लूका 18
18
आशा सोळेकेवोर आस दरोज प्रार्थना किम्ट
1अनि पजा ओरक आशा सोळेकेवोर आस दरोज प्रार्थना कियाना जरुरता बारेते तोहान साटि येसु ओरकुन उन्दि पिटो वेहतुर: 2“उन्दि सेहेरतिगा परमेस्वरदुन वरयोर बोरे मानेयकुन वने मानेमायोर वरोर न्याय केवाल अदिकारि मतोर। 3अनि अदे सेहेरतिगा उन्दि रान्डि आळ मन्दु, अनि अद रान्डि आळ न्याय केवाल अदिकारिना हेरे पकाय बेरा वास-वासुन, ‘दुश्मन नावागा अन्याय किसोर मन्तोर अद अन्याता विरुद न्याय किसुन नाकुन न्याय हिम’ इन्जोर इन्दु। 4अनि न्याय केवाल अदिकार अद रान्डि आळदासंग हुचुक दियांग ते केन्जोर आतुर, मति आकरि ओर मन्दे इदाम आलहिला लाकतुर, ‘नना ते परमेस्वरदुन वरयोन अनि बोरे मानेयकुन वने मानेमायोन, 5मति इद रान्डि आळ नाकुन तकलिप किसोरिंग मन्ता इन्जोर नना ताना न्याय किस अदेन पिचिहका; आयोते इद रान्डि आळ दरोज वासुन नाकुन परिसान कियार’ इन्जोर ओर आपुना मन्दिगा आलिहतुर।”
6अनि पजा प्रबु ओरकुन इतुर, “येर पापि न्याय केवाल अदिकार बांग इन्तोर इन्जोर निमाट केन्जाट। 7मति येर खराब किन्तोर न्याय केवाल वने इदाम कितुर ते परमेस्वर नरका-पियाल आपुना मुने किलिंगसोर प्रार्थना किन्तोर आपुनोर आचतोरक लोकुरकुन बचोन सोबाय न्यायकियानुर बहे? ओरक ओरा प्रार्थनातुन उत्तर हियाना साटि बेरा हेवोर आयनुर। 8परमेस्वर ओरकुन सान्डे न्याय कियानुर इन्जोर नना मिकुन चेतेकिसुन वेहान्तोना। मति नना मानेयतोर मरि दरतितिगा वायका ते नावागा विस्वास केवालोरक पकाय कमि लोकुरकुन कलियका” इन्जोर प्रबु इतुर।
आपुनतुन हजोर समजेमान्तोर ओन हुडलोर किहिनुर
9अनि माक परमेस्वरना मुने येताना योग्य बुतो केवाल आन्दोम इदाम आपुनतुन समजेमास दुसरोलोरकुन तुच्च समजेमान्दुरक लोकुरा बारेते येसु उन्दि पिटो वेहतुर: 10“उन्दि दिया इवुर मानेय प्रार्थना लोतिगा प्रार्थना कियान साटि हतुरक, वरोर परीसि मानेय मतोर अनि दुसरो टाक्स येतवाल मानेय मतोर। 11अनि परीसि मानेय निचुन आपुना मन्दे पकाय लावते इदाम प्रार्थना किया लाकतुर, ‘हे परमेस्वर, नना येर डाकु, खोटाल, व्यभिचार केवालोरक इदाम लोकुरा लेहका या येर टाक्स येतवाना लेहका वने नना हिलेन इन्जोर नना निया धन्यवाद किन्तोना। 12नना हपताते रन्ड बेरांग उपास किन्तोना अनि नना कमेय कितालता दहावो हिसा वने हिंतोना’ इदाम प्रार्थना कितुर।”
13“मति टाक्स येतवाल मानेय लक निचुन स्वरगतिके हुळान वने हिमत केवोर आस आपुना चातितुन कोहक्स-कोहक्स पकाय दुःखि आसुन, ‘हे परमेस्वर, नना पापि मानेय मन्तोना नाकुन दया किसुन मापि किम’ इन्दा लाकतुर।”
