LUK 24
24
Hangneng-keshagha
(Mat 28.1-10; Mrk 16.1-8; Jhn 20.1-10)
1Apvüwa tsathang wi ghanen mitu nzathu na mathu kiden ketheng hankedemvu tsü khuya nu ashüjjen wi wha. 2Mathu na ashüjjen jenka wi alon tsü khupheghe kethengla muya, 3tsalina mathu ciwi du, isala Apvüwa Jisu kamangwa tsü nmu. 4Mathu na ciwi ngan nu tsü jjügi meshen pi amansa keben wi meshu keni athsümeni cwencwe kesa mphi nu wan gho mathu kete wi nganya. 5Nzathu na messi ntsa nu ayyi wi nkhwendu, tsü keni na mathu wi khi, “Nthu mangkesa na keshü jawi hang kebenwa tsü bhaten nu? 6#Mat 16.21; 17.22-23; 20.18-19; Mrk 8.31; 9.31; 10.33-34; Luk 9.22; 18.31-33 Ma he wi nmi, ma hangneng-shaghadha. Ma Galilee wi keben mangwa le nthu kiza khe tsü meshenyalo. 7‘Anyi Tsawa tsü ghan pi kesami nyithu kwen wi chi nsathu yishü, ma pi kross miwi jenben, nu ma ghanan kecheng seng wi hangneng-shaghaben.’ ” 8Tsaseng wi nzathu na ma jüh tsü meshenya, 9nu ashüjjen wina kheneng gho hathu tsüdi khi pi sansikeyathu taghakhen nu kepathu tsüdi kiza. 10Nzathu tsüna Magdalen Maria, Joanna, James jja Maria; mathu nu nza kepa wi mathu gweghe ketenthu na hathu ha khi pi apostelthu kiza. 11Isala apostelthu na nzathu kekhi jüh tsüna nyu jühjjüwa le sala mathu n-nondi. 12Isala Pitor na shagha bvü sen nu ashüjjen wi wa; ma kukedula ashüjjen wi ghangchi nan athsü ketan khe mangla nmu. Isanu ma ha mangwa sadha nu sala amansa nu ajjen wi kheneng ghoa.
Emma Nyu wi waketen
(Mrk 16.12-13)
13Tsü ghanan mathu meshu keni na anyu kesü Emma wi waden, tsüna Jerusalem manyi jü kilometer taghakhen-u saben. 14Manyi ciwi pala tsüthu kekuli cüki tsüdi khi pi keccünengli waden. 15Manyi keccünengli wa keten wi Jisu na ma ketanla manyi tetsaki gho nu mathu gweghe wa. 16Manyi ma mu lela ma chüshi meya. 17Jisu na manyi wi keü, “Nshinyi na mangwa jjügi keccünengli wa ten nu?”
Manyi na ngan nu ahathanathi ghang wa. 18Manyi kesü nyan na Kleopa kesawa tsüna khineng, “Jerusalem wina kegho jawi hajü mangwa sa khe tsü cüki nkechüwa tsü no ketan man ha!”
19Ma manyi wi keü, “Mangwa cüki nu?” Manyi ma wi khineng, “Nazareth nyiwa Jisu, atusenjüh-kechü nyi kesü, Anyiza nu anyi tsüdi tuwi ma jüh nu kekuli kekhang kebenwa tsü miwi kuli kechi cüki le! 20Ithu keqhaikedi ntsathu nu kekhang kesenthu na ma pi shü thsülo kesa ghena ghan pi nyu kwen wi chia, nu ma pi kross miwi jen. 21Isala ithu na ma Israel nyi hangshaya ketenwa tsüle kesa nondi ben. Hathu hati kesa na nansü ghanan kecheng sadha. 22Ikhang jawi nzathu pahan ghena ikhang mansa; mathu na ghanen mitu ashüjjen wi wha, 23isala ma kamang tsü nmu. Mathu kheneng gho ikhang wi mathu tangnyilothu muya nu tangnyilothu na mathu wi ma hangneng-shaghadha kesa kizale khi. 24Ikhang jawi la pahan ashüjjen wi wha nu nzathu kekhi tsüti muya, isala mathu na ma nmu.”
25Tsaseng wi Jisu na manyi kiza, “Nshinyi kejüphon, nshinyi khatila atusenjüh-kechüthu na kekhithu tsü nondi dhu ben nu! 26Messiya na hathu ha wi ketizen sa nu ma nyankethang mu nkeya-u kwe?” 27Jisu na Ntsawajüh wi Mosa lesüshen na wala atusenjüh-kechüthu tsüdi wi ma cüki zhü ketheng tsü khimetha pi manyi kiza.
