KEKULI 2
2
Kemetha Ghamu Na Kegho
1 #
Lev 23.15-21; Aye 16.9-11 Pentekost tsathang cukeya wi kenondithu tsüdila ghola apen kesü wi saghu ben. 2Zuli atssan wi ameghü kekhang kesho hhai ti gho mathu keben jjen tsü pongya. 3Nu anni mili ti kesa gho gishü zighe sen nu mathu kesüsü miwi ben wa kesa mathu na muya. 4Mathu tsüdila Kemetha Ghamu pi pongya nu Aghamu kekhang pi mathu kecü ti mathu na ajüh kepathu khi shagha shan.
5Ciwi Judah nyithu nu ayyi wi diyyi tsüdi wi ketsatanthu na gho Jerusalem wi hangben. 6Mathu na ahhai ha zakeya wi anyi kejon na gho saghuya. Mathu tsüdila amansa ntsa sa, kepaghenanye mathu tsüdila kenondithu na mathu papa jüh khi keben zaya. 7Mathu amansa nu qhethiketen nu khi, “Ajühkhi kebenthu ha tsüdila Galilee nyi nye kwe? 8Isathu, khatinu mathu na ikhang jühkhi keben zaya ben nu? 9Ikhang na Parthia, Media, nu Elam wina; Mesopotamia, Judea, nu Kappadosia wina; Ponta nu Asia, 10Frugia nu Panfilia, Egipt nu Libia yyi Ciren kete wina ghoben. Ikhang pahan na Rom, 11Judah nyi nu Judah nyi nkenyethu la, Kreta nu Arabia wina ghoben; isathu, khatinu mathu na ikhang jüh wina Anyiza amankesa kekuli cüki kekhi zaya ben nu?” 12Mathu tsüdila amansa nu qhethiketen sala khokho wi keü, “Ha ma jjügi mangwa saben nu?” 13Isala anyi pahan na kenondithu nankeqhe nu khi, “Anyi hathu ha adina pvü ben le!”
Pitor Jühkekhi
14Pitor na apostelthu taghakhen gweghe ngan shagha nu ma hhai misi ntsawa nu anyitenti wi khi, “Ipvüshang Judah nyithu nu Jerusalem wi kahangthu tsüdila hi khile kebenwa ha kinachi nu hi ya ha jjügi pi nthu kiza thsülo: 15Nthu na meshen keben ti anyi hathu na adina nben; kepaghenanye khili aghanen amighe tugu ketan kihhe ben. 16Isala hawa ha atusenjüh-kechüwa Joel na khi ketheng tsü: ”
17 #
Jol 2.28-32 ‘Hi asakhen ghanan wi hati saben,
Anyiza na khiben:
Hi ighamu meyisha pi anyi tsüdi miwi chiden.
Nthu tsangathu na atusenjüh-khiben;
anyi pvünyithu na kemanthi muben,
nu anyi keqhaithu na aman chüben.
18Tsü ghanan wi hi ighamu meyisha pi
imaghathu nza npvüza cüben,
nu mathu na atusenjüh-khi ben.
19Hi atssan wi azensuthu nu ayyi miwi
amankesathu kuli chiden.
Ciwi ajjü, anni, nu annikekhu kejon saben;
20aghani na jang, nu asha na ajjü ti nmie shaben,
tsüna Apvüwa tsathang keti nu anyankethang
npi sa kegho tu wi.
21Nu Tsaseng wi thowa na Apvüwa wi
kekiqa khiechi khe hangsha yaben.’
22“Hi Israel nyithu, ijüh kinachilo! Anyiza wina kegho Nazareth nyiwa Jisu tsüna Anyiza kekhang sen nu nthu jawi amankesa nu azensuthu kekuli tsü nthu na chüben. 23#Mat 27.35; Mrk 15.24; Luk 23.33; Jhn 19.18 Anyiza na ma kenen nu kemeshen wina Jisu pi nthu kwen wi chicü, nu nthu na ma pi kesami nyithu cü nu pi kross miwi jen thsüa. 24#Mat 28.5-6; Mrk 16.6; Luk 24.5 Isala Anyiza na ma sa pi keshü wina hangneng-shagha thsüa nu keshü kekhang wi ma lisha chi cüa, kepaghenanye keshü na ma ghantenya nben. 25Kepaghenanye David na ma cüki hati khitheng:
‘Hi matsü tsüdila Apvüwa na itu wi keben mu.
