लूका 4
4
येसु सयताना परिक्षातुन जिकान्तोर
(मत्ति ४:१-११; मर १:१२-१३)
1अनि येसु पवित्र आत्माता पुरा नियन्त्रणते आस यरदन नदिताल वातुर अनि परमेस्वरना आत्मा येसुन वारु पल्लातिगा ओतुर, 2अनि सयतान चालिस दियांग येसुना परिक्षा किन्दुर। अनि अव चालिस दियांग येसु बाराय तिनोर, अनि चालिस दियांग पुरा आतुंग असके येसुन पकाय करवस्तु।
3असके सयतान येसुन, “निमा परमेस्वरनोर मरि आन्दि ते रोटि बनेमायि इन्जोर इद कलदुन इन” इदाम इतुर। 4येसु सयतानतुन इतुर,
“‘मानेय रोटितेय जिवोत मनोर आयनुर#व्यव ८:३; मत्ति ४:४ ’
इन्जोर पवित्र पुस्तकतिगा कोटताल मन्ता।”
5असा वने सयतान येसुन मटा पोरो ओतुर अनि उन्दि झडकाते दरतितांग सबोय देशकुन तोहतुर, 6अनि येसुन इतुर, “नना इद सबोय अदिकार अनि अदेना हजोरपण निकुन हियाका, इद धनसंपति सबोयता अदिकार नाकुन हिता मन्ता, अनि नना बोन हियाका इदाम इच्चा किन्तोना ओन हिंतोना। 7इन्जोर निमा नावांग काल्क अरकि ते इद सबोय निया आयार” इदाम इतुर। 8असके येसु सयतानतुन उत्तर हितुर,
“ ‘निमा आपुनोर परमेस्वर प्रबुन सेवा किस केवल ओनाय आरादना किम#व्यव ६:१३; व्यव १०:२०; मत्ति ४:१०’
इन्जोर पवित्र पुस्तकतिगा कोटताल मन्ता”
इदाम इतुर।
9असके सयतान येसुन येरुसलेमतिगा ओसुन यहुदि लोकुरा हजोर मन्दिरता पोरोडा कोडितिगा निपिहतुर, अनि येसुन इतुर, “निमा परमेस्वरनोर मरि मनकि ते इद मन्दिरता पोरोडाल अडिय डेया। 10बाक्याकि
‘निकुन केपान साटि परमेस्वर आपुनांग स्वरगदूतकुन आग्या हियानुर,
11अनि निया कालकुन कल पळमाकि इन्जोर स्वरगदूतक निकुन आपुनांग कयक्ने ताहानुंग#भज ९१:११-१२; मत्ति ४:६’
इन्जोर पवित्र पुस्तकतिगा कोटताल मन्तोर”
इदाम इतुर। 12येसु सयतानतुन,
“‘निमा आपुना परमेस्वर प्रबुना परिक्षा केमा#व्यव ६:१६; मत्ति ४:७’ इदाम पवित्र पुस्तकतिगा कोटताल मन्ता”
इन्जोर उत्तर हितुर। 13इदाम सयतान सबोय परिक्षा किस हुळतु असके दुसरो सन्दि पुटानावनाह येसुना हेरेटाल सयतान वितितुर।
येसुना सेवाता सुरुवात
(मत्ति ४:१२-१७; मर १:१४,१५)
14अनि येसु पवित्र आत्माता लावदे पुरा नियत्रण आस गलील प्रदेशतिगा मलस वातुर, अनि येसुना पोल्लो हेरेगुरेटांग प्रदेशतिगा अवतु। 15येसु ओरांग समाज मन्डलितिगा प्रबुना पोल्लो करियला लाकतुर, अनि सबोय लोकुरक येसुन हजोरपण किन्दुरक।
नासरतिगा येसुना होंग
(मत्ति १३:५३-५८; मर ६:१-६)
16असा येसु नासरत#४:१६ नासरत इस्रयेल देशता गलील जिल्लातिगा दक्षिण-नडुम बागता उन्दि सेहेर मता। सेहेरतिगा वातुर, अगा ओर पाले-पोसे किसि; अनि आपुना रितिते अनुसार यहुदिलोकुरा पवित्र दिया ओरा समाज मन्डलितिगा हन्जुन पवित्र पुस्तक वाचेकियान साटि नितितुर। 17परमेस्वरना पोल्लो वेहवाल यशायाहना पवित्र पुस्तकतुन येसुना कयदे हितुर अनि येसु पवित्र पुस्तक टन्डसुन खोलेकितुर:
