Jọnị 4
4
Jizọsị Na Sameriya Ḅẹ Ẹrẹḅọ Ma Na
1Farịsiiapụ ma nwẹnị naa mịnẹ Jizọsị ḍukamẹnjị tẹ ò minji kẹ sara tẹ apụ Jọnị jụ ḅẹ apụ nẹngị tẹ. 2(Karakaraye ḍuko ḅụ Jizọsị ḅarana minji kẹ kịnị sara-a, kụma ò ḍukamẹnjịapụ ma kịngẹ mie minji kẹ kịnị sara yee.) 3Mie ḅụ Jizọsị ḅo ịn miemẹ ḍuko ma ḅọrọarị ye naa sakị ọ̀ nwẹnị Judiya koroma-so Galili mu. 4Ò muarị sakị, Sameriya sịẹ ḅio mie ọ̀ mẹnjị ḅọrọ ḅẹ ye.
5 #
Suk 33.19; Jọs 24.32 Sameriya ḅụ ò ḅo ịn kẹ Sayịka sịn gbọrụ ama lam, anị ama mẹ na Jekọbụ kẹ ọ̀ tụḅọ Josẹfụ pịrị kiri na kpekim. 6Anị kiri mẹ ḅụ Jekọbụ suḅe simem. Mẹnjị mẹ ḅụụ-lọkọ kẹ Jizọsị ḅaamam, tẹ ọ̀ nwẹnị suḅe mẹ suku lẹgị. Anị sakị anị ḅo ene-ogbo la tẹ.
7Sameriya ḅẹ ẹrẹḅọ nwẹnị minji ḍuu ḅẹ ḅo, tẹ Jizọsị nwẹnị á ḅẹẹ, “Minji kẹ ị̀ pịrị à ḅuu ị́ na.” 8(Anị sakị ò ḍukamẹnjịapụ ma mu ama ḅio fịye fẹẹ ḅẹ mu wararị.)
9 #
Ẹzị 4.1-5; Neh 4.1,2 Ẹrẹḅọ ma nwẹnị pakịrị, “Ị́yẹrị Juu-ḅẹ-ḅọ, yẹrị Sameriya ḅẹ ḅọ ḅẹ sakị, ndẹẹ í inetẹ ị̀ ḅara minji ḅii ḅuu ḅẹ ḅara?” (Juu-ḅẹ-apụ Sameriya ḅẹ apụ kẹ minji ḅuu tẹ so tẹ kọpụ na bọlị na kẹ ḅuu ḅuu-a.)
10Jizọsị nwẹnị pakịrị, “Ị́ nwẹnị Tamụnọ kẹ tomi pịrị, pịrị ye na, ị́ ḅara minji mẹ ḅiiarị ḅọ ḅe na nimi namịna, mimgbe rẹ mie ọ̀ ḅara ị́ ḍumo-pịrịarị minji ḅii ọkị ḅarịye.”
11Ẹrẹḅọ ma nwẹnị ḅẹẹ, “Ị̀ Nyanaḅọ, ị́ agbakuru nyana-a anị sakị suḅe mẹ pịkị pokolo wararị, ndẹẹ ị́ mịẹtẹ ị̀ ḅẹẹarị ḍumo-pịrịarị minji mẹ ḍuu ḅo ị̀ pịrị ḅu ḅẹ ḅara? 12Wamịna atẹngịḅọ Jekọbụ mie mị suḅe mẹ soku wa pịrị ye, tẹ ori-o, ori awọmẹ-o, ori anana-o, inimgba mị suḅe ḅio paka-ḅo minji ḅuum. Ị́ sịn-arị ị́ Jekọbụ nẹngị, ị́ ọ̀ nẹngị ḅoto?”
