YOANE 5
5
1Edaku ki tea maga wanogoe nasaisaiana sikai ki naka ni Yudea e doko; go Yesu e paki Yerusalem pano.
2Go luku‐noai‐ava sikai e doko Yerusalem pisari namata‐pua ni shiip, waina e pei tea sosoana pae Heberu ki Bethesda, waina e peani natara‐taup̃a lima. 3Taua sikai ni naatam̃oli maga eu one natara‐taup̃a maga wanogoe, waina eu sasana, waina eu kesa, waina eu pei pito, waina eu lologara, eu do leogoro naparivariana ni noai: 4nalakena te ragi seara agelo sikai ki Yehovah e siwo paki lukunoai‐ava wanogoe, po mari noai e duletule: go naata waina e pea paki asa edaku ki naduletuleakiana ni noai e pei tea mariana e p̃ia pa dua ki nasasanaana waina e pei tea vuatiana asa. 5Go naatam̃oli sikai ni doko tokora wanogoe, waina e peani natau rualima dolu tamate latolu nasasanaana aneana. 6Ragi waina Yesu e punusi a e one, po atae naga e dapala nogoe doko ragi varau, 7e noa ki nia, e naga, Ku masauna naga p̃a vei tea mariana p̃a wia kite? Tea sasana wanogoe e pasa dara e, e naga, Nawota, a da peani te naatam̃oli sikai mau, ragi waina noai e pei tea duletuleakiana, waina ega nadi ki nau paki luku‐noai‐ava: ma ragi waina kinau a do umai, tea p̃ota sikai e pea ki nau siwo pano. 8Yesu e noa ki nia, e naga, P̃a tuleana, p̃a tape dakati nawewele anigo, po surata. 9Go m̃araverave naatam̃oli wanogoe e pei tea mariana e p̃ia, go e dape dakati nawewele aneana po surata.
10Go e pei sabbath naaleatia wanogoe. Nalakena tea wanogoe navarapule maga ni Yudea eu noa ki tea waina e pei tea maripauriana, eu naga, E pei sabbath, go e da pae nawotaeana mau naga p̃a tape dakati nawewele anigo. 11Ma nae e pasa dara ra, e naga, Tea waina e mari au a p̃ia, nae e noa ki nau, e naga, P̃a tape dakati nawewele anigo, po surata. 12Eu pusuusu paki nia, eu naga, Naatam̃oli waina e noa ki‐go, naga P̃a tape dakati, po surata, e pei sei? 13Ma tea waina e pei tea maripauriana e da atae a mau: nalakena Yesu e moro pano, go taua sikai ni naatam̃oli maga eu doko tokora wanogoe. 14Edaku ki tea maga wanogoe Yesu e pap̃ai e roara ni nasum̃a tapu, po noa ki nia, e naga, P̃a leo, ku pei tea mariana ku p̃ia, p̃a ta moro mari naleo sa mau, naga tea waina e sa p̃arua liu ega ta pakilina ki‐go mau. 15Naatam̃oli wanogoe e pano, po noakisai navarapule maga ni Yudea naga tea waina e mari a e p̃ia e pei Yesu. 16Go nalakena tea wanogoe navarapule maga ni Yudea eu kopalele Yesu, nalakena e mari tea maga wanogoe sabbath. 17Ma Yesu e pasa dara ra, e naga, Tamagu e do p̃osiwosi pa pa paki ragi waia, go kinau a do p̃osiwosi. 18Nalakena tea wanogoe navarapule maga ni Yudea eu laaga p̃arua naga euga mari punue a, nalakena e dapiri sabbath, tea wanogoe e da sikina mau, ma e soso Sup̃e ki Tamana aneana, e dum̃ana mari a e pitotowo ma Sup̃e.
19Nalakena tea wanogoe Yesu e pasa dara po noa ki da, e naga.
