Litanga 4
4
1Na Adamu ya manya Hawa mukali wewe; na ya va inda, na yivula Kaini, na a vola, Nnyoye musatsa nobukonyi bwa Yahova. 2Kandi yivula amwavo wewe Habili. Na Habili ya li mwayi wamagondi, navutswa Kaini ya li mulimi we lirova 3inyinga ya madiku yago Kaini ya letera Yahova isadaka yelyama lyomulimi. 4Kandi Habili ya leta ku vimeme vya imbiri vyekyayo kikye, noku maguta gavyo. Na Yahova ya bugirira Habili na isadaka yeye; 5navutswa si ya bugirira Kaini na isadaka yeye. Na Kaini ya vihirirwa ligali, na a kunnya mu tsimoni tsitsye. 6Na Yahova ya volera Kaini, Kigira ki u vihirirwa? Kandi kigira ki u kunnya mu tsimoni? 7Nu u va nu u kola bulahi, si u la bugirirwa? Kandi nu u ta kola bulahi kihaanwa kyobwoni ki gona ha kiliango. Na liyenya lyakyo li la va ku ive, nive u la va netsingulu kukyo. 8Na Kaini ya volera Habili amwavo wewe. Na ga duka, lwa va li mmulimi, Kaini ya twulira Habili amwavo wewe, na a mwiita.
9Na Yahova ya volera Kaini, Amwavo wowo Habili a veye haliha? Naye ya vola, Si mmanya mba: inze mbeye mulindi wa amwavo wange? 10Kandi ya mu teva, U koli kindu ki? Mwoyo gwa masahi ga amwavo wowo gu kupanga lwanga ku inze mu lirova. 11Kalunu u laameywi kutwula mu iirova, li kunuye munwa gwalyo kuvugula amasahi ga amwavo wowo ku mukono gugwo; 12kutwula kalunu lwa u lima, si li la leta ku ive tsingulu tsyalyo; u la va mwivisi nomugendagendi ku lirova. 13Na Kaini ya volera Yahova, Likalagirwa lyange ni linene kuvita lya nyala. 14Henza, u nkungi ku lirova; kandi mbiseywi kutwula mmoni mwumwo; na nda va mwivisi nomugendagendi ku lirova; na ga la va, ku vosi u ndola a la nziita. 15Na Yahova ya mu volera, Kigira yaga ku vosi u liita Kaini, kisalya ki la vanzwa kuye hali katano na kaviri. Kandi Yahova ya vika kiloleru ku Kaini, gase mulala ku vosi u mu nyola a la mwiita.
16Na Kaini ya twula imbiri wa Yahova, na a menya mu kivala kya Nodu, ki veye ivugwe wa Edeni. 17Na Kaini ya manya mukali wewe; na a va inda, na yivula Enoka: naye yombaka lidala, na a li gulika kuli lieta lya mwana wewe, Enoka. 18Na Enoka yivula Iradu; na Iradu yivula Mehujaelu; na Mehujaelu yivula Methusaelu; Methusaelu yivula Lameku. 19Na Lameku ya leta avakali vaviri; lieta lya mulala ya langwa Ada, na wundi ya langwa Zilla. 20Na Ada yivula Jabalu: uyu ya li ise wa va menyanga mu mahema nokuva netsing'ombe. 21Kandi amwavo wewe ya langwa Jubali: uyu niye ise wa yavo ava kupanga inangoli na indulele. 22Kandi Zilla yivula Tubalikaini, mutuli wevyogi vyosi vyomugasa na vyekivya: na mbotso wa Tubali-kaini ya li Naama.
23Na Lameku ya volera avakali veve:
Ada na Zilla, hulira mwoyo gwange;
Mwinye avakali va Lameku, mu tegidze amatu ku livola lyange:
Kigira nziiti wa kuya inze,
Na musoleli wa nkindukidza;
24Na Kaini na a va ni ya vanzirwa kisalya hali katano nakaviri,
Ligali Lameku a la vanzirwa hali makumi katano na gaviri na katano na kaviri.
25Na Adamu ya manya mukali wewe kandi; na yivula mwana muyai, na a mu gulika Sethu: na a vola, Kigira Nyasaye u mbeye lwivulu ha bugono bwa Habili; kigira Kaini ya mwiita. 26Kandi Sethu yivula mwana muyai; na a mu gulika Enosh: mu madiku yago avandu va tanga kwanira lieta lya Yahova.
S'ha seleccionat:
Litanga 4: MBE
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©Bible Society of Kenya, 1967