nama dafeere n bala, bii fum pɔ Yerusalɛm, se'ere en sɔi la, Yerusalɛm dela na'kãtɛ la tiŋa. 36Da pɔ fum zuo, se'ere en sɔi la, fum kan ta'am bahɛ ti zuo zonko lebege pɛɛlega bii sabega. 37Bahɛ ti fum ‘ɛ̃ɛ dɛna ɛ̃ɛ,’ bii fum ‘Aayi dɛna aayi’; sɛla en dagi ŋwana ze'ele la be'em puan na.
Leregere
(Luki 6.29, 30)
38 #
Yɛh 21.24; Malm 24.20; Tii 19.21 “Ya wum ti ba yuum yele diimen diimen ha la ti, ‘Niho teere la niho, ti Nyɛnɛ tɛɛra nyɛnɛ.’ 39Gee mam yeti ya yeti, da lerege se'em en tuue fum. Gee se'em han lobe fum zuɔ sapɛka, ŋmɛregɛ gɔbega sapɛka la pa'ahɛ en. 40Se'em me han yi' fum naba yire ti a to'e fum banaa, yɛɛ damsika la pa'ahɛ en. 41Se'em han pɛregɛ fum ti fum kiŋɛ miilɛ deyina la en, kiŋɛ miilɛ pa'ahɛ en. 42Bo' se'em woo en suhɛ hɔ sɛla, da tuta nu'o la se'em woo en boti a peŋe sɛla hɔ zi'an.
Nɔŋɛ fum dinduma
(Luki 6.27-28, 32-36)
43 #
Malm 19.18
“Ya wum ti ba yuum yeti, ‘Nɔŋɛ fum mabia, gee yaaɛ fum dima.’ 44Gee mam ya yeti, nɔŋɛ ya dinduma gee pu'uha bɔ'ɔra sɛba en daani ya. 45Ŋwana ti ya wan dɛna ya Sɔ se'em en boi saazuo ha wa kɔma. Se'ere en sɔi la, a baheri ti wuntɛɛŋa nyɛkera bɔ'ɔra nɛrebe'ero la nɛresuma za'a mɛ, gee tuna saa bɔ'ɔra nɛretuntɔɔ la nɛre ŋmɛlema za'a. 46Yamam han nɔŋɛ sɛba en nɔŋɛ ya ma'a, beni yɔɔrɛ ti ya wan to'e? Sɛba en to'ohe kuba pun ka ita la bala? 47Yamam han pu'uha ya suurɔ ma'a, yamam iti la beni gana nɛra woo en iti se'em la? Sɛba en ka zoti Yinɛ me pun ka ita la bala mɛa? 48#Malm 19.2; Tii 18.13 Deni ya sɛba en bi'ɛ kahegɛ woo ya Sɔ en boi saazuo ha bi'ɛ kahegɛ se'em la.
S'ha seleccionat:
Matu 5: GBTP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Gurenɛ New Testament © The Bible Society of Ghana, 2020.