13Tẹ Jizọsị nwẹnị pakịrị, “Mị minji mẹ ḅuu ḅọ, ḅuu ḅọ jen minji mḅọ pọkọ tarị ḅa, 14kụma ị̀ ḅara ḅo minji mẹ ḅuu ḅọ, ḅuu ḅọ minji ḅarị jen kẹ mḅọ pọkọ tarị ḅịa. À kẹ mḅọ pịrị ḅuu ḅarị minji mẹ mḅọ ḅụụ ḅio ngụngụḅa sọ tẹ ḍumo pịrị minji pakama, pakama mḅọ sime pịrị ḅa, tẹ mḅọ gbamaso ḍumo nyana ḅa.”
15Ẹrẹḅọ ma nwẹnị ḅẹẹ, “Ị̀ nyanaḅọ, anị minji mẹ kẹ ị̀ pịrị, anị sakị jen minji ḅuu ḅarị ị̀ pọkọ tarị ḅịa, tẹ à ḅarị pịkị ḅo-ḅo mịanga minji ḍuu ḅịa.”
16Jizọsị nwẹnị ḍuko á pịrị, “Mu í di sịn tẹ pịkịma-ḅoo.”
17Árị nwẹnị pakịrị, “À diḅọ nyana-a.”
Jizọsị nwẹnị pakịrị, “Í ḍuko ḅara ọkọọ, mịnẹ í diḅọ nyana-a. 18Ị́ sọnọ owiapụ sime tẹ so tẹẹ, mịọkụ ị́ na angarị ḅọ ḅe sọ ị́ di-a; ị́ karakaraye ḍuko ị̀ pịrị tẹ.”
19Ẹrẹḅọ ma nwẹnị ḅẹẹ, “Ị̀ Nyanaḅọ, àrị ẹrịarị ḅara ịkịankoroḅọ. 20Mị tụndụ mẹ ọgọnọ mie ị̀ ama ḅẹ Sameriya ḅe atẹngịapụ Tamụnọ tẹkẹ-tẹkẹ ye, kụma ọmịnị Juu-ḅẹ-apụ mẹẹ Jeruselemu ḅụ anie kịnị Tamụnọ tẹkẹ ḅẹ anga.”
21Jizọsị nwẹnị á ḅẹẹ, “Ẹrẹḅọ, ì mininii, sakị ḅo ḅa, tẹ tomi anị ḅọrọ mị tụndụ mẹ ọgọnọ-o, Jeruselemu ḅụ sọ, ḅarị Ḍaḅọ ḅe tẹkẹ ḅịa. 22Ọmịnị Sameriya ḅẹ apụ ma ọ́ tẹkẹarị ḅọ tụḅọ-o, tụḅọ-o ó nimi-a, kụma wamịnị Juu-ḅẹ-apụ ma wa tẹkẹarị ḅọ wa nimi wararị, ḅọrọma Juu-ḅẹ-apụ ḅụ ḅọrọ tẹ ḅoarị ẹrẹsị. 23Kụma sakị mẹ ḅoarị, anị ḅo la sọ la tẹ, anie tomi Tamụnọ Tẹmẹ ḅe kụrọ ḅụ Ḍaḅọ ḅe tẹkẹ ḅẹ sakị mẹ, tẹ karakara kẹ, ò ḅiiarị ḅara ḅụ sunsin ọ̀ pịrị ḅa. 24Tamụnọ anie Tẹmẹẹ, ọ̀ Tẹmẹ ḅe kụrọ ḅụ ngẹrị mie tomi inetẹ karakara ḅara kẹ ò sime-ḅara ḍiki tẹ sunsin ọ̀ pịrị ḅarịye.”
25Ẹrẹḅọ ma nwẹnị ọ̀ ḅẹẹ, “À nimim Mẹsaya ḅe ḅo ḅa. Ò ḅo sakị ò ye goyegoye ḍuko wa pịrị ḅa.”
26Jizọsị nwẹnị pakịrị, “Yẹrị ị́ na ẹkwẹn-arị ḅọ ḅe anie orii.”
