मत्ती 25
25
दस कुवांरियाँ रा उदारण
1तां यीशु ने अपणे चेल्लेयां कने बोल्लेया, “स्वर्ग रा राज उन्हा दस कुवांरियाँ रे सांई है, जे मसांला लेई करी नौेए लाड़े जो मिलणे तांइ निकली। 2उन्हा बिच का पंज कुवांरियाँ लापरवाह थी ते पंज कुवांरियाँ समजदार थियां। 3जे लापरवाह थी उन्हा अपणी मसांला लित्ती, पर तिन्हा ने अपणे कने होर तेल नी लित्तेया। 4पर समजदार कुवांरियाँ ने अपणी मसांला कने अपणी कुप्पियाँ बिच तेल भी भरी लेया। 5जां नौये लाड़े जो आणे बिच देर होई गई, तां सारी कुआंरिया बासियां मारणा लग्गी अते सोई गई। 6अद्दी रात्ती रोला पेया, दिख्खो, नौआ लाड़ा आया करदा है! तिसेरे कने मिलणे बाहर चलो। 7ते उस्सी बेल्ले से सारी कुवांरियाँ उठी अते अपणी मसांला तैयार कित्ती। 8ते लापरवाह कुआंरिया ने समजदार कुआंरिया जो बोल्लेया, अपणे तेल बिच का किच्छ असा जो भी देयो, किजोकी असा री मसांला बुझी चेल्ले री हिन। 9पर समजदारां ने उन्हा जो जवाब दित्तेया, नी! असी नी देई सकदी किजोकी फिरी ना ए असा रे तांइ पूरा होणा अते ना ही तुसा रे तांइ इधेरे तांइ तुसा तेल बेचणे वाले का जाई करी अपणे तांइ तेल खरीदी लेयो। 10जां से तेल खरीदणे जाया करदी थी तां नौआ लाड़ा आई रेया ते जे कुआंरिया, जे पैल्ले का तैयार थी, से तिस कने ब्याह वाले घरे जो चली गेईयां अते दुआर बांद्द करी दित्तेया। 11इसेरे बाद से पंज्ज कुवांरियाँ भी तेल लेई करी पूजी पेई, अते से हक्कां लाई करी बोलणा लग्गी, मालक, ओ मालक, दुआर खोलो, असा जो भी अन्दर आणे देयो। 12पर उसने जवाब दित्तेया, मैं तुसा जो सच बोलदा, मैं तुसा जो नी जाणदा 13इधेरे तांइ चौकन्ने रेयो, किजोकी तुसा ना उस दिन जो जाणदे, ना उस बेल्ले जो जां मैं वापिस हटी करी आणा।”
तीन नौकरां रा उदारण
14फिरी स्वर्ग रा राज उस मणू उदारण सांई है, जिनिये सफर पर जान्दे अपणे नौकरांं जो सदवाई करी तिन्हा जो व्यापार बिच लाणे तांइ किच्छ तोड़े दित्ते। 15तिन्ने इक्क जो पंज तोड़े, अते दूए जो दो, ते त्रिये जो इक्क से हर इक्क जो उसेरी काबलियत रे हिसाब कने देई करी परदेस जो चली गेया। 16तां, जिस जो पांज्ज तोड़े #25:16 तोड़े इक्क तोड़ा पंद्रह साल्लां री धियाड़ी रे बराबर हैमिल्ले थिये, उसने झट ही उन्हा जो कम्म पर लाई दित्तेया अते पंज तोड़े होर कमाई लै। 17तिय्यां ही जिस जो दो तोड़े #25:17 इक्क तोड़ा पंद्रह साल्लां री धियाड़ी रे बराबर हैमिल्ले थिये, तिन्निए भी दो होर कमाए। 18पर जिस जो इक्क तोड़ा#25:18 इक्क तोड़ा पंद्रह साल्लां री धियाड़ी रे बराबर है मिल्लेया थिया तिसने जाई करी जमीन खोदी, ते अपणे मालक रे पैसेयां जो लुकाई दित्ते। 