GÉNESIS 13
13
Abramhuan, Lothuan raquirinacushcamanta
1Abramca Egiptomantaca paipac huarmita pushashpa, tucui charishcata apashpami, Neguev llactaman huichai rirca. Shinallatac Lotpish paihuanmi rirca. 2Abramca yalli chayuc cashpami, curitapish, cullquitapish, animalcunatapish achcata charirca. 3Pai Neguevmanta cutishpaca, ashancaman rishpami, Bet-el puebloman chayarca. Chashnami Bet-el pueblo, Hai llacta chaupipi, ñaupaman carpa huasi cashcallamantac chayarca. 4Ñaupaman altarta ruhuashcallamantac chayashpami, Mandac Diosta mañarca.
5Abramhuan ric Lotpish achca ovejacunata, vacacunata, carpa huasicunatami charirca. 6Chaimantami michina allpaca mana pactarca. Chaillapitac ishcaita causanataca mana pudircachu. 7Abrampac michiccunaca Lotpac michiccunahuanmi piñanacuc carca. Shinallatac cananeocunapish, ferezeocunapish chaillapitacmi causarca.
8Chashna cacpimi, shuc punzha Abramca Lotta cayashpaca: «Ñucanchicca huasi ucupurami canchic. Ñucanchicpura mana piñanacunachu canchic. Shinallatac ñuca michiccunapish cambac michiccunahuan mana piñanacunachu can. 9Cai tucui allpaca cambac ñaupallapitacmi. Chaimanta ñucamanta raquirichunmi munani. Can lluqui maqui ladoman ricpica, ñucaca alli maqui ladomanmi risha, cutin can alli maqui ladoman ricpica, ñucaca lluqui maqui ladomanmi risha» nirca.
10Shina nicpimi, Lotca huichailla ricushpaca, Jordán tucui pambata ricurca. Chai pambaca Edén huerta shina, parcuc yacuyuc, shinallatac Mandac Dios manarac Sodomata, Gomorrata tucuchicpi, Zoar llacta chimba ladopi cac Egipto llacta shinami carca. 11Chaimantami Lotca tucui Jordán pambata acllashpa, inti llucshina ladoman rirca. Shinami caishuc chaishuc raquirinacurca. 12Abramca Canaanpimi causai callarirca. Cutin Lotca chai pugru pambapi tiyac llactacunapimi Sodoma pueblocaman caipi chaipi carpa huasicunata shayachishpa, causai callarirca. 13Sodomapi causaccunaca millai gentecuna, mancharina juchacunata ruhuashpa, Mandac Diosta piñachiccunami carca.
14Lotmanta raquirishca quipami Mandac Diosca Abramtaca: «Can maipi cashcamanta uratapish, jahuatapish, inti llucshina ladotapish, inti tigrana ladotapish ricui. 15Tucui can ricushca allpataca tucui causaipacmi canmanpish, cambac huahua huahuacunamanpish cusha. 16Cambac huahuacunataca ñuto allpata shinami, achcata mirachisha. Ñuto allpata maijan yupai pudishpaca, cambac huahua huahuacunatapish yupangami. 17Jatarishpa, llactacunata sunimanpish, anchomanpish purishpa ricugri, canmanmi chai allpataca cugrini» nirca.
18Shina nicpimi, Abramca carpa huasicunata apashpa, encina yuracuna tiyac Mamre pambapi causagrirca. Chaica Hebrón pueblo cuchullapimi carca. Chaipimi Mandac Diosman shuc altarta ruhuarca.
S'ha seleccionat:
GÉNESIS 13: QCA10
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.