मत्ति 13
13
अलग अलग जागातिगा अरता विजाता पिटो
(मर ४:१-९; लूका ८:४-८)
1ओदे दिया येसु लोताल पसियसुन गलीलि नहारता टकातिगा हन्ज उदितुर। 2अनि पकाय लोकुरा भीळ ओना हेरे जमा आतुरक असके ओर डोंगातिगा अन्जतुर, अनि सबोय भीळ टकातिगा नितितुरक#लूका ५:१-३। 3अनि ओर ओरकुन पिटोते पकाय पोल्लोंग वेहतुर, अगडाह उन्दि पिटो इदाम मता, “वरोर विजा वीतवाल विजा वीतान साटि पसियतुर। 4विजा वीतान बेरा हुचुक विजा हरिता टकातिगा अरतुंग अनि पिटेंग वास अवेकुन तितुंग। 5हुचुक विजा कलदा जागादिगा अरतुंग, अगा अवेकुन पकाय तोळिय पुटो अनि खोल तोळिय पुटो इन्जोर अव सान्डेय मोळियतुंग। 6मति पोळद पसियत अनि अवेहना पोरो अदि तरतु असके अव हिरक पयोंग इन्जोर वतितुंग। 7हुचुक विजा काटापोदेलातिगा अरतुंग अनि काटापोदेलांग बरसुन अवेकुन नोवचतुंग। 8मति हुचुक विजा सोबाय जागादिगा अरतुंग, अनि बोदे नुर पट, बोदे साट पट, अनि बोदे तिस पट कायांग ततुंग। 9निमाट बाताल केन्जान्तोरिट अदेन पकाय ध्यानते केन्जुन सम्जेकिम्ट।”
येसुना पिटोता उदेश
(मर ४:१०-१२; लूका ८:९-१०)
10चेलाह लोकुरक हेरे वास येसुन, “निमा लोकुरासंग पिटोते बाक्या वळकान्तोन?” इन्जोर ओन पुच्चेमातुरक। 11येसु ओरकुन “स्वरग राज्यता रहस्य पुन्दान साटि मिकुन वरदान हिता मन्ता मति ओरकुन पुटो। 12बाक्याकि बोना हेरे मन्ता, ओन हियानुर अनि ओना हेरे पकाय आयार, मति बोना हेरे बाराय हिले, ओनाताल ओना हेरे बाताले मन्ता ओद वने येतानुर#मत्ति २५:२९; मर ४:२५; लूका ८:१८; लूका १९:२६ । 13अनि ओरक हुळान्तोरक मति हुळवाप मन्तोरक, अनि केन्जान्तोरक मति केन्जवाप मन्तोरक अनि समजेमायोरक इन्जोर नना ओरासंग पिटोते वळकान्तोना। 14ओरा बारेते परमेस्वरना पोल्लो वेहवाल यशायाह इदाम वेहता पोल्लो पुरा आन्ता:
‘निमाट कविते केन्जोरेय मन्दाकिट, मति समजेमायवि आयकिट,
अनि कोन्डाते हुळसोर मनकिट, मति मिकुन दिसो आयार।
15बाक्याकि येर लोकुरा मन पकाय कटोर आता।
ओरक आपुना कविंग बन्द किस इरतोर, अनि आपुना कोन्डानुंग मुच इरतोर,
ओरक कोन्डाते हुळमाकिर, अनि कविते केन्जमाकिर अनि मन्दे समजेमायमाकिर अनि विस्वास केमाकिर इदाम मतोरक।
ओरक इदाम हिलेर आस मनेर ते ओरक नावा हेरे मलस वास मनेर
अनि नना ओरकुन सुदरे किस मनेना#यश ६:९,१०’।
