लूका 2
2
येसुना जनम
(मत्ति १:१८-२५)
1अद बेरा रोमि देशतोर सबोय लोकुरक ओरा पुरकातोरक बगा मन्तोरक अगा हन्जुन आपुनांग पोरोय कोटहिर इन्जोर रोमि देशता हजोर राजाल ओगुस्तुस निकेडाल उन्दि आग्या पसियतु। 2(कुरेन्यास#२:२ कुरेन्यास रोमि देशता हजोर राजाना वरोर गोतियाल अनि सिरिया जिल्लाता सयनिक लोकुरा मुक्याल मतोर। सिरिया जिल्हातोर अदिकारि मतोर असके पहलेटा इद पोरोय कोटाना बेरा आतु।) 3इन्जोर आपुना पोरोय कोटहान साटि सबोय लोकुरक आप-आपुना नाटेनिके अनि सहेरतिके हतुरक। 4अनि यूसुफ वने दावुद राजाना परिवारता अनि वंशतोर मतोर इन्जोर पोरोय कोटान साटि, 5ओर गलील प्रदेशता नासरत सहेरतिगाडाल पसियसुन दावुद राजाल जनम आतोर येहुदि प्रदेशता बेतलहेम सेहेरतिगा हतुर। ओनासंग मरमिंग साटि हेनांग-मंगळिंग किस मता मरियम ओनासंग मता। अद मेन्दुत मता। 6यूसुफ अनि मरियम बेतलहेम सहेरतिगा मतोरक असके मरियम आपुना नुनालिन जन्मेमायाना दियांग पुरा आतुंग, 7अनि मरियम आपुना पहले मरिन जनम हीत। अनि ओरकुन बेतलहेमतिगा मन्दाना साटि विशराम गुह बगाय पुटो इन्जोर चवातुन जुन्हीते हुरिचुन कोळकातिगा इरतु।
स्वरगदूतकना द्वारा बेळांग मेहवालोरकुन सन्देश
8अनि अद प्रदेशता हेरे पकाय बेळांग मेहवालोर मतोरक, अद दिया ओरक नरका पल्लातिगा आपुनांग बेळाना गोहडि केपिन्दुरक। 9असके प्रबुना उन्दि दूत ओरा मुने दिसतु, असके प्रबुना वेळिचि ओरा हिरमुटा मांचतु, अनि ओरक पकाय जाक आहचतु। 10ओद स्वरगदूत ओरकुन इन्ता, “वरियमाट। पकाय ध्यानकिस केन्जाट, नना सबोय लोकुरकुन पकाय गिरिदा हिन्ता उन्दि सोबाता पोल्लो वेहका। 11नेन्ड दावुद राजाना बेतलहेम सेहेरतिगा मिया साटि वरोर पिसिहवाल जनमेमातोर। ओरे प्रबु मसिहाल आन्दुर। 12अनि जुन्हीते हुरिहच कोळकातिगा हुन्जिहता वरोर नुनान मिकुन दिसानुर, इद मिया साटि उन्दि चिना मन्दार।” 13स्वरगदूत इदाम इन्दिला आता अचोन बेरा अद स्वरगदूतसंग असा स्वरगदूतक्ना उन्दि गोहडि परमेस्वरना स्तुति किस दिसतुरक,
14“स्वरगतिगा परमेस्वरना हजोरपण दिसिर
अनि दरतितिगा परमेस्वर बोनिगा गिरिदा आन्तोर ओरकुन शान्ति पुटि”
इदाम इतोरक।
15अनि स्वरगदूतक मेहवालोरा हेरेटाल स्वरगतिके हतुरक, असके मेहवालोरक वरोन दुसरोनासंग इदाम इन्तोरक, “देट माक बेतलहेम हन्जुन इद पोल्लोतुन पुच्चेमायकाट अनि प्रबु माकुन वेहता इद पोल्लोतुन पळकसोर अद पोल्लो माक हुळकाट।” 16अनि बेळांग मेहवालोरक सान्डे हन्जुन मरियम अनि यूसुफिना हेरे कोळकातिगा हुन्जिहता नुनान हुळतुरक। 17अनि पजा नुनालना बारेते स्वरगदूत ओरकुन वेहच मता सबोय पोल्लो दुसरो सबोय लोकुरकुन वेहतुरक, 18अनि अद पोल्लो केन्जतोर सबोय लोकुरक बेळांग मेहवालोर ओरासंग वेहच मता अद पोल्लोता बारेते आश्चरय आतुरक। 19मति मरियम केन्जता इव सबोय पोल्लोनुंग आपुना मन्दे इरसुन अदेना बारेते आल्हीन्दु। 20अनि स्वरगदूत बेळांग मेहवालोरकुन बदाम वेहच मतोर अदामे ओरक सबोय पोल्लोनुंग केन्जुन अनि हुळसुन परमेस्वरना महिमा अनि स्तुति किसोरिंग हतुरक।
