PAMUNGKAAN 4
4
Si Kain dohot si Abel
1Dung i marcampur ma si Adam dohot si Hawa dadaborunia i, jana denggan ma pamatangna. Ditubuhon ia ma sada anak halaklahi jana ning ia ma, “Hara ni panolongi ni Tuhan, maruli do au sada anak halaklahi.” Gabe dibaen ia ma goar ni dakdanak i, si Kain. 2Dung i ditubuhon si Hawa muse ma sada nari laing anak halaklahi, na margoar si Abel. Gabe parmahan biri-biri do si Abel, tapi anggo si Kain gabe partani do. 3Dung adong sadia lolot, dibuat si Kain ma sian suha ni tano na nibaennia i, dipasahat ia ma i tu Tuhan gabe haul. 4Dibuat si Abel ma sada anak ni biri-biri siangkaan sian saparinaan; disambol ia ma i, lalu dihaulkon ia ma goar-goaranna na dumenggan sian i tu Tuhan. Jop ma roha ni Tuhan mida si Abel dohot na nihaulkonnia i, 5tapi anggo si Kain dohot na nihaulkonnia i ditulak Tuhan do. Marpiar-piar ma muruk ni si Kain, jana murhing ma bohina hara ni murukna. 6Jadi didok Tuhan ma tu si Kain, “Biasi muruk ho? Biasi murhing bohimu? 7Muda na denggan do na nibaenmu, musti angkon tata bohimu; tapi hara ni na nibaenmu na jat, gabe painte-intehon ma dosa laho masuk tu bagasan ate-atemu. Na giot rajaan ni dosa ma dirimu, tapi angkon taluhononmu do i.”
8Jadi didok si Kain ma tu si Abel anggina i, “Beta jolo hita tu ladang.” Jadi di hatiha di ladang halahi dibalbal si Kain ma angginia i lalu dibunu ia.
9Disapai Tuhan ma tu si Kain, “Di dia si Abel, anggimi?”
Dialusi si Kain ma, “Nada huboto i. Angkon iba ma he lakna pajago-jago angginiba?”
10Jadi didok Tuhan ma, “Biasi angkon baenonmu pangalaho na jorbut i? Pio-pio do mudar ni anggimi sian tano i, songon sora na mangangguk mangido pamalosan. 11Hona bura ma ho, jana na so tola be ho mangkarejohon tano i. Madung diincop tano i mudar ni anggimi, songon na mungkap pamanganna manjagit mudar ni anggimi di na nibunumi ia. 12Muda pe gabe martani ho, na so adong ma bagi aha hasil ni tano i; gabe halak na madoado noma ho na so adong bagasna di tano on.”
13Jadi ning si Kain ma tu Tuhan, “Madokdoktu do da uhuman i tu au, nada tarporsan iba. 14Dipaorot Ho do iba sian tano on, padaohon sian Ho dohot sian pangurupiMu. Mompas-ompas noma iba, nada adong bagas di tano on, jadi sanga ise na marsuo dohot iba bunuonna ma iba.”
15Tapi didok Tuhan ma, “Nada songon i. Muda adong halak na mamunu ho, gabe pitu hosa ma sintahon balosna.” Dung i dibaen Tuhan ma tanda di si Kain laho pabotohon tu sude halak na marsuo dohot ia, anso ulang dibunu ia. 16Jadi morot ma si Kain sian jolo ni Tuhan jana maringanan ma ia di tano na margoar “Nod” di Habincaran ni Eden.
Pomparan ni si Kain
17Adong do sada anak ni si Kain dohot dadaborunia, digoari ma i si Henokh. Dung i dipajongjong si Kain ma sada kota, jana digoari ia ma kota i mangihutkon goar ni anaknia i. 18Adong ma anak ni si Henokh na margoar si Irad. Si Irad on ma amang ni si Mekhuyael. Anak ni si Mekhuyael ma si Metusael jana si Metusael ma amang ni si Lamekh. 19Si Lamekh dua halak dadaborunia, si Ada dohot si Zila. 20Ditubuhon si Ada ma si Jabal jana pomparan ni si Jabal ma bangso parmahan bope na maringanan di undung-undung. 21Angginia si Jubal goarna, i ma ama ni sude parmusik hasapi dohot parsuling. 22Ditubuhon si Zila ma si Tubal Kain, i ma mambaen sude ragam ni parkokas na sian tumbaga dohot bosi. Iboto ni si Tubal Kain ma na margoar si Naamah.
23Mandok hata ma si Lamekh tu angka dadaborunia i,
“Ho Ada dohot ho Zila, tangihon tuson!
Humatehon do sada doli-doli hara ni na nihantamnia au.
24Muda pitu hosa disintakkon laho mambalos tu si Kain,
angkon pitu pulu pitu hosa ma buaton muda adong na mamunu au.”
Si Set dohot si Enos
25Maruli anak dope si Adam dohot dadaborunia sada nari. Ning si Hawa ma, “Dilehen Debata dope baya di au sada nari anak gonti ni si Abel na nibunu ni si Kain i.” I ma umbaen si Set dibaen ia goar ni anaknia i. 26Adong ma anak ni si Set na margoar si Enos. Mamungka di hatiha i ma didok halak goar ni Tuhan Na Badia i muda maribadat tuSia.
S'ha seleccionat:
PAMUNGKAAN 4: LAIAKB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Indonesian Bible Society