GÉNESIS 4
4
Cainampi, Abelampi
1Ukatsti chachax Eva warmipampiw mayachasxäna. Warmisti usur jaqiptxänwa, ukat Caín sat wawap wawachasxäna, ukatsti sarakïnwa: “Jichhax mä yuqall wawanïxtwa. Tatituw churitu” sasa. 2Ukxarusti Evax Abel sat wawaparuw wawachasïna, jupasti Cainan jilapänwa. Abelax ovejanak uywirïnwa, Cainasti yapu yapuchiriraki.
3Mä qawqha pachatsti, mä urux Caín chachax Tatitur waxt'a chuririw yapupat achunak apäna. 4Abelasti ovejanakapat suma lik'ïkis uk aparakïna, ukatsti Tatituruw luqtäna. Diosasti Abelan waxt'aparux sum katuqäna; 5ukampis Tatitux janiw Caín chachan waxt'aparux sum uñtankataynati, ukat Cainax wal phiñasïna, uñnaqapas mayjt'awayarakïnwa. 6Ukatsti Tatitux sänwa: “¿Kunatarak phiñastasti, uñnaqamas mayjt'awayarakisti? 7Jumatix askïki uk lurasmaxa, jach'ar aptatäsmawa; ukampisa juman jan aski luratamatxa, juchax jumar apnaqañatakix jak'amankaskiwa, ukampis jumax atipjañamawa” sasa.
8Mä urusti, Cainax Abel jilaparuw säna: “Pampar saraskañäni” sasa. Kunapachatix panpachani pampankasipkän ukkhaxa, Cainax Abel jilaparuw jiwayañkam nuwjäna.#4.8 Sab 10.3; Mt 23.35; Lc 11.51; 1 Jn 3.12. 9Ukat Tatitux Caín chacharux jiskt'äna:
—¿Kawkinkis Abel jilamaxa? —sasa.
Cainasti sarakïnwa:
—Janiw yatktti. ¿Nayax jilaxan uñjiripätti? —sasa.
10Tatitusti sarakïnwa:
—¿Kunatsa jilamar jiwayta? Jilaman wilap wartkta ukax kunatix chiqapäki uk nayan uñjañaxatakiw art'asinitu.#4.10 Heb 12.24. 11Ukat jichhax jumax ñanqhachat uñjasïta, jilaman wilapax wartaski uka uraqitsa jaqunukutaw uñjasïta, jilamar jiwayatam layku. 12Wal yapuchkäta ukasa, janiw achunakax achurapkätamti. Aka uraqi muyusarakiw jan samart'añ jikxatas sarnaqäta.
13Ukatsti Caín chachax Tatiturux sarakïnwa:
—Janiw nayax uka jach'a mutuyäwi t'aqhiskiristti. 14Jichhax aka uraqit jaqunukxistawa, ukatsti aka uraqinxay jumat jayarst'at muychï, janiraki nayatakix samarañas utjkchiniti. Ukhamarak khititix jikxatkitani ukax jiwayakchitaniya —sasa.
15Ukampis Tatitux jupar sarakïnwa:
—Khititix jumar jiwaykätam ukax paqallqu kuti mutuyatäniwa —sasa.
Ukatsti Tatitux mä chimpu Caín chacharux uchäna, ukhamat khitis jupar jikxatasin jan jiwayañapataki. 16Ukatsti kawkhantix Caín chachax Tatitumpi parlaskäna uka chiqat mistuwayxänwa, ukat Nod sata chiqar jakiriw sarxäna, ukasti Edén chiqat inti jalsu tuqinkiwa.
Cainan wawanakapa
17Ukatsti Cainax warmipampiw mayachasxäna, warmisti usur jaqiptasax Henoc sat wawaparuw wawachasïna. Ukatsti Caín chachax mä marka sayt'ayäna, uka markarusti Henoc wawapan sutipampiw suticharakïna. 18Caín chachat saraqirinakax akïrinakawa: Henoc, Irad, Mehujael, Metusael, Lámec, ukanaka. 19Lámec chachasti pä warminïnwa. Maynïrix Adá sata, maynïristi Sila sataraki. 20Adá warmin wawapasti Jabal satänwa, jupasti chhujllanakan jakapki, uywanak uywapki ukanakan awkipawa. 21Jabal sat jaqisti mä jilanirakïnwa Jubal sutini, jupasti arpanaka, qinanaka toct'asirinakan awkiparakïnwa. 22Sila warmisti, Tubal-caín sat wawaruw wawachasïna, jupasti bronceta, hierrota yänak lurir jaqïnwa. Jupax Naamá sata mä kullakanïnwa.
23Mä urusti, Lámec chachax warminakaparux akham sänwa:
“Adá, Sila nayan warminakaxa,
kuntix sapkäma uk sum ist'apxam:
Nayax mä jaqiruw jiwayta,
nayar chhuxrinchatapata,
mä waynaruw jiwayta,
nayar nuwatapata.
24Caín chachar chhuxrinchiritix
paqallqu kuti mutuyatächinixa,
nayar chhuxrinchjirix
paqallq tunka paqallquni kutiw mutuyatäni” sasa.
Adanampina, Evampin kimsïr wawapa
25Adanampi Evampisti wasitat wawanïxapxäna, uka wawasti Set sutinïnwa, ukat Adanax sarakïna: “Tatitux yaqha wawa churxitu, Cainax jiwaykäna uka Abel lanti” sasa.
26Set chachasti mä wawanirakïnwa, jupasti Enós satänwa. Uka urunakatpach jaqinakax Tatitun sutip art'asis yupaychañ qalltapxäna.
S'ha seleccionat:
GÉNESIS 4: AYOPD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996