27Ẹkwẹn mẹ mu ọkọ la gbọrụ sakị Jizọsị ḍukamẹnjịapụ ma sọ pịkịma ḅo tẹ. Ori ẹrẹḅọ ma na ẹkwẹn-arị ye mẹ nwẹnị kpọma ịna ḅụụ-buama lama, kụma ịna ḅụ gbọrụḅọ-sọ á ḅẹẹ-a, “Í tiye ḅiiarị?” anịanịa ò gbela, “Í tiegotẹ árị na ẹkwẹn-arị?”
28Anịtẹso ẹrẹḅọ ma nwẹnị á minji jongo mẹ koroma tẹ sọ-mu ḍuko ama ḅẹ apụ ma pịrị, 29“Ọ́ paa ḅo à paka kụra-ḅio à mịẹtẹ ye goyegoye ḍuko ị̀ pịrị ḅọ ḍikii. Ori ḅọrọ Mẹsaya ḅe ḅoto.” 30Mie ḅụ ịn nwẹnị ama mẹ ḅio paka Jizọsị dama-mu.
31Anie mịẹarị sakị ò ḍukamẹnjịapụ ma ọ̀ tẹkẹarị, “Ye-tolumaḅọ, paa ye ọkị fị!” 32Kụma ọ̀ nwẹnị pakịrị, “À fị ḅẹ fịye emi, tẹ ọ́ gbala-gbala anị gboloma ye nimi-a.” 33Mie ḅụ ò ḍukamẹnjịapụ ma nwẹnị saakị jụmọ-jụmọ gbela, “Kịnị inetẹ fịye ọkị-ḅo ọ̀ pịrị fị ḅẹ?”
34Jizọsị nwẹnị ịn ḅẹẹ, “Ì fịye anie ị̀ kẹ fịrịma ḅọ ḅe ḅii ye mịẹ, tẹ ọ̀ kẹ ị̀ pịrịm à kọrị ḅẹ kọrịnama mẹ kọrị fama. 35Ọ́ gbọrụ ẹkwẹn kọn kọnm, ‘Ini akalụ kọnm ḍiḅi-aị soku sakị la ḅa.’ Kụma à ḍuko ọ́ pịrịarị, ọ́ paa tọrụ saakị ḍụọ ma ḍikii, ọmịnị ẹrị ḅa ḍiḅi aị ma mịọkụ kpọọ fama tẹ soku apụ koruarị! 36Sokuarị ḅọ ḅe gbẹẹ-ye ọkịarị, tẹ ò soku aị ma kobiri sime gbamaso ḍumo wẹrịmarị, mie ḅụ ḍiḅiḅọ na soku-ḅọ na ḅioḅẹlẹ gboloma ḅa. 37Mị ẹkwẹn mẹ karakara ẹkwẹn, ‘Ḍiḅi ḅọ kịrịm, soku ḅọ kịrịm.’ 38Àrị ọ́ fịrịmarị ó mu soku nwẹn ḅẹẹ ḍụọ mẹ ọmịnị ḍiḅi-a; jen-apụ kọrịnama ḅụ paka-ḅo ye mie ọmịnị fịarị ye.”
39Anị ama sime Sameriya ḅẹ tọnwa-apụ gotẹ Jizọsị minini ye ẹrẹḅọ ma ḍuko ịn pịrịm mịnẹ, “Ori à mịẹtẹ ye goyegoye ḍuko ị̀ pịrịm.” 40Mie ḅụ Sameriya ḅẹ apụ ma ḅo Jizọsị la sakị, ini ọ̀ tẹkẹm mịnẹ ọ̀ paa ini na kẹlẹ simee, tẹ ọ̀ nwẹnị anịjụ maa aḍin sime.