16मति निमाट कोन्डाते हुळान्तोरिट अनि मिया कविते केन्जान्तोरिट इन्जोर धन्य मन्तोरिट#लूका १०:२३-२४। 17बाक्याकि परमेस्वरना पोल्लो वेहवाल पकाय लोकुरक अनि परमेस्वरना मुने येताना योग्य बुतो कितोर पकाय लोकुरक निमाट हुळान्तोरिट ओव पोल्लो हुळान साटि इच्चा किन्दुरक ते वने ओरक हुळोरक। इदेक निमाट केन्जातोरिट ओव पोल्लोनुंग ओरक केन्जाना इच्चा किन्दुर ते वने अव पोल्लोनुंग ओरक केन्जोरक इन्जोर नना मिकुन खरोय इन्तोना।”
अलग अलग जागातिगा अरता विजाता पिटोता अर्थ
(मर ४:१३-२०; लूका ८:११-१५)
18अनि येसु इतुर, “इदेक निमाट विजा वीतवालोरा पिटोता अर्थ केन्जाट। 19बोरायि स्वरग राज्यता बारेता पोल्लो केन्जुन समजेमायोर ते ओना मन्दिगा वितस मतोर ओद पोल्लोतुन सयतान वासुन उन्च ओन्तोर। हरिता टकातिगा वीतस मतोर ओव विजा येरा बारेते आन्दु। 20अनि कलदा जागादिगा वीतस मतोर ओव विजा ते पोल्लो केन्जुन सान्डेय गिरदातासंग मानेमान्तोर ओरे आन्दुरक। मति आपुनिगा हिरक पयोंग इन्जोर अव वले दियांग मनोर आयनुंग, 21अनि ओर केन्जता पोल्लोता कारण पकाय तकलिप अनि सन्कट आन्ता असके सान्डेय परमेस्वरना विस्वास तासिन्तोरक। 22काटापोदेलानिगा वितस मतोर ओव विजा ते वरोर मानेय पोल्लोतुन केन्जान्तोर मति इद सन्सारता चिन्ता अनि संपतिता दोखा पोल्लोतिगा आहचुन ओरा विस्वास नाश आन्तोरक ओरा बारेते आन्दु। 23सोबाय जागादिगा वीतितुर ओव विजा ते पोल्लोतुन केन्जुन समजेमान्तोर ओरे आन्दुर, ओर अदेना अनुसार कायांग ततान्तोर, बोदे नुर पट, बोदे साट पट, अनि बोदे तिस पट हिन्तोर।”
केळा रोन्डाता पिटो
24येसु ओरकुन परमेस्वरना राज्यता बारेते समजे कियान साटि असा उन्दि पिटो वेहतुर ओद पिटो इदाम मता: “वरोर मानेय मतोर, ओर आपुना डन्डतिगा सोबाय विजा वीतितुर। 25मति सबोय लोकुरक हुज्तुरक असके ओनोर दुश्मन वास गोहकनिगा केळाता विजा वीतस हतुर। 26गोहक मोळियतु असके केळा विजा वने मोळियता दिसतु। 27असके मालकानोर दासक वास मालकान इतुरक, ‘हे स्वामि, बाताल निमा आपुना डन्डतिगा सोबाय विजा वीतित ते पजा केळाता विजा अगा बदाम मोळियतु?’ 28असके मालकाल ओरकुन, ‘इद वरोर दुश्मनना बुतो आन्दु’ इन्जोर इतुर। असके दासक ओन इदाम पुच्चेमातुरक, ‘माक हन्जुन अवेहकुन तेहकस जमाकियान साटि निया इच्चा मन्ता बहे?’ 29मालकाल ओरकुन इतुर, ‘आयो, केळा विजाता बुडुम तेहकानपा निमाट अदेनासंग गोहकुन वने तेहकिकिट इन्जोर इदाम आयमाकि। 30रन्डासकुन कोयानवनाह संगेय बरसिला हिम्ट, अनि कोयान बेरा नना कोयवालोरकुन पहले केळा रोन्डातुन तेहकस पोतहान साटि अवेहनांग पेन्डियांग दोहाट, अनि गोहकुन नावा टोलितिगा जमा किम्ट इन्जोर इन्का।’ ”
