Matthew 9
9
Jesus kaa ishi wiishumaat niishushaap uchischinuhamuwaakanh
Mark 2.1-12; Luke 5.17-26
1Ekw Jesus kaa puusit chiimaaniyuu kaa aashuuhahkwaau aniyuu saakahiikaniyuu, kaa isichimetwaau anite aniyuu ihtaawiniyuu kaa uhchiit. 2Chii peshuweuch maak awenichii naapeuh nipewinihch e pimishiniyich ekaa uhchi nisitusiyich. Iskutak Jesus kaa waapahtamuwaat aniyuu aweyuuh utaapwehtamuwiniyuu chii iteu aniyuu naapeu, “Muuchicheyihtah niwiichewaakan, chiwepeyihtamaakuun chimachihtwaawinh.”
3Ekw anichii wiishuwewiniyuu kaa chiskutamaachetwaau anit kaa ihtaatwaau chii iteuch e ayimihiitutwaau, “Paastaameu Chishemanituu uu naapeu.”
4Jesus maak chii chischeyimeu taan e ishi ayimihiituyich ekw kaa itaat, “Taapwe nitamukw kaa ishi maamituneyihtamekw. 5Taan uste wiyehtihch chechii iinaanuuhch, ‘Chimachihtwaawin chiwepeyihtamaakuun,’ maak chechii iinaanuuhch, ‘Pisikuuh, ekw maak pimuhteh.’ 6Chika waapahtiitinaawaau Iinuu Ukusisa taapwe wiya e ayaat tipeyihchichewiniyuu utah aschiihch chechii wepeyihtamaachet machitwaawinh.” Ekw kaa itaat aniyuu naapeu ekaa uhchi nisitusiyich, “Pisikuuh, utinh chitashpishimun, che chiiweyin.”
7Chii pisikuu maak an naapeu, kaa chiiwet. 8Iskutak maak anichii awenich anit kaa ihtaatwaau wiyaapahtahkwaau taan kaa ispayiyich chii sechisuuch ekw kaa maamihchimaatwaau Chishemanituu e miyaayich aweyuuh suuhkaatisiiwiniyuu.
Jesus kaa wiishaamaat Matthew chechii nuushuushkaakut
Mark 2.13-17; Luke 5.27-32
9Ekw Jesus kaa chistuhtet anit uhchi, mekwaach maak e ati pimuhtet, chii waapameu naapeu e apiyich masinahiicheukamikuhch Matthew e ishinihkaasuyich, Chisheuchimaau shuuliyaayuu kaa maamuushtinamiyich e chii itaapatisiyich. Ekw Jesus kaa itaat, “Pechi papaawiicheu.” Ekw Matthew kaa pisikuut, kaa ati wiichewaat Jesus.
10Mekwaach maak Jesus e miichisut anite Matthew wiichiihch mihchetu kutakach Chisheuchimaau shuuliyaamiyuu kaa maamuushtinahkwaau kaa itaapatisitwaau chii ihtaauch anit kaye kutakach awenichii kaa machaatisiitwaau chii wiichimiichisuumeuch Jesus ekw maak aniyuu uchischinuhamuwaakaniyuuh. 11Pasch maak Phariseech chii waapameuch uyuuh ekw kaa itaatwaau aniyuu chischinuhamuwaakanh, “Chekwaan wehchi wiichimiichisuumaat chichiskutamaachesiimuwaau aniyuuh Chisheuchimaau shuuliyaayuu kaa maamuushtinamiyich kaye aniyuuh kutak kaa machaatisiyich.”
12Jesus maak chii pehtaweu ekw kaa itaat, “Namui nituweyimeuch nituhkuiin anichii awenichii ekaa kaa aahkusitwaau, mikw anichii kaa aahkusitwaau eukunich netuweyimaatwaau nituhkuiin. 13Wii nisituhtamukw maa anite chihchi masinahiikanihch kaa itashtech, ‘Chishewaatisiiwin eukw netuweyihtamaan, namui wii e machishtawehamaanuuhch chekwaan.’ Namui anichii kaa kuiskutaatisiitwaau wehchi takushiniyaan. Nichii takushin chechii nituumakwaau umachihtwaauch chechii kweskaatisiitwaau.”