41Tọnwa jen-apụ ḅarana ori oku mẹ naa tẹ ò mininim, 42tẹ ịn nwẹnị ẹrẹḅọ ma ḅẹẹ, “Wa í ḍuko wa pịrị ye gotẹ minini-a, kụma wamịnị sọ wamịna ḅeri kẹ naa tẹ pịkị nimi tẹ mịnẹ tomi-juḅẹye ori anie tomikiri mẹ ḅẹ Ḅọrọmaḅọ ḅee.”
Jizọsị Gbọrụ Fịrịmẹnjị-Opuḅọ Tụḅọ Gwọm
43Jizọsị anịanga maa aḍin sime tẹso, ọ̀ nwẹnị ḅọrọ so Galili mu. 44#Mat 13.57; Mak 6.4; Luk 4.24Ori ḅioju sọ ḅẹẹ tẹ, “Ịkịankoroḅọ amịna ama ḅụ kụn nyana-a.” 45#Jọn 2.23Ò mu Galili la sakị, tomi ma iḅi ḅara kẹ ọ̀ daa-ọkịm, ini ḅẹ apụ Jeruselemu ḅụ Saḅaḅọrọ-Alalị mẹ mu tẹ ọ̀ mịẹ ye goyegoye ẹrịm ẹrẹsị.
46 #
Jọn 2.1-11
Anịtẹso Jizọsị nwẹnị sin Galili ḅẹ Kena mu, anie ò minji kẹ iru mịẹ ama mẹ. Anịanga sime Ḅẹrẹtọn gbọrụ opu fịrịmẹnjịḅọ tụḅọ Kepanọmụ ḅụ sime tẹ obim. 47Tẹ tomḅọ ḅe naam mịnẹ Jizọsị Judiya ḅụ so ḅo Galili la tẹ ḅẹ sakị ori ọ̀ dama-mu tẹ ọ̀ ḅẹẹm mịnẹ ọ̀ Kepanọmụ mu tẹ ọ̀ tụḅọ obi tẹ fịị, fịị ḅara simearị ḅọ ḅe gwọọ. 48Jizọsị nwẹnị ọ̀ ḅẹẹ, “Ọmịnị ḅụụ-bua ma aị na ḅụụ-gbiripuma aị na ẹrị-a ogbo minini minini-a apụ.”
49Fịrịmẹnjị-opuḅọ ḅe nwẹnị pakịrị, “Ị̀ Nyanaḅọ, ị̀ na ḅoo, ị̀ tụḅọ ḅe amụ fịị-a sakị.”
50Jizọsị nwẹnị ọ̀ ḅẹẹ, “Muu, ị́ tụḅọ ḅe ò ḍumo ḅa.”
Tomḅọ ḅe nwẹnị Jizọsị kọn ẹkwẹn mẹ minini, tẹ pịkịma-so. 51Ọ̀ warị muarị ogbo ori afịrịmẹnjịapụ ḅo etela ori na bịama tẹ ọ̀ ḅẹẹm, “Ị́ tụḅọ ḅe ọ̀ ḅarị fịị ḅịa.”
52Ọ̀ nwẹnị ọ̀ tụḅọ ḅe ḅụụ saakị kụrọma sakị kẹ in gbela, tẹ ini mẹẹ, “Ḅịẹịn eneḅaka gbọrụ so ḅiri ḅụ mie akọm mẹ ọ̀ ḅụụ kan so ye.” 53Anịtẹso ḍaḅọ ḅe nwẹnị kẹ ḅiokoroma mịnẹ anị gbọrụ sakị mẹ ḅụ mie Jizọsị ọ̀ ḅẹẹ ye, “Ị́ tụḅọ ḅe ọ̀ ḅarị fịị ḅịa.” Mie ḅụ ori na ọ̀ warị ḅẹ apụ na nwẹnị Jizọsị minini apụ sọ.
54Mie maaịn karama ḅụụ-buamaye tẹ Jizọsị mịẹ ye ó Judiya ḅụ sime tẹ so mu Galili la tẹso.
S'ha seleccionat:
Jọnị 4: KBTP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
(C) The Bible Society of Nigeria