येसुना बारसा
21नुनाल जनम आतपा आट दियाना पजा यहुदि रिति रिवाचता अनुसार नुनालना कतना कियाना बेरा वात, असके नुनालना पोरोय येसु इरतुरक, बाक्याकि नुनाल मरियमना पोटातिगा बनेमायाना मुने स्वरगदूत अद नुनालना पोरोय इदाम इरिला पहाजे इन्जोर वेहच मता।
येसुन मन्दिरतिगा प्रबुन सोपेकिन्तोर
22-23(अनि परमेस्वर मूसान#२:२२-२३ मूसान इस्रयेल लोकुरकला मुक्याल अनि प्रबुना वरोर सेवक मतोर। हिता नियमता अनुसार “सबोयताल पहलेटा मरि प्रबुन साटि समरपित मन्तोर#निर १३:२,१२; लेव्य १२:२-८।”) येसुना अवालना शुद्धि आयाना दियांग आतुंग, असके मूसाना नियमता अनुसार प्रबुन सोपेकियान साटि येसुनोर अवाल-बाबो येसुन येरुसलेमता मन्दिरतिगा ततुरक, 24अनि प्रबुना नियमता अनुसार: “पुराळ पिटेना उन्दि जोळी या परेवानागं रन्ड पिलांग तचुन बलि हेविर।”
शिमोन पवित्र आत्माते येसुना वायाना पोल्लोतुन वेहिन्तोर
25येरुसलेम सेहेरतिगा शिमोन पोरोयतोर वरोर मानेय मतोर, अनि ओर मानेय परमेस्वरना मुने येताना योग्य अनि परमेस्वरना भक्ति केवाल मतोर। अनि ओर इस्रायेल लोकुरा लेहचियाना साटि पोसिंदुर, अनि ओनिगा पवित्र आत्मा मन्तोर। 26अनि लोकुरकुन पिसान साटि प्रबु लोहतोर मसिन हुळवा निमा हायवि आयिकि इदाम परमेस्वरना पवित्र आत्मा शिमोनिन वेहच मतोर। 27शिमोनिन परमेस्वरना आत्मा वेहतोर इन्जोर ओर मन्दिरता डुवारतिगा हतुर। असके मूसाना नियमता अनुसार नुनाल येसुन साटि रिति रिवाज केविर इन्जोर मरियम अनि यूसुफ नुनाल येसुन मन्दिरतिगा ततुर, 28अनि पजा शिमोन नुनाल येसुन आपुना कोराते येतितुर अनि परमेस्वरदुन महिमा किसुन इतुर:
29“हे प्रबु, इदेक निमा नाकुन निया पोल्लोता अनुसार शान्तिते हायिला हिम,
30बाक्याकि यहुदि आयोर लोकुरकुन परमेस्वरतुन तोहच हियान साटि,
सबोय देशतोर लोकुरकनिकेडाल निमा आहचतोर निया इस्रयेल लोकुरकुन आदर पुटान साटि,
31सबोय लोकुरकुन पिसान साटि उन्दि वेळिचि आस निमा लोहतोर,
32निया पिसहानातुन नना हुळतान”
इन्जोर इतुर#यश ४२:६; ४९:६; ५२:१० । 33इदाम नुनाल येसुना बारेते शिमोन वेहन्दुर अव पोल्लोंग केन्जुन ओना अवाल-बाबो आश्चरय आतुरक। 34अनि शिमोन ओरकुन आशिष हिसुन मरियमिन इन्तोर: “केन्जा, वेर नुनालनिगा विस्वास केवोरक हुचुलोरक इस्रायेल लोकुरकुन दन्ड मिलेमायाना अनि येनिगा विस्वास कियानुरक हुचुलोरक इस्रायेल लोकुरकुन आशिष मिलेमायान साटि वेन उन्दि चिना आस परमेस्वर इरतोर। 35ओना होंगते पकाय लोकुरक वळकानुरक, इदाम ओना दुःख-तकलिब अनि होंगदुन हुळसुन निया मन्दिगा कसेर कदियान्ता लेहका पकाय दुःखता नोमुर आयार।”
हन्नाना गवाहि
