Luke 6
6
Jisü ye Sabbath Mpeu ke
1Sabbath tsalà lakhi lo Jisü ye aghiluqo vechesü wuche, ikelo pa khopemiqo no aghipe lothi muxu pe au lono munu püzü chu ghi che. 2Phariseemi khami no iniju, “Nongu ye kushiye Sabbath tsalà yeza hexa ghi shimo kepu shi ani kea?”
3Jisü no panongu khochile, “Nongu ye David eno pa küsàmiqo no müzüthive kelo kiu shi keno khilemu phiju mphi keshea? 4Pa no Alhou ki lo ilo no kishekimtheve keu sho ikhilu eno chuve püzü pa küsàmiqo ghí tsüe. Kishekimtheve keu sho ye achinemi kumo aye kütami ye chuni keu ayeza lo kühae.” 5Jisü no panongu vilo hi ghí pi, “Timi Nu ye Sabbath tsalà shou Ampeu ke.”
6Sabbath tsalà kütau lakhi lo Jisü no Synagog lo ilo no kütsü ae. Eno au ithamlave kemi lakhi tilehi ngo ae. 7Phariseemi ngò ayeza kükütsümiqo ye akipimí Jisü tsü niye ajeku phuju akehu Jisü ye Sabbath tsalà lo shipivi nani keo shipivimo nani keno tsaqüi chheju ae. 8Ikemu Jisü ye panongu no kiu kümsü akeno ithi akehu au ithamlave keu vilo ishi pi, “Ithulo eno kümtsü gizülo puthugho lo.” Ikehu pa no ithu no tile puthugho ngoe.
9Tile Jisü no panongu vilo pi: “I no nongu vilo iniju ani, Ayeza kiqi lo Sabbath tsalà lo khikhiu shikeu no achipi kea: akivi kümlà shikeu no keo küsakügha kümlà shikeu no kea? Aküxü xalu keu no keo kütsave keu no kea?”
10Pa no ighowo panongu jupuwo eno anhü thive keu vilo pi, “O u xachholo.” Pa no tishi kelo pa u ye kupukülai athoputholuve. 11Ikemu Phariseemi ngò ayeza kükütsümiqo ye muqhumüzaive eno Jisü shou kiu shive moayesa keno panongu dolo küptsa thuve.
Akhopemi Chighikini
12Ghulo lakhi Jisü ye akighini shi niye naghuto küdau iqhoe, eno pa ye puthotsü Alhou vilo inikhua. 13Kughou inaqhe shive keno pa no pa pape chekemiqo ku eno panongu chighikini kishelu, pa no tipaqo pesü Apostolmiqo ipi kuve tsü:
14Simon (khuu pesü Peter kuve tsü keno) eno pa thiküzüu Andrew,
James,
John,
Philip,
Bartholomew.
15Matthew,
Thomas,
Alphaeus nu James,
Simon azá yeghi kimiye kicheu ipi ku chekeu,
16James nu Judas
ngò Judas Iscariot, khuu thechuu shive keno.
Kükümgha eno Ahaküsapuqo
17Jisü no panongu gholo iqi no aqa lo puthugho pe ngoe. Pa pape chekemi timi kutomo tile ae eno Judea qha kümtsü lono, Jerusalem, Tyre eno Sidon yeghi lo azü mükü lo aphughi akeqo lono timi amqo kijè lakhi ighie, 18panongu ye pa tsa ini eno panongu küsǜ shipivi tsüpe niye ighikhae. Ikelo mithekumo ghungu no pünaqhi pe akemiqo shikipivi ithulue, 19eno timi kümtsü no pa bulu niye pükapütsae, kughengu pa lau no aküka ipeghino panongu kümtsü shipivi ake.
20Jisü no pa khopemiqo ju no pi:
“Nongu khunoqo no athokhami keno akümghae;
kughengu Alhou kükaphu ye nonguw ke!
21Müzüthi akemi kümghae,
kughengu nongu ghapiqi tsü nani:
Nongu khunoqo no itehi qa ani keno akümghae;
kughengu nongu ye nulu nani ke.
22Kughou Timi Nu ghenguno timi no nongu mithi,
nongu leve, nongu thaigha
eno küsakügha kepi nongu jeku nike no,
nongu kümghae.
23“Kughou tishini keno tipa tsalani alovishelo eno alokivi lau no ilhe lo, kughengu kungugha lo nonguw qesaxu kijè ani. Kughengu panongu pù-asüqo ghí tipaphi shi tungkupumiqo peitha cheke.
24“Ikemu nongu khunoqo no kiními keno ahaküsapue,
kughengu nongu ye alokughuno ithuluve ake.
25Nongu itehi chhikhoi akemiqo ghenguno ahaküsapue,
kughengu nongu ye müzüthi anani.
Nongu itehi nu akeqo ghenguno ahaküsapue,
kughengu nongu ye mloqa eno anhezü-piji nani.
26Kughou timi kümtsü no nongu ye aloe ipini keno,
nongu ghenguno ahaküsapue.
