मरकुस 9
9
येसुना रुपान्तर
(मत्ति १७:१-१३; लूका ९:२८-३६)
1अनि येसु ओरकुन इतुर, “इगा नितितोरक ओरागडाल हुचुलोरक परमेस्वरना राज्य लावतासंग वायाना हुळाना मुने हायोरक इन्जोर नना मिकुन खरोय इन्तोना” इन्जोर ओरकुन इतुर। 2सारुंग दियाना पजा येसु, पतरस अनि याकुब अनि युहन्नान मटा पोरो ओतुर अनि अगा ओरकुन तासि बोरे हिलेर आसि। अनि अगा ओरा मुने येसुना रुप बदले मात#२ पत १:१७-१८। 3अनि ओनांग सन्दरांग दरतितिगा बोरे दोबीन वने साप कियापरोर अचोन पान्डरिह आस चमकेमान्दुंग। 4असके मूसाल अनि एलियाल वने अगा दिसतुरक अनि येसुनासंग वळकिन्दुरक इदाम चेला लोकुरक हुळतुरक। 5पतरस येसुन इतुर, “हे गुरु, मावा इगा मन्दाना बेस मन्ता; इन्जोर माक मून्ड मन्डाक बनेहकियाकाट, उन्दि निया साटि, उन्दि मूसा साटि, अनि उन्दि एलियान साटि।” 6अनि बाताल उत्तर हियाका इन्जोर ओर पुनोर आन्दुरक बाक्याकि ओरक पकाय वरियस मतोरक। 7असके उन्दि ढगि ओरकुन मुचतु अनि ओद ढगिताल इदाम लेंग पसियत, “येर नावोर प्रिय मरि आन्दुर, निमाट येनांग वेहनातुंग केन्जाट#मत्ति ३:१७; मर १:११; लूका ३:२२ ।” 8असके ओरक सबोय बासा हुळतुरक अनि येसुन तासि आपुनसंग बोने हुळोरक। 9मानेयतोर मरि हातोरिगाडाल जिवे मायानावनाह निमाट बाताल हुळतोरिट ओद पोल्लो बोने वेहमाट इन्जोर मटाताल रयान्पा येसु आपुना चेला लोकुरकुन आग्या हितुर। 10“हातोरिगाडाल जिवे मायानाता अर्थ बाताल मन्ता?” इन्जोर ओरक आपसते वळकसुन इद पोल्लोतुन ओरक आपुना मन्दे आटवन इरतुरक। 11अनि ओरक येसुन पुच्चेमातुरक, “एलियाह मुने वायाना जरुरि मन्ता इन्जोर मूसाना नियमतुन करिहवालोरक बाक्या इन्तोरक#माल ४:५; मत्ति ११:१४ ?” 12येसु ओरकुन उत्तर हितुर, “एलियाह मुनेवास सबोय सुदरे कियानुर इद खरोय पोल्लो मन्ता मति ओर पकाय तकलिप सहेनकियानुर अनि ओन तुच्च समजेमायिला पहाजे इन्जोर नना मानेयतोर मरिना बारेते इदाम बाक्या कोटतोर? 13मति एलियाल ते वातोर अनि ओना बारेते बाताल कोटता मन्ता अदामे ओरक बोद इच्चा कितुर अद सबोय ओना पोरो कितुरक इन्जोर नना मिकुन इन्तोना।”
येसु दुष्टात्मा पयतोर पेकान सुदरे किन्तोर
(मत्ति १७:१४-२१; लूका ९:३७-४३)
14बसके येसु चेलालोकुरा हेरे वातुर ते ओरा सबोयबासा पकाय भीळ आता अनि नियमतुन करिहवालोरक ओरासंग विवाद कियाला आतोरक इन्जोर ओर हुळतुर। 15ओन हुळता बराबर सबोय लोकुरक पकाय आश्चरय किया लागतुरक, अनि ओनाके वितस ओन नमस्कार कितुरक। 16येसु ओरकुन पुच्चेमातुर, “निमाट येरासंग बाताल विवाद कियाला आतोरिट?” 17भीळताल वरोर मानेय ओन उत्तर हितुर, “हे गुरु, नना आपुनोर पेकान निया हेरे तच मन्दान ओनिगा उन्दि दुष्टात्मा मन्ता ओद दुष्टात्मा ओन मुकाल बनेहकिता। 