Matu 3

3
Yɔn Ko'sɔɔra la muulegɔ
(Maki 1.1-8; Luki 3.1-18; Yɔn 1.19-28)
1Dabeha aŋa ha puan la, ti Yɔn Ko'sɔɔra la wa bɔna la Yudiya muuen ha muula baha na yeti. 2#Mat 4.17; Mak 1.15 “Tee ya, gee Saazuo sɔ'ɔlum la pɔri na.” 3#Aza 40.3 Nɛre-ina n bala ti nɔtɔgeha Azaaya tɔgɛ a yele yeti,
“Kua kayima n kaahi muuen ha baha na yeti,
‘Maafum ya Daana la sore,
maalɛ ya a sore la tuuntɔɔ.’ ”
4 # 2 Nad 1.8 Yɔn yɛ la futo ti ba dikɛ yugenɛ kɔberɔ wugɛ, ti a sɛganɛ dɛna duŋa ganɛ baalega ti a dikɛ lu' a sia, ti a dia dɛna sunwa'ara la muuen seero. 5Ti Yerusalɛm tiŋa nɛreba, la sɛba woo n boi Yudiya nɛreba za'a kina a zi'an na, la tinse'ehi woo en kaaɛ Yɔɔdan kulaa la nɛreba za'a, 6ti ba puta ba be'em ti a sɔɔra ba ko'om Yɔɔdan kulaa la puan.
7 # Mat 12.34; 23.33 Gee Yɔn en ta nyɛ ti Farasii la Sadusiiduma la kini a zi'an na ti a sɔ ba ko'om la, a yele ba yeti, “Yamam kampɛbila wa! Ani en yele ya la ninmu'urɛ ti ya zɔ li'ihɛ Yinɛ sunsunyiim wa n kini na wa? 8Wani ya wala sɛ'a n pa'alɛ ti ya teere la. 9#Yɔn 8.33 Da kɔ'ɔm kɔ'ɛ ya puti'ira yɛta ya mɛhi yeti, ‘Aberaham en de tumam sɔyaaba la zuo.’ N yeti ya mɛ wa, ti Yinɛ wan ta'am bahɛ ti kuga wa asɛ'a lebege Aberaham kɔma. 10#Mat 7.19 Nananawa, liya la maahum mɛ gã'a tia woo tilen, ti tisɛka woo en ka wani walesuma, liya la wan ŋmaaɛ tikaŋa bahɛ, ti ba dikɛ ka bahɛ bugum la puan.
11“Mam sɔɔri ya mɛ la ko'om wa, ti la pa'alɛ ti ya tee ya puti'ira ya be'em puan. Gee se'em en bi'ihɛ gani mam boi mam pooren kina na. Mam pun ka seke ti n zãla a tagera. Eŋa wan sɔ ya mɛ la Fa'a Sia la, la bugum. 12A zãli a yeelego pi'ɔ mɛ a nu'uhen, a wan yeele disɛka woo ti a tɔ a toore la puan la, vaaɛ a kisuma la su' bããren. Gee bunvagela la, a wan nyɔ' ba la bugum n ka diti kiŋera puan.”
Yezu Ko'om sua
(Maki 1.9-11; Luki 3.21, 22)
13Ti Yezu ze'ele Galilii wa'am Yɔn zi'an Yɔɔdan kulaa la puan na, ti Yɔn sɔ en ko'om. 14Ti Yɔn ka sakɛ gee yeti: “Fum tugum nari ni ti fum sɔ mam, ti fum tugum yɛ'a mam zi'an na?” 15Gee Yezu lerege en yeti, “Bahɛ ti la dɛna bala nananawa. La dela ma'a bo' tu, ti tu doohe ŋwana tum sɛla wuu tuuntɔɔ.” Ti Yɔn sakɛ. 16Ti en sɔ Yezu ko'om ba'ahɛ la, ti a ze'ele ko'om la puan kɔ'ɔm dɔɔra na la, a yeti a bihɛ ti saazuo en yu'ɛ bo' en, ti a nyɛ ti Yinɛ Sia sigera a zuo na ana wuu dayene la, wa'am na yagelɛ a zuo. 17#Pi'il 22.2; Yoo 2.7; Aza 42.1; Mat 12.18; 17.5; Mak 1.11; Luk 9.35 Ti kua ze'ele saazuo tɔgɛ bahɛ na yeti, “Mam mɛŋa Dayua n ŋwana, se'em ti n nɔŋɛ, se'em ti n nini tigɛ la en.”

S'ha seleccionat:

Matu 3: GBTP

Subratllat

Comparteix

Copia

None

Vols que els teus subratllats es desin a tots els teus dispositius? Registra't o inicia sessió

YouVersion utilitza galetes per personalitzar la teva experiència. En utilitzar el nostre lloc web, acceptes el nostre ús de galetes tal com es descriu a la nostra Política de privadesa