लूका 10
10
येसु सत्तर चेलालोरकुन लोहान्तोर
1अनि येसु लोकुरकुन इद पोल्लो वेहता पजा असा सत्तर मानेयकुन चेला बनेकियान साटि आचतुर। अनि बोद-बोद सेहेरतिगा अनि नाट-नाटेनिगा हनवाल मन्तोर ओरकुन इवुर-इवुर किसुन आपुना मुने लोहचितुर। 2अनि येसु चेलालोरकुन इतुर, “पन्डता डन्ड पकाय मन्ता, मति बन्यारक कमि मन्तोरक इन्जोर ओर आपुना डन्डतिगा कोयान साटि बन्यारक लोहिर इन्जोर डन्डतोर मालकान विनन्ति किम्ट#१०:२ पन्डताल डन्ड मन्जे परमेस्वरना पोल्लो केन्जुन परेमेस्वरतानिगा विस्वास कियाना साटि पकाय लोकुरक तयार मन्तोरक। बन्यारक मन्जे परमेस्वरना सेवेक मन्तोरक। डन्डतोर मालकाल मन्जे परमेस्वर मन्तोर।#मत्ति ९:३७,३८। 3हन्ट! अनि मन लावेकिस केन्जाट, नना मिकुन हुंडराहना नडुम बेळांग पिलांग लेहका लोहान्तोना#मत्ति १०:१६। 4इन्जोर निमाट बोदे पिसवि पयमाट अनि बोदे जोरा पयमाट, हरपुह पयमाट; अनि हन्दानपा बोने हरतिगा नमस्कार केमाट#मत्ति १०:७-१४; मर ६:८-११; लूका ९:३-५ । 5अनि निमाट बोद लोतिगा दाकिट असके, ‘इद लोतिगा शान्ति आयि।’ इदाम इन्ट। 6अनि अद लोतिगा बोने शान्तिते मन्दानाता इच्चा मन्दार ते, मिया शान्ति अद लोतिगा मन्दार, आयोते अद शान्ति मियागा मल्स वायार। 7अनि बाताल आयि मिकुन हियानुर अदेन निमाट तिंट-उन्ट अदे लोतिगा मन्ट, बाक्याकि बन्यारतुन ओना बनि पुटाना योग्य मन्ता। अनि लोहक-लोहक मनमाट#१ कुरि ९:१४; १ तिमु ५:१८ ।”
8येसु ओरकुन असा इतुर, “बोद सेहेरतिगा निमाट दाकिट अद सहेरतोरक लोकुरक मिकुन स्वागत कियानुरक ते ओरक मिया मुने बाताल आयि तिन्दा हियानुर अदेन निमाट तिंट। 9अनि अद सहेरतोरक बिमारि लोकुरकुन सुदरे किस, ‘परमेस्वरना राज्य मिया हेरे वाता’ इदाम ओरकुन इन्ट। 10अनि बोद सेहेरतिगा दाकिट, अगाडोरक लोकुरक मियांग केन्जोरक आयनुरक ते, ओरांग हाटुमनिगा हन्जुन#बुतोंग १३:५१ , 11‘मिया सेहेरता डुन्डो मावा काल्कनिगा टुंडता, अदेन मिकुन चेतावनि हियान साटि माक मिया मुने कसियसिंतोरोम। मति परमेस्वरना राज्य मिया हेरे अवता इन्जोर निमाट पुंट’ इदाम इन्टकिट। 12परमेस्वरना न्यायता दिया सदोम#१०:१२ सदोम सहेरतोर लोकुरक पकाय खराब मतोर इन्जोर परमेस्वर ओरकुन किसिते नाश कितुर। सहेरतोर#उत्प १८:१७—१९:२९; यहु ७ लोकुरकुन दन्ड हियानुर अदेनताल वने पकाय दन्ड मिकुन पुटार इन्जोर नना मिकुन चेतेहकिसुन वेहान्तोना#उत्प १९:२४-२८; मत्ति ११:२४; मत्ति १०:१५।”
पस्तेमायोर लोकुरा सेहेर
(मत्ति ११:२०-२४)
13येसु ओरकुन असा इतुर, “हे कुराजीन अनि बेतसयदा#१०:१३ कुराज अनि बेतसयदा गलील नाहारता किनाराते उत्तर दिसाता उन्दि यहुदि सहेर मतांग। सहेरतोरक लोकुरक! नना मिया सहेरतिगा हजोर हजोर अत्भुत चमत्कारता बुतो कितान मति निमाट आपुना गलतिता बारेते पश्चाताप केविट। इदे अत्भुत चमत्कारता बुतोतुन सूर अनि सिदोन#१०:१३ सोर अनि सिदोन यहुदि लोकुरा सेहेर हिले आसि। ओरक परमेस्वर अनि ओना आग्यातुन स्विकार केवोर आन्दुरक। सहेरतिगा#यश २३; यहेज २६:१—२८:२६; आमो १:९-१०; जक ९:२-४ किस मनेना ते अदे बेरा लोकुरक आपुना दुःख प्रगट कियान साटि पोताता बन्डि करिस निरतिगा उदस मनेर। 14अनि न्यायता दिया सूर अनि सेयदातुन दन्ड हियानुर अदेनताल वने पकाय दन्ड मिकुन पुटार। 15अनि हे कफरनहुम#१०:१५ कफरनहुम यहुदिलोकुरा सेहेर माता सहेरते मनवालोरक लोकुरक, माक स्वरगतिगा दाकोम इन्जोर निमाट आपुना मन्दे आलिहन्तोरिट, मति निमाट अडिय नरकतिगा दाकिट#यश १४:१३-१५ ।”
