Matiu 2
2
Bannteeb nba din nyii yendopo na labaar
1Bi din mar Yisa dosau nna ni, ki bi yir Betlehem, ki li be Judea tingbouŋ ni. Bi din marɔ Bat Herod yooe. Li yoo na ki banntesiab din nyii yendopo ki baar Jerusalem ki tan boi niib a 2“Israel teeb kpanbar saakɔɔ nba ki bi marɔ na, u be lee? Ti daan la u ŋmaabire yendopo ki baar na a ti tan jiantɔ.” 3Bat Herod nba din gbat nna maŋ, ki li biir ŋɔɔ nan Jerusalem teeb kur para ni, ki bi ji din ki fit kari. 4Ki u din yiin Yennu jiantu yudamm nan sennu wannteeb ki tan boib a “Lee ki bi sa mar Yennu Niganntɔɔ Masia na?”
5Ki bi jiinɔ a “Betlehem doo nba be Judea tingbouŋ ni na; kimaan Yennu sɔkinii na din sɔb ki yaa a Yennu yet a
6‘Fin Betlehem nba be Juda tingbouŋ ni na,
a ki tee tinbik kaa Juda yiar ni,
kimaan batsɔɔ tan sa nyi a nie,
ki ŋɔɔe tan sii yen n niib Israel teeb.’ ”
7Linba na poorpoe ki Bat Herod din yiin bannteeb maŋ woonin ni, ki tan boib ki fiitib fanu a wun bann yoo nba ki ŋmaabir na daan nyii; 8ki u din yetib, “I saa man Betlehem ki saa lon bik maŋ fanu; yoo nba ki i lau, yin jenna ki tan betin ki n mun saan ki saa jiantɔ.” 9Bat na nba din pak nna ki gbenn yoonba, ki bi nyii ki soor sɔnu; ba din saa maŋ ki bi la ŋmaabir nba daan nyii yendopo na, ki li gar bi tɔɔnn po ki saa set bik maŋ nba be ŋaak nba na ni, li sanpaapo. 10Ba la ŋmaabir maŋ na, ki bi para ni penn bonchiann. 11Ki bi kɔɔ ŋaak maŋ ni, ki la bik maŋ nan u naa Mari; ŋanne ki bi gbaan ki jiant bik maŋ, ŋaan biit bi paka ki nyinn piinii ki turɔ; piinii maŋ din tee sarima nan tulaarnyun nan tulaarsiar nna ki bi yir mir.
12Tɔn, ki Yennu din pak ki turib bi dammiit ni, a bi ji daa ŋmat Bat Herod boor ni; li paak, ki bi ji din tɔkin sanjogauŋ ki ŋmat kun bi doo ni.
Josef nba din chiar ki saan Ijipt biaŋinba na labaar
13Bannteeb na nba din kun na poorpoe ki ti Yomdaanɔ Yennu malaka din baar Josef boor u dammiit ni, ki betɔ a “Fiit ki jii sanpantik maŋ nan u naa kii tiin kii saa Ijipt tingbouŋ ni, ki saa kar leŋ nan yoo nba ki n tan sa tura mɔb biak, kimaan Bat Herod loon ki wun lon bik maŋ boore ki kpiu.”
14Ki u din fiir nyiɔk ki jii bik na nan u naa ki chiar ki saan namm Ijipt tingbouŋ ni. 15U din be leŋe nan yoo nba ki Bat Herod din tan kpo na. Linba kur din tun a lin gbeen linba ki ti Yomdaanɔ Yennu din te ki u sɔkiniisɔɔ pak li po nee a “N din nyinn n bija maŋ Ijipt tingbouŋ nie.”
Bonjabis kpinu labaar
16Herod nba din tan bann nan bannteeb maŋ kparɔe na, ki li gbatɔ bonchiann, ki u din tun lanjimanba a bin saan Betlehem nan li digbanbis ni ki saa kpi bonjabis kur; ki bi din kpi sanpantii nan binba tee bina ŋannlelee kaman nan wa daan boi bannteeb maŋ ki bann yoo nba ki ŋmaabir na daan nyii na.
17Wa kpii waas na biaŋinba na ki li din teen ki gbeen linba ki Yennu sɔkinii Jeremaya din pak na po a
18“Rama tiŋ nɔɔk nie ki bi gbia fuut,
mɔnii nan fabinii nan kpemɔnboor kir bo,
ki Rachel mɔ u waas paak,
ki bi barimɔ ki tan goo,
kimaan u waas kura kpowa.”
Ba din nyii Ijipt tingbouŋ ni ki jen biaŋinba
19Tɔn, ki Bat Herod tan kpo; ki u kuun poorpo ki ti Yomdaanɔ Yennu malaka bia din saan Josef boor u dammiit ni, Ijipt tingbouŋ ni, 20ki saa yetɔ “Fiit ki jii bik maŋ nan u naa, ki ŋmat saan Israel tingbouŋ ni, kimaan binba din lor a bin kpi bik maŋ na kpowa.” 21Ki Josef din fiir ki jii bik maŋ nan u naa ki din ŋmat ki saan Israel tingbouŋ ni.
22Wa din tan gbat a Akelaus dii naan ki kar u baa Herod naangbant paak Judea tiŋ ni na, ki jaŋmaanii soorɔ nan wun kun leŋ; ki Yennu bia din wannɔ u dammiit ni a wun ŋmat saan Galilee tingbouŋ ni. 23Ki u din saan ki saa kar doo nba ki bi yi Nasaret na ni, a lin teen gbeen maan nba ki Yennu sɔkiniinba nba din sɔb linba na a “Bi tan sii yiu Nasaret nirɔe.”
S'ha seleccionat:
Matiu 2: BIM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió