JOHAN 4
4
Jesuq Nai Samaria Nyung
1Phorisinok riika Johan nam ma, Jesuq raq asengi ka apa she lap wan tlo kiimaq apaiq raq nokmaiqse ma kham lamkuqtlo nguta tsütsa ka taito. 2(Riikhaqli miika, Jesuq apaiq riika ju miimin kham ka lamkuq mak dea. Asengibi riili nokmaiqse ma kham ka lamkuqto.) 3Nanok raq apaiq tingkhu na bom riichong sia rai kra tai raüta, apaiq ka Judia wang maq, Gelili wang nü niishe hali jang wan nongto. 4Apaiq ka Samaria wang lam maq wawan chang she dongkito.
5Apaiq ka Samaria wang na Saikar chela na saüto. Saikar chela ka richü pat na Jakob raq, ase Joseph ma wenkuq thütaq, wakram kra tho niili riito. 6Jakob raq apaiq pat na athu thü khappong ashi ka kriiba na asi. Jesuq ka wanhiq khumtsi raq anü rai raüta, kra khappong kii na niitiitsak anga riito. Kra akhing ka ranaiq shethung shekham bala riito.
7Kra liipan niili, Samaria nyung ashi ka kham thiikai aki kiijaq saükito. Jesuq raq apaiq jaq wa, “Ngi ma kham anyang chang kuqlaq,” nguta jaüto. 8(Kra bala, ajaqshisetiim ka chela wa phaq asea tü adung ritkai kihoto.)
9Kiijiishe Samaria nyung raq, “Ümniika Jehudi phan. Ngi ka Samaria phan. Riita, ümniiraq i jaq wa kham ka jamkho jaü tlaü?” nguta Jesuq bom ka treto. (Jehudinok phan raq Samarianok phan rai ka takshi pinshi na tro phaqsiq mak phan. Kriika tsangshiq liipan na apii, riiqkhiq.)
10Kiijiishe, “Shiikeawe raq maiqse ma jamlai kongphiq kewan ro wa, kra ümniiraq tak haü jiika, kiimaq ümjaq wa kham jaüti we ka juwa, kra ümniiraq sap haü jiika, apaiq jaq wa ümniiraq jaü haü jaq, apaiq raq ümniima rilung tsitsü kham mikuq wa”
11Kiijiishe, Jechak nyung raq waito, “Shiilangwe, ümjaq na kham khechang balting min ahü. Kiimaq ara khappong arka atsaüwiq. Kra chong tlaü rilung tsitsü kham ka ümbawo milap haü? 12Ara khappong arka, naiti tipai Jakob raq naishiq ma akuq thü. Naiti pat na, asaü asetiim nai tsangshiq nyamse ümchuwa rümtaq thun wiita raq, kham ka arwa nyangto. Ümniika naiti Jakob thaq niimin ajong ngutiika tiingo maü sham na?”
13Kiijiishe Jesuq raq treto, “Jurwa ara kham ara nyang tlaq, kriiti ma kham nyangtsi ka dong ruq li miraq. 14Shatmaq, jurwa ngi raq akuq ha kham nyang tlaq, kriiti ma kham nyang tsi ka dong mak she miraq. Ngi raq akuq ha kham ka apaiq tsan mong na, tsitsü khamphok rai se miishe mija wan. Kiimaq apaiq ma pattup pat-sa rilung she mikuq.”
15Kiijiishe jechak nyung raq treto, “Shiilang we! Ngi ma kra kham ka kuqlaq! Kra nyang ha jiika, i letsi mak she miraq. Kiimaq arwa kham thiikai armin hun nü rai mang she mirha!”
16“Walaq, ümwese ka sheawakiq. Laüta, ana jangki nongkiq,” nguta Jesuq raq apaiq ma chongkuqto.
17Kiijiishe, apaiq raq treto, “Shiilang we, ngi ka i wese ri ahü.”
Jesuq raq treto, “Ümwese ahü ngutlaü ka riikhaqli. Kriika tengto. 18Ümrilung na maiq webiingi miishe watlaü. Kiimaq ümchaü ümnaq sidam tlaü we kiimin la, riikhaqli ümwese ka riimak. Ümniiraq ngi ma chongtlaü arka tengto.”
19“Shiilang we, ümnaq ara sham- mi we khana!” nguta apaiq raq Jesuq bom ka treto. 20“Naiti naiwi Samaria phan raq, Shiikeawe ka ara kin arjaq shomnoq wan raüta sithüto. Shatmaq, namshiq Jehudinok phan ngiitiq, Shiikeawe ka nashiq raq Jerusalem niili shomnoq chang nguta chongtlan.”