रायि पळेदा पिटो
(मर ४:३०-३२; लूका १३:१८,१९)
31परमेस्वरना राज्यता बारेते लोकुरकुन समजे कियान साटि येसु ओरकुन असा दुसरो उन्दि पिटो वेहतुर, ओद पिटो इदाम मता, “स्वरग राज्य रायिता पळे लेहका मन्ता, अदेन वरोर मानेय आपुना डन्डतिगा उरसतुर। 32ओद सबोय पळेताल हुडला मन्ता मति सबोय मराताल हजोर आतु। अनि आबारता पिटेंग वासुन अदेना कोहक पोरो मन्तांग इचोन हजोर आस बरसान्ता।”
परमेस्वरना राज्यता बारेते दुसरो पिटो
(लूका १३:२०,२१)
33स्वरगराज्यता बारेते लोकुरकुन समजे कियान साटि येसु असा वने दुसरो पिटो ओरकुन वेहतुर, “उन्दि आळ हुचुक खमिरतुन#१३:३३ तिन्दाना सोडा लेहका बुतो किन्ता दुसरो उन्दि चिज ओसुन मून्ड सेर पिन्डीतिगा मिलेकिसीतु, अद सबोय पिन्डि वले आसोरिंग पकाय बोगिलत। स्वरगराज्य वने इदामे मन्ता।”
येसु पिटोते सन्देश हितुर
(मर ४:३३-३४)
34इव सबोय पोल्लोंग येसु पिटोते लोकुरकुन इतुर, अनि बिना पिटोते येसु ओरकुन बाराय इनोर आन्दुर।
35“नना पिटो वेहान साटि आपुना टोडि तरियका,
दुनियाता उत्पतिताल गुपित मन्तांग ओद पोल्लोनुंग नना वेहका#भज ७८:२”
इन्जोर परमेस्वरना पोल्लो वेहवालना द्वारा परमेस्वर इन्ज मतोर ओद पोल्लो इदाम पुरा आयि।
केळा रोन्डाता पिटोता अर्थ
36येसु भीळतुन तासिस लोन वातुर असके ओनोर चेला लोकुरक ओना हेरे वास, “डन्डतिगाडाल केळा रोन्डाता पिटो माकुन समजेकिस वेहा” इन्जोर विनन्ति कितुर। 37असके येसु ओरकुन उत्तर हितुर: “सोबाय विजातुन वीतवाल नना मानेयतोर मरि आन्दान। 38डन्ड इद दुनिया आन्दु; सोबाय विजा स्वरग राज्यता बालक आन्दुरक; अनि केळा रोन्डा सयतानोर मरि आन्दुरक। 39केळा विजा वीतितुर ओर दुश्मन सयतान आन्दुर। कोयाना दुनियाता अन्त आन्दु; अनि कोयवालोरक स्वरगदूत आन्दुर। 40केळा रोन्डातुन तेहकस किसितिगा इरस पोतहान्तोर अदाम लेहका दुनियाता अन्तते आयार। 41नना मानेयतोर मरि आपुनोर स्वरगदूतकुन लोहका अनि ओरक ओना राज्यताल सबोय पाप कियान साटि कारण आन्ता सबोय पोल्लोनुंग अनि खराब बुतो केवालोरकुन जमा कियानुर, 42अनि ओरकुन किसता भट्टितिगा वाटानुर, अगा किलाना अनि पल्क कटरे कियाना आयार। 43ओद बेरा परमेस्वरना मुने येताना योग्य बुतो केवालोरक आपुना बाबो परमेस्वरना राज्यतिगा पोळद लेहका मान्जानुरक। निमाट बाताल केन्जान्तोरिट अदेन पकाय ध्यानते केन्जुन सम्जेकिम्ट।”
मकता खजानाता पिटो