19बड़े दिनां बाद तिन्हा नौकरांं रा मालक आई गेया अते तिन्हा का लेखा-जोखा मंगेया। 20जिस जो पंज तोड़े #25:20 तोड़े इक्क तोड़ा पंद्रह साल्लां री धियाड़ी रे बराबर हैमिल्ले थिये, तिसने पंज तोड़े होर लेई जाई करी बोल्लेया, मालक, तुसा मेरे जो जे पंज तोड़े दित्ते थिये पंज तोड़े होर मैं कमाये हिन। 21तिसेरे मालक ने तिसजो बोल्लेया, शाबास, तू विश्वास रे लायक खरा नौक्कर है, तू थोड़े तोड़ेयां बिच भी विश्वास रे लायक रेया, मैं तिज्जो बड़ी चीजां पर हक दैणा। 22अते जिस जो दो तोड़े मिल्ले थिये तिसने भी आई करी बोल्लेया, मालक, तुसा मेरे जो जे दो तोड़े #25:22 इक्क तोड़ा पंद्रह साल्लां री धियाड़ी रे बराबर हैदित्ते थिये, मैं दो तोड़े होर कमाए हिन। 23तिसेरे मालक ने तिसजो बोल्लेया, शाबास, तू विश्वास रे लायक खरा नौक्कर है, तू थोड़े तोड़ेयां बिच भी विश्वास रे लायक रेया, मैं तिज्जो बड़ी चीजां पर हक दैणा। अपणे मालक री खुसी बिच शामिल होई जा। 24तां जिस जो इक्क तोड़ा मिल्लेया थिया, तिसने आई करी बोल्लेया, मालक, मैं तेरे जो जाणदा थिया की तू सख्त मणू है, तू से कटदा जे तू बाया नी, ते तुसा इदेय मणू हिन, जे भी नी बांदे पर फिरी भी बटोरणा पसंद करदे, 25इधेरे तांइ मैं डरी गेया थिया किजोकी जे अगर मैं तुसा रे तोड़े जो गवाई दिंदा तां तुसा मेरे जो सजा दैणी थी, इधेरे तांइ मैं जाई करी तेरे तोड़े #25:25 इक्क तोड़ा पंद्रह साल्लां री धियाड़ी रे बराबर हैजो जमीन अदंर दब्बी दित्तेया ए लेयो जे तुसा रा है ए रेया, लेई लो। 26तिसेरे मालक ने तिसजो जवाब दित्ता, तू इक्क बुरा अते आलसी नौक्कर है, तू जाणदा थिया कि मैं बगैर बाये रे कटदा अते जे मैं भी नी बाया, तित्ते का फसल बटोरदा। 27तां तिज्जो मेरे पैसेयां जो साहूकारां का जमा करी दैणा चाईदा थिया, तां मैं वापस हटी करी अपणे पैसे ब्याज समेत लेई लिंदा। 28इधेरे तांइ तिस मालक ने अपणे दूए नौकरांं जो बोल्लेया, इसका से तोड़ा#25:28 इक्क तोड़ा पंद्रह साल्लां री धियाड़ी रे बराबर है लेई लो, ते जिस दास का दस तोड़े हिन तिसजो देई देयो। 29किजोकी हर उस मणू का, जिस ने जे किच्छ उस का थिया उसेरा सही इस्तेमाल कित्तेया, तिसजो होर जादा दित्तेया जाणा पर उस का, जिस का जे किच्छ थिया उसेरा सही इस्तेमाल नी कित्तेया, सब किच्छ लेई लित्तेया जाणा। 30इधेरे तांइ उस बेकार नौक्कर जो बाहर न्यहारे बिच सूट्टी देयो जित्ते मणूआं ने रोणा अते अपणे दांद पीह्णे।
इन्साफ रा दिन
