Tobit 10
10
CAB. 10
1Nish choont Tobit e ayr dy chooilley laa: as tra va laghyn y jurnah harrish, as nagh daink ad,
2Eisht dooyrt Tobit, Vel ad cumrit? ny vel Gabael marroo, as cha vel dooinney erbee dy chur da yn argid?
3Shen-y-fa v’eh feer seaghnit.
4Eisht dooyrt e ven rish, Ta my vac marroo, fakin dy vel eh fuirraght foddey; as ghow ee toshiaght dy ghobberan er-e-hon, as dooyrt ee,
5Nish cha mooar lhiam son nhee erbee, my vac, neayrys ta mee er choayll uss, soilshey my hooillyn.
6Dooyrt Tobit ree, Bee dty host, nagh cur geill, son t’eh dy sauchey.
7Agh dooyrt ish, Bee uss dty host, as nagh jean my volley; ta my vac marroo; as hi’ee magh dy chooilley laa ayns y raad er ren ad goll, as cha ren ee gee beaghey erbee ’sy laa, as cha scuirr ee dy ghobberan fud-ny-hoie son e mac Tobias, derrey va kiare-laa-yeig ny banshey harrish, va Reguel er loo dy begin da ceau ayns shen. Eisht dooyrt Tobias rish Reguel, Lhig dou goll, son cha vel m’ayr as my voir jerkal arragh dy m’akin.
8Agh dooyrt e ayr-’sy-leigh rish, Fuirree marym, as ver-ym fys gys dt’ayr, as inshee ad da kys ta reddyn goll-er mayrt.
9Agh dooyrt Tobias, Cha nee; agh lhig dou goll gys m’ayr.
10Eisht hrog Reguel er, as hug eh da Sara e ven, as leih jeh e chooid, sharvaantyn, as maase, as argid:
11As vannee eh ad, as hug eh er-sooyl ad, gra, Dy der jee niau jurnah mie diu, my chloan.
12As dooyrt eh rish e inneen, Cur uss arrym da dt’ayr as dty voir-’sy-leigh, ad ta nish dt’ayr as dty voir, dy voddym goo mie y chlashtyn jeed. As phaag eh ee. Dooyrt Edna myrgeddin rish Tobias, Dy jean y Chiarn dy niau oo y vishaghey, my vraar deyr, as dy giall eh dy vaik-ym dty cloan jeh my inneen Sara, my n’oym baase, dy voddym boggey ’ghoaill kiongoyrt rish y Chiarn: cur-my-ner, ta mish coyrt my inneen dhyts ayns dty chiarail er-lheh; shen-y-fa nagh cur drogh ghellal j’ee.
S'ha seleccionat:
Tobit 10: YNAPBR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Yn Cheshaght Ghailckagh 1979, 2017
© Manx Gaelic Society 1979, 2017