44येसु ओरकुन असा उन्दि पिटो वेहतुर, “स्वरगराज्य इदाम मन्ता, वरोर मानेयतुन डन्डतिगाडाल उन्दि खजाना पुटतु। ओर अदेन असा अगाय मकिहतुर, ओर पकाय गिरदाते हन्जुन बारायि ओना हेरे मता अदेन मोमसितुर अनि ओद डन्डतुन असतुर।”
अनमोल मोतिता पिटो
45येसु स्वरग राज्यता बारेते असा उन्दि पिटो वेहतुर, “स्वरग राज्य सोबाय मोतिहकुन पळकसोरिंग मन्तोर वरोर व्यापारी लेहका मन्ता। 46ओन उन्दि पकाय किमति मोति पुटत ते ओर हन्जुन आपुना सबोयतुन मोमस ओद मोतितुन असतुर।”
जालिता पिटो
47येसु असा उन्दि पिटो वेहतुर, “स्वरग राज्य समुद्रदिगा वाटतोर अनि सबोय प्रकारतांग मीन्क पयतोर उन्दि हजोर जालि लेहका मन्ता। 48अनि जालि मीन्कने निन्दित ते, मीन्क पयवालोर अदेन टकातिगा पिळिंगसोर ततुर अनि उदस सोबाय-सोबाय मीन्कुन दळियातिगा जमा कितुर अनि खराब-खराब मीन्कुन हरचितुर। 49दुनियाता अन्तते इदामे आयार। स्वरगदूतक वासुन पापि लोकुरकुन परमेस्वरना मुने येताना योग्य बुतो केवालोकुरकनिगाडाल अलगो कियानुर। 50अनि ओरकुन किसता भट्टितिगा वाटसियानुर। अगा किलाना अनि पल्क कटरे कियाना आयार।”
जुनाल अनि पुनाल करहानाता महत्व
51“बाताल निमाट इव सबोय पोल्लोंग समजेमातिट?” इन्जोर येसु ओरकुन पुच्चेमातुर। “इंगो” इन्जोर ओर उत्तर हितुरक। 52येसु ओरकुन इतुर, “इन्जोर स्वरग राज्यतोर चेलाह बनेमातोर परमेस्वरना नियमतुन करिहवालोरक सबोय लोकुरक आपुना भंडारताल पुनांग अनि जुनांग चिजक टन्डान्तोर ओर मानेय लेहका मन्तोर।”
नासरत नाटेनोर लोकुरक येसुन विरोद किन्तोरक
(मर ६:१-६; लूका ४:१६-३०)
53येसु इव सबोय पिटो इन्ज मारिहतुर असके ओर अगडाल हतुर। 54अनि आपुना नाटेनिगा वासुन यहुदि लोकुरा समाज मन्डलितिगा उपदेश हिया लागतुर असके ओरक चकेमास इदाम पुच्चेमायिला लागतुरक, “येन इद ग्यान अनि इद अत्भुत चमत्कारता बुतो कियाना अदिकार बगाडाल पुटतु? 55बाताल येर मरा मिस्रिनोर मरि आयोर बहे? अनि बाताल येना अवहारिना पोरोय मरियम अनि ओनोर तमोलोरा पोरोय याकुब, यूसुफ, शिमोन अनि यहुदा हिले बहे? 56अनि बाताल येनांग सबोय हेलांग मावासंग मनोंग बहे? पजा येन इद सबोय बगाडाल पुटतु” इन्जोर पुच्चेमास येसुना पोल्लोतिगा विस्वास केवोर आतुरक।
57मति येसु ओरकुन इतुर, “परमेस्वरना पोल्लो वेहवालिन आपुना देश अनि आपुना लोन तासिस सबोयलोर आदर किन्तोरक#युह ४:४४।” 58अनि येसु अगा ओरा अविस्वासता कारण पकाय लावता बुतो केवोर।
S'ha seleccionat:
मत्ति 13: fmu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.