18“गरिब लोकुरकुन परमेस्वरना सोबाता पोल्लो वेहान साटि नाकुन आचतोर
इन्जोर प्रबुना आत्मा नावागा मन्ता।
अनि बन्दि लोकुरकुन लेहचियानाता सन्देश हियान साटि
अनि अन्दरालोरकुन असा हूळ परान साटि
परमेस्वरना सोबाता पोल्लोतुन वेहान साटि
पिडित लोकुरकुन लेहचियान साटि,
19अनि लोकुरकुन परमेस्वरना दया कियान साटि प्रबुना बेरा वाता इदाम वेहान साटि नाकुन लोहतोर”#यश ६१:१-२
इन्जोर ओर वाचेकितुर।
20अनि येसु पवित्र पुस्तकतुन बन्द किसुन सेवकना कयदिगा हिस उदितुर; असके यहुदि समाज मन्डलितोर सबोय लोकुरक येसुन हुळिला आस मन्दुरक, 21अनि पजा येसु लोकुरकुन “नेन्ड पवित्र पुस्तकतिगाडाल नना वाचेकिता इव पोल्लोंग मिया मुने पुरा आतु” इदाम इन्दिलाकतुर। 22अनि सबोय लोकुरक येसुन बेस मन्तोर इन्दा लाकतुरक, येसुना टोडिताल दयाता पोल्लो पसिय्तुंग इन्जोर लोकुर येसुना बारेते दंगेमातुरक; अनि “अररे! येर ते यूसुफना मरि आन्दुर बहे?” इन्जोर इन्दालाकतुरक।
23असके येसु ओरकुन इतुर, “ ‘हे डाक्टेर, निमा आपुनतुन बेसकीम! कफरनहुम#४:२३ कफरनहुम गलीलि नहारता हेरेटा उन्दि सहेर मता। सहेरतिगा कितोन निया बारेते बाताल आयि केन्जतोरोम अदेन निया आपुना इद सहेरतिगा वने किम’ इदाम निमाट नाकुन जरुर इन्किट।” 24अनि येसु ओरकुन असा इतुर, “परमेस्वरना पोल्लो वेहवाल बोरे मानेय आपुना नाटेने मान-आदार कल्योर इन्जोर नना मिकुन खरोय वेहान्तोना#युह ४:४४। 25अनि परमेस्वरना पोल्लो वेहवाल एलियाना दियाते साळे मून्ड वरसांग पिर वायो आतु अनि सबोय देशतिगा हजोर दुष्काळ आत, अद बेरा इस्रायेल देशतिगा पकाय रान्डिह आतुंग इन्जोर नना मिकुन खरोय वेहान्तोना#१ राजा १७:१। 26मति सेय्दा प्रदेशता सरेफत नाटेना रान्डिन तासि दुसरो बोदे रान्डिहना हेरेय परमेस्वरना पोल्लो वेहवाल एलियान परमेस्वर लोहोर आतुर#१ राजा १७:८-१६ । 27अदामे परमेस्वरना पोल्लो वेहवाल एलीशाना काळते इस्रायेल देशतिगा पकाय कोडि बिमारि लोकुरक मतोरक, मति केवल सिरिया देशतोर नामान पोरोयतोर कोडि बिमारिताल शुद्ध आतुर, अनि दुसरो बोरे कोडि बिमारिताल शुद्ध आयोरक आतुरक#२ राजा ५:१-१४।” 28इद पोल्लो केन्जुन समाज मन्डलितिगा मन्तोरक सबोय लोकुरक पकाय होंगदे तेदितुरक, 29अनि पजा येसुना हिरमुटा आसुन सहेरताल बाहरो पचिहच हितुर, अनि ओरा सहेर उचमन्दा अद मटा पोरो येसुन ओतुर अनि मटा पोरोडाल अडिय दुरसान साटि कोसिस कितुरक। 30मति येसु लोकुरा कोहडिता नडुमताल पसियस हतुर।
येसु दुष्टात्मा पयतोर मानेयतुन सुदरे किन्तोर
(मर १:२१-२८)
31अनि पजा येसु गलीलता कफरनहुम#४:३१ कफरनहुम गलीलि नहारता हेरेटा सेहेर मता। सेहेरतिगा हतुर; अनि यहुदि लोकुरा समाज मन्डलितिगा ओरा पवित्र दिया लोकुरकुन परमेस्वरना पोल्लो करहिन्दुर। 32अनि येसुन पोल्लो करिहाना अदिकारते मता इन्जोर लोकुरक ओनांग पोल्लोनुंग केन्जुन आश्चरय आतुरक#मत्ति ७:२८,२९।