Kughengu panongu pù-asüqo ghí tipaphi shi kichileu tungkupumiqo vilo piche ke.
Aghümi Kimiye keu
27“Ikemu nongu ini akemiqo vilo I no piani: O ghümi kimiye lo, nongu mithi kemi lau akivi kümlà shilo, 28nongu ghusho kemi kümgha tsülo, nongu peithapüsa kemi ghenguno inikhu tsülo. 29Khuala no O gimuchu lakhi lo ghatsü aye, tüxau ghí mighe pe tsülo. Khuala no ow ubephi ikhisüwuve aye, pa pelo O phiküzü ghí luve pelo. 30O vilo khu kemi kümtsü lau tsülo, khuala no ow kiuala luve tsü aye, khuchile keu shi kevilo. 31O lau shipe nishi ketoi kütami lau shilo.
32“Nongu no nongu kimiye kemi likhi kimiye aye nongu ghenguno kiu alá ani kea? Axinemiqo thotsü khuno no pano kimiye keno tipano kimiye cheni. 33Eno nongu lau akivi mülà kemi lau likhi akivi mülà aye nongu ghenguno kiu alá ani kea? Axinemiqo ghí tishi chenie. 34Nono ithulu chileluveni kemi lau likhi püná aye O ghenguno kiu alá ani kea? Kuchopu ithulu chileluve nikeu ghenguno axinemiqo ghí axinemi lau püná tsü chenie! 35Ikemu O ghümiqo kimiye lo eno panongu lau akivi kümlà shilo, püná lo eno kiumu tsüchile pe nikeu laju kevilo. Tishianguno no ye ajume kijè anani eno no ye shishe Akiqheu Lhou nuli shilu nani; kughengu pa ye shikimthi küha kemi eno küsaküghami lau kimiyeqhiyi ke. 36Nongu Papù ye kimiyekini kehu nongu ghí kimiyekinimi shilo.
Kütami Shou Küghathabe Keu
37“Küghathabe kevilo, eno O shou küghathabemo nani; kütami pipüsa kevilo, tishianguno O pipüsavemo nani; kütami kipimí qhitsülo eno O kipimí qhivetsü nani. 38Tsülo eno ti O tsüchile nani. Chhitoi shi inadasü ghi kunosü eno qoleqolei shi nongu tsü nani; kughengu nono kütami shou kiu qhemi mighibeni keno titoi O shou mighibe nani ke.”
39Pa no kimghi pìye keu hi ghí panongu vilo pi: “Anhethi kighichemi ye anhethi kighichemi saphelu nani keshea? Pama kinikujo aqò lo ikiqi ilovemoni keshea? 40Kiphimi lakhi ye shikükau shou kumoe, ikemu khukhumu tsaqütsalei qopheve aye panonguw shikükau toive nani.
41“No ye kushiye O likhi O nhethi lo asülu akeu jukutomo püzü O thiküzüu nhethi lo amihi akeu jukuto ani kea? 42No ye kíshi no O likhi O nhethi lo asülu akeu jukutomo püzü O thiküzüu vilo, ‘O nhethi lo amihi akeu I no ikhipheve tsüní,’ ipi luni kea? No ye kühaküghamie, atüghishi O likhi O nhethi lo asülu akeu ikhive paghilo, tishianguno no ye O nhethi tsüghükhüi shi püzü, O thiküzüu nhethi lo amihi akeu ikhi phelu kepu shi nani ke.
Asübo eno Tipau Xathi
43“Asübo kivi ye axathi lhoküsa pithí chemo, momu asübo lhoküsa ye axathi kivi pithí chemoe. 44Asübo kümtsü pa likhi pa xathi lono michilu cheni. Khumu asahubo lono mubuthi xolu chemoe, momu ayemhibo lono atsaithi xolu chemoe. 45Timi kivimi no pa mlo lo akivi pekütsüpüa keu lono akivi pephe cheni, eno küsaküghami no pa mlo lo küsakügha pekütsüpüa keu lono küsakügha pephe cheni. Kughengu amlo lo kiu pekütsüpüani keno akichi lono piphe cheni.
Aki Kishimi Alokütsüu eno Mübomzüu
46“Kushiye I vilo, ‘Ampeu, Ampeu,’ ipi no I no pikeu shichemo kea? 47I lau ighi kemi eno I tsa ini no tipaqo pape kemi ye kiutoi kemi keno I no nongu pìyeni. 48Panongu ye timi lakhi no aki shi ake toi ke: pa no thonhei chhusü eno atuqu shou aboqha qhae; kughou atshünazü ighi keno aki tipau chhele ighi ikemu tiye süküghütha mülae, kughengu tiye akivishi shipüa ke. 49Ikemu timi khuu no I tsaqo chilu no papemoni keno pa ye timi lakhi no aboqha sümo no asàye shou aki shipuku keu toi ke, atshünazü no chhele ighi kelo aki tipau paikhavi ilaiqive eno tiye qhoi kütsaleve ke!”
S'ha seleccionat:
Luke 6: STB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.