KEKULI 4
4
Pitor Nu Johan Manyi Hoho Tuwi kewa
1Pitor nu Johan manyi na ajühkhi pi anyithu kiza keben wi Keqhaikedi ntsathu, Kekinyijjen ghikehiethu, nu Sadukithu pahan na ghoa. 2Mathu na lebenminu ntsa sa, kepaghenanye apostel keni na Jisu na keshü wi hangshagha kesa tsüti anyi la keshü wina kahang wi shaghaneng shaben le pi anyithu sansi kesa ghena. 3Tsalina mathu na manyi ghanya nu pi atssüzüjjen wi chi nu dhitsüwa cu, tsüna minu wa kesalina. 4Isala ketsijüh tsü za keyathu anyi kejon na nondiya, nu anyi hazar manga-u pi mathu wwaya.
5Dhitsüwa wi Judah nyi accülikesathu, keshenpfüthu, nu Ayenkesansithu na Jerusalem wi saghuya. 6Mathu na Keqhaikedi ntsa Anna, Kaifa, Johan, Alexander, nu kepa wi Keqhaikedi ntsa theghithu la ssinu kemetuli. 7Mathu na apostel keni pi mathu tuwi ngan thsü nu manyi wi keü, “Nshinyi na mangwa kekhang nyelela thowa nyan sen nu hati ha saya nu?”
8Pitor na Kemetha Ghamu pi ma pong pvünu mathu luneng, “Anyi ccülikesathu nu keshenpfüthu: 9Keujüla nansü accü nkemehaiwa ha miwi kemehai kulikechi nu khati nu ma sa pi mehaiya khe ishinyi keü lethu, 10nthu nu Israel nyi tsüdila chüyalo; anyi hawa ha Nazareth nyiwa Jisu Khrista, nthu na ma pi kross miwi jen, nu Anyiza na keshü wina ma sa pi hangneng kecüwa nyan kekhang wina ma sa pi mehaitha yadha, nu anyi ha nthu tuwi ngan ben. 11#Zak 118.22 Jisu ha Ntsawajüh na ma cüki hati khitheng:
‘Alon, nthu ajjen kesathu na meya
mvula kesawa tsüna tsüdi miwi
ma donbvü kemechanwa sa shagha dha.’
12Ma wi ketan hangshakeya muya ben, kepaghenanye ithu hangsha meyathu keyishü Anyiza na atssan kekhu wi anyan kepa wi pi anyithu ncü.”
13Mathu na Pitor nu Johan manyi na anyi jümu pala nkechü nyi lela kempvüza kesa tsü mu pi mathu mansa. Isanu mathu na manyi kheni na Jisu nie keten nyile kesa chüya. 14Isala mathu na mangla khi meyala, kepaghenanye mathu na anyi sa pi mehai keyawa tsüna Pitor nu Johan gweghe ngan keben mudha. 15Tsalina mathu na manyi ajühkekaghakhi jjen teshi nu bvülo kiza, nu mathu jawi keccünengli wa. 16Mathu khi, “Ikhang anyi ha keni pi khati sa nu? Jerusalem wi kahangthu tsüdila manyi azensuthu kulikechi chüben, nu ikhang la nyele khiya ntendha. 17Isala ajjügi ha pi anyithu jawi khi nwa thsüla le kesalina ikhang na manyi wi Jisu nyan ha khi pi anyi thola nkiza la yilo kesa kitsan ntsa sachi na.”
18Tsalina mathu na manyi ci neng chi nu manyi wi khiela Jisu nyan khi pi nyu nkizala nu nyu nsansila yilo kesa manyi khen. 19Isala Pitor nu Johan manyi na luneng, “Nthu ketanla Anyiza tuwi khawa meshon khe meshen nanlo— nthu jüh kekina-u la Anyiza jüh kekina-u khe. 20Kepaghenanye ishinyi na mangwa mu nu zaya khe tsü pi nkhila saya nben.” 21Tsalina Hoho na tsü miwi manyi kitsan neng chi nu manyi lisha chi cüa. Mathu na manyi meten-mesha cü le kesa mangla sa meyala, kepaghenanye anyi tsüdila mangwa kulichi khe tsü ghena Anyiza seng ben. 22Ma miwi azensu sa kechi anyi hana ma kahang mapi jügha miwi sadha.
Kenondithu Na Kempvüza Ghena Kekhie
23Pitor nu Johan manyi lisha chicü meyi manyi na ghola keqhaikedi ntsathu nu keshenpfüthu na manyi wi mangwa le kiza khe khi pi manyi pvüshangthu kiza. 24#Bvü 20.11; Neh 9.6; Zak 146.6 Kenondithu na tsü zakeya wi mathu tsüdila gweghe nu Anyiza wi kekhie sa: “Apvüwa, atssan, ayyi, atssükedone nu tsüthu wi kebenthu tsüdila sa kechiwa! 25#Zak 2.1-2 No Kemetha Ghamu wina nmaghawa ithu baqhai David wi kiza,
‘Mangkesa na Judah nyi nkenyethu na alebentsu;
mangkesa na anyithu na acho kaghacang
tsü kiden ben nu?
26Ayyi wi kadimithu nu kekhang kesenthu
na kemetuli,
nu Apvüwa ma Messiya tsü shun le kiden bendha.’
27 #
Luk 23.7-11; Mat 27.1-2; Mrk 15.1; Luk 23.1; Jhn 18.28-29 Kepaghenanye ntsakhiwa Herod nu Pontia Pilat manyi na anyunuti ha wi Judah nyi nkenyethu nu Israel nyithu ssinu kemetuli nu nmagha kemethawa no ma pi Messiya sa thsü kesawa Jisu tsü shun. 28Mathu kemetuli nu no kekhang nu kemeshen wina sale südhe ketheng tsü tsüdila sa. 29Apvüwa, khili mathu cho kekiden ha ghangchi nu ikhang nmaghathu yala kempvüza sa nu ketsijüh ha khi thsülo. 30Nkwen changchi nu sa pi mehai cü, nu nmagha kemethawa Jisu nyan wina azensuthu nu amankesathu saya thsülo.”
31Mathu na kekhie kesa cen seng wi mathu keben pen tsüna kuli shagha. Mathu tsüdila Kemetha Ghamu pongya nu kempvüza sala Anyiza ketsijüh tsü khi wa.
Kenondithu Na Mathu Keben Pi gishüsen
32 #
Kek 2.44-45 Kenondithu khangwa tsüna kemeshen nu aleben kesütan sa. Meshu kesütanla ma keben tsü pi ma ji le nkhi, isala mathu tsüdila ma keben tsü pi mathu gishü sen. 33Apostelthu na kekhang sen nu Apvüwa Jisu hangneng- keshagha cüki tsü khi, Anyiza na ma kemihhi meyisha pi mathu tsüdi miwi chicü. 34Akhang tsüwa wi meshu kesütanla nhhatu. Ajjen alli kebenthu na tsü pi jeü nu apisa sengho 35apostelthu kwen wi chia; nu apisa tsü pi meshu kesüsü nsenthu keyishü qei wi gishü cü. 36Tsüti Josef, Levi nyi kesü Cipra wi kepvüghawa, apostelthu na pi Barnaba (ma jjügi nyu kechü-kenongwa) le ci ketenwa la 37ma lli kesü pi jeü nu apisa sengho apostelthu kwen wi chia.
S'ha seleccionat:
KEKULI 4: RENGNBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.