Chivkeeb 9
9
Vaajtswv Coglug rua Nau-es
1Vaajtswv foom koob moov rua Nau-es hab nwg cov tub has tas, “Mej yuav muaj tub muaj ki coob, kuas mej txhaj muaj xeebntxwv fuamvaam moog nyob puv nplajteb.#Chk 1.28 2Txhua yaam tsaj, tsi has tsaj nyeg, tsaj qus, naab, qaav, naag noog, hab tej ntseg puavleej ntshai mej. Kuv yuav muab tej tsaj ntawd tso rua mej kaav. 3Txij nuav moog kuv pub txhua yaam tsaj, noog, hab ntseg rua mej noj, ib yaam le tej zaub kws kuv tub pub rua mej noj lawm. 4Tabsis mej tsi xob noj tej nqaj kws txhaam ntshaav, rua qhov ntshaav yog yaam kws ua kuas muaj txujsa.#Lek 7.26,27; 17.10-14; 19.26; 2 Kev 12.16,23; 15.23 5Yog leejtwg tua tuabneeg, kuv yuav rau txim tuag rua tug ntawd. Yog tej tsaj tum tuabneeg tuag, kuv yuav rau txim tuag rua tej tsaj ntawd ib yaam nkaus. 6Yog leejtwg tua tuabneeg, mas lwm tug yuav muab tug ntawd tua ib yaam nkaus, rua qhov Vaajtswv tsim tuabneeg muaj tug yaam ntxwv zoo le Vaajtswv.#Tsd 20.13; Chk 1.26
7“Mej yuav muaj tubki coob, kuas mej tej xeebntxwv fuamvaam moog nyob puv lub nplajteb.”#Chk 1.28
8Vaajtswv has rua Nau-es hab nwg cov tub tas, 9“Txij nuav moog kuv coglug tseg rua koj hab koj cov xeebntxwv, 10hab txhua yaam kws muaj sa, txhua yaam noog, hab txhua yaam tsaj kws nrug mej tawm huv lub nkoj lug. 11Kuv coglug tseg rua mej has tas: kuv yuav tsi tso dlej lug nyaab txhua yaam kws muaj sa kuas puamtsuaj le zag nuav, hab dlej yuav tsi nyaab lub nplajteb kuas puamtsuaj le nuav ib zag ntxiv lawm. 12Lub cim kws kuv coglug tseg moog ibtxhis rua mej hab txhua yaam kws muaj sa, 13mas yog kuv yuav ua kuas muaj ib tug dluab zaaj sawv rua sau cov fuab. Tug dluab zaaj ntawd yog lub cim kws kuv coglug tseg nrug tuabneeg nplajteb. 14Thaus twg kuv ua kuas muaj fuab roog sau nruab ntug, ces tug dluab zaaj ntawd yuav tshwm tuaj rua sau cov fuab. 15Kuv yuav ncu ntsoov tej lug kws kuv cog tseg rua mej hab txhua yaam tsaj, mas kuv yuav tsi tso dlej lug nyaab txhua yaam kws muaj sa kuas puamtsuaj ib zag ntxiv le lawm. 16Thaus tug dluab zaaj sawv tshwm sau cov fuab, kuv pum tug dluab zaaj ntawd, kuv yuav ncu txug tej lug kws kuv tau cog tseg moog ibtxhis rua mej hab txhua yaam kws muaj sa nyob huv nplajteb nuav. 17Tug dluab zaaj nuav yog lub cim kws kuv coglug tseg rua txhua yaam kws muaj sa nyob huv nplajteb.”
Nau-es hab Nwg Cov Tub
18Nau-es cov tub kws tawm huv lub nkoj lug yog: Xees, Haas hab Yafej. (Haas yog Kana-aas txiv.) 19Nau-es peb leeg tub nuav yog txhua tsaav tuabneeg kws nyob huv nplajteb nuav cov yawmkoob.
20Nau-es yog tuabneeg ua laj ua teb, nwg yog thawj tug kws xub cog txiv maab ntaag. 21Thaus nwg haus kua txiv maab, ua rua nwg qaug heev, hab nwg ca le hle rig tsho pw labqaab huv tsevntaub. 22Thaus Haas kws yog Kana-aas txiv, pum nwg txiv pw labqaab le ntawd, nwg txawm tawm moog has qha rua nwg ob tug tijlaug. 23Ces Xees hab Yafej txhaj moog muab tau ib lub tsho ntev nthuav kag rua nrau obtug nrausqaum hab muab khuam rua sau obtug xubpwg. Obtug txhaj kwv thaub qaab moog rua huv lub tsevntaub coj moog npug obtug txiv, obtug tig ntsejmuag rua ib caag vim obtug tsi xaav pum obtug txiv labqaab le ntawd. 24Thaus Nau-es zoo cawv tsim lug nwg paub tej kws nwg tug tub ntxawg ua rua nwg, 25Nau-es txhaj has tas,
“Kana-aas raug foom
tsi zoo lawm!
Nwg yuav ua nwg ob tug
tijlaug qhev.
26Ca le ua tug TSWV kws yog
Xees tug Vaajtswv tsaug!
Kana-aas yuav ua Xees qhev
moog le.
27Thov kuas Vaajtswv ua rua Yafej#9.27 Yafej: Lub npe nuav, lub suab has le Henplais lu lug kws has tas, “vaammeej.”
caajceg fuamvaam!
Thov Vaajtswv ca Yafej
tej xeebntxwv nrug Xees
tsaav tuabneeg nyob ua ke.
Kana-aas yuav ua Yafej qhev.”
28Tom qaab dlej nyaab nplajteb taag lawm, Nau-es tseem ua neej nyob tau peb puas tsib caug xyoo ntxiv, 29hab nwg tuag rua thaus nwg noobnyoog muaj cuaj pua tsib caug xyoo.
S'ha seleccionat:
Chivkeeb 9: HNJ2000
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2000 United Bible Societies. All rights reserved.