16अनि येसु असा इतुर, “मिया पोल्लो केन्जान्तोरक ओरक नावा वने पोल्लो केन्जान्तोरक; अनि मिकुन तुच्चा समजेमान्तोरक ओरक नाकुन वने तुच्चा समजेमान्तोरक; अनि नाकुन तुच्चा समजेमान्तोरक ओरक नावोरक लोहतोरकुन वने तुच्चा समजेमान्तोरक।”
सत्तर चेलालोरक मल्स वान्तोरक
17अनि सत्तर चेलालोरक गिरदा आसोरिंग मलसवासुन “हे प्रबु, निया पोरोयदे माक दुष्टात्मातुन वने टन्डतोम” इन्जोर येसुन वेहिला लाकतुरक। 18अनि येसु चेलालोरकुन इतुर, “नना सयतानतुन बिजलि लेहका पोरोडा स्वरगताल अडिय अरताल हुळतान। 19नना मिकुन तरास्कना अनि मिचोना अनि सयताना सबोय लावता पोरोडाल कालदे गसेकिसोरिंग ताकाना अदिकार हितोना; अनि बोदे चिजताल मिया जिवातुन बसकेय हानि आयो आयार। 20मति दुष्टात्मा मिया आग्या मानेमास पसिहनातांग इन्जोर निमाट गिरदा आयमाट, मति मिया पोरोय स्वरगतिगा कोटताल मन्ता इन्जोर गिरदा आम्ट।”
येसु पवित्र आत्माते गिरदा आन्तोर
(मत्ति ११:२५-२७; मत्ति १३:१६,१७)
21अनि अचोन बेरा येसु पवित्र आत्माते पकाय गिरदा आसुन इतुर, “हे बाबा, स्वरगतोर अनि दरतितोर प्रबु, निमा इव सबोय पोल्लोनुंग ग्यानि लोकुराताल अनि समजदार लोकुराताल मकिहच इरस मतोन, अनि परमेस्वरनिगा खरोय विस्वास कियाना इच्चा मन्तोरक बालक लेहका मन्तोरक ओरक नम्र स्वभावतोर लोकुरकुन निमा तोहिति इन्जोर नना निया धन्यवाद किन्तोना। इंगो, हे बाबा, अदेय पोल्लो निकुन सोबाय लाकत। 22नावोर बाबाल सबोय नावा कयदे सोपे किसितोर अनि मरि बोर आन्दुर इन्जोर केवल बाबोन हरचि दुसरो बोरे पुनोर। अनि बाबो बोर आन्दुर इन्जोर केवल मरि अनि आपुना बाबोना बारेते तोहच हियान साटि बोना पोरो मरि इच्चा कोन्तोर ओरे हरचि दुसरो बोरे पुन्तोर” इन्जोर इतुर#युह ३:३५; युह १०:१५।
23अनि येसु चेलालोरा हेरे वरोरे हन्जुन केवल ओरा साटि इदाम इतुर, “इदेक इव सबोय पोल्लोनुंग हुळान्तोरिट निमाट धन्य मन्तोरक। 24निमाट हुळान्तोरिट ओद पोल्लोनुंग परमेस्वरना पोल्लो वेहवाल पकाय लोकुरक अनि पकाय राजा लोकुरक हुळान साटि विचार कितुरक ते वने ओर हुळवाप मन्तोरक, अनि निमाट केन्जातोरिट ओद पोल्लोनुंग केन्जान साटि विचार कितुरक ते वने ओरक केन्जवाप मन्तोरक” इन्जोर इतुर।
मयातोर सामरिना पिटो
25अनि पजा, मूसाना नियमतुन करिहवाल वरोर मानेय नितितुर अनि येसुना परिक्षा कियान साटि, “हे गुरु, नना अनन्त जिवाता वारसन आयान साटि बाताल कियाका?” इदाम पुच्चेमातुर#मत्ति २२:३५-४०; मर १२:२८-३४ । 26असके येसु ओर मानेयतुन, “परमेस्वरना पवित्र पुस्तकतिगा बाताल कोटताल मन्ता? अनि निमा पवित्र पुस्तकतिगा कोटता अद पोल्लो बदाम समजेमान्तोन?” इन्जोर पुच्चेमातुर। 27अनि ओर मानेय येसुन, “ ‘निमा आपुना परमेस्वरदुन आपुना सबोय मन्दे, सबोय आत्माते, सबोय लावदे, अनि सबोय बुद्धिते मया किम’, अनि ‘आपुना हेरेटोर लोकुरकुन आपुना लेहका मया किम’ ” इदाम उत्तर हितुर#व्यव ६:५; लेव्य १९:१८ । 28अनि येसु ओर मानेयतुन इतुर, “निमा खरोय उत्तर हितोन, इदाम किसोरिंग मनकि ते निकुन अनन्त जिवा पुटार#लेव्य १८:५।”