21Kiijiishe, Jesuq raq apaiq ma chongto, “Maiqnyung loi! I bomchong arma kamlaq! Akhing ashi misaü wan, maiqse raq Awe Shiikeawe ka ara kin arjaq lo, Jerusalem na lo, ka shomnoq mak she miraq. 22Namshiq Samaria phan riika, riikhaqli maq juwa shomnoq tlan kriika sap man. Shatmaq, naishiq Jehudinok phan riika juwa shomnoq tiikai kriika asap hai. Ara jamkhano chongtiikang ngukla, Shiikeawe raq maiqse ka jamkho tiichhii tlaq, kra lam phan chongketi ka, naishiq Jehudinok phan lümaq chongkuqtlo. 23Shatmaq, akhing ka saüho tlo she, sha saükito she ngu i, maiqse raq Awe Shiikeawe ka Asii Wenyi ningkun maq, apaiq raq maiqse jaq wa jamkha shomnoq wa lungwii tlaq, kra phan phan riikhaqli mishomnoq wan. 24Shiikeawe ka Wenyi kiimaq tengteng. Krai mren, maiqse raq apaiq ka, apaiq Wenyi maq, apaiq raq maiqse jaq wa, jamkha shomnoq wa lungwii tlaq, kra phan phan li apaiq ka shomnoq chang.”
25Kiijiishe, Jechak nyung raq Jesuq bom ka treto, “Ngi raq asap ha, Khristo ka misaüho she. Apaiq she saüki raüla, naishiq ma phanrap she michong kuq.”
26Kiijiishe, Jesuq raq apaiq ma chongto, “Ngi ahata apaiq. Ngi ümchaü ümniirai riibom rai dam tiikang we ahata apaiq.”
27Kra liipan niili she, Jesuq jaqshisetiim ka saüto. Apaiq ka jechak nyung rai riibom rai kra chhi raüta, tsangshiq ka awang raili she riito. Shatmaq, tsangshiq phong wa jurmin jechak nyung ma, “Ümniika arjaq jamlai rit wa?” ngutiimin wailot mak dea riito. Kiimaq apaiq miimin, “Ümniika apaiq rai jawa riibom dam tlaü?” ngutiimin wailot mak riito.
28Kiijiishe jechak nyung ka akham tak kiimin kiijiili baiqthü tlii raüta, chela kiiniishe wawanto. Raüta kiijaq nokwe ma bom ka akha chongto. 29“Warong ra, liiwa rongkiq. I niikiijaq, maiqwe ashi, ngi raq i rilung na ümchuwa ahea abi klo kang thun kra wiita asap siisaq. Apaiq ka Khristo ngutlaq kiiwa riita nya?” 30Krai mren she, kra chela na siti nokwe ka Jesuq liiwa ngutiishe, apaiq phana wato.
31Kiimaq ana ajaqshisetiim raq apaiq nangnga, “Shrinketi we, dung ka phanshi ra siili jiimin phaqsiq liina!” nguta tiipaiqnea rai lam maq chongto.
32Shatmaq, apaiq raq, “Ngi raq phaq sia chang dung ka asi. Kriika namshiq raq sap man,” nguta tsangshiq bom ka treto.
33Kra tai raütiishe, “Riita, ashi ra raq apaiq ma tü adung sha kuqta nya?” nguta ajaqshisetiim liipan na bom ka riiwaito.
34Kiijiishe Jesuq raq tsangshiq ma chongto, “Ngi ma dung ka, ngi tiikaiti we wak na minshiiq tiikang kra. Apaiq raq ngi ma jaqsham akuq tlot wan tiikang ahata, ngi ma dung pin. 35Namshiq raq bom tiihap, ‘Jipi lüblai jai miika, tsamjut sia chang she miraq’ nguta ngutlan riimak sha? Shatmaq, ngi chongpha. Wakram kiina samhea tiitsang liirong liita; tsam ka aman she; tsam ka ajutcho she! 36Tsamjut ningchangti we riika, ningchang maq laptlo. Kiimaq tsam jut tlaq kriika, pattup pat-sa rilung tsam. Krai mren ajangti we nai ajutti we ka adam niishe michochi. 37‘Weshi raq ajang riiwan, weshi raq ajut riiwan,’ nguta bomchong tiihap hong wan tlaq kriika tengto. 38Ngi raq namshiq ka nanok raq min ashiiq, aje she wakram kiiwa, tsamjut kai tiiki tiikang. Kriika namshiq raq min ashiiq han ka riimak. Nanok ahinti raq ashiiq. Tsangshiq hunnii wantaq kiiwa, namshiq ma liip dongtlo.”