28Mathu na gho anyu manyi wale kebenwa tsü tetsakiya, Jisu na ma tsü miwi wa keten ghe sa; 29isala manyi ma cüten nu khi, “Ishinyi gweghe ben walo, minu wadha nu atsajang wa tendha le!” Tsalina ma mathu gweghe ben wa. 30Ma mathu gweghe dsajjüle miz wi donki, amesa khuya nu kemihhi khiechi; tsaseng wi ma tsü pakhhiya nu pi manyi cü. 31Tsaseng wi manyi nyon shachi nu manyi na ma chüya, isala ma manyi tuwi na nmu la. 32Manyi khokho wi khi, “Ma alenca wi ishinyi ccüneng nu Ntsawajüh khimetha pi ishinyi kekiza wi anni na ishinyi leben kemecang ti nsa kwe?”
33Manyi wan shagha nu Jerusalem wi wha neng, ciwi manyi na sansikeyathu taghakhen na kepathu gweghe keben muya 34nu khi, “Ntsakhiwa Apvüwa na hangneng- shaghadha! Ma Simon yala ma muya thsüdha!”
35Tsaseng wi manyi na alenca wi khati sa nu Apvüwa na amesa pakhhi kechi wi manyi khati nu ma chüya khe khimetha pi mathu kiza.
Jisu Sansikeyathu Yala Ma Mukeya thsü
(Mat 28.16-20; Mrk 16.14-18; Jhn 20.19-23; Kek 1.6-8)
36Manyi ha khitu keben wi Jisu na wan gho mathu jawi nganya nu mathu wi kiza, “Kecca ya nthu ssiben keyawa salo.” 37Mathu na qhethiketen sa nu acenpvü kesü mu bendhale meshen wa. 38Isala ma mathu wi kiza, “Mangkesa na nthu leben ketizen sa nu nthu leben wi hathu ha n-nondila benten nu? 39Ikwen nu iccüthu ghangchilo, nu ha hi le kesa chüya. Hi panan nu chüya, kepaghenanye acenpvü na asa nu agü nmi, isala nthu na mukeben ti hi tsü tsüthu benle.”
40Ma tsüti khi nu ma kwen nu ma ccüthu pi mathu ccüca. 41Mathu na khili la n-nondi, mathu na anonghe ntsa nu amansa; tsalina ma mathu wi keü, “Nthu na he wi kedsawa mangla benla nmi nu?” 42Mathu anga keshvu kesü pi ma cü, 43nu ma tsü khuya nu mathu tuwi na dsa.
44Tsaseng wi ma mathu wi khi, “Hi hathu cüki tsüdila kheni nthu gweghe keben wina khi pi nthu kizadha, Mosa Yenwa, atusenjüh-kechüthu na kezhü, nu Zakeci wi ighena zhü kethengthu tsüdila sacen shaben.”
45Tsaseng wi ma mathu leben sha pi Ntsawajüh chüshiya thsü, 46nu mathu wi khi, “Hati zhütheng, Khrista na ketizen sa ntsa saben nu ghanan kecheng seng wi keshü wina hangneng-shagha ben; 47nu ma nyan wina leben khapeghekeya nu kesami teshi kecü ketsijüh tsü pi Jerusalem wi atuwa sala mizzatenti tsüdi wi nkizathu yishü. 48Nthu na pala hathu ha ghena chüzathu. 49#Kek 1.4 Nu hi iBa na khishi ketheng tsü pi nthu miwi kesunchi cüben. Isala nthu na tang wi kekhang na nthu miwi npi kedugho chu hie nbenlathu yishü.”
Tang wi Jisu Ssikikesa
(Mrk 16.19-20; Kek 1.9-11)
50 #
Kek 1.9-11
Tsaseng wi ma anyunutiwa wina mathu ssi shhula Bethani kecu wi wa nu ciwi ma kwen zanki pi mathu miwi chi nu sawegü pi mathu cü. 51Ma sawegü pi mathu cü keben wi ma mathu teshi nu ma ssinu tang wi kia. 52Mathu ma kinyi nu mathu nonghe ntsa sala Jerusalem wi wha neng, 53nu matsü tsüdi wi mathu na Kekinyijjen wi ben nu Anyiza seng.
S'ha seleccionat:
LUK 24: RENGNBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.