18ओन बगाय आयि पयान्ता अगाय मुटहान्ता अनि ओना टोडितिगा फेस वान्ता अनि पल्क उपिहन्तोर अनि वतसोर दान्तोर, इद दुष्टात्मातुन पसियसिम्ट इन्जोर नना निया चेलालोरकुन इतान मति ओरक पसिहस परोरक।” 19इद केन्जुन येसु ओरकुन इतुर, “हे अविस्वासि लोकुरक, नना बचोवनाह मियासंग मनका? अनि बचोवनाह मिकुन सहेमायका? ओन नावा हेरे तराट” इन्जोर वेहतुर। 20असके ओरक ओन येसुना हेरे ततुरक अनि येसु ओन हुळतुर असके ओद आत्मा सान्डे ओन तलियत अनि ओर जागादिगा मुटतुर अनि टोडितिगाडाल बुम्बूह वाटसोर मोडरेह किन्ता। 21येसु ओनोर बाबोन पुच्चेमातुर, “येना इद हालत बसकेडाल मन्ता?” ओर इतुर, “हुडलोर मन्दुर असकेडाल। 22दुष्टात्मा येन हव्काना साटि बसकेय किसतिगा बसकेय एतिगा अरहित मति निमा बाताले किया परान्तोन ते मया किस माकुन मदत किम।” 23येसु ओन इतुर, “निमा बाताले किया परान्तोन इन्जोर निमा बाक्या इन्तोन? विस्वास केवान साटि सबोय आय परान्ता।” 24पेकालनोर बाबो सान्डे किलिंगसोर इतुर, “हे प्रबु नना विस्वास किन्तोना अनि नाकुन नियागा पकाय विस्वास कियान साटि मदत किम।” 25लोकुरक वितस भीळ कियाला आतोरक इन्जोर येसु हुळतुर ते ओर दुष्टात्मातुन इदाम इन्ज रांगतुर, “हे मुकि अनि बहरो आत्मा ओनागाडाल पसियस हन अनि ओनागा असा बसकेय होळियमा इन्जोर नना निकुन आग्या हिन्तोना।” 26असके दुष्टात्मा पकाय किलिंगसोर ओन मोडरेह किस पसियस हतु अनि पेकाल हाताप लेहका हून्जतुर, “ओर हातुर” इन्जोर पकाय लोकुरक इन्दा लागतुरक। 27मति येसु ओना कय पयस ओन तेहतुर, अनि ओर नितितुर। 28येसु लोन वातुर असके ओनोर चेलालोरक ओन पुच्चेमातुरक, “माक ओद दुष्टात्मातुन बाक्या पसहिला परोम आत?” 29येसु ओरकुन इतुर, “इदाम दुष्टात्मा केवल प्रार्थनाता द्वारा पसियस दान्ता।”
आपुना हायानाता बारेते येसु असा वेहान्तोर
(मत्ति १७:२२-२३; लूका ९:४३-४५)
30पजा येसु अनि ओनोरक चेला लोकुरक अगडाल गलीलतिगाडाल हन्ज मतोर अनि ओर अगा मन्तोर इदाम बोरे पुनमाकिर इन्जोर येसुन लागिन्द। 31ओर आपुनोर चेलालोरकुन उपदेश हिस ओरकुन इतुर, “नना मानेयतोर मरि मानेयना कयदे पयपियानुर अनि ओरक ओन होवक्स वाटनुरक अनि ओर हातपा मून्ड दियाना पजा असा जिवे मायनुर।” 32मति इद पोल्लो ओरकुन समजेमायो मति ओरक येसुन पुच्चेमायिला वने वरियन्दुरक।
सबोयताल हजोर बोर मन्तोर
(मत्ति १८:१-५; लूका ९:४६-४८)