Ma ikete wi keben ghena hi khiela khuli meyacha.
26Tsalina ileben cca nu ijüh la anonkeghe ketan.
Nu hi keshü nyi lela hi chüti nondiki benden,
27kepaghenanye no hi teshi pi
keshü yyi wi chia nben;
no nmagha kemethawa ya ashüjjen
wi bighe thsüa nben.
28No hi yala kahang len tsü chüya thsüdha,
nu no ikete wi keben ghena
anonkeghe pi hi pong cüdha.’
29“Icünyuthu, hi kapvüshüsha nu ithu baqhaiwa David cüki khi pi nthu kizaben. Ma shü nu nyu ma pi vhü, nu ma shüjjen na nansü lela ithu jawi ben. 30#Zak 132.11; 2 Sam 7.12-13 Ma atusenjüh-kechü nyi kesü nu Anyiza na ajüh khishi pi ma kekiza tsü ma chüben; Anyiza na David shicübvügha kesü pi David ti kadimi sa thsüden. 31David na Anyiza na sale kebenwa tsü mu, tsalina ma Khrista na hangneng-shagha keten cüki hati khi,
‘Ma teshi pi keshü yyi wi ben thsüa nben;
ma gwosajjü pi ashüjjen wi bighe thsüa nben.’
32Anyiza na Jisu ha sa pi keshü wina shagha nengya thsüa nu ikhang na ha chüzathu. 33Ma zanki pi ma Ba Anyiza kwen ajewa wi chiya, nu Abawa na ajühkhichi ketheng ti ma Kemetha Ghamu muya. Nu nthu khili mu nu za keben hana ma ju meyisha pi ithu miwi chi kecü. 34#Zak 110.1 Kepaghenanye David na ma tang wi nwa, isala ma hati khi,
‘Apvüwa na iPvüwa wi kiza:
Ikwen ajewa donki yalo,
35hi nghinyithu pi nccü kekhu wi chi
nu nccü kennipen npi kesa thsü chu.’
36“Tsalina Israel nyithu tsüdila nthu na ghan pi kross miwi jen kesawa Jisu ha Anyiza na ma sa pi Apvüwa nu Messiya sa thsüle kesa chüyalo!”
37Anyithu na ha zakeya wi leben ketizen sa nu Pitor nu apostelthu wi khi, “Acünyuthu, ikhang na khati sa nu?”
38Pitor na mathu wi kiza, “Nthu tsüdila kesami wi leben khapeghe nu Jisu Khrista nyan wina baptaiz sa meyathu yishü, isanu nthu kesami keteshi muyale kesalina; isa lethu, nthu na Anyiza juwa Kemetha Ghamu tsü muya ben. 39Kepaghenanye Anyiza jühkhukechiwa tsüna nthu, nthu tsangathu, nu kelensie wi kebenthu lela Apvüwa ithu Nyiza na ci pi ma wi chiya ketenthu tsüdi ghena.”
40Pitor na ajüh kepa wila kejon khi pi mathu kiza nu khi, “Kemeten-kemesha na ashicü nkemehai hawa miwi gho ketenwa wina nthu hangsha yalo.” 41Mathu kejonla ma jüh kekhi tsü nondiya nu baptaiz saya, nu tsü ghanan anyi hazar kecheng-u pi mathu wwaya. 42Mathu na matsü tsüdi pi apostelthu kesansijüh kina, isanu gweghe ashusala kekhie la saben wa.
Kenondithu jawi Kahang
43Apostelthu na azensuthu nu amankesathu kejon kuli kechi ghena tsüdila messi shan. 44#Kek 4.32-35 Kenondithu tsüdila gweghe ashusa nu mathu keben tsüdila saghu pi kesü sa. 45Mathu ajjen, alli nu keben tsüdila jeü sengho mathu jawi thowa na khaju nsenthu yishü ben khe pi gishü. 46Atsathangla mathu na Kekinyijjen wi kemetuli, aleben tsentsa wi anonkeghe sala mathu jjen wi gweghe dsajjü, 47mathu na Anyiza seng, nu anyi tsüdila mathu nen ntsa sa. Atsathangla Apvüwa na hangshaya kebenthu pi mathu wwayaya sa.
S'ha seleccionat:
KEKULI 2: RENGNBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.