14असके येसु इन्तोर, “येर पापि मानेय परमेस्वरना मुने येताना योग्य आस येर आपुना लोतिके हतुर। मति परीसि मानेयसंग इदाम आयो आत। आपुनतुन हजोर समजेमान्तोर ओन हुडलोर किहिनुर मति आपुनतुन हुडलोर समजेमान्तोर ओन हजोर किहिनुर” नना मिकुन चेतेकिसुन इन्तोना#मत्ति २३:१२; लूका १४:११ ।
येसु बालकुन आशिरवाद हिन्तोर
(मत्ति १९:१३-१५; मर १०:१३-१६)
15उन्दि दिया येसु बालक पोरो कय इरसुन आशिरवाद हेविर इन्जोर हुचुलोर लोकुरक आपुनांग बालकुन येसुना हेरे ततिला लाकतुरक। मति निमाट येसुन तंग केमाट इन्जोर येसुनोर चेलालोरक ओरकुन इतुर। 16अनि येसु बालकुन आपुना हेरे केयसुन आपुना चेलालोरकुन इतुर, “बालकुन नावा हेरे वायिला हिम्ट, अनि बालकुन आयो इन्माट। बाक्याकि परमेस्वरना राज्य इदामलोराय मन्ता। 17निमाट वरोर हुडलोर बालक लेहका स्वरग राज्यतुन स्विकार केवि आयकिट ते स्वरग राज्यतिगा हनविट आयकिट इन्जोर नना मिकुन चेतेकिसुन वेहान्तोना।”
धनि मानेय अनि अनन्त जिवा
(मत्ति १९:१६-३०; मर १०:१७-३१)
18उन्दि दिया यहुदि लोकुरा मुक्याल येसुन पुच्चेमातुर, “हे गुरु निमा सोबाय मन्तोन अनि अनन्ता काळदा जिवा कल्यान साटि नना बाताल कियाका?” 19अनि येसु मुक्यान इतुर, “मति नाकुन सोबाय गुरु बाक्या इन्तोन?, केवल परमेस्वरिन तासि दुसरो बोरे सोबाय हिलेर। 20निमा ‘व्यभिचार केमा, हत्या केमा, अनि कलमा, अनि जुटा गवाहि वळकमा, अनि आपुना अवाल-बाबोना मान इरा’ इदाम परमेस्वरना आग्यानुंग ते निमा पुन्तोन बहे” इन्जोर पुच्चेमातुर#निर २०:१४; व्यव ५:१८; व्यव २०:१३; व्यव ५:१७; निर २०:१५; निर ५:१९; निर २०:१६; व्यव ५:२०; निर २०:१२; व्यव ५:१६। 21“नना हुडलोर पेकाल मतोना अगडाले इव सबोय आग्यानुंग मानेमासोरींग वातोना” इन्जोर ओर मुक्याल मानेय इतुर। 22अनि येसु ओन इतुर, “इदेक वने नियागा असा उन्दि पोल्लोता कमि मन्ता, निमा आपुना सबोय धनसंपतितुन मोमसुन अव डबुंग गरिब लोकुरकुन तुसिन ते निकुन स्वरगतिगा आत्मिक धनसंपति पुटार। अनि निमा नावा चेला बनेमाम।” 23मति ओर पकाय धनि मानेय मतोर इन्जोर इव पोल्लोनुंग केन्जुन पकाय उदास आतुर।
24अनि येसु ओन हुळसुन, “धनि लोकुरकुन परमेस्वरना राज्यतिगा हन्दान साटि पकाय कटिन मन्ता! 25अनि धनि लोकुरक परमेस्वरना राज्यतिगा हन्दानाताल हुट सुयिता बुकाताल पसियस हन्दाना सुदोय मन्ता” इन्जोर इतुर। 26अनि इद पोल्लोतुन केन्जुन लोकुरक येसुन इतुर, “ते बोनाय मुक्ति आय परो आयार।” 27येसु ओरकुन इतुर, “मानेय किया परोर अद पोल्लो परमेस्वरिन किया परान्तोर।”
