ADECHHÜ 6
6
Anyi Kahang Nkemehai
1 #
Job 1.6; 2.1. Anyi na ayyi tsüdi wi bvüzighe kewa wi mathu ngathu pvüghaya. 2Anyiza tsathu #6.2: Anyiza tsathu; nyelela tang nyithu na nza atsimehai ntsa kesathu kemu wi mathu kenenthu kessi pi mathu wubvü saya. 3Tsalina Apvüwa na khi, “Hi anyithu ya anuphan nhang thsüdha; mathu na shü wa keten nyi. Nansü nten na mathu amapi meza nu ngwe miwi nhang thsüdha.” 4#Scs 13.33. Tsü tsüwi nu tsü seng wi lela Anyiza tsathu nu nzathu shicübvügha anyi khüton kemehai ayyi wi ben. Mathu na wakesa tsüwi anyi kedi kekhang nu kemechan sa.
5 #
Mat 24.37; Luk 17.26; 1 Pi 3.20. Apvüwa na ayyi wi anyi tsüdila hang nmehai nu matsü tsüdi wi mathu kemeshen nmehai kesa mukeya wi, 6ma mathu sapi ayyi wi hang thsü kesa ghena ma leben güccü. Ma asengmeshen, 7nu khi, “Hi ayyi miwi anyi sahang kechithu, aghangsathu nu awathu la nmi thsü laden, kepaghenanye hi mathu sakechi ghena ileben güccüdha.” 8Isala Apvüwa na Noah nen.
Noah
9-10Hana Noah cüki. Ma atsa kecheng ben, Shem, Ham, nu Jafeth. Noah na kesazzi mangla nmi nu ma tsüwi ma ketan anyi kemehai. Ma Anyiza ssi ghanpfü nu hang, 11anyi kepa wi tsüdila Anyiza tuwi meghangmeghe nu yasayala na ayyi pong. 12Anyiza na ayyi ghang kechi wi nmehaila kesa muya, kepaghenanye anyi tsüdila meghangmeghe wa.
13Anyiza na Noah kiza, “Hi anyi tsüdi yasa piale cenyadha. Hi mathu tsüdi yasatha saden, kepaghenanye yasayala kekuli na ayyi pongdha. 14Achan kemehai pi n-ghena ahunjjen kesü cühya; ma non wi shondhi kepapa saya nu anie pi ahunjjen non nu amei wila nyen yalo. 15Ahunjjen kesie 133 meter kemeza 22 meter nu kemisi 13 meter isalo. 16Ahunjjen keshon wi 44 sentimeter na meiwa wi jjenkubhi kesü saya. Ashha kecheng sa nu ma keshon wi ajenka kesü saya. 17Hi atssüdon kesun pi ayyi miwi kahangli tsüdi meyanthi thsüaden. Ayyi miwi pala tsüdila shüaben, 18isala hi no ssinu cenkethenjüh kesü saden. No, nwubvü, ntsathu, nu mathu wubvüthu ssinu ahunjjen non wi duya. 19-20No aghangsathu nu awathu alen kepapa kesa tsüdi hang ben thsüle kesalina npvüzawa kesüsü nu nzawa kesüsü ssinu ahunjjen non wi duya. 21Nthu nu tsüthu ghena kedsakejjü kepapa kesa tsüdi sen du tsanqaiya.” 22Noah na Anyiza ma kekiza ti tsüdila saya.
S'ha seleccionat:
ADECHHÜ 6: RENGNBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.