33पजा ओरक कफरनहुम नाटेनिगा वास लोतिगा उदस मतोरक असके येसु ओरकुन पुच्चेमातुर, “हरिते निमाट बोद पोल्लोता विवाद किन्दिट?” 34ओरक मावागाडाल हजोर बोर मन्तोर इदाम हरितिगा आपसते विवाद किस मतोरक इन्जोर कमेक मतोरक#लूका २२:२४। 35असके येसु उदस ओरक बारा लोकुरकुन केयतुर अनि ओरकुन इतुर, “बोनाय हजोर आयाना इच्चा मन्ता ते ओर सबोयताल हुडलोर अनि सबलोरा सेवक बने मायिर#मत्ति २०:२६-२७; २३:११; मर १०:४३-४४; लूका २२:२६।” 36अनि ओर वरोर नोनान ओरा नडुम निपिहतुर। अनि ओर नोनान आपुना कयदे येचुन ओरकुन इतुर, 37“नावा पोरोयते येरक बालकनिगाडाल वरोन बोरे स्विकार किन्तोर ते ओर नाकुन स्विकार किन्तोर; बोर नाकुन स्विकार किन्तोर ओर नाकुन आयो मति नाकुन लोहवान स्विकार किन्तोर#मत्ति १०:४०; लूका १०:१६; युह १३:२० ।”
बोर माकुन विरोद हिलेर ओर मावासंगे मन्तोर
(लूका ९:४९-५०)
38असके युहन्नाल येसुन इतुर, “हे गुरु, वरोर मानेय निया पोरोयते दुष्टात्मातुन पसहाना माक हुळतोम अनि ओर मावा परके वायोर इन्जोर माक ओन दुष्टात्मातुन टन्डमा इन्जोर इतोम।” 39येसु इतुर, “ओन दुष्टात्मातुन टन्डमा इन्जोर इनमा बाक्याकि बोर नावा पोरोयते लावता बुतो किन्तोर ओर सान्डे नाकुन विरुद गलति इन परोर। 40बाक्याकि बोर मावा विरोदते हिलेर ओर मावासंगे मन्तोर#मत्ति १२:३०; लूका ११:२३। 41निमाट मसिना चेलालोरक आन्दिट इन्जोर बोरायि उन्दि गिलास एर मिकुन उहविर ते ओन आपुना प्रतिफळ जरुर पुटार इन्जोर नना मिकुन खरोय इन्तोना#मत्ति १०:४२।”
दुसरोन पापकियान साटि सन्दि बनेहकेमाट
(मत्ति १८:६-९; लूका १७:१-२)
42येसु असा इतुर, “अनि नावागा विस्वास किन्तोर येर हुडलोरक निकेडाल बोरे वरोन पापकिहान साटि बोरे कारण आयनुर ते ओना गुळंगातिगा उन्दि जतातुन दोहचुन समुद्रदिगा दुरसानाताल पकाय हजोर दन्ड ओन पुटार। 43निया कय निकुन पाप किहिनता ते ओद कयदुन कदियस वाटा बाक्याकि रन्ड कयदासंग नरकता अनन्त काळता किसतिगा हन्दानताल उन्दि कयदासंग अनन्त जिवनतिगा हन्दाना निया साटि बेस मन्ता#मत्ति ५:३०। 44अगा नरकतिगा ओदेना पुळिय हायो अनि किस पियो। 45नियांग काल्क निकुन पापता हरिते ओयिंग ते अव काल्कुन कदियस वाटा। 46बाक्याकि रन्ड काल्क मन्स वने नरकता अनन्त काळता किसतिगा दाकिताल लंगळाल आस जिवनते हन्दाना निया साटि बेस आयार। 47निया कोन्डांग निकुन पाप कियान साटि कारण आतेक कोन्डांग टन्डस वाटा। रन्ड कोन्डांगनासंग नरकतिगा हन्दानाताल आन्दराल आस परमेस्वरना राज्यते हन्दाना निकुन साटि बेस मन्ता#मत्ति ५:२९। 48अगा नरकतिगा ओरा पुळिय बसकेय हायो अनि किस बसकेय पियो#यश ६६:२४। 49सबोय लोकुरकुन पकाय हजोर पकाय तकलिपतिगा हन्दान साटि प्रबु विचार किन्तोर बाक्याकि सबोय लोकुरकुन शुद्ध कियाला पहाजे। 50होवोर सोबाय मन्ता मति होवोरता स्वाद दायार ते निमाट दुसरो बोद चिजते अदेन स्वाद बनेहकिया परकिट? इदाम निमाट परमेस्वरिन साटि उपयोगतोर बनेमाम्ट अनि सबोय लोकुरासंग शान्तिते मन्ट#मत्ति ५:१३; लूका १४:३४-३५ ।”
S'ha seleccionat:
मरकुस 9: fmu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.