Lomau, lomau, a noa ki mu, a naga, Natuna e da mari atae dum̃ana mari te navatuna mau, ma e mari tea waina e punusi Tamana e do mari a. Nalakena naleo maga waina nae e pe mari ra, naleo maga wanogoe Natuna ma e do mari ra dakiusi a. 20Nalakena Tamana e dodomi Natuna, po piseiki nia naleo maga mamau puti waina nae e do mari ra; go ega wo piseiki nia nawosiana maga waina eu p̃arua liu tea maga waia, naga nimu kuga maga. 21Nalakena dakiusi waina Tamana e do sike tea mate maga eu duleana po pakamauri ki da, dapala nogoe Natuna ma e do pakamauri ki tea maga waina e masauna. 22Nalakena Tamana e da pasap̃otae te naata mau, ma e dua Natuna navasap̃otaeana mamau; naga tea maga mamau puti euga dodomadagani Natuna, ega tapala waina eu dodomadagani Tamana. 23Tea waina e da dodomadagani Natuna mau, e da dodomadagani Tamana mau waina e dip̃aki lua e umai. 24Lomau, lomau, a noa ki mu, naga Tea waina e dogo navasaana aginau, po saralomau navasaana ki tea waina e dip̃aki lua au umai, e peani namauriana waina e du mau du, go ega wo da umai paki navasap̃otaeana mau, ma e po m̃elu dua ki namateana po paki namauriana. 25Lomau, lomau, a noa ki mu, naga Aura ega wo umai, go e pei ragi waia, waina tea mate maga euga wo dogo nadaleo ni Sup̃e Natuna asa; go tea maga waina eu dogo euga wo mauri. 26Nalakena dakiusi waina Tamana e peani namauriana e doko asa, dapala nogoe e dua Natuna naga nae ma ega veani namauriana ega toko asa: 27go e dua e naveinawotaana naga ega mari navasap̃otaeana, nalakena e pei naatam̃oli Natuna. 28Kuga ta maga tea wanogoe mau: nalakena aura ega wo umai waina tea maga mamau puti waina eu one matigo maga one euga wo dogo nadaleona, 29po dave umai; tea maga waina eu mari naleo p̃ia maga, euga wo dave umai paki namoroduleanaana ni namauriana; go tea maga waina eu mari naleo sa maga, euga wo dave umai paki namoroduleanaana ni navasap̃otaeana.
30Kinau a da mari atae dum̃agu mari te navatuna sikai mau: a pasap̃otae dapala waina a dogo: go navasap̃otaeana aginau e leana; nalakena a da laaga namasauana aginau mau, ma a laaga namasauana ki tea waina e dip̃aki lua au umai. 31Kinau a pe noa sokisoki nalo kakagu, nanoasokisokiana aginau e pe ta pei lomau mau. 32Tea waina e do noa sokisoki nalo kakagu e pei tea p̃ota sikai; go a atae naga nanoasokisokiana waina e do noa sokisoki a nalo kakagu e pei lomau. 33Nimu ku dip̃aki lua pa punusi Yoane, go e magi nalomauana noa sokisoki. 34Ma nanoasokisokiana waina kinau a dape a e da m̃elu naatam̃oli mau: ma a noa tea maga wanogoe naga nimu kuga vei tea mautipauriana. 35Nae e pei nasulu waina e soro po maramalaga: go nimu ku masauna naga kuga laelaea namarama aneana ragi seara. 36Ma nanoasokisokiana waina kinau a peani a e p̃arua liu tea ki Yoane: nalakena nawosiana maga waina Tamagu e dua au ara naga aga mari sua ra, nawosiana maga wanogoe waina a do mari ra, eu do noa sokisoki nalo kakagu, naga Tamagu e dip̃aki lua au umai. 37Go Tamagu waina e dip̃aki lua au umai, nae e noa sokisoki nalo kakagu. Ku da dogo nadaleona te ragi mau, go ku da punusi navunusiana kakana mau. 38Go ku da peani navasaana aneana doko nap̃alaumu doko mau: nalakena tea waina nae e dip̃aki lua e umai, nimu ku da saralomau navasaana aneana mau. 39Kuga veve usiusi navasaana midiriana maga nalakena ku midoaki nia naga ku peani namauriana waina e du mau du ara; 40go nara eu pei tea waina eu do noa sokisoki nalo kakagu; go ku karai umai punusi au, naga kuga veani namauriana. 41A da dape nasamasamaana m̃elu naatam̃oli maga mau. 42Ma a atae mu, naga ku da peani nadodomiana paki Sup̃e doko nap̃alaumu mau. 43Kinau a umai pae nagisa ni Tamagu, go ku da piragi au mau: tea p̃ota sikai e pe umai pae nagisana aneana, nae wanogoe ku pe viragi a. 44Nimu ku mari atae saralomau dapale sava, waina ku do dum̃amu dape nasamasamaana kiamu, go nasamasamaana waina e m̃elu Sup̃e sikai maau umai ku da laaga asa mau? 45Kuga ta midoa ki nia mau naga kinau aga wo pasa dip̃a mu paki Tamagu: sikai e doko waina e do pasa dip̃a mu, Moses, waina nimu ku do leogoro pavatu asa. 46Nalakena ku pe saralomau navasaana ki Moses, ku pe saralomau navasaana aginau; nalakena nae e midiri nalo kakagu. 47Ma ku pe ta saralomau navasaana midiriana aneana maga mau, ku pe wo saralomau navasaana aginau maga dapale sava?
S'ha seleccionat:
YOANE 5: NTB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible Society of the South Pacific