36अनि असेरना पाळिताल पनुवेलना पेडि हन्नाल पोरोयदा परमेस्वरना पोल्लो वेहवाल उन्दि पेडि मता। अनि मरमिंग आता पजा आपुना मुजोनासंग सात वरसांग मता, अनि पजा अदेना मुजोहाराल हातुर। 37अनि हन्नाल चोवरान्सी वरसाताल रान्डि मता। इदेक अद पकाय सेळो आस मन्दु अनि अद परमेस्वरना प्रार्थना लोतुन तासिवो आस उपास अनि प्रार्थना किस-किस नरका-पियाल परमेस्वरना सेवा किन्दु। 38अनि यूसुफ अनि मरिनासंग शिमोन वळकन्दुर असके हन्नाल अद मन्दिरतिगा वात। अनि नुनाल येसुन हुळत असके परमेस्वरना धन्यवाद किया लाकत। इस्रयेल लोकुरा लेहचियाना हरहुळस मतोर ओर लोकुरकुन हन्ना नुनाल येसुना बारेते वेहिला लाकतु।
यूसुफ अनि मरियम नुनाल येसुनासंग नासरत नाटेनिके मलस वान्तोरक
39मरियम अनि यूसुफ प्रबुना नियमता अनुसार प्रार्थना लोतिगा सबोय बुतोतुन किस मारिहतुर अनि गलील प्रदेशता आपुना नासरत सेहेरतिगा मलस वातुरक#मत्ति २:२३। 40अनि पजा नुनाल येसु हजोर आसोरिंग लावदे अनि बुद्धि पुरा आसोरिंग बरसतुर; अनि परमेस्वरना दया ओनासंग मता।
येसु पेकाल येरुसलेम मन्दिरतिगा
41अनि येसुनोर अवाल-बाबो दर वरसांग यहुदि लोकुरा पसहा हनुमते येरुसलेमतिगा हन्दुरक#निर १२:१-२७; व्यव १६:१-८ । 42अनि येसुन बारा वरसानोर आतुर, असके ओरा रितिता अनुसार ओरक येरुसलेमतिगा हन्दुरक। 43अनि पसहाता हनुम किसुन मरियम अनि यूसुफ आपुना लोतिगा मलस वायिला लाकतुरक, मति येसु पेकाल येरुसलेमतिगाय मतोर; अनि ओनोर अवाल-बाबो पुनोर आतुरक। 44अनि ओरक येसु पेकाल बोरे दुसरो लोकुरासंग वायिला आतोरक इदाम समजेमास उन्दि दियाता लक हन्दाना आत। अनि पजा ओरक आपुनोर परिवारतिगा अनि पुतोरक लोकुरकनिगा पळकिला लाकतुरक। 45मति येसु पेकान दीसोर इन्जोर ओरक पळकसोरिंग येरुसलेम सेहेरतिगा असा मलस हतुरक, 46अनि मून्ड दियाना पजा मरियम अनि यूसुफ येसु पेकान येरुसलेम मन्दिरतिगा कलियतुरक असके ओर मन्दिरतिगा परमेस्वरना पोल्लोतुन करिहवाल गुरुजि लोकुरा नडुम उचुन ओरांग केन्जदुर अनि ओरकुन प्रश्न किन्दुर। 47अनि येसु पेकना केन्जतुरक ओरक सबोय ओना बुद्धिता बारेते अनि ओर हिता सबोय उत्तरता बारेते आश्चरय आस मन्दुरक। मरियम अनि यूसुफ ओन हुळसुन दंगेमातुरक! 48अनि ओना अवहारि मरियम येसु पेकान इतु, “ओहो! हे नोना, निमा बाक्या इदाम किति? निया बाबाल अनि नना पकाय चिन्ताते निकुन पळकिन्दोम” 49ओद केन्जुन येसु पेकाल आपुनोर अवाल-बाबोन इतुर, “निमाट नाकुन बाक्या पळकिंदिट? नाकुन आपुन बाबोना लोन मन्दाना मन्ता इन्जोर बांग निमाट पुनविट बहे?” 50अनि ओर आपुनोर अवाल-बाबोन इतुर अद पोल्लोतुन ओना अवाल-बाबो समजेमायोर आतुरक। 51अनि येसु पेकाल आपुनोर अवाल-बाबोनसंग मलस हतुर अनि नासरत सेहेरतिगा वातुरक अनि ओरा आदर मानते अनि नम्रताते मन्दिला लाकतुर। अनि ओना अवहारि अव सबोय पोल्लोनुंग आपुना मन्दे इरतु।
52येसु पेकाल बुद्धिते, वयते, परमेस्वरना अनि मानेयक्ना गिरिदाते बरसोरिंग हतुर#१ शाम २:२६; नीति ३:४ ।
S'ha seleccionat:
लूका 2: fmu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.
