LUK 21
21
Denyilewa Na Keben Khukechi
(Mrk 12.41-44)
1Jisu na ghangkevüli chi nan kebanthu na mathu keben pi Kekinyijjen keben kechipen wi cüchi keben muya, 2nu ma denyile ketha-u kesü la pisa kenmiewa keni pi cüchi keben muya. 3Ma khi, “Denyile ketha-uwa hana kepa tsüdi miwi kejiki pi chidha. 4Kepaghenanye kepathu na mathu keben kejon qei wina pi chi, isala denyile hawa tsü ma sen nu hang keten keben tsüdi pi chidha.”
Jisu na Kekinyijjen Keyasa Cüki Kekhi
(Mat 24.1-2; Mrk 13.1-2)
5Sansikeyathu pahan na keben pi Anyiza kecü nu alon kemehai pi Kekinyijjen tsikemehai sa ketheng cüki keccünengli ben. Jisu na khi, 6“Nthu na mu keben ha tsüdi matsü na gho lethu, alon kesütanla ma pen wi nbenla benle; tsüdila pasha ben le!”
Agükeccü nu Kemeten-kemesha
(Mat 24.3-14; Mrk 13.3-13)
7Mathu na keü, “Kesansiwa, hathu ha kusi saben nu? Nu hathu ha sa keten wi zensu khati saben nu?” 8Jisu khi, “Nyu nthu nmechu thsüle kesalina kiden-kesha yalo, kepaghenanye anyi kejon na inyan wina hati khi ghoben, ‘Hi Khrista le’ nu ‘Matsü na ghodha.’ Isala mathu nie nwala. 9Nthu na aghikesa nu kekivvü jüh zakeya wi lela nmessila. Kepaghenanye hathu ha atuwa nsathu yishü, isala asakhenwa tsüna npi tetsaki le!” 10Ma mathu wi khi, “Diyyi kesü na diyyi kepawa ssinu aghisa ben, nu kadiyyi kesü na kesü ssi kesali ben. 11Ciwi ameghükuju ntsa saben; apen tsüdi wi azeng nu adhagha saben; nu tang wi qhethiketen nu amankesa saben. 12Isala hathu tsüdi npi kesa tuwi nyu nthu ghan pi metenmesha; nthu ssi wa Sinagogthu wi ajühkaghaten nu nthu pi atssüzüjjen wi chiaben; inyan ghena nyu nthu ssinu kadimithu nu kekhang kesenthu tuwi waben. 13Hana nthu ghena Ajühkemehaiwa pi kekhi tsü kemehai kesü saben. 14#Luk 12.11-12 Matsü npi wina khatile khi pi nthu ketanla nthu sheikhiya nu kesa lebengüccü nben lalo, 15kepaghenanye hi nthu ghinyithu thola nthu matang nu shunya nkesa ajühthu nu kemetsa pi nthu cüben. 16Nthu bajjathu, nthu cünyuthu, nthu shilithu, nu nthu pvüshangthu na nthu ghan pi nyu kwen wi chi nu mathu na nthu pahan pathiaben. 17Anyi tsüdila inyan ghena nthu nanmeghü ben. 18Isala nthu li wi assen kesütanla bhataghaya nben. 19Zükeqhe nganyalo, nu nthu ketanla nthu hangsha yaben na.
Jisu na Jerusalem Keyasa Kekhi
(Mat 24.15-21; Mrk 13.14-19)
20“Nthu na khathansha wi süpahizithu na Jerusalem vüsen keben muya khe tsüna wan yasa tendhale kesa chüyaben. 21Tsaseng wi Judea wi kebenthu na ayikhathu wi bvü wa nsathu yishü; anyunutiwa non wi kebenthu na bvüshu; nu ayela wi ketenthu na anyunutiwa wi ndu lalo. 22#Hos 9.7 Kepaghenanye hathu ha tsüdi Ntsawajüh na kekhi tsü sacenya thsüle kesalina ‘Kemeten-kemesha tsathang’ saben. 23Tsü tsathang wi nza atsa-npvü ketenthu nu kinyibvü atsa ssi ketenthu ghena khatila qhethiketen saten nu! Ayyi ha miwi qhethiketen hathakina na ghoben, nu Anyiza wi kemeten na anyithu miwi ghoben. 24Njünnu pi pahan süthi nu kepathu ssinu diyyi tsüdi wi atssüzü sa waben; nu Judah nyi nkenyethu na mathu tsü npi kecu chu Jerusalem cüten ben.
Anyi Tsawa na Ghoketen
(Mat 24.29-31; Mrk 13.24-27)
25 #
Isa 13.10; Ezk 32.7; Jol 2.31; Ccü 6.12-13 “Aghani, asha, nu ghotsithu wi amankesa saben. Ayyi miwi diyyi tsüdila ketizen sa nu atssükedone kaghamo ghena messi ben. 26Anyithu na ayyi ha wi gho ketenwa ghena messi pi shüca waben, kepaghenanye tang wi kekhangthu tsüdi pakuliaben. 27#Dan 7.13; Ccü 1.7 Anyi Tsawa na kekhang sen nu anyankethang sala akulukeshü miwi ghoden. 28Khathansha wi hathu sa shagha khe nthu na shagha yaki ghangchilo, kepaghenanye nthu hangshakeya na tetsakidha.
Khhaghabvüton wina Chükeya
(Mat 24.32-35; Mrk 13.28-31)
29Tsaseng wi Jisu na ajühkaghape ha pi mathu kiza: “Khhaghabvüton nu achanton kepathu tsüdi meshenchilo. 30Khathansha wi tsüthu wa kaghani shigü shagha keten muya khe mazu wa tendha kesa nthu na chüyaden. 31Tsü makesü, nthu na hathu ha sa keben kemu wi Anyiza Kadiyyi na gho tendha kesa nthu na chüyaben.
32“Anyi khili hang kebenthu tsüdi npi keshü tuwi hathu ha tsüdila sacen ben kesa meshenyalo. 33Atssan nu ayyi na nmilaben, isala ijüh tsü khiela nmila sa nben.
Hie Nbenthu Keyishü
34“Nthu na dsajjü deja nu nansü kahang ha ghena meshen pi leben-güccü nu atsathang tsüwa yala wan ghola aca ti nthu yaya thsü nsale kesalina meghe-metsashhu benlo. 35Kepaghenanye tsüwa tsüna ayyi wi anyi tsüdi miwi ghoden.
36Nthu na sa ketenthu ha tsüdi wi la mehaitsü benya kemehai kezü muya nu Anyi Tsawa tuwi nganyale kesalina keshüthangla hie nu kekhie sa benlo.” 37#Luk 19.47 Jisu na atsathangla aghanan lethu Kekinyijjen wi nyu sansi nu minu lethu ma wa aghaja Oliv Yikha wi ben wa isa. 38Ghanen kaghapenla anyithu na mitu na wa Kekinyijjen wi ma jühkina den.
S'ha seleccionat:
LUK 21: RENGNBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.