28अनि पतरास येसुन इतुर, “हुळा, माक ते आपुना सबोय लोन डुवार हरचुन निया परके वातोरोम।” 29येसु पतरासिन इतुर, “निमा बरोबर इति। मति परमेस्वरना राज्य साटि आपुना लोतुन या मुतेहारि या तमोलोरकुन या अवाल-बाबोन या बालकिन हरचुन, 30इद जीवनतेय पकाय गुनांग आशिष पुटार अनि वायान काळदे ओन स्वरगतिगा अनन्ता जिवा वने पुटार इन्जोर मिकुन नना चेतेकिसुन वेहान्तोना।”
येसु आपुना हायानातुन तिसरो बेरा वेहान्तोर
(मत्ति २०:१७-१९; मर १०:३२-३४)
31असा येसु आपुनोर बारा खास चेलालोरकुन आपुनासंग ओतुर अनि ओरकुन इतुर, “माक येरुसलेम सेहेरतिगा दान्तोराट। अनि माक अगा ओवकाट असके नना मानेयतोर मरिना बारेते सिरान्ते परमेस्वरना पोल्लो वेहवालोरक बाताल कोटताल मन्ता अद सबोय पोल्लो पुरा आयार। 32अनि ओर नाकुन रोमि लोकुरा कयतिगा सोपेकिसियानुर, अनि नाकुन कवानुरक, नाकुन अपमान कियानुरक, अनि नावा पोरो उसकानुरक। 33अनि ओरक नाकुन काटाना सोटते पिटहानुर अनि नाकुन हव्कानुरक। मति नना असा मून्ड दियाने असा जिवे मायका।” 34अनि येसु आपुनोर चेलालोरकुन वेहन्दुर अद पोल्लो ओरकुन बाताले समजेमायो आत। अनि अद खरोय पोल्लो परमेस्वर ओराताल मकिहच इरतुर इन्जोक येसु ओरकुन वेहिच मतोर अद पोल्लोता बारेते ओरक समजेमायिला परोरक आतुरक।
अन्दडाल भीक तलकवान येसु सुदरे किन्तोर
(मत्ति २०:२९-३४; मर १०:४६-५२)
35येसु अनि चेलालोरक यरिहो सेहेरता हेरे अवतुरक, असके हन्दाना हरदा ओदा वरोर अन्दडाल भीक तलकवाल उचमन्दुर। 36अनि ओर अन्दडाल भीक तलिहकवाल लोकुरा भीळतुन आपुना हेरेटक हन्दानातुन केन्जुन इगा बोरक हन्दिला आतोरक? इन्जोर ओर लोकुरकुन पुच्चेमातुर। 37अनि लोकुरक ओन वेहतुरक, “नासरत सहेरतोर येसु इगाडाल हन्दिला आतोर।” 38अनि इद पोल्लोतुन केन्जुन ओर, “हे येसु, दावुद राजानोर वंशतोर, नाकुन दया किम!” इदाम पकाय जोरदे केयिला लाकतुर। 39अनि मुने हन्दिला आस मन्दुरक लोकुरक ओर अन्दळान कमेक मन इन्जोर रांगदुरक मति ओर “हे दावुद राजानोर वंशतोर येसु नावागा दया किम!” इन्जोर असा पकाय जोरदे केयतुर।
40अनि येसु ओना लेंगदुन केन्जुन अगाय नितितुर, अनि ओर अन्दळान आपुना हेरे ततिला ओरकुन आग्या हितुर। 41अनि ओर अन्दळान येसुना हेरे ततुरक असके येसु, “नना निया साटि बाताल कियाला पहाजे?” इन्जोर ओन पुच्चेमातुर। असके अन्दडाल इतुर, “हे प्रबु, नना हुळिला पहाजे!” 42असके येसु अन्दळान इतुर, “निमा हुळा। निमा नावागा विस्वास कितोन इन्जोर निमा सुदरेमाति।” 43अनि अन्दडाल सान्डे हुळिला लाकतुर, अनि ओर परमेस्वरना महिमा किसोरिंग येसुना परके हन्दालाकतुर। अनि इद चमत्कारतुन हुळतुरक सबोय लोकुरक वने परमेस्वरना हजोरपण किया लाकतुरक।
S'ha seleccionat:
लूका 18: fmu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.