29मति ओर आपुनास बराबर मन्तोर इदाम तोहान साटि ओर असा उन्दि प्रश्न येसुन पुच्चेमातुर, “नावा हेरेटोर बोर आन्दुर?” 30असके येसु ओर मानेयतुन उत्तर हितुर: “वरोर मानेय येरुसलेम सहेरताल यरिहो#१०:३० यरिहो यहुदि जिल्लाता उन्दि सहेर मता। नाटेनिके हन्दिला आस मन्दुर, असके ओन्डकाह ओना हिरमुटा आसुन ओनांग कपळांग टन्डस पिटितुरक अनि बेहोस आनाहकिन ओरक वितितुरक। 31असके अदे हरतिगाडाल यहुदि लोकुरा वरोर याजक हन्दिला आस मन्दुर, मति ओर बेहोस आतोर मानेयतुन हुळसुन ओन हुळवाप ओना हुळुंचसा लकताल हतुर। 32अनि इदाम लेहका असा वरोर लेवि#१०:३२ लेवि इस्रयेल देशता याजक लोकुरा उन्दि पाडि मता। मानेय अदे हरतिगाडाल हतुर, अनि ओर वने बेहोस आतोर मानेयतुन हुळसुन ओन हुळवाप ओना हुळुंचसा लकताल हतुर। 33मति वरोर सामरि जातितोर मानेय अदे हरतिगाडाल हन्दिला लाकतुर, असके ओन ओर बेहोस आतोर मानेयतुन दिसतुर। अनि ओर बेहोस आतोर मानेयतुन हुळसुन ओना जिवा नोपीचुन दया कितुर#२ इति २८:१५। 34अनि सामरि जातितोर मानेय बेहोस आतोर मानेयना हेरे वासुन ओनांग किरकनिगा निय अनि दवायि दोहतुर, अनि आपुना गदि पोरो ओन बोरसतुर अनि उन्दि लोतिगा ओसुन ओना सेवा कितुर। 35अनि दुसरो दिया सामरि मानेय उन्दि दीयातांग रोजीतांग डबुंग पुटान्तांग अचोक डबुंग लोन मालकान हितुर। अनि इतुर, ‘येना सेवा किसोरिंग मनकिट, अनि निकुन असा लागानुंग अव डबुंग नना मल्स वायका असके निकुन हियाका’ इन्जोर इतुर।”
36असके येसु मूसाना नियमतुन करिहवालिन इतुर, “इदेक निमा समजेमाति ते वेहा अदे हरतिगाडाल येरक हतुरक मुवुरासक लोकुरकनिकेडाल ओन्डकाहना मार तिनवाल मानेयना हेरेटोर बोर आतुर?” 37असके मूसाना नियमतुन करिहवाल इतुर, “बेहोस आस मन्तोर ओन दया कितुर ओर ओना हेरेटोर आतुर” इन्जोर इतुर। असके येसु इतुर, “हन, अनि निमा वने अदामे किम।”
येसु मारता अनि मरियमना लोतिगा
38येसु अनि ओना चेलालोरक येरुसलेम सहेरतिके हन्दिला आस मन्दुरक, असके उन्दि नाटेनिगा अवतुरक, अनि मारता पोरोयदा उन्दि आळ येसुन आपुना लोतिके ओतु#युह ११:१। 39अनि मरियम पोरोयदा मारताना उन्दि हेलाळ मता, अद प्रबु येसुना काल्क हेरे उचुन ओना पोल्लोनुंग केन्जिला आस मन्द। 40मति मारता पोरोयदा आळ वरताहकुन जेवन बनेहकिनेक तान पकाय पिसकाट वात। असके मारताल येसुना हेरे वासुन, “हे प्रबु, नावा हेलाळ नाकुन बुतोकियाला वरायतुन हरचिता इन्जोर निकुन बाताले चिन्ता हिले, नावा मदत केवि इदाम तान निमा वेहा!” इन्जोर हन्दिला लाकतु। 41अनि येसु तान उत्तर हितुर, “मारता हे मारता, निमा पकाय पोल्लोनांग चिन्ता किन्तोन अनि वरयान्तोन, 42मति उन्दि पोल्लो सबोयताल मुक्य पोल्लो मन्ता, अद सोबाता पोल्लोतुन मरियम आचता, अद पोल्लोतुन बोरे तानिगाडाल उन्दिला परोर।”
S'ha seleccionat:
लूका 10: fmu
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active) Wycliffe Bible Translators, Inc. All rights reserved.
