YOHANES 13
13
Yesus mpuk kekea penotoa-penotoa-Ne
1Ayok bilai rayo Paskah muloi, Yesus bi namen bahwo waktau-Ne bi sapei utuk lalau kunei dunio yo ngen Bak. Si kemasiak tun-tun milik-Ne de neak dunio yo, si mengasiak tobo'o sapei moi sudone.
2Ketiko tobo'o dong mukmei sesamo, Iblis bi misik rencano lem atei Yudas Iskariot, anok Simon, utuk mianat Yesus. 3Yesus namen bahwo Bak bi semreak kutene ngen Si bahwo Si teko kunei Allah ngen bakea belek ngen Allah. 4Lajau klongonba Yesus ngen temanggea jubah-Ne. Si mok delam bea kain lenan ngen meket-Ne moi pinggang-Ne. 5Sesudo'o Si me'eng bioa moi lem do reseng ngen muloi mpuk kekea penotoa-penotoa-Ne lajau melapne ngen kain de tepeket neak pinggang-Ne o. 6Lajau sapei ba Si ngen Simon Petrus. Nadeak Petrus ngen Si, “Tuhan, Ko lok mpuk kekeaku?”
7Jawab Yesus ngen si, “Jano de Uku menea, ko coa namen uyo, tapi be ko bakea ngertai.”
8Nadeak Petrus ngen Si, “Ko coa bakea mpuk kekeaku sapei seke'anne.”
Jawab Yesus, “Amen Uku coa mpuk kekeanu, ko coa dapet bagiak lem Uku.”
9Nadeak Simon Petrus ngen-Si, “Tuhan, jibaek kekeaku bae, tapi tangen ngen ulauku kulo!”
10Nadeak Yesus ngen Petrus, “Api bae de sudo mendai, si jibeak mpuk dirai igai tapi mpuk kekea ne, udi bi bersih, tapi coa kutene.” (11Sebab Si namen, api de bakea semreak Si. Kerno o Si madeak, “Coa kute udi bersih.”)
12 #
Luk. 22:27
Sesudo Si mpuk kekea tobo'o, Si makei keracok-Ne ngen belek moi penan-Ne. Lajau Si madeak ngen tobo'o, “Ngertai udi jano de sudo Uku menea ngen udi? 13Ko madeak Uku Gu'au ngen Tuhan, keceknu o tepat, sebab memang Uku ba Gu'au ngen Tuhan. 14Amen Uku, Tuhan ngen Gu'aunu, mpuk kekeanu, mako udi wajib saling mpuk kekeanu. 15Sebab Uku bi melei teladan ngen udi, supayo udi kulo menea serai awei de sudo Uku menea ngen udi. 16#Mat. 10:24; Luk. 6:40; Yoh. 15:20 Sesungguakne Uku madeak ngen udi: Suang pelayan coa ba lebiak lekat kunei Tuan ne, suang utusan coa lebiak lai kunei pado de mutusne. 17Amen udi namen kutene yo, mako riang ba udi, amen udi menea ne.
18 #
Mzm. 41:10
Iso tetang udi kute Uku madeak. Uku namen, api de sudo Uku piliak. Tapi jano de tenulis neak lem Alkiteb harus tejijai, ‘Tun de mbuk besamo Uku, bakea melawen Uku.’ 19Uku madeakne ngen udi uyo kulo ayok hal o tejijai, supayo amen hal o tejijai, udi pecayo bahwo Uku ba Si. 20#Mat. 10:40; Mrk. 9:37; Luk. 9:48, 10:16 Sesungguakne Uku madeak ngen udi: Api bae de temimo tun de nutus-Ku, si temimo Uku, si temimone de mutus Uku.”
Yesus minget Yudas
(Mat. 26:21-25; Mrk. 14:17-21; Luk. 22:21-23)
21Sesudo Yesus madeak awei o, Si jijai ibo, lajau besaksai, “Sesungguakne Uku madeak ngen udi, saleak suang neak antaro udi, bakea semreak Uku.”
22Penotoa-penotoa o samo-samo kemliak suang ngen de luyen, tobo'o ragau api de maksud-Ne. 23Saleak suang neak antaro penotoa Yesus, adeba penotoa de kemasiak-Ne, nyandea pa'ok-Ne, depeak kanen-Ne. 24Simon Petrus melei isyarat ngen penotoa-penotoa'o supayo si betanye ngen Yesus api de maksudne.
25Lajau penotoa de temot pa'ok Yesus o jemling, betanye ngen Si, “Tuhan, api do'o?”
26Jawab Yesus, “Siba de bakea Uku melei ruti, sesudo uku cemlupne.” Sesudo madeak awei o Si cemlup ruti o, lajau mok ngen meleine ngen Yudas, anok Simon Iskariot. 27Sesudo Yudas temimo ruti o, si pasuk semat. Lajau Yesus madeak ngen si, “Jano de ko lok menea, menea ba segro.” 28Tapi coa ade suang kulo kunei antaro tobo'o de temot mukmei o ngertai getai Yesus madeak o ngen Yudas. 29Kerno Yudas megong kutak, ade de sako bahwo Yesus meluak si temukua bae utuk pesta o, melei jano bae ngen tun peset.
30Sesudo temimo ruti o, Yudas segro lalau, pado waktau o bilai bi kelmen.
Periteak blau
31Sesudo Yudas lalau, madeakba Yesus, “Uyo Anok Manusio nujai ngen Allah kulo nujai lem Si. 32Amen Allah nujai lem Si, Allah bakea de mulio-Ne kulo lem dirai-Ne ngen bakea mulio Si ngen segro. 33#Yoh. 7:34 Hoi anok-anok-Ku, Uku coa bakea tinggea an igai ngen udi. Udi bakea mesoa Uku, awei de sudo Uku madeak ngen tun-tun Yahudi. Moi penan Uku lalau, coa mukin udi teko, awei'o kulo uyo Uku madeakne ngen udi kulo. 34#Yoh. 15:12, 17; 1Yoh. 3:23; 2Yoh. 1:5 Uku melei priteak blau ngen udi, adeba supayo udi saling mengasiak, serai awei Uku kemasiak udi, awei'o kulo udi arus saling kemasiak. 35Amen udi saling mengasiak mako kute tun bakea namen bahwo ko adeba penotoa-penotoa-Ku.”
Yesus minget Petrus
(Mat. 26:31-35; Mrk. 14:27-31; Luk. 22:31-34)
36Simon Petrus madeak ngen Yesus, “Tuhan, moi ipe Ko lalau?” Jawab Yesus, “Moi penan Uku lalau, ko coa dapet temotoa Uku uyo, tapi be ko bakea temotoa Uku.”
37Nadeak Petrus ngen Si, “Tuhan, getai Uku coa dapet temotoa Ko uyo? Uku bakea melei nyabaiku utuk-Nu!”
38Jawab Yesus, “Nyabainu bakea ko melei utuk-Ku? Sesungguakne Uku madeak ngen udi: Ayok monok bekokok, ko bi muker Uku telau kilai.”
S'ha seleccionat:
YOHANES 13: REJ
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
@ LAI 2011 Indonesian Bible Society (Lembaga Alkitab Indonesia)