33अनि अगा यहुदि लोकुरा समाज मन्डलितिगा वरोर मानेय मतोर, ओनिगा अशुतात्मा मता, 34अनि अशुतात्मा इन्ता, “हे नासरितोर#मत्ति २:२३#४:३४ येसुना हुळिला पहारते येसुना परिवार नसरत नाटेनिगा हन्जुन अगा मतोरक इन्जोर नासरि पोरोयते येसुन केयान्तोर। येसु, निमा मावा पोरो बाक्या कय लावे किन्तोन? बांग निमा माकुन नाश कियान साटि वातोन? निमा परमेस्वरनोर पवित्र मानेय आन्दि इन्जोर नना पुन्तोना!” इदाम हजोर लेंगदे केयसुन ओर तेदितुर। 35असके येसु ओन इतुर, “कमेक मन! अनि ओनिगाडाल पसियसुन हन!” इदाम रांगतुर असके अशुतात्मा ओन नडुम पल्लातिगा हुक्तस बोदे किर केवाय ओनिगाडाल पसियतु। 36अनि इदेन हुळसुन सबोय लोकुरक दंगेमातुरक, “इद पोल्लो बचोन आश्चरय आन्द? येसु अदिकार अनि लावदे अशुत्मातुन आग्या हिन्तोर अनि अशुतात्मा पसियान्ता!” इदाम इन्दिला लाकतुर। 37अनि इदाम नालुंगास बासानांग प्रदेशकनिगा येसुना बारेता पोल्लोंग फयलेमायिला लाकतुंग।
पतरासना पोयहारिन अनि दुसरो लोकुरकुन येसु सुदरे किन्तोर
(मत्ति ८:१४-१७; मर १:२९-३४)
38अनि येसु यहुदि समाज मन्डलितिगाडाल तेचुन शिमोना लोतिगा हतुर। अनि शिमोना पोयहारिन पकाय पिनि पयस मन्ता, अनि तान सुदरे किम इन्जोर शिमोन्नोर लोतोरक पिनि पयस मन्ता ताना साटि येसुन वेहतुर। 39येसु पिनि पय्ता बायिना हेरे निचुन पिनितुन रांगतुर असके पिनि अदेनताल रेयत, अनि अद बायि बेस आसुन ओरांग सेवा किया लाकतु।
40अनि पोळद मुळन्दान बेरा, रंग-रंगनांग बिमारिते हुन्च मन्दुरकुन येसुना हेरे ततुरक, अनि येसु वरोरवरोनिगा कय इरसुन ओरकुन सुदरे कितुर। 41अनि पकाय लोकुरकनिकेडाल दुष्टात्मांग: “निमा परमेस्वरनोर मरि आन्दि!” इन्जोर पकाय हजोर लेंगदे केय्सोरिंग पसियस हतुंग। पकाय लोकुरकनिगाडाल दुष्टात्मांग पसिय्तुंग मति ओर मसि आन्दुर इन्जोर दुष्टात्मांग पुन्ज मन्दुंग इन्जोर वळकिला हेवोर आस येसु दुष्टात्मानुगं रांगदुर।
समाज मन्डलितिगा परमेस्वरना सोबाता पोल्लोतुन येसु वेहान्तोर
(मर १:३५-३९)
42अनि पजा पोळद पसिय्त असके येसु अद नाटेनाल पसियसुन सुनसान जगाते हतुर। अनि लोकुरक डगिना-डगि येसुन पळकसोरिंग ओना हेरे वातुरक, अनि ओरा हेरेटाल येसु हन्माकिर इन्जोर येसुन ओरक रोकेकियाला लाकतुरक। 43मति येसु ओरकुन इतुर, “नाकुन दुसरो सेहेरकनिगा वने परमेस्वरना राज्यता सोबाता पोल्लोतुन वेहाना मन्ता, बाक्याकि नाकुन परमेस्वरना पोल्लोतुन वेहान साटि लोहतोर।” 44अदाम येसु गलील प्रदेशतांग यहुदि लोकुरा समाज मन्डलिहतिगा परमेस्वरना पोल्लोतुन वेहचोरिंग मन्दुर।
S'ha seleccionat:
लूका 4: fmu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.