39Kra nyung raq, “Ngi raq i rilung na jamlai wa klo kang thun kra wiita apaiq raq asap siisaq,” nguta tsangshiq ma chongto. Kra lümaq, kra chela wa Samaria nok maiq pahea raq, Jesuq ma kamto. 40Krai mren, Samaria nok ka apaiq phana ki raüta, tsangshiq rai haithü laq nguta tiipaiqnea tiiwinto. Krai mren, Jesuq ka kiijaq ranaiq nai hai thü damto.
41Jechak nyung bom tai raüta maiq pahea raq, Jesuq ma kamwanto. Shatmaq, kra thaq niimin kaü raüta, maiq pahea riishe hali, Jesuq apaiq bomchong kra tai raüta, apaiq ma kam wanto. 42Kiimaq tsangshiq raq jechak nyung nangnga, “Naishiq raq ümchaü apaiq ma kam tiikai arka, ümniiraq naishiq ma chong laü kra jaq seng laita kamwan ka riimak she. Shatmaq, naishiq raq maiqmii mak maq chhi laitiishe, apaiq ka riikhaqli mangjong maiqse Chhiiti we dea nguta kamwan tiikai.”
Jesuq Raq Siihiip We Se Tsi Tiiheato
43Kiijaq ranaiq nai haithü jai miishe, Jesuq ka Gelili wang na hali jang wan nongto. 44Ara jamkhano chongtiikai ngukla, apaiq raq nguto, “Shiikeawe shammi ka maiqmii hiqshongti riika shreng mak,” nguta chongto. 45Apaiq ka Gelili hiq na saü wan kiita, kiiwa nokmaiqse raq Jesuq ka ahea wiq maq tao wanto. Tsangshiq raq apaiq tao wantaq kriika tsangshiq Tiichhii Wan Poi lomkai Jerusalem na kitaq kra akhing na, Jesuq raq phanrap jaqsham wantaq kra tsangshiq raq chhito. Kriikha maq, Jesuq ka Gelili na saü wan kiita, tsangshiq raq apaiq ka aheawiq maq taoto.
46Kra jai miishe, Jesuq ka Gelili wang na, Kana hiq na hali wawan nongto. Apaiq raq kongkhu ji na, kham ka spiqtai ma tiija wantaq kriika Kana hiq maq riito. Kiijaq mungrümti siihiip we ashi asi. Ase maiqwe se ka Kaparniam na atsi riito. 47Apaiq raq Jesuq ka Judia wang maq Gelili wang niishe saü wato nguta tsütsa ka tai raüta, apaiq ka Jesuq phana kito. Raüta, ase Kaparniam na atsi, tsihea kra tiihea kuq wa kiq nguta heakito. 48Jesuq raq apaiq ma nguto, “Namshiq raq awang chang jaqsham chhi man wiiwii ka, kam man phan.”
49Kiijiishe Siihiip we raq treto, “Shiilang we lei! Jaqlo wa i. I se ka tsaiki jiiq.”
50Kiijiishe, Jesuq raq treto, “Walaq. Ümse ka tsai mak, mihiaki she!”
Krai mren kriiwe raq Jesuq bom kiima kamto. Raüta, apaiq ka ahiq na wawanto. 51Apaiq ka jam na misaü wan shaq niili, ajaqshisetiim raq apaiq ka lam na humki raüta, “Ümse ka ahea she!” nguta chongkito.
52Kiijiishe, apaiq raq tsangshiq ma, ase tsi ka ümtinkhan akhing mo hea pha wantaq kra waito. Tsangshiq raq, “Ümji ranaiq, ranaiq nari shi akhing miishe atsi ka hea pha wanto,” nguta apaiq ma chongto. 53Kiijiishe awe raq atsan na tiitsangto, kra nari akhing niidea Jesuq raq apaiq ma, “Ümse ka mihiaki she,” nguta chongtaq ira nguta sapto. Krai mren she, apaiq rai ajamti tiim tarü raq Jesuq miishe kamwanto.
54Arka Jesuq raq Judia wang maq Gelili wang na wa raüta, thong nai ngoja awang chang jaqsham she riito.
S'ha seleccionat:
JOHAN 4: TANGSBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.