PAMUNGKAAN 8
8
Parsidung ni aek na oto i
1Nada dihalupahon Debata si Noak rap dohot sude binatang na adong di bagasan kapal i; mangombus ma alogo dibaen Debata gabe mamungka ma surut aek i. 2Sude mata mual na di laut na bidang i di toru ni tano dohot sude pintu ni aek na di langit tartutup ma. So ma udan, 3jana sumurut ma aek i 150 ari honokna. 4Di ari pitu bolas bulan papituhon mantul ma kapal i di sada dolok di Luat Ararat. 5Torus sumurut do aek i jana di ari parjolo bulan pasampuluhon, mamungka ma tarida puncu ni angka dolok.
6Dung salpu opat pulu ari, diungkap si Noak ma sada jandela ni kapal i, 7jana dipalua ia ma sada unggas sigawak. Nada mulak unggas i tu kapal i, tapi sai habang-habang do ia pahae pahulu lopus nada adong be aek di tano i. 8Jadi dipalua si Noak muse ma sada darapati laho patangkaskon sanga na dung surut aek i. 9Tapi dibaen ditutup aek i dope sude tano, nada dapot darapati i inganan hasonggopanna. Jadi gabe mangulahi ma ia ro tu kapal i, jana disurduhon si Noak ma tanganna pamasukkonsa mangulahi tu bagasan. 10Dipainte si Noak ma pitu ari nari dung i dipalua ia ma mangulahi darapati i. 11Dung andospotang ro ma mangulahi darapati i mandapotkon si Noak maroban bulung ni zetun na rata sangkarambar di tuktukna i. Sian i diboto si Noak ma na dung surut aek na oto i. 12Dipainte ia ma pitu ari nari, dung i dipalua ia ma darapati i sanoli nari, tapi nada mulak be tusia darapati i.
13Di na marumur 601 taon si Noak, di ari parjolo bulan parjolo madung mahiang sudena. Dibuka si Noak ma pintu ni kapal i, jana mangaranap ma ia humaliang. Diida ia mamungka mahiang ma tano i. 14Di ari dua pulu pitu bulan paduahon, madung mahiang sude tano i.
15Jadi didok Debata ma tu si Noak, 16“Ruar ma ho sian kapal i dohot dadaborumi, angka anakmu dohot dadaboru ni halahi. 17Paruar ma sude unggas dohot binatang i, anso tarbaen halahi mamopari jana mamarpar di sude tano on.” 18Jadi ruar ma si Noak sian kapal i rap dohot dadaborunia, angka dakdanaknia bope dohot angka dadaboru ni dakdanaknia i. 19Ruar ma sude binatang dohot unggas sian kapal i marsidongani horongna be.
Pasahat haul ma si Noak
20Dipajongjong si Noak ma sada langgatan di Tuhan, dibuat ia ma sada binatang dohot unggas na so haram sian ganop horong, ditutung ia ma i himpal-himpal songon haul somba-somba di ginjang ni langgatan. 21Moga ma Tuhan dibaen uap na huskus sian haul somba-somba i, jana didok Tuhan ma di bagasan rohaNia, “Nanggo buraanKu be portibi on hara ni pangalaho ni jolma; Huboto, sian haposoon ni jolma i do jahat pikiranna. Nada uhumanKu be sude jolma na mangolu, songon na baru Hubaen i. 22Salolot adong tano on, tongtong ma masa suanon dohot sabion, ari ngali dohot ari las, logo ni ari dohot nonat, arian dohot borngin.”
S'ha seleccionat:
PAMUNGKAAN 8: LAIAKB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Indonesian Bible Society