Matthieu 16
16
Atre nga bé sree Jésus ke o yi'n
(Marc 8:11-13; Luc 12:54-56)
1Pharisifue (*f4*) nin Sadducéfue'm (*f5*) bé baa Jésus wun le ke bé ken nian, bé sé i ke o yi nyanmien su lo atre kun klé bé. 2Jésus sé bé ke: [Nnosua nun an sé ke, ainman lika'n o wa kpadya, afin nyanmien su'n wa blô. 3Ye nglemun an sé ke, nzué'n wa to nde, afin wia'n tuu i bô nde. An si nyanmien su lo ninngé'm bé nzolie, sannge an si'a ble'm bé nzolie.] 4Adyulisufue tete bo bé ti ke bla b'o kunnde bian i wun bô sa Nyanmien nyrun'n, bé waan bé yi atre klé bé. Bé su yi'a atre klé'a bé, san Jonas lie'n tye. I sin o yatyi bé le oli.
Pharisifue'm bé nin Sadducéfue'm bé kpaun ayré'n
(Marc 8:14-21)
5Ke i sonnzonfue'm béh koh nzué'n bué kun lo'n, bé wla fili, ba fa'a kpaun. 6Jésus sé bé ke: Anh nian amun wun kpa Pharisifue nin Sadducéfue'm bé kpaun ayré'n i lika. 7I sonnzonfue'm bé bu i akunndan bé sé bé wiéngu ke: Kpaun bo ya faman'n ti ye o sé soo. 8Ke Jésus tili'n, o sé ke: An ti swran bo amun awlen soman. ?Nzu ti ye kpaun bo amuan faman'n ti an idyoo? 9?An nian wu'en i wle ékun, ye amun wla kpe'an kpaun nnun bo swran akpi-nnun bé dili'n, nin i ônga bo an isali'n, i gbôgbô'n i nuan su. 10?Ye amun wla kpe'an kpaun nsô bo swran akpi-nnan bé dili'n, o nin i ônga bo an isee gbôgbô dandan'm bé nun'n i gbôgbô'n i nuan su? 11?Ke n kan kléé amun ke an nian amun wun Pharisifue nin Sadducéfue'm bé kpaun ayré'n i lika'n, o yô se ti ye amuan wu'en i wle ke, nanh kpaun nde ye n kan kléé amuon? 12Ye bé wuun i wle ke, nanh kpaun ayré'n i lika ye i waan bé nian bé wun nion, sannge liké nga Pharisifue nin Sadducéfue'm bé klé'n i lika ye i waan bé nian bé wun nion.
Wafa nga Pierre bu ke Jésus ti b'o kannin'n
(Marc 8:27-30; Luc 9:18-21)
13Ke Jésus dyuu Césarée Philippe asa lie'n su'n, o use i sonnzonfue'm bé ke: ?Swran'm bé waan, wan yele m bo n katyii Swran'n? 14Bé sé ke: Swran wié'm bé waan, Jean baptême yôfue'n yele wo wié'm bé waan, Élie yele wo, wié'm bé kusu bé waan, Jérémie yele wo, annze Nyanmien nuan idyofue'm bé nun kun yele wo. 15Ye o usa bé ke: ?Ye amun kusu amun waan, wan yele min? 16Simon Pierre sé ke: A ti Christ, Anannganman Nyanmien'n i Wa. 17Jésus sé i ke: Simon, Jonas wa, o lie su ti yé, afin nanh swran ye o yii sa so'n nglô kléé woo, sannge min Si b'o ô nyanmien su lo nion. 18N kusu, nh kanh klé o ke, bé fle o Pierre (bo i bô yele yebue). Yebue tanda'n su ye m ma kplan min asonun nion, ye wié'n su kwla satyimen. 19M ma fa Nyanmien siéle'n i la clé'n man o. Liké nga a kô tanniin asie'n su wa'n, bé wa tanniin nyanmien su lo, ye nga a kô men i wun atin sie'n su wa'n, bé wa men i wun atin nyanmien su lo. 20Ye o wle i sonnzonfue'm bé su nun kpa ke, nanh man bé kan klé swran fi ke o ti Christ.
Jésus i kunle bo bé wa kuin'n i su bôle
(Marc 8:31—9:1; Luc 9:22-27)
21Ke o fin tyen so'n nun'n, Jésus bôô i sonnzonfue'm bé kan kléle bô ke, san oh koh Jérusalem oh wunh nyrennen dan kpenngben, nin Nyanmien nyrun dyranfue dandan, nin mmla kléfue'm bé sa nun, nan béh kuinh, ye i lé nsan su oh tyenh. 22Pierre fe oo aamien nan wa idyoe, o sé i ke: N kpla é! Nannan, nanh man Nyanmien di su man sa nga to o su. 23Sannge Jésus kpe i nyin séé Pierre ke: Satan (*f6*), fa dyaô n wun le, a satyi n ti nun, afin wo akunndan'n ti'a Nyanmien lie, swran lieo.
24Ke o yôô so'n, o sé i sonnzonfue'm bé ke, swran nga i waan oh suh n su'n, mon o klen i wun man min, o sue i waka'n, nan o su n su. 25Afin swran ng'o klô ke oh seseh i wun'n, oh kpeh i nguan'n sin, sannge swran ng'o kpe i nguan'n sin min ti'n, oh nyenh ékun. 26?Se swran kun nyan men wunmuan'n, nan i ti i nguan'n kpe sin'n, nzu ye o yô yé men io? ?Ye nzu liké ye swran kun kwla fa tô i nguan nion? 27M bo n katyii Swran'n min nin n Si ange mun éh bah i dunman nun béh wunh ke i nyrun ti nyannyan o yô srô, ye ke swran kun i nyôlie'n ti dyu'n mh menh i nuan liké. 28Nanwle, bé nga bé ô wa ye'n, nanh bé ngba ye wié'n kunh bé, nan ba wun ke m bo n katyii Swran'n n su ba, m ma di n famien nion.
S'ha seleccionat:
Matthieu 16: BLNT74
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Baoulé New Testament © Alliance Biblique Universelle, 1974.