GÉNESIS 2
2
1Jahua pachatapish, cai pachatapish, chaipi tucui imalla tiyajcunatapish chashna rurashpami tucuchirca. 2Taita Diosca pai imalla ruranataca canchis punlla tucunapajca tucuitami tucuchirca. Tucui imalla rurana cashcata tucuchishpaca canchis punllapica samarircami. 3Taita Diosca pai imalla rurana cashcata tucuchishpa canchis punllapica samarishcamantami, chai punllataca paipajlla ch'icanchishca samana punlla cachun alli nirca.
Adanpish, Evapish Edén huertapi cashcami
4Jahua pachatapish, cai pachatapish chaipi imalla tiyajcunatapish callaripi Taita Dios rurashcacunaca chaicunami. Jahua pachata, cai pachata ña rurashca cajpipish, 5allpapica ima yuracuna manaraj tiyarcachu. Verdijlla q'uihuapish manaraj huiñarcachu. Mandaj Dios cai pachapi manaraj tamyachishcamanta, allpapi imata rurajpish manaraj tiyashcamantami chashna carca. 6Ashtahuanpish allpamanta yacu p'uyul llujshishpami, tucui cai pachata noyochicurca. 7Mandaj Taita Diosca runataca ñutu allpamanta rurashpa, paipaj singapi causaita cuj samaita p'ucujpimi, runaca causaiyuj tucurca.
8Mandaj Taita Diosca inti llujshin ladoman caj Edén llajtapi huertata rurashpami, pai rurashca runataca chaipi churarca. 9Mandaj Taita Diosca chai huertapica, micunanqui tucui laya sumaj granocunata p'ucuj sumaj yuracunatami huiñachirca. Shinallataj chai huerta chaupipica causaita cuj yuratapish, ima alli cashcata, mana alli cashcata yachaj chayachij granota p'ucuj yuratapishmi huiñachirca.
10Edén llajtapi caj huertamantaca jatun yacu llujshishpami, chai huertallapitaj chuscu ladoman chaupirishpa regaricurca. 11Chai yacumanta chaupirishca shuj yacuca, Pisón shutimi. Chai yacuca curi tiyaj Havila llajtatami muyun. 12Chai llajtapi tiyaj curica alli curimi. Chaipica bedelio shuti yuracunapish, ónice shuti sumaj rumipishmi tiyan. 13Q'uipa jatun yacuca Gihón shutimi. Chai yacumi Cus shuti llajtata muyun. 14Ishquipaj q'uipa jatun yacuca Hidekel shutimi, chai yacuca Asiria llajtatami inti llujshin ladoman ricun. Quimsapaj q'uipa jatun yacuca Éufrates shutimi.
15Mandaj Taita Diosca, Edén llajtapi pai rurashca huertapimi pai rurashca runataca chaipi trabajashpa, cuidashpa causachun churarca. 16Mandaj Taita Diosca chai runataca cashnami mandarca: “Cai huertapi tiyaj tucui yuracunapi p'ucushcacunataca micunguilla. 17Ashtahuanpish huerta chaupipi tiyaj yuraca allita mana allita yachaj chayachijmi. Chai yuramantaca ama micungui. Chai yuramanta micushpaca, chai punllallatajmi huañungui” nircami.
18Chai q'uipami Mandaj Taita Diosca: “C'arilla canaca mana allichu. Chaimanta paita ayudaj, pai imapaj minishticushcata rurasha” nirca. 19Mandaj Taita Diosca, cai allpamanta rurashca causaj tucui laya animalcunata, huairata purij alasyuj animalcunataca ima shutilla canata Adán ricushpa shutichichunmi paipajman pushamurca. Causaiyuj caj tucui chaicunaca Adán shutichishca shinallataj chai shutimi saquirirca. 20Adanca sacha animalcunatapish, huairata purij alasyuj animalcunatapish, charina animalcunatapish tucuitami shutichirca. Ashtahuanpish paita ayudaj, pai imapaj minishticushcataca mana japircachu. 21Chaimi Mandaj Taita Diosca, Adanta huañuita dormichishpa, paipaj costillamanta shuj tulluta llujshichishpa aichataca ima shina cashca shinallatataj saquirca. 22Mandaj Taita Diosca Adanmanta llujshichishca tullumantaca shuj huarmita rurashpami paipajman apamurca. 23Chaimi Adanca:
“¡Caica ñuca tullumanta, ñuca aichamanta rurashcami!
Paica c'arimanta rurashca cashcamanta “Huarmi” nishcami canga” nirca.
24Chashna cashcamanta c'arica, paipaj yayata mamata saquishpa paipaj huarmihuan tandanacushpa ishquindijmanta shuj aichallami tucunga.
25Adanpish paipaj huarmipish ishquindijtajmi lluchulla carcacuna. Ashtahuanpish mana pinganachircacunachu.
S'ha seleccionat:
GÉNESIS 2: QCHI04
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Quichua Chimborazo Bible Revision 2010 © United Bible Societies, 2010.