Marc 11
11
Jésus i Jérusalem klo'n nun wlule
(Matt 21:1-11; Luc 19:28-40; Jean 12:12-19)
1Ke bé wa dyu Jérusalem bo bé dyuu Bethphagé nin Béthanie Olive Ôka'n i wun le'n, Jésus sunmeen i sonnzonfue'm bé nun nnyon, 2o sé bé ke: Anh wo klo'n bo ô amun nyrun le'n su. Ke an dyu lo tye'n, amunh wunh aflunmun gbanflen kun bo swran fi nian fu'a su lé, o minnda le. Anh nyanndyii fa bla. 3Se swran wié usa amun ke, nzu ti ye an nyanndyii'n, anh sé i ke: É Min'n i sa a mien i wun, i waan é fa ble, oh fah ble amun ékun ityra'n.
4Ke bé oli'n, bé wuun aflunmun gbanflen so'n, o minnda amuan kun nun atin nuan le, nan ba nyanndyii. 5Bé nga bé ô le'n, bé wié'm bé usaa bé ke: ?An su yô nzu? ?Nzu ti ye an nyanndyi aflunmun nion? 6Bé kaan nde nga Jésus kan kléé bé'n, ye bé yatyii bé nuon. 7Bé fa aflunmun'n kô maan Jésus, bé fa bé tannin mun sese i su, ye Jésus traan suo. 8Swran kpanngban bé sesee bé tannin mun atin'n nun, wié'm bé kusu bé bubu fié'n su nnya mun, bé guegue atin'n nun. 9Bé nga bé dun mmua i nyrun'n nin bé nga bé su i su'n bé kpan sé ke:
«Hosanna! Swran ng'o ba é Min Nyanmien i dunman nun'n, o mon o nyan nguan!»
10Nyanmien man famien ng'o ba é nannan David ôsu'n nun'n i famien'n yô yé!
Man Hosanna'n te nyanmien su lo!
11Jésus dyuu Jérusalem lo nan wa wlu Nyanmien sua dan'n nun. Ke o nianniaan lo ninngé'n kwlaa'n, b'o wuun ke alie a san'n, o nin i sonnzonfue blu-nin-nnyon'n bé oo Béthanie.
Blofue aloma'n bo Jésus bôli i sannzan'n
(Matt 21:18-19)
12Ke alie'n tyennin bo bé fin Béthanie le béh koh'n, awé kuun Jésus. 13O wuun blofue aloma bô kun mmua lo, nnya ô su. O oli ke o kô nian se oh nyanh mma wié su ô, sannge ke o wunngéé lo'n, wa wu'an liké fi sen i nnya'n, afin o nian dyu'e i sule. 14Ye o séé aloma'n ke: Nanh swran fi di o su mma kun mlonmlon! I sonnzonfue'm bé tili.
Aata difue'm bé Nyanmien sua dan'n nun fuanle
(Matt 21:12-17; Luc 19:45-48; Jean 2:13-22)
15Ke bé dyuu Jérusalem lo'n, Jésus wluu Nyanmien sua dan'n nun ékun. Kpekuun o too aata difue nin bé nga bé tô liké Nyanmien sua dan'n nun'n bé bô kanle suo. O su dyete mma katyifue'm bé table'n nin ôkunmômô ate yôfue'm bé bia'm bé bô guali. 16Wa ma'an swran fi atin ke o sua liké sin Nyanmien sua dan'n i awlô afien. 17Ke oh kléh bé liké'n, o sé bé ke: ?Ba kle'e ke: «Bé wa fle n sua'n lika bo nvlé'n kwlaa bé nin Nyanmien bé kôkô yale?» Sannge amuan fa katyi awiéfue'm bé fiawle.
18Ke Nyanmien nyrun dyranfue dandan nin mmla kléfue'm bé tili'n, bé kunndee i kunwle. Bé srôé yele ke i liké b'o klé'n bô swran'n kwlaa bé nuan.
19Ke wia'n toli'n, Jésus nin i sonnzonfue'm bé fin klo'n nin fitéli.
Blofue aloma'n b'o wuli'n i su nde
(Matt 21:20-22)
20Nglemun ke béh sinh'n, i sonnzonfue'm bé wuun aloma so'n wa wu kéé lélé a dyu i ôlui'n nun lo. 21Pierre wla kpeen sa nga Jésus yôô aloma'n su, o séé Jésus ke: Baba, nian, aloma'n bo a bôô i sannzan'n wa wu. 22Ye Jésus séé bé ke: Anh lafi Nyanmien su. 23Nanwle, swran ng'o lafi Nyanmien su'n o kwla sé ôka nga ke o tu i bô wa kô to dyénvié'n nun. Se i awlen'n ti'a nnyonnyon b'o lafi nde ng'o kannin'n su ke oh yôh'n, Nyanmien wa yô i so'n men. 24I so'n ti, nh kanh klé amun ke, liké kwlaa nga an sre'n, anh lafi su ke amuan nyen, o wa fa man amun. 25Ke an dyaô bo amunh kôkôh yale klé Nyanmien'n, se swran wié wun nde ô amun klun'n, anh yatyi tyee, nan amun Si b'o ô nyanmien su lo'n wa yatyi sa nga an yôlii'n wa tye amun. 26[Sannge se an yatyi tyemen'n, amun Si b'o ô nyanmien su lo'n su yatyi'a amun lie'n kusu tye'a amun.]
Jésus i atin b'o le'n
(Matt 21:23-27; Luc 20:1-8)
27Bé baa Jérusalem le ékun. Ke Jésus wlanwlanh Nyanmien sua dan'n nun'n, Nyanmien nyrun dyranfue dandan, nin mmla kléfue, nin kpenngben'm bé bee i wun le, 28bé usee i ke: ?Wan dunman nun ye a yô sa nga muon? ?Ye wan ye o tuu o ke a yôo? 29Jésus sé bé ke: N kusu m ma usa amun sa kun, se an te n su'n, nh kléh amun swran ng'o maan min atin bo n yô sa so'n. 30?Jean i baptême b'o yôli'n, Nyanmien ye o meen i atin annze swran ye o meen i atin ye o yôo? Anh bua n wié. 31Sannge bé sé bé wiéngu ke: Se é sé ke Nyanmien ye o meen i atin'n, oh usah é ke: ?Se o ti so'n, nzu ti ye amuan lafi'e i suo? 32Se é sé ke swran ye o meen i atin'n… Sre kun bé swran'm bé wun, afin bé kwlaa bé bu Jean Nyanmien nuan idyofue sakpa. 33I so'n ti, bé sé Jésus ke: É simen. Ye Jésus sé bé ke: N kusu, n su klé'a amun swran ng'o maan min atin bo n yô sa so'n.
S'ha seleccionat:
Marc 11: BLNT74
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Baoulé New Testament © Alliance Biblique Universelle, 1974.