31जां मणू रे पुत्तर, जे मैं ही है, वापिस हटणा, तां अपणी महिमा बिच अपणे सब स्वर्गदूतां कने आणा, ते मैं अपणे महिमामय सिहांसन पर बेई करी सारी दुनिया रा ईसांफ करणा। 32ते सारी जातियां मेरे सामणे इकठ्ठी कित्ती जाणी अते तिन्हा इक्क दूज्जे जो इय्यां बखरा करणा, जिय्यां इक्क पुहाल बकरियां का भेड़ां बखरी करदा। 33तिनिये पवित्तर लोक्कां जो जे भेड़ां सांई हिन, अपणे सीद्दे पास्से ते बुरे लोक्कां जो जे बकरियां सांई हिन, अपणे पुठ्ठे पास्से खड़ेरणा। 34फिरी मैं अपणे सज्जे हत्थ पास्से वालेयां जो बोलणा, ओ मेरे प्यो का आशीष पाये रे लोक्कों, आओ, ते जे राज तुसा रे तांइ दुनिया रचणे का पैह्ल्ले तैयार कित्तेया गेया है उसेरे अधिकारी होई जाओ। 35किजोकी मैं भूख्खा थिया ते तुसा मेरे जो खाणे तांइ दित्तेया, मैं प्यासा थिया ते तुसा मेरे जो पाणी पीणे जो दित्तेया, मैं परदेसी थिया, तुसा मेरे जो अपणे घरे रुकाया। 36मैं नगां थिया, ते तुसा मेरे जो कपड़े पुआये, मैं बुमार थिया ते तुसा मेरी सेवा कित्ती मैं जेल बिच थिया ते तुसा मेरे जो मिलणे तांइ आए। 37तां धार्मिक लोक्कां ने तिन्हेरे जो जवाब दैणा ओ प्रभु, असी कधाड़ी तुसा जो भूख्खा दिख्खेया ते खुआया ते पाणी पियाया? 38असी कधाड़ी तुसा जो परदेसी दिख्खेया ते अपणे घरे रुकाया ते बगैर कपड़े रे दिख्खी करी कपड़े पुआये? 39असा ने कधाड़ी तुसा जो बुमार या जेल बिच दिख्खेया ते तुसा जो मिलणे जो आए? 40फिरी मैं उन्हा जो जवाब दैणा, मैं तुसा रे कने सच बोलदा जां भी तुसा ने मेरे भोले-भाले चेल्लेयां बिच का कुसकी इक्क तांइ भी किच्छ कित्तेया, तां से तुसा मेरे तांइ कित्तेया। 41तां मैं पुठ्ठे पास्से वालेयां लोक्कां कने बोलणा ओ अभागे लोक्कों! मेरे का दुर चली जाओ, अते जे आग्ग परमेश्वर ने शैतान ते तिसेरे दूतां तांइ तैयार कित्ती, उस हमेसा तिकर बलणे वाली आग्ग बिच पेई जाओ। 42किजोकी मैं भूख्खा थिया, ते तुसा मेरे जो खाणे तांइ नी दित्तेया, मैं प्यासा थिया ते तुसा मेरे जो पाणी नी पियाया, 43मैं अजनबी थिया, पर तुसा मेरे जो अपणे घरे नी रुकाया, मैं नगां थिया, ते तुसा मेरे जो कपड़े नी पुआए, मैं बुमार ते जेल बिच थिया पर तुसा ना मेरा ध्यान रख्खेया ते ना ही मेरे कने मिलणा आए। 44तां तिन्हा ने जवाब दैणा, ओ प्रभु, असी तुसा जो भूख्खा, प्यासा, परदेसी, बिना कपड़े रे, बुमार, ते जेल बिच कधाड़ी दिख्खेया ते तेरी सेवा नी कित्ती? 45तां मैं उन्हा जो जवाब दैणा, मैं तुसा जो सच बोलदा कि तुसा जे किच्छ मेरे इन्हा भोले-भाले बिच का कुसकी इक्क कने भी नी करदा, से मेरे कने भी नी करदा। 46ते तिन्हा पुठ्ठे पास्से वाले बुरे लोक्कां ने हमेसा बलणे वाली आग्ग बिच सजा भुगतणी पर, धार्मिक सीद्दे पास्से वाले लोक्कां ने हमेसा री जिन्दगी बिच चली जाणा।
S'ha seleccionat:
मत्ती 25: CDHNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.