Ekaa e utinahk awen miichimiyuu mikw chechii ayimihaat
Mark 2.18-22; Luke 5.33-39
14Ekw John siikahaahtaacheu uchischinuhamuwaakanh kaa pechi nituwaapamaatwaau aniyuu Jesus ekw kaa itaatwaau, “Meshikum ekun e ihtiyaahch niyaan ekw maak anichii Phariseech ekaa miichisuyaahch. Chekwaayuu maak wehchi ekaa ihtitwaau wiyawaau chichischinuhamuwaakanich ekaa miichisutwaau.”
15Jesus maak chii iteu, “Muyaam e niipuunaanuuhch, namui macheyihtamuch anichii kaa wiishaamaakanuutwaau mekwaach anit e ihtaayich aniyuu uschinaapewaan. Ekun maak e ishinaakuhch utah mekwaach e ihtaayaan anichii chischinuhamuwaakanich e ihtaatwaau mikw maak iskutak utihchipayihche che pechi utinikuyaan anit e ihtaatwaau uhchi ekw maak yaakw che ihtitwaau meshikum ekaa miichisutwaau anichii chischinuhamuwaakanich.”
16“Muyaam awen e wii miishahahk weskach akuhpiyuu e uskaayich machunishiyuu aapachihtaate, aniyuu e uskaayich machunishiyuu aapachihtaate kata utaapaaweyuu ekw maak etituu che piikupayihch an akuhp. 17Kaye namui awen piihtaapuutaau e ushkaakamiyich shuuminaapuuyuu anite ishi e weskachuuniyich ushakai puutaahch. Wesh anite ishi piihtaapuutaate aniyuu kaa ushkaakamiyich shuuminaapuuyuu iskutak maak ushihuumakaniyiche mitun chika taatupayiniyuu aniyuu ushakai puutaayuu. Ekw maak namui kata uhchi ayaau shuuminaapuuyuu kaye maak aniyuu ushakai puutaayuu namui kata uhchi ishinaakuniyuu miin chechii aapachihtaat. E ushkaakamihch shuuminaapuuh anite ishi piihtaapuutaakanuu e ushkaakwaauh ushakai puutaih ekw maak chechii kanuweyihtaakanuuhch.”
Ishkwesh kaa wanishkaanaakanuut nipuwinihch uhchi ekw maak iskweu Jesus utakuhpiyuu kaa taahtinamuwaat
Mark 5.21-43; Luke 8.40-56
18Mekwaach maak Jesus e itwet aniyuu, peyakw naapeu e uchimaaut chii pechi uchihchiihkunipayihuu anit Jesus e ihtaayich e itaat, “Chii puunipimaatisiyuu nitaanis anuhchiish, pechi saamin ekw maak miin che pimaatisiit.”
19Ekw Jesus kaa pisikuut, kaa wiichewaat aniyuu naapeu, kaye uchischinuhamuwaakanh chii wiicheukuu.
20Chii ihtaau maak anit iskweu niishushaap pipun e chii wanihtaat umihkw, eukw an uspiskuniihch kaa uhchi pechi naataat Jesus kaa taahtinamuwaat anite e waniskwekaniyich aniyuu utakuhpiyuu. 21E chii taapwehtahk kiipaa che miinuwaatisiit aat mikw taahtinamuwaate e waniskwekaniyich Jesus utakuhpiyuu.
22Ekw Jesus kaa kweschikaapuut, kaa waapamaat aniyuu iskweu ekw kaa itaat, “Miyeyihtah nitaanis, chitaapwehtamuwin chimiinuwaachihiikuun.” Tiiwehch maak chii miinuwaatisiyuu an iskweu aniyuu kaa itaaspinet.
23Iskutak Jesus kaa piihchewaat aniyuu naapeu kaa uchimaawiyich wiichiyuu, chii waapameu aniyuu kaa chii puutaacheyitwaauh e chiskahaakanuyich aweyuu e chii puunipimaatisiyich kaye aniyuuh aweyuu kaa nanehkaatweutamiyich. 24Chii iteu, “Namui chinituweyihtaakusinaawaau utah, wiiwiikw nete, taapaa nipuu an ishkwesh mikw wesin nipaau.” Ekw kaa ushinuwaatwaau aniyuu e itweyich e maayeyimaatwaau. 25Iskutak maak misiwe aniyuu iinuu kaa wiiwiitishihwaakanuyich, ekw Jesus kaa piihchewaat aniyuu ishkwesha unipeukamikuyuu, kaa utinamuwaat utihchiyuu ekw kaa wanishkaat an ishkwesh. 26An maak kaa ispayiyich chii mishihtepayuu e tipaatutaakanuuhch.
Jesus kaa miinuwaachihaat niishu naapeu ekaa kaa waapahtamiyich
27Iskutak maak Jesus chestuhtet anit uhchi aniyuu naapeu wiichiihch niishu naapeu ekaa waapahtamiyich chii nuushuushkaakuu e aashihkweyich e ishi tepwaatikut, “Chiya aniyaa Chisheuchimaau David e ihtaat kaa uhchiyin, pechi chistimaacheyiminaan maa.”
28Jesus maak chii piihcheu waaskaahiikanihch ekw anichii naapeuch ekaa kaa waapahtahkwaau kaa nituwaapamaatwaau ekw Jesus kaa itaat, “Chitaapwehtenaawaau aa chechii miinuwaachihiitakuch.” Ekw kaa itikut, “Ehe, Utipeyihchikeu.”
29Ekw Jesus kaa taahtinamuwaat aniyuu uschiishikuyuu, kaa itaat, “Nihaau taan e ishi taapwehtamekw ekun che ishi ihtuutamaakuyekw.” 30Chii miinuwaachihaakanuuch maak ekw kaa waapahtahkwaau. Ekw Jesus kaa itashumaat ekaa chechii wiihtamuwaayich aweyuu.
31Namui maak uhchi pishichiheuch, yaapach chii katipaachimeuch Jesus misiwe anite e ati ituhtetwaau.
Jesus kaa miinuwaachihaat naapeu ekaa uhchii ayimiyich
32Iskutak maak e ati chistuhtetwaau anichii naapeuch, pasch awenich chii peshuweuch naapeuh anit Jesus e ihtaayich ekaa nihtaaweyich e piihchishkaakuyich machiahchaahkwa. 33Iskutak maak Jesus kaa wiiwiitishihwaat aniyuuh machiahchaahkwa, ekw kaa kaschihut an naapeu e ayimit. Misiwe maak awenichii chii miskaateyihtamuch uyuu kaa ispayich. Chii iteuch maak, “Namui wiiskaat nuuhchi waapahtenaan maamishkaach chekwaan e ispayihch utah Israelihch.”
34Mikw maak anichii Phariseech chii iteuch, “Aniyuu wesin kaa niikaanishkuwaayich machiahchaahkwa eukw aniyuu kaa miikut suuhkaatisiiwiniyuu chechii wiiwiitishihwaat machiahchaahkwa.”
Jesus kaa chistimaasinuwaat iinuuh
35Jesus maak misiwe chii ituhteu anite nanaahkuu e utenaauniyich kaye anite nanaahkuu ihtaawinishihch, e chiskutamaachet Jewa ayimiheukamikuhch, kaye e kacheskwet e waawiihtahk miywaachimuwiniyuu e aayimuutahk Chishemanituu uchisheuchimaawiniyuu, kaye e miinuwaachihaat aweyuuh nanaahkuu itaaspinewiniyuu e ayaayich. 36Iskutak maak wiyaapamaat aniyuu mihchetu aweyuuh, naashch chii chistimaacheyimeu kiipaa naashch e mukushkaateyihtamihaakanuyich kaye ekaa ayaayich aspeyimuwiniyuu, mwehch maanishchaanishach e ishinaakusitwaau ekaa ayaawaatwaau maanishchaanishuiinuuh che naanaakachihiikutwaau. 37Ekw kaa itaat aniyuu uchischinuhamuwaakanh, “Weyuutanh e chiishi nihtaauchihkwaau nihtaauchihtaakan mikw maak namui mihchetuuch anichii che maamuushtinahkwaau. 38Ayimihaakw, nitutamuwaahkw an tepiyeusiit uyuuh kaa chiishi nihtaauchiniyikwaauh nihtaauchihtaakanh chechii itishahwaat mihchetu aweyuu anite e maauchihchikaanuyich.”
S'ha seleccionat